psy/ Laila Saied

05/06/2024

الدليل لا يؤخذ بالاحساس والمشاعر ..
بتستغفر ليه لما بتجيلك فكره فيها تساؤلات او تشكيك في العقيدة .. مش انت اللى اخترت تجيلك الفكره .. ولا ليك مقدرة تمنعها تيجي وتظهر

هل الموسوس مذنب؟؟؟؟
اذا كانت الاجابه
لا...طيب بتستغفر عن ذنب
لم تفعله ليه؟؟؟؟

ولو الاجابه نعم
هل عندك دليل عقلي حقيقي
واضح علي الذنب؟؟؟؟

ملحوظه الدليل لاياخذ بالاحساس
والمشاعر...

01/05/2024

فكره واحده لها اكتر من علاج 👌🏻🤍

29/04/2024

كل ما تضيق بيك كده وتحس انك ملكش دور او هدف في حياتك افتكر انت عديت بأيه وصبرت واتجاوزت ايه لوحدك اكتب كده وعد كام موقف وحش تجاوزته .. كام مسئولية شيلتها على قد ما تقدر .. كام حد ساعدته .. كام حد كان شايفك طوق نجاة ربنا بعتك ليه في وقت معين .. ونت بتعد كده هتحس ساعتها قد ايه انت ظالم نفسك بأنك بتحصر قيمتك ودورك في الحياة على الحاضر بس واللى مش عارف تحققه ازاي لسه 🤍

29/04/2024

عشان تطلع من علاقة وتقرر تتعافي منها لازم تتأكد انك مسيبتش باب موارب لرجوعها تاني .. مسيبتش شات قديم متمسحش .. مسيبتش رقم محتفظ بيه مسيبتش صورة محتفظ بيها تفكرك بالتفاصيل تاني ..

ال move on مش هييجي بإنك تقعد تراقب من بعيد هو ندم ولا لا
هو مبسوط ولا متضايق
هو مرتاح ولا تعبان منغيرك
هو بيشوف بوستاتك واستوريهاتك ولا لا
هو هيرجع تاني ولا لأ
انا هبقى في نظره جامد كده اني سيبته ولا لأ
كل ده بيفتح باب تاني انت مش واخد بالك منه ...

لما تقرر تتخطي وتتعافي من علاقة بيبقي كأنك عايز تقطع صفحة من كتاب حياتك عارف يعني ايه تقطع ؟

يعني مش هترجعلها تاني بأى طريقة هي مش لزماك وقررت تستخدم صفحة جديدة غيرها

صعب التعافي وانت مقرر تسيب باب موارب صدقني 🖤

29/04/2024

فيه مسميات لطرق التفكير على فكرة نقدر نميز بيها احنا بنفكر ازاي ...

فيه حاجه اسمها تشوهات معرفية .. يعني زى شوائب كده لما بتملي تفكيرك بتخليه ملوث .. غير نقي .. مش صاافي .. مش متوازن

التشوهات المعرفية دي عندنا كلنا ك بشر مفيش حد معداش ولا بيعدي عليها .. الفكرة اننا قادرين نقلل منها ف نفكر بموضوعية شوية .. او نفكر بيها وحنا معندناش وعي اننا مستسلمين ليها

تشوه معرفي .. يعني حاجه بتعيق تفكيرك .. حاجة شوهت ادراكك الداخلى وبتدعم احيانا مشاعرك الوحشة والسلبية

طب زي ايه اشهرهم .. اللى كلنا بنفكر بيهم وحنا مش واعيين

زى نمط الكرة البلورية ( او القفز للاستنتاجات او قراءة الغيب ) ⚠🚫
وهنا بقرأ افكار اللى حواليا واتوقع ردود افعالهم وافسرها على طريقتي انا ونا معنديش دليل ملموس على صحة توقعاتي دي .. بستنتج بناءً على خبراتي انا وبقرأ افكاىر بناءً على اسلوبى انا فالتفكير .. وعادة هنا النتبجة اني بسئ الظن او بتهور او باخد قرارات غير موزونة .. طب ما تلاقي دليل الاول يدعم افكارك دى وبعدين احكم .. بص للامور بموضوعية شوية بلاش تنحاز لنفسك عشان مجرد احساس جواك مقتنع بيه .. فين دليلك الاول ( وهنا بيبقى مفيش دليل فعلا ملموس .. انا حسيت حاجه وفكرت فيها ف توقعتها وفسرت اللى حواليا منغير ما افهمهم الاول

مثال للتوضيح : واحدة اتخطبت لواحد وبعدين سابها عشان مفيش تفاهم .. تيجي تتخطب بعد كده تقوم سيباه هي عشان تبقى هي اللى سابت الاول قبل ما يسيبها .. طب ايش عرفك انه هيسيبك .. ليه بتقرأي الغيب .. ليه بتعممي تجارب قديمه مش يمكن خير ليكي .. فين دليلك عشان تفكرى كده وتاخدي قرار بناء على كده !

