05/05/2023
السكتة الدماغية (جلطة او نزيف المخ) ..
حسب تقديرات منظمة الصحة العالمية هي السبب الاول للإعاقة في الكبار والبالغين.
العوامل التي تزيد من خطر الاصابة بالسكته الدماغية هي :
كبر السن.. الضغط العالي .. ارتفاع نسبة الكوليسترول.. السمنة وكثرة تناول الاطعمة غير الصحية .. التدخين.. السكر.. امراض القلب .
الاعراض بتظهر بشكل مفاجئ :
و بتكون على شكل ضعف عام وتنميل.. صعوبة في الحركة.. ضعف التركيز.. وتغير في درجة الوعي .. صعوبة في الكلام.. صداع عنيف ومشاكل في الرؤية
وبنكرر تاني بتظهر بشكل مفاجئ
اتصرف ازاي لو شكيت في حالة سكتة دماغية:
في اختصار عالمي وهو FAST ... كل حرف هو عبارة عن طلب بنطلبه من المريض فنتأكد اذا كانت سكته دماغية او لأ :
1) F ➡ Face (الوجه) :
ممكن تظهر أسنانك؟
الهدف هو اني اشوف لو في اي اعوجاج في الفم.... وهل نصف الوجه اليمين زي الشمال
2) A ➡ Arm ( الذراعين ) :
من فضلك ارفع ايدك؟
المصاب بالسكته الدماغية مش هيعرف يرفع دراع من الاثنين ..وان رفع دراعه ممكن يسقط منه.
3) S ➡ Speech (الكلام) :
ممكن تقولي اسمك بالكامل :
بنشوف لو بيقطع في الكلام او مش بيكمل الجملة على بعضها او بيتوه منك ومش عارف يجاوب
4) T ➡ Time (الوقت) :
بمجرد ما سألنا ال 3 اسئلة ولقينا واحد فيهم مش مظبوط فوراً ننقل المصاب على المستشفى لان عنصر الوقت مهم جداً عشان ننقذ المريض من موت محقق.
احفظ ال 3 اسئلة وعلمهم لغيرك وكل اللي تعرفهم...
