دكتور وسيم أشرف - اخصائي نفسي اكلينيكي

23/05/2025

عايز/ة أهرب… أهو أي جوازة والسلام!

مش بس بنات…
فيه شباب كمان بيتجوزوا هروب.
البنت من بيت كله ضغط وخنقة…
والولد من مسؤوليات بيت أو نظرة أقل من أهله أو حتى علشان يثبت لنفسه إنه “راجل”.

البنت ممكن تكون شايفة الجواز باب للهروب من تحكم، قلة حنية، أو عنف نفسي.
والولد ممكن يكون شايفه طريق للهروب من المقارنة، الضغط، أو حتى الوحدة.

والنتيجة؟
اتنين دخلوا حياة جديدة وهما أصلًا مجروحين…
مش لأنهم جاهزين، لكن لأنهم تعبانين ومش لاقيين مخرج تاني.

💔 الجواز ميتبنيش على الهروب…
لازم يكون اختيار ناضج، مبني على تفاهم وراحة وقبول، مش محاولة إنقاذ مؤقتة من حياة مش قادرين نكمل فيها.

👂 لو انت أو انتي حسيتوا إنكم بتفكروا تتجوزوا عشان “تهربوا” مش عشان “عايزين تعيشوا”،
اقفوا لحظة… اسمعوا نفسكم، واطلبوا مساعدة،
سواء من شخص موثوق أو من متخصص.

اختاروا الجواز بإرادتكم، مش بوجعكم

15/05/2025

“كل الآباء بيحبوا أولادهم!”
لا، مش كل الآباء بيحبوا أولادهم.
وفيه أولاد وأطفال عاشوا عمرهم بيدوّروا على معنى الحب… في حضن غايب، في كلمة مش بتتقال، في حضن مستنيينه ومابيجيش.

الحب الأبوي مش فرض، ومش غريزة تلقائية عند كل الناس.
فيه أب بيعرف يحب، وفيه أب محتاج يتعلّم يعني إيه يحب.
وفيه كمان أب ماينفعش يبقى أب أصلاً.

11/05/2025

يوميات شخص بيعاني من اضطراب الشخصية الحدية (BPD):

تخيل إن مشاعرك عاملة زي موج البحر، بتعلى فجأة وتهدى فجأة، بدون سبب واضح.
• الصبح: تصحى حاسس إنك فاضي من جوه، مش عارف إنت مين ولا عايز إيه.
• الظهر: رسالة صغيرة من شخص بتحبه تخليك تطير من الفرحة وتحس إنك أخيرًا محبوب.
• العصر: تأخير بسيط في الرد يخليك تحس إنك مرفوض، وتبدأ تفكر إنهم هيبعدوا عنك للأبد.
• المغرب: زعل جامد وغضب فجائي، ممكن تكسر حاجة أو تجرح نفسك عشان تهدي التوتر.
• الليل: ندم، بكاء، وخوف من الوحدة… وتبدأ تلف في دايرة من المشاعر المتقلبة تاني يوم.

مش هو شخص متقلب عن قصد، هو شخص تعبان من إحساسه بنفسه وبالناس.
هو مش درامي… هو موجوع ومش لاقي نفسه..

27/04/2025

استخدام الذكاء الاصطناعي كبديل للعلاج النفسي.. مخاطرة مش محسوبة!
في الفترة الأخيرة، كتير من الناس بدأت تعتمد على أدوات زي ChatGPT كبديل عن العلاج النفسي، سواء لطلب النصيحة أو حتى لفضفضة مشاعرهم.

ورغم إن التكنولوجيا دي قوية وممكن تساعد في بعض الجوانب، لكن:
• الذكاء الاصطناعي مش مدرب على فهم التجارب الإنسانية العميقة بكل تعقيداتها.
• مفيش قدرة حقيقية على التعاطف أو الإحساس الحقيقي بالمريض.
• مفيش تشخيص سليم ولا خطة علاجية مناسبة لحالة كل شخص.

الأخطر من كده، إن الاعتماد المفرط عليه ممكن يؤدي لتعلق نفسي خطير… المريض يحس إنه لقى حد “بيسمعه” طول الوقت، لكنه في الحقيقة بيتعامل مع آلة، مش بني آدم فاهم ومقدر مشاعره.