مثال تاني: مواعدة صحبتي في مكان ووقت معين وفضلت واقفه مستنية وهي مجاتش .. وابتدي اتعصب وافكر انها قصداها بقى وانها مش بتقدرني وانها كذا وكذا .. طب مش يمكن جرالها حاجه ؟ فين الدليل طب ؟

نمط تاني مشهور اوي بنستخدمه كتير اسمه ( التعميم ) ⚠🚫
مثال : واحدة اتخانت او واحد اتخان وجه يخطب بعدها فضل يشك في خطيبته ويشوفها زي اللى خانته .. ويقولك كل البنات زي بعض .. كُل ليه بقى ؟
هل انت اتعاملت مع كل البنات عشان تصدر الحكم ده ؟
هيقولى كذا حد .. هقوله بردو مش مبرر للتعميم .. احنا كام مليون نسمه .. اتعاملت مع مليون ست ؟
ده بجد والله احنا بنعمم كده ودي سبب علاقات كتير باظت عشان كل الرجالة زى بعض وكل الستات زي بعض .. خصص متعممش !
فيه الخير وفيه الشر .. لو الدنيا ابيض او اسود بس ايه لزمه باقي الالوان ؟

فيه اختلافات .. فيه الحلو وفيه الوحش .. هتلاقي شخص فيه عيوب وهتلاقيله بردو مميزات .. حلو ف كذا ووحش ف كذا .. مش كله وحش ومش كله حلو !

نمط تالت مهم اوي اوي ( المثالية ) او ( الكل او اللاشئ ) اسمه كده .. يا كل حاجه ، يا ولا حاجه ⚠🚫

يا نذاكر جامد اوي ونتفوق اوي .. يا نفشل اوي ونبقى ملناش دور ولا انجازات مهي كده كده بايظه
يا ابان مفياش غلطه وبيرفيكت يا منزلش من البيت خالص
يا اكون خلوق اوي ومرتكبش ولا ذنب ولا غلطه يا اجلد نفسى واقسي عليها وابقى فاسد .. منا خلاص غلطت

المثالية شئ خطير بنعاني منه في مجتمعنا 🖤
نمط قاسي جدا ممكن يهد الانسان او يخليه يقوم تاني ..
محنا لازم نغلط .. ونرتكب ذنوب .. ونفشل .. ونقع ونضعف .. احنا بشر مش انبياء !
المهم نتعلم .. مش المهم نعاقب نفسنا !!

نمط اخير صعب اوي ( نمط الوصف ) ⚠🚫
بوصف نفسي بحاجات مش فيا .. بوصف نفسي بناءً على سلوك او فعل عابر صدر مني غصب عني .. بوصف نفسي بناءً على اراء الناس فيا .. بوصف نفسي بناء على صعوبات او فشل او اهانات اتعرضتلها خلتني مقتنع اني وحش فعلا

لو طول الوقت بتجلد ف نفسك وبتوصفها بحاجات وحشه يبقى انت بتفكر بالنمط ده .. يبقى انت قاسي على نفسك .. انت قاسي على نفسك ومستني اللى حواليك يبقو بيحترموك مثلا او بيرأفو بيك .. طب ده انت اولى ب نفسك 🤍

لو حاولنا نبقى واعيين بالانماط اللى بنفكر بيها دي ونحاول نوقفها قدر الامكان .. مش نمنعها طبعا ( اكيد هنفكر بيها احيانا لكن نبقى واعيين ب ده ) هنعيد حساباتنا تاني ونبقى في اماكن تانيه ❤

29/04/2024

" لن تهزم الشخص الذي ضمّد جراحه بنفسه "

جملة عميقة بتخبى وراها معاني كتير اوي 💙

ممكن توصف شخص قابل نفسه كُلياً فمش هيفرق معاه تصيُّد الناس لأخطائه

او شخص فاهم نفسه كويس وعارف ازاي يتكفّل بتعبه لوحده

او شخص عدي بأنواع كتير من الالم وفي كل مرة بتزيد خبرته في التعامل مع اي ألم مهما كان لأنه متعود

او شخص صريح مع نفسه قبل ما يكون صريح مع الناس فمش محتاج يفكر الناس شيفاه ازاي

او شخص متحمل مسئولية كل قرار بياخده مهما كان غلط فمش هيخاف من اي رد فعل ولا هيتردد

الجملة فيها قوة .. وفنفس الوقت فيها ألم كبير
لو قعدنا نتأمل كده في مشاكلنا .. في قدراتنا لما بنتحط ف موقف صعب مثلا .. في قدرة تحملنا .. صبرنا .. ثباتنا .. وضوحنا .. صراحتنا .. قبولنا لنفسنا او لغيرنا .. المرونة .. الرضا .. الحزم .. الارادة

كل دي نعم من ربنا .. كل دي حاجات تستحق نتأمل فيها ونشوف قد ايه جوانا حاجات جميلة حتي لو كانت بتطلع فالاوقات الوحشه .. بس كونها جوