06/09/2024
معلومة جديدة في منهج .
الكل بيسأل عنها.
وهي وحدة قياس الكتل الذرية u
هي إيه أو بترمز لأيه ؟
وحدة قياس الكتل الذرية ( u ) هي إختصار ل كتلة مكونات الذره atomic mass unit
اختصارها u أو amu
وهي قياسا بتساوي كتلة بروتون واحد او نيترون واحد .
وهي تساوي 1\12 من كتلة ذرة الكربون-12.
وتساوي : u = 1.660538921×10−27 kg
طب في الجدول اللى قدامنا ده من كتاب المدرسة , يعني ايه
p =1u
و n =1 u
و e =1/1836 u
يعني ببساطة كتلة البروتون او كتلة النيترون قد كتلة الالكترون ب 1836 مرة
يعني زي الصورة الثانية كده محتاج قصاد كل بروتون واحد او نيترون واحد في كفة الميزان اني احط 1836 الكترون في الكفة التانية علشان يحصل توازن ..
وده اللى بيفسر ليه بنقول كتلة الالكترون صغيرة جدا ومهمله مقارنة بالبروتون او النيترون.
وكمان ده بيفسر ليه العدد الكتلي بيساوي مجموع اعداد البروتونات والنيترونات فقط ..وليه بتتركز كتلة الذرة في النواة حيث تتواجد البروتونات والنيترونات في النواة .
وبعد مافهمنا ده ..نقدر نجاوب على اكتر من سؤال علل في النقطة دي واللى كل الطلاب مابيحبوش اسئلة علل أو بما تفسر..لكن لما تفهمها هاتجاوب بثقة وفهم أكبر.
س - علل أو بما تفسر . تتركز كتلة الذرة في النواة ؟
ج- لضألة كتلة الالكترونات اذا ما قورنت بكتلة البروتونات والنيترونات داخل النواة
-----------------------------
ملحوظة :
مش مطلوب من طالب أولى إعدادي كل ده عن المعلومة دي..
المطلوب فقط إنه يعرف
١- إن u وحدة قياس الكتلة الذرية الصغيرة وهي وحدة زي الجرام والكيلو جرام ولكن للكتل الضئيلة جدا .
٢- إن كتلة الالكترون ضئيلة جدا لو قارنها بكتلة البروتون او النيوترون .
٣- إن كتلة الذرة بتتركز في النواة لوجود البروتونات والنيوترونات بها.
