خواطر دكتورة تغذية د/ هند حسين

17/07/2025

💪الشغل يعني سعي علي الرزق….يعني أمل بيتجدد كل يوم انك تقدر تفيد او تساعد حد باللي ربنا ادهولك بفضله من علمه الواسع 🙏يعني صعوبات و تحديات بتواجهك يوميا من ساعه ما تخرج من بيتك لحد ما ترجع تاني مش شايف ادامك من كتر التعب …. بس الأهم من كده إن الشغل يعني يقين و إيمان بقول الحق سبحانه و تعالي "إِنَّ الَّذِينَ آمَنُوا وَعَمِلُوا الصَّالِحَاتِ إِنَّا لَا نُضِيعُ أَجْرَ مَنْ أَحْسَنَ عَمَلًا". يارب اجعل عملنا عمل صالح و ارزقنا القوة و الصبر عليه 🤲صباحكم خير و بركة 🤲صباح العمل و الأمل💪💚

15/07/2025

اوعوا تكونوا فاكرين ان تخصص التغذية العلاجية دوره بس علاج السمنة ( و إن كان ده طبعا مهم جدا ) ،،التغذيه العلاجية تخصص بيساعد في علاج امراض كتير او علي الأقل تخفيف أعراضها🙂و من اهم الامراض اللي الأكل الصح فيها بيفرق جدا مع المريض … الالتهابات المناعية للجهاز الهضمي
تعالوا نشوف الڤيديو ده اللي شرفت فيه بلقاء د/ اسامه البحر ، استشاري امراض الكبد و الجهاز الهضمي 👇👇

13/07/2025

صباح الخير و البركه 🌞 اللي عايز يفطر كل يوم الصبح فطار المصريين الشهير ، الفول المدمس اللذيذ 😋و في نفس الوقت يحافظ علي صحته ، البوست ده ليه 👇👇
مفيش شك ان طبق الفول بتاع الصبح لا يعلي عليه ، بيشبع و يبسط و مليان فوايد 💪بس عايز تتمتع بيه كل يوم بدون ما تعرض صحتك للخطر خد بالك من اللي جاي ده😍
👈 الفول اللي حيتاكل معاه سطر عيش كل يوم ، غالبا ما حيزود وزنك و يصيبك بالسمنه و مشاكلها 😰😰خاصةً لو مش بتعمل مجهود بدني يطلع كم الطاقة و السعرات اللي اخدته من العيش😨
👈 طبق الفول الغرقان في الزيت ممكن جدا يبهدل لك القولون😱 و يسبب لك مغص و آلام رهيبة ( خصوصا لو عندك قولون عصبي او التهابات في القولون )
👈 الفول بتاع المحلات اللي اتحط له وهو بيستوي رز او عيش ( في محلات فعلا بتعمل كده🫣) يعني نشويات وده مش حلو لمريض السكر لإن حمله الجليسيمي عالي .

طيب نعمل ايه عشان الفول حبيب الملايين بفضل حبيبنا بدون اي مشاكل لا قدر الله 🤔

👈 لو عايز تاكل فول كل يوم الافضل تدمسه في البيت ( في بوست علي الصفحة كان بيتكلم عن تدميس الفول في البيت ممكن ترجع له لو عايز ، عشان تقتنع)
👈 ما تفتحش في اكل العيش معاه ، حدد لنفسك كميه معقوله من العيش ما تزودش عنها ، و يا سلام اذا اكلت معاه عيش معمول بالرده بدل العيش الأبيض حيشبعك كويس جدا .
👈 حط التوابل اللي انت بتحبها عشان تديلك طعم حلو من غير ما تغرقه بالزيت 🫣و كفايه رشت زيتون ولا رشه زيت حار حلوه و خفيفه.
👈 يا سلام كمان لو تعمله فول اسكندراني ( الاسكندرانية اللي زييي 😊😊 عارفينه كويس ) فول و عليه بصل 🧅 و بقدونس حاجة كده آخر طعامه تفتح النفس و تشبع لوقت طويل .
و بكده ناكل الفول و احنا مطمنين و شبعانين 😍😍

06/07/2025

طول عمري بشوف ان تغذية مرضي المستشفي مش بس علم …
هي الحقيقه علم و فن ، فلما نتعامل مع مرضي الاورام الخبيثة ضروري نراعي ان لو مش الورم نفسه بيأثر علي اكل و شرب المريض … فالعلاج سواء علاج كيماوي او اشعاعي او مناعي ممكن يسبب اعرض جانبيه تأثر بشكل سلبي جدا علي اكله… فتلاقي معظم المرضي ، نتيجة العلاج بيعانوا من فقدان شهية او تغيير في احساسهم بطعم الأكل او احساس بالغثيان بمجرد رؤية الأكل😰 او اضطراب في حركة الجهاز الهضمي يسبب إسهال أو إمساك …. و غيرها من الاعراض اللي ممكن تسبب للمريض حاله شديده من الهزال و الضعف و سوء التغذية او ما يعرف بال cancer
cachexia …
عشان كده تغذية مرضي الأورام الخبيثة امر بيحتاج وعي متكامل بالحالة من تاريخها الطبي ، للعلاج الحالي و اثاره الجانبيه ، و كمان دقه في اختيار اسلوب التغذيه الانسب للمريض سواء بالفم او تغذيه أنبوبية في الجهاز الهضمي مباشرةً او تغذية وريدية… التغذية الإكلينيكية تخصص في غاية الاهمية لمرضي المستشفيات.
🤲اللهم علمنا ما ينفعنا و انفعنا بما علمتنا و ارزقنا علما و عملا يقربنا إليك🤲🤲

05/07/2025

بتقلّي بنفس الزيت أكتر من مرة🤔🤔خدي بالك… انتي ممكن تكوني فعلا بتوفري بس في نفس الوقت انتي اكيد بتعرضي صحتك لخطر حقيقي🫣

👇 تعالي نشوف سوا ليه لازم تبطلي العادة دي فورًا 👇👇
🍟 دراسات كتير قالت ان غلي الزيت اكتر من مره بيكون فيه مواد مسرطنه اسمها Aldehydes و علي المدي البعيد ، المواد دي مرتبطه بزياده احتمال الاصابه بانواع من السرطان زي سرطان الثدي و القولون ( حفظنا الله جميعا🤲)
💣 وكمان رفع درجة حرارة الزيت ، بينتج عنه مواد يتسبب تهيج في الجهاز الهضمي ، و ده بيعمل انتفاخات و آلام و ممكن الامر يوصل ل التهابات شديده في الجهاز الهضمي 😨😨
🥴 مش بس كده ، المواد اللي اتكونت مع غلي الزيت ، بتقلل المناعه علي المدي البعيد، و خاصه عند الناس اللي اصلا مناعتها ضعيفة.

💔 الزيت اللي اتغلي اكتر من مره ، مليان بالدهون المتحولة (Trans Fats) و الدهون المتأكسده، و للاسف بتزيد
مع كل غلوه، ودي أخطر أنواع الدهون! بترفع الكوليسترول الضار LDL وتقلل المفيد HDL، وده بيسبب انسداد الشرايين و بالتالي بيرفع خطر الجلطات وأمراض القلب.
🔴و حقولك علي علامات اذا لقيتها لازم تتخلصي من الزيت ، علامات معناها ان الزيت ده اصبح خطر 👇
⚠️ لونه الزيت بقي غامق
⚠️ قوامه أصبح تقيل
⚠️ ريحته سيئه
⚠️ بيطلع دخان كتير اما يتسخن
⚠️ في شوائب بتطفو علي سطحه او رغوه

لو لقيتي اي علامه من العلامات دي اعرف ان الزيت ده مش صالح للاستخدام تاني .
💚 كلام من دكتورة تغذية قلبها على صحتك:
التوفير الحقيقي مش في تكرار استخدام الزيت… لأن اللي حتوفريه ممكن لا قدر الله تصريفه علي علاج مشاكل صحية كتييييير سببها غلي الزيت اكتر من مره .

24/06/2025

☀️ و بما إننا داخلين علي الصيف و حر الصيف... فعايزه افكركم و افكر نفسي معاكم ان الجسم محتاج مشروبات تبرد و تنعش و تحميه من الجفاف 🫣و طبعا المايه هي المشروب الاول و الافضل دايما لكن غير المايه في مشروبات طبيعيه كتييييير مفيده جدا جدًا ، عشان كده جهزتلكم شويه بوستات هنتكلم عن مشروبات صيفية 🍹 مليانة فوايد صحية 😍مثبتة علميًا.

تعالوا مع كل كوبايه نكتشف إزاي ممكن نرطب الجسم و نحافظ عليه من الجفاف و كمان ناخد اكبر قدر ممكن من المكاسب الصحية 🌿💧
و اول كوبايه حنبدأ بيها هي كوبايه عصير اللمون، اصله رخيص و ابن حلال و علي اد إيدينا
🍋 و حقولكم علي اهم ٣ أسباب تخليك تشرب عصير ليمون كل يوم! 💪٣ فوايد مثبته علميا

🍋عصير اللمون ممكن يساعد جدا في تقليل ضغط الدم ، فالابحاث بتقول ان في اللمون مركبات نباتية اسمها الفلافونويدز Flavonoids ممكن تساعد في تقليل الضغط و بالتحديد ضغط الدم الانقباضي ( الرقم الاولاني، اللي بيعبر عن ضغط الدم في الشرايين لحظه انقباض القلب ) ، و في دراسه اتعملت سنه ٢٠١٤ و وجدت ان السيدات اللي بتمشي بانتظام و بتشرب عصير لمون يوميا ضغط الدم عندهم اقل من السيدات اللي مش بتعمل كده ، ودراسات كتير اكدت ان تأثير الفلافونويدز اللي في اللمون بتساعد النشاط البدني زي المشي في تخفيض الضغط ، مش بس كده اللمون في ٣ مواد بتقلل الكوليسترول ( الليمونين- الهيسبردين و الدايوزمين) و عشان كده او عندك كوليسترول او ضغط عالي او الاثنين بوصيك تتمشي و تشرب عصير لمون يوميا ، ده ممكن يساعدك جدا في تنظيم ضغطك، و علي فكره الدراسات قالت الفلافونويدز دي بتقلل احتمال الاصابه بالسكتات الدماغية عند السيدات ( و السكتات الدماغية دي بتحصل نتيجة نقص او توقف الدم عن المرور للمخ)

🍋🍋كمان بيساعد جدا في منع الإصابة بأنيميا نقص الحديد ( يعني نقص عدد كرات الدم الحمرا بسبب نقص الحديد و ده اكتر انواع الانيميا انتشارا) ، لانه بيساعد علي امتصاص الحديد من الأكل اللي جاي من مصدر نباتي زي الفول و العدس و الزبيب و السبانخ و غيرهم ، وده عشان فيه فيتامين سي و حمض السيتريك Citric acid ، فلو عايزين نحمي نفسنا من الانيميا نحط اللمون او عصيره مع الاكل اللي فيه حديد .

🍋🍋🍋 و الفايدة الجايه دي لمرضي حصوات الكلي ، عصير اللمون فيه حمض الستريك اللي بيمنع الاصابه بحصوات الكلي لأنه بيزود درجة القاعدية و كمان حجم البول فبالتالي بيقلل تركيز الاملاح فيه ، و اذا شربت كوبايه صغيره ( حوالي ١٢٠ مل ) من عصير اللمون كل يوم حتديلك كميه كافيه من حمض الستريك لمنع تكوين الحصوات .ب

جرب في الصيف تشرب عصير لمون باستمرار ، حتنتعش و ترطب جسمك و تستفيد
🍋💛
صباح الرزق و التساهيل و يومنا جميل إن شاء الله

19/06/2025

البوست ده للامهات📣📣
🎓 فطار سريع وصحي قبل امتحان الثانوية العامة ! 🥣✨

الكلام انهارده لأمهات طلبه و طالبات الثانويه العامه ، ربنا يبارك في تعبكم و مجهودكم اللي بذلتوه الفتره اللي فاتت و يفرح قلوبكم ❤️❤️عارفه ان الولاد و البنات الصبح ، وقتهم ضيق، و اعصابهم و اعصابكم مشدودة و مش مستحمله كلام و لا مناهده في الأكل ، و عارفه انكم في نفس الوقت عايزينهم يفطروا قبل الامتحان.
👈عشان كده جبتلكم 7 أفكار سريعة وسهلة الفطار ، تدي طاقة وتساعد علي التركيز و تمنع الاحساس بالهبوط اثناء الامتحان:

1️⃣ توست مع زبدة فول سوداني مع موز 🍌
البروتين اللي في زبدة الفول السوداني والسكريات الطبيعية من الموز، طاقة مركزة ومتوازنة.

2️⃣ و ممكن كمان زبادي مع عسل نحل وقطع مكسرات خفيفة 🍯🌰
الزبادي بيساعد على الهضم والعسل بيدي الطاقة، والمكسرات بتدعم التركيز بالدهون الصحية اللي فيها.

3️⃣ عيش بلدي + جبنة + خيار 🥒 او طماطم 🍅
العيش البلدي بيساعد على الهضم و مصدر طاقه ، والجبنة مصدر بروتين ، والخيار و الطماطم بترطب الجسم.

4️⃣ بيض مسلوق + و عيش بلدي + طماطم 🍅🥚
البيض غني بالبروتين و الفيتامينات اللي بتقوي الذاكرة، والطماطم فيها مضادات أكسدة مهمة.

5️⃣ اي صنف فاكهة عندك مع لبن وملعقة عسل 🍓🍌🥤
العصير ساهل و سريع الهضم و الامتصاص ، و بيدي فيتامينات وسكر طبيعي.

6️⃣ كورن فليكس مع لبن + شوية فواكه مجففة زبيب مثلا 🍇🥛
الكورن فليكس مصدر للطاقة من الكربوهيدرات اللي فيه ، والفواكه المجففة رائعة في الفيتامينات والمعادن.

7️⃣ عيش بلدي مع فول بالليمون و الزيت الخفيف 🍞🍅
فطارنا التقليدي الصحي جدا ، الفول غني بالبروتين والألياف اللي بتشبع جدا و العيش البلدي مصدر صحي للطاقة.

💡 نصيحة من دكتورة تغذية لو ابنك او بنتك مش متعودين يفطروا الا متأخر ، مفيش مشكله انك تأجلي الفطار لبعد الامتحان و بلاش ايام الامتحانات تضغطي عليهم بحاجة هما مش متعودين عليها ، ده ممكن يسبب ارتباك في الجهاز الهضمي مع توتر الامتحان ، لكن لو كانوا متعودين علي الفطار الصبح قبل ما يبدأوا يومهم ، ما ينفعش نسيبهم ايام الامتحان ينزلوا من غير فطار ، لأن ده حسيبب لهم احساس بالصداع و عدم القدرة علي التركيز اثناء الامتحان🫣
ربنا يفرحكم بيهم و يطمنكم عليهم 🙌💪

06/06/2025

29/05/2025

صباح الخير و البركة ☘️و احنا بنكمل كلامنا عن الفيبروميالچيا ، فأحب اقول لكل بطله بتحارب الفيبروميالچيا ، إن الخضار والفاكهة سلاحك الطبيعي ضد الفيبروميالجيا! 🌿🍓
عشان تقللي من التعب المزمن، و الأوجاع المنتشرة في جسمك.
و بما ان من اهم اسباب الاعراض دي ، الالتهابات المزمنة الناتجة عن تراكم الجذور الحره المعروفه بال Free Radicals – و دي نفايات بتنتج بشكل طبيعي في الجسم من التمثيل الغذائي أو التوتر، و لما بتزيد، بتسبب ضرر في الخلايا وبتزود الألم والإجهاد.