والفرق الجوهري كمان إن المعالج النفسي المحترف، لما بيحصل تعلق عاطفي من المريض تجاهه، بيقدر يتعامل معاه بشكل صحي،
وبيفهم أبعاد العلاقة العلاجية وبيعرف يساعد المريض يفصل المشاعر دي بطريقة آمنة تخدم رحلة علاجه، من غير ما يسببله ضرر نفسي إضافي.

العلاج النفسي الحقيقي مع معالج محترف بيقدملك:
• احتواء حقيقي لمشاعرك.
• فهم متخصص لحالتك وظروفك
• خطة علاجية مبنية على علم ودراسات موثوقة.
• علاقة علاجية صحية وآمنة تساعدك تنمو وتتعافى.

23/04/2025

المُعالج النفسي مش مُنقذ خارق.

ناس كتير بتدخل الجلسة متوقعة إن المعالج هيديهم “الحل السحري” أو يقولهم يعملوا إيه حرفيًا عشان حياتهم تتصلّح.

لكن الحقيقة إن دور المعالج مش إنه يديك الحل…
دوره إنه يمشي معاك في الطريق وانت اللي تكتشف الحل جواك.

المُعالج بيساعدك:
• تفهم مشاعرك وتفكر فيها من زوايا مختلفة
• تسمع صوتك الداخلي من غير تشويش
• تلاحظ أنماط التفكير والسلوك اللي بتكرّرها
• وتقرر بإيدك، بإرادتك، التغييرات اللي عايز تعملها

العلاج النفسي رحلة، مش وصفة جاهزة.
والمعالج مش قائد… هو مرافق واعي، شايفك، وبيحترم خطوتك مهما كانت بطيئة

22/04/2025

خلينا نتفق:
الاضطراب يفسّر السلوك، مش يبرّره.

يعني آه، ممكن يكون الشخص مش بيقصد يضايقك، أو عنده صعوبة في التواصل، أو بيفهم الدنيا بشكل مختلف.
بس ده مش معناه إنك تسيب حقك، أو تستحمل حاجات بتتعبك.

نفهم؟ آه.
نبرر؟ لأ.
نحط حدود؟ طبعًا

14/04/2025

“بص على ابن خالتك.. شوف صاحبك شاطر إزاي!”

جملة بنقولها من غير ما نحس، لكن بتسيب جرح جوه الطفل، ممكن يفضل معاه سنين.

المقارنة بتسرق من الطفل إحساسه بالقيمة، وتزرع جواه شعور إنه دايمًا “ناقص”.
بدل ما يتحفز، بيبدأ يشك في نفسه، ويصدق إنه مش كفاية.

الأطفال مش نسخ من بعض.
كل طفل ليه قدراته، سرعته، اهتماماته، وطريقته في التعبير عن نفسه.
لما ندي له الأمان إنه محبوب من غير شروط، بيكبر وهو واثق، مش خايف من الفشل أو نظرة الناس.

خليك دايمًا مصدر دعم، مش ضغط.
قارن طفلك بنفسه… وشجّعه يطوّر من نفسه، مش ينافس حد تاني.

09/04/2025

فيه لام شمسية…

وأنا بتفرج على مشاهد الجلسات اللي عملها الدكتور في المسلسل، لفت نظري حاجة مهمة…

لفت نظري مدى تعاطف الدكتور مع المشكلة، وإزاي المسلسل كان صادق جدًا في إنه يوصل صورة المعالج النفسي إنه في الأول وفي الآخر: إنسان.

إنسان بيسمع، بيتأثر، بيشعر، وبيمنح كل شخص قدامه مساحة آمنة يقدر يعبر فيها عن خوفه، وجعه، ضعفه، وكل اللي نفسه يقوله بدون حُكم.

المعالج مش شخص بيلبس قناع طول الوقت زي ما بعض الناس متخيلة…
ولا بيقعد يسمع وخلاص بدون ما يتأثر!

⸻

وده بالظبط اللي بيأكده كارل روجرز في كتابه الشهير:
“أن تصير إنسانًا” (On Becoming a Person)

كارل روجرز بيأكد إن العلاقة العلاجية بين المعالج والعميل هي أهم من أي خطة علاج مكتوبة.

العلاقة دي فيها:
• أمان
• صدق
• تعاطف
• حضور حقيقي من الطرفين

وبيشجع المعالج دايمًا يكون حقيقي بإنسانيته ومشاعره… من غير ما يلبس “قناع المعالج المثالي” طول الوقت.

⸻

أوقات كتير…
مجرد إن العميل يحس إن اللي قدامه بيشعر بيه فعلًا… ده لوحده بيكون علاج!

الإحساس ده بيكسر حواجز جوا نفس أي شخص…
وبيفتح باب جديد للخروج من سجنه الداخلي…

⸻

بجد المسلسل ده مش بس سلط الضوء على مشكلة كبيرة بنشوفها يوميًا كمعالجين نفسيين…

لكنه كمان نور نقطة مهمة جدًا:

المعالج مش روبوت
المعالج إنسان… بيحس بيك… وبيعيش معاك كل تفصيلة…
وبيساعدك من قلبه علشان توصّل لبر الأمان.

06/04/2025

كتير بنسمع جملة: “الصدمات بتقوي”
والحقيقة؟ مش دايمًا!

الصدمات لو متعاملناش معاها صح، ممكن تكسر أكتر ما تبني…
الموضوع مش في إننا نتجاهل اللي وجعنا ونمشي كأن مفيش حاجة حصلت،
الموضوع كله في إزاي بنتعامل مع الصدمة دي.

القوة مش في الهروب ولا في التظاهر إن كل حاجة تمام…
القوة الحقيقية في المواجهة، في الفهم، في التعافي.

واللي قاله الدكتور في المشهد ده يختصر كل الكلام:
“مش الصدمات اللي بتقوي… اللي بيقوى هو اللي بيعرف يتعافى منها.”

خد وقتك… افهم وجعك… واطلب مساعدة لو محتاج.
مفيش قوة حقيقية بتيجي من التجاهل… لكن بتيجي لما نواجه ونتعافى

27/03/2025

نصيحه لأي حد اتعرض لصدمات طفوله وبالتحديد للتحرش : كفايه فرجة علي لام شمسيه..

27/03/2025

وممكن تتكتب باختصار فى سطر:
لأن أبوه بقى (أب): يسمع.. يهتم.. يحمي..

ليه يوسف اتكلم وحكى مع أبوه دلوقت؟ وماكنش بيتكلم ولا يحكي فى الأول؟
ممكن الإجابة تتكتب فى كتاب كامل.. وممكن تتكتب باختصار فى سطر:
لأن أبوه بقى (أب): يسمع.. يهتم.. يحمي..

23/03/2025

هل في حاجة اسمها مشاعر صح ومشاعر غلط؟ 🤔

كتير من الناس بتتربى على فكرة إن في مشاعر “صح” لازم نحس بيها، ومشاعر “غلط” لازم نقاومها أو نخبيها. لكن الحقيقة إن كل المشاعر طبيعية ومشروعة، والمهم هو إزاي بنتعامل معاها.

🔹 الخوف مش غلط، هو مجرد إنذار بيقولك خد بالك.
🔹 الغضب مش غلط، هو إشارة إن في حاجة مضايقاك ومحتاجة تتحل.
🔹 الحزن مش غلط، هو طريقة جسمك يعبر بيها عن الخسارة أو الألم.
🔹 الفرح مش بس مشاعر صح، لكنه مش لازم يكون موجود طول الوقت.

❌ اللي ممكن يكون غلط هو الطريقة اللي بنتصرف بيها مع المشاعر دي:
• الغضب لو تحول لعنف.
• الحزن لو دخلنا في عزلة مستمرة.
• الخوف لو منعنا من المحاولة.

✅ بدلاً من إنكار المشاعر أو كبتها، الأصح هو نفهمها ونتعامل معاها بطريقة صحية. لأن المشاعر زي البوصلة، بتساعدنا نفهم نفسنا أكتر ونقرر إزاي نتصرف.

إنت مش غلطان عشان حاسس بمشاعر معينة.. لكن مهم تتعلم توظفها في الاتجاه الصح! 💡