Aya Elgindy - Child Psychologist

07/12/2024

اوقات بتحتاج من اللى بتحبهم طبطبه و احتواء و احساس بانهم حاسين بيك و بوجعك .. اهم من انك تسمع منهم نصيحه او لوم

07/12/2024

20/11/2024

Happy children's day ❤

الاهم من انك تسعى ان طفلك يكون متفوق دراسيا و يطلع الاول
اسعى انه يكون سوى نفسيا و يتمتع بصحه نفسيه جيده

طفلك صفحه بيضاء انت اللى بترسم شخصيته .. انت اكبر متحكم فى نفسيته .. انت اللى بتحدد ذكرياته فى المستقبل
و دى مسؤليه كبيره لازم تكون قدها
علشان طفلك يكون شخص سوى نفسيا
لازم تتقبله .. تحتويه .. تحسسه بالامان .. تسمعه .. تشاركه اهتماماته .. تدعمه و تشجعه
حبك لطفلك و حنانك عليه من اهم العوامل اللى بتساعد انه يكون متمتع بصحه نفسيه

كل سنه و اطفالنا سعداء ❤

09/11/2024

النور القوى اوقات بيتعب العين و يرهقها و لو زاد ممكن يعمى

اللى حواليك لو قربت منهم زياده عن اللزوم و نوروا اوى قدامك و شوفت اللى جواهم ممكن تتعب من تفاصيل كتير مكنتش شايفها و انت سايب مسافه و النور كان خافت

المسافه بتحافظ على الخصوصيه و الود .. حافظ عليها

15/06/2024

السعاده غايه بيتمناها كل البشر
السعاده موجوده فى أدق تفاصيل ايامنا بس ممكن تكون محتاجه شويه جهد مننا علشان نقدر نبصرها
العيد هديه ربانيه و فرصه عظيمه و غير مرهقه للحصول على السعاده
حاول تستغل الفرصه و تفصل شويه من دوامه الحياه
و تلاقى سعادتك فى ابسط تفاصيل العيد علشان تشحن طاقتك و تقدر تكمل ❤ 🥳🎊

كل سنه و انتم طيبين 😊💕


#العيدفرحه

15/06/2024

كل سنه و حضرتكم بكل خير
طبعا كلنا مستنين اول يوم العيد علشان نحضر الدبح و نوقف اولادنا يشهدوا الدبح علشان يبقوا أقوياء كده و يتشجعوا و يفرحوا بالعيد اصل فرحه العيد مش حتكمل غير بأنهم يشهدوا الدبح ! و لازم نحكيلهم بالتفصيل عن كيفية الدبح و قصه سيدنا إبراهيم و ازاى كان حيدبح ابنه بالتفصيل !!!!

الحقيقه الطفل قبل سن ١٠ سنوات بيكون إدراكه غير مكتمل للامور .. لما يشوف مشهد دبح و دم او يتحكاله القصه بتفصيلها ممكن جدا ميستوعبش الفكره و لا يفهم المغزى من القصه و اللى يترسخ فى ذهنه فقط طريقه الدبح و منظر الدم المرعب
ممكن جدا يظهر رعبه و خوفه الشديد فى وقتها و ساعتها خوفه حيتقابل بالهجوم من الاهل و يبدأ يسمع كلمات زى انت جبان ليه .. اجمد انت راجل .. ليه ابنك خايف كده ده انا ابنى كان بيساعد باباه فى الدبح من و هو سنتين كده غلط لازم تشجعيه علشان يبقى راجل
و ممكن جدا وقتها ميظهرش خوف الطفل لأن الكل بيشجعه و هو بيتظاهر أمامهم بالقوه لكن تظهر بعد ذلك سلوكيات تدل على تأثره النفسى بالمشهد المرعب 😨
ممكن يتخيل المشهد كل فتره و يحلم بيه أثناء النوم
ممكن تلاقى تهتهه فى الكلام .. قضم اضافر .. تبول لا ارادى أثناء النوم .. عنف مع أقرانه و اخواته .. كرهه لاكل اللحمه
ممكن كمان توصل للتقليد لو الطفل خياله واسع ممكن جدا يبدأ يقلد اللى شافه مع أخوه او اخته كنوع من اللعب فهو غير مدرك بالخطوره
لازم نراعى اننا بنتعامل مع طفل
كل طفل و له بناء نفسى قد يكون قوى و قد يكون ضعيف
مينفعش نجرب فى نفسيه اطفالنا
فيه حاجات كتير جدااااا ممكن نعرفها للطفل عن العيد غير شرح كيفية الدبح و رؤيه الدم
و كل سنه و حضرتكم جميعا بخير 😊😊
#تربيه

13/04/2024

على رأى اللى قال .. الاهتمام مبيطلبش 😂

الحقيقه فعلا الاهتمام مبيطلبش و كمان مبيتمثلش
يعنى لا ينفع تطلب من حد انه يهتم بيك و لا ينفع تمثل انك مهتم بحد

لان الاهتمام حقيقى و ملموس .. مش مجرد كلام بيتقال ممكن نزيف فيه علشان نقضى مصلحتنا من الشخص اللى قدامنا
اهتمامك بشخص بتحبه بيكون فعل لا ارادى ناتج عن حبك الحقيقى له

اظهر للى بتحبهم اهتمامك بيهم و قد ايه انت بتحبهم قبل ما تندم بعد ما الوقت يفوت انك معبرتلهمش عن حبك ليهم بالاهتمام 😍😍😍😍

و اوعى تطلب من حد انه يهتم بيك لانه ببساطه مش حيعرف يمثل انه مهتم 😎

13/04/2024

يظل الإنسان جميلا إلى أن يتكلم اما ان يتضاعف جماله او يزول تماما
الخيار متروك له !

13/04/2024

النهارده اول يوم شغل بعد اجازه طويله نسبيا... احساسك كان ايه و انت راجع للشغل ؟ .. اكيد احساس التأهب و الزهق للرجوع للشغل و الروتين اليومى بعد وقت كبير من الراحه ده احساس طبيعى
طبيعى انك تميل للراحه و التغيير فى اليوم و الوقت المتاح لنفسك اللى بتستمتع فيه بالحاجات اللى بتحبها و علشان كده عملوا الاجازه الأسبوعيه اللى من خلالها بنفصل من الروتين اليومى و نحاول نستمتع بيها علشان نرجع اكتر نشاط و حيويه و عطاء

لو احساس الزهق زاد و الضيق و التوتر و الخنقه سيطروا عليك و تملكوا منك طول يومك متسكتش و تقول كمان كام يوم حتعود تانى على الشغل لان ده مش طبيعى .. اعرف ان انت محتاج تعيد تفكير فى روتين حياتك و شغلك من الاول
أهمها التفكير فى نوع الشغل نفسه و هل هو ده المجال اللى بتحبه و بتحاول تطور من نفسك فيه و لا لا
مكان شغلك هل انت مرتاح فيه و حاسس انه مكانك و قادر تدى فيه و لا لا
وقتك لنفسك هل بتلاقى وقت لنفسك خلال يومك لهواياتك و للاستمتاع بالحاجات اللى بتحبها و لشحن طاقتك و لا لا
كل دى اسئله محتاج انك تلاقى إجابتها و لو الاجابه بلا يبقى لازم تبدأ فى التغيير فورا

التغيير حيبدأ بتنظيم يومك و ترتيب وقتك
بأنك تخصص لنفسك يوميا وقت ممتع تفصل بيه عن ضغط الشغل ولو كان صغير
انك متعتبرش الشغل ده نوع من العقاب او التكدير او الحاجه المفروضه عليك غصب عنك .. انك تكون حابب شغلك و مستمتع بيه علشان تقدر تبدع فيه
انك تعتبر الاجازه الأسبوعيه مكافأة لنفسك على اسبوع شغل و اجتهاد فى مجال انت اخترته و بتحبه و تخطط انك تعمل فيها حاجه انت بتحبها و تستمتع بيها

09/04/2024

الواحد مش حاسس بطعم العيد 😒

فرحه العيد مبقتش زى زمان 😒

فين زمان ايام ما كنا بنستنى العيد و نرتبله انما دلوقتى بقت الايام شبه بعضها 😒

جمل بنقولها و بنسمعها من كل اللى حوالينا دايما

تفتكروا فين المشكله 🙋

و ليه دايما حابين اننا نعيش فى حاله من النوستالجيا و نترحم على ايام عشناها و احنا صغيرين و مش عارفين نعيش زيها دلوقتى 😯

هل ضغوط الحياه هى السبب مثلا او فقدان شخص عزيز علينا مخلينا مش عارفين نستمتع بالعيد زى زمان

تفتكروا ايام ما كنا بنحس بفرحه العيد و اهالينا بيحسوها معانا و بيحاولوا يفرحوا و يفرحونا مكنش عندهم ضغوط و كانت حياتهم مرفهه و وردى ... مفقدوش عزيز عليهم و مكنوش بيفتكروا أهلهم و لا الذكريات اللى كانت بتجمعهم بيهم فى العيد ؟؟؟؟؟

الفرق بينا و بينهم إنهم كانوا بيحاولوا يصنعوا الفرحه حتى و لو بأقل التكاليف ... كانوا عايزين يفرحوا و يفرحونا علشان كده قدروا يحققوا الفرحه و يعيشونا ايام متتنسيش رغم بساطتها و يحفروا اجمل ذكريات ليهم معانا اللى بتخلينا دلوقتى نفتكرها و ندعى لهم بالرحمه

الفرق بينا و بينهم إننا مكسلين ندور على الفرحه و بنتحجج بجمله ان فرحه العيد مبقتش زى زمان

حاولوا تفرحوا نفسكم 😊😊 و تفرحوا اللى حواليكوا 😊😊

العيد فرحه لو انتو عايزين تفرحوا ☺☺
كل سنه و انتم طيبين 😊
🎈🎉🎊🎈🎉🎊🎈🎉🎊🎈🎉🎊🎈🎉🎊🎈🎉




أخصائية نفسيه / ايه الجندى