🎯 فهنا اختيارك للأكل بوعي ممكن يفرق معاكي كتير .

الخضار والفاكهة بألوانها المختلفة مش بس شكل و طعم حلو، دول:
✅ مصدر ممتاز لمضادات الأكسدة
و كنز من مركبات نباتية اسمها (Phytochemicals)
✅ و كمان كبسوله طبيعيه من ال فيتامينات و المعادن
✅ فيها ألياف بتدعم صحة الأمعاء والمناعة.

و عشان ال ٣ حاجات دول الخضار و الفاكهة بتحارب معاكي الجذور الحره اللي قلتلك عليها و بالتالي بتقلل الالتهابات و بتساعدك جدا في تقليل الأعراض .
💡 طيب محتاجه اد ايه من الخضار و الفاكهة عشان تساعدك ؟

التوصيات العلمية بتقولك خدي كل يوم ٨ – ٩ حصص من الخضار والفاكهة .

و احب اقولك ان ده أسهل مما تتخيلي !
بس تعالي الاول نفهم مع بعض
👇 يعني إيه “حصة”؟

🥗 الحصة الواحدة من الخضار و الفاكهة =

☘️واحده فاكهة متوسطة (زي مثلا واحده جوافة او كيوي او تفاحة 🍏 أو واحده خوخ او برتقالة 🍊)
☘️او 🍉 من البطيخ:
كوبايه من مكعبات البطيخ او نقدر نقول شريحة مثلثه متوسطة الحجم ومن🍈 الكنتالوب / الشمام: كوبايه مكعبات أو نص واحده صغيرة يعني تقريبا 4–5 قطع متوسطة

🍓 ومن الفراولة حوالي كوبايه من حبات الفراولة الكاملة
يعني تقريبًا 7 إلى 10 حبات متوسطة الحجم
🫐 ومن التوت ¾ كوب إلى 1 كوب نقدر نقول حفنة صغيرة مليانة (handful)

☘️ او نص كوب عصير طبيعي 100% (بدون سكر مضاف و خدي بالك عصير طبيعي مش عصير علب)
☘️او كوبايه خضار ورقي (جرجير، خس، سبانخ)
☘️او نص كوباية خضار مطبوخ (كوسة، فاصوليا ، بروكلي، بامية….)
كل المطلوب منك انك تركزي و تاخدي من كل الاصناف اللي قلتلك عليها دي ٨ ل ٩ حصص علي مدار اليوم.
و خدي بالك كل ما نوعتي في الاصناف كل ما كان افيد .
👩‍⚕️ و خديها نصيحة مني كدكتوره تغذية
مافيش مكمل غذائي تاخديه فيعوضك عن طبق الخضار او الفاكهة الطبيعي اللي ربنا خالقه .جسمك محتاج دعم طبيعي، وده يبدأ من اكلك !

#فيبروميالجيا

25/05/2025

لو تشخيصك إنك مصابه بال "فيبروميالجيا" كان بالنسبة لك حكم بالاعدام علي راحتك و خلاكي تعتقدي انك حتعيشي طول الوقت في تعب وألم...
فاسمحي لي أقولك: فيه أمل 🌹وفيه حاجات كتير نقدر نعملها – من اهمها انك تختاري الأكل المناسب لحالتك و ده ممكن يساعدك جدا في تخفيف الاعراض اللي طول الوقت تعباكي و مزعلاكي🥲🥲
و عشان كده النهارده هنتكلم عن الأصناف اللي بينصح ان مريضه "الفيبروميالجيا " تقللها منها اد ما تقدر 👇👇👇

1️⃣الأطعمة المعالجة والمعلبة
🥫زي اللانشون، النودلز الجاهزة، والشوربة البودرة الجاهزه ، و الاصناف المتحليه بالسكر الدايت ،لأنها بتحتوي اضافات ، و الاضافات دي بتزود الاعراض للأسف 🥲🥲، زي محسن الطعم جلوتامات احادي الصوديوم او MSG ( المعروف بإسم الملح الصيني) و السكر الدايت اللي فيه (الاسبرتام ) ، في بحث اتعمل سنه ٢٠١٢، وجد ان الاشخاص المصابين بالفيبروميالچيا و التهابات القولون العصبي ، لما بطلوا الأصناف اللي فيها ماده MSG و السكر الدايت اللي فيه الاسبرتام ، قلت عندهم الاعراض بنسبة ، عارفين قلت اد ايه 🤔🤔 قلت بنسبه ٣٠٪؜ ، و دي نسبه كويسة جدا عل فكره ، و المفاجأة كانت انهم اما رجعوا تاني للمادتين دول رجعت لهم الاعراض تاني 🥲

2️⃣خدي بالك لما تيجي تاخدي اللبن 🥛، بلاش اللبن كامل الدسم ، و الحاجات المعمولة منه ، دهون اللبن دهون مشبعة بتعلي الالتهابات جدا ، خليكي مع اللبن خالي الدسم ، و لو تقدري علي لبن الصويا فهو اختيار ممتاز ، و ركزي مع الجبنة القريش و الجبنه البيضاء قليله الدسم و قللي من الجبنه الشيدر و الرومي ، و نفس الفكره في اللحوم الحمرا🥩🥩، اختاري اللحمه اللي مفيهاش دهون ، و الافضل من اللحمة الحمرا بالنسبه لك ، الفراخ و الارانب و الديك الرومي و السمك اللي مش مقلي.
للحديث بقيه ان شاء الله 🌷

🤔🤔فاكرة آخر مرة جسمك ارتاح فيها كانت امتي ؟
ممكن توصلي للراحة دي تاني... بس البداية من اكلك و شربك
استعيني بالله و خدي بالاسباب و ان شاء الله كل خطوة صغيرة حتفرق معاكي فرق كبير 🙏🙏

و افتكري دايما ان كل ما كانت خطه اكلك و شربك مبنيه على تحاليلك وظروفك انتي كل ما حتلاقي نتيجه بإذن الله .
ربنا يعفو عنك و عن كل مريض 🙏🙏🌹.

08/04/2025

للبدايات جمالها 🌹و خاصه البدايات اللي بتيجي بعد مواسم الطاعات …. بدايه الشغل بعد رمضان و عيد الفطر ، ليها متعه و طعم تاني …. وكأن رمضان بييجي يشحن روحك بطاقة إجابيه كنت فعلا محتاج لها 💪 طاقه تخليك تطلع احسن ما عندك💪و بعد ما فصلنا شويه عشان ال ١٠ الاواخر من رمضان 🌙و اسبوع العيد و كحكه 🎉🎈🎉
ياللا نرجع تاني نعرف مع بعض علي الصفحة معلومات تفيدنا عن أكلنا وعلاقته بصحتنا و دوره الكبير في حياتنا…. و دايما متابعتكم و اسئلتكم فضل من ربنا عليه و مسئولية كبيرة بتشرفني و بتسعدني 🌹
دمتم اصحاء
د/ هند حسين

22/03/2025

إلا هو إحنا ليه ساعات بعد الفطار بنحس إننا همدانين و مهبطين 🤔🤔تعالوا نعرف 👇👇