29/01/2026
🚸 صديقي الاربعيني
دليلك لصيانة "الموتور". روشتة خاصة للحفاظ على قلبك ❤️
عشان قلبك يفضل يدق بصحة وقوة، فيه شوية مفاهيم لازم نغيرها، وشوية عادات لازم نثبتها. دي الخلاصة الطبية من وجهة نظر القلب:
١- الحركة بركة.. بس بذكاء 🏃♂️
انسى "موضة" الـ ١٠ آلاف خطوة! الأهم هو التوقيت والمجهود.
المطلوب: ٢٠ لـ ٣٠ دقيقة مشي يومياً، أو أي رياضة تعلّي ضربات قلبك (جري، عجلة، سباحة). العبرة بـ "الكيف" مش بس "الكم".
٢- عداد المياه 💧
في الشتاء بننسى نشرب عشان مفيش عطش، وده خطر جداً. خلي جنبك دايماً "قزازة مياه" واحسب بتشرب قد إيه. الترطيب مش رفاهية، ده أساسي للدورة الدموية.
٣- الأكل.. الجودة قبل أي حاجة 🥩
أكل الشارع: ممنوع، أو مرتين في الشهر بالكتير (حتى المشويات اللي فاكرها صحية!).
المصنعات: اللانشون وأخواته = ممنوع تماماً.
الدهون: الدهون الحيوانية (باعتدال) أفيد بمراحل من الزيوت النباتية المهدرجة.
٤- اطمئن بالأرقام
(Check-up سنوي) 📝
تحاليلك السنوية هي مرايتك:
صورة دم كاملة (CBC)
سكر تراكمي (HbA1C)
وظائف كلى (Kidney function)
دهون كاملة (Lipid profile)
تحليل (ProBNP) لتقييم كفاءة القلب.
٥- الإيكو
(Echo) صديقك الصدوق 🖥️
فحص رخيص، آمن (بدون صبغة أو إشعاع)، ومهم جداً. احتفظ بالتقرير بتاعه للزمن عشان نقارن بيه لو حصل أي تغيير لا قدر الله.
٦- خرافة الأسبرين والبديل السحري 💊
الأسبرين بعد الأربعين: خرافة وانتهت طبياً!
الحماية الحقيقية: لو فيه دواء واحد يستحق تاخده لحماية شرايينك (بعد استشارة طبيبك) هو الـ Statin حتى لو دهونك سليمة.
المستقبل: قريباً جداً، أدوية الـ (Empa / Dapagliflozin) هتكون هي "الساحر" لحماية القلب والكلى، لدرجة إن فيه أبحاث بتقول من كتر فوايدهم "Should we add them to water?!" (نحطهم على مياه الشرب!).
٧- علامات الخطر 🚨
أي وجع في الصدر، نهجان، أو وجع في فم المعدة بيزيد مع "المجهود" = زيارة فورية لطبيب الصدر و القلب. ونفس الكلام لو فيه تاريخ عائلي لارتفاع الدهون أو قصور الشرايين.
خلاصة القول:❤️
نام بدري، اشرب قهوتك (مفيدة للقلب طالما مفيش خفقان)، وربنا يديم عليكم منه الصحة.❤️
