14/04/2026
في حاجات بنقولها لمريض الاكتئاب من غير ما نحس إننا بنأذيه:
١. "اتقي الله وهتتحسن."
مريض الاكتئاب بيتقي الله —وبرضو دماغه مش بيفرز الهرمونات الصح.
الإيمان مش بيلغي المرض — زي ما الإيمان مش بيلغي السكر أو الضغط.
٢. "فكر بإيجابية."
ده مش قرار — دى لخبطة فى كيميا المخ
لو كان بالتفكير — مكنش محتاج دكتور.
٣. "إنت بتعمل كده في نفسك."
مريض الاكتئاب مختارش إنه يكون كده.
ولو كان في إيده — كان غيّر نفسه من زمان.
٤. "الدواء هيعودك عليه."
الدواء النفسي مش مخدر —هو بيعوض نقص في كيمياء المخ.
زي ما مريض الضغط "بيتعود" على دواء الضغط.
٥. "روح اتمشى وهتتحسن."
التمشيه كويسه — بس مش علاج.
زي ما تقول لواحد رجله مكسوره "اجري وهتتحسن."
٦. "ربنا ابتلاك عشان يرفع درجاتك."
ده كلام صح —بس مش وقته مخه أصلا مش هيدرك الحكمه من كده.
٧. "معقول حبة برشام تتحكم في مزاجك؟"
آه — بالظبط زي ما حبة أسبرين بتوقف الصداع.المخ عضو — بيتعالج بدواء.
٨. "ناس أصعب منك وماخدوش دواء."
كل حالة مختلفة — كل دماغ مختلف.المقارنة دي مش بتشجع. بتبوظ.
٩. "إنت بس محتاج تشغل نفسك."
لو الشغل كان العلاج —الناس اللي بتشتغل ١٢ ساعة ما كانتش بتتعب نفسياً.
١٠. "جرب كلم ناس وهتتحسن."
التواصل مهم — بس مش بديل عن العلاج.الإنسان ممكن يكون محاط بمية واحد وبرضو يكون مريض.
١١. "أنا شايفك كويس — مش مريض."
الاكتئاب مش بيتكتب على الوش.أكتر الناس ابتساماً ممكن يكون بيشيل أتقل حاجة جواه.
١٢. "اصبر — هيعدي."
الصبر مش بيعالج — الصبر بيساعد.بس من غير علاج — ممكن "هيعدي" من غير ما يتحسن.
١٣. "ليه بتاخد دواء وإنت شاب؟"
المرض النفسي ماعندوش سن.الاكتئاب بيصيب أطفال وشباب وكبار.
١٤. "جرب الأعشاب."
في أعشاب بتساعد — وفي حالات لازمها دواء طبي.
الدكتور هو اللي بيحدد — مش المجتمع.
١٥. "الناس زمان ماكانتش بتاخد دواء وكانوا كويسين."
الناس زمان كمان ماكانتش بتعمل عمليات قلب.الطب اتطور — والصحة النفسية جزء منه.
١٦. "إنت بس محتاج تبقي قوى."
مريض الاكتئاب مش ضعيف —هو بياخد دواء ويصحى الصبح ويكمل.
ده أقوى من كتير ناس ما بتاخدش دواء.
مريض الاكتئاب مش محتاج حكمة —محتاج حد يقوله "أنا معاك."
متترددش فى طلب المساعدة
وكلمنا على طول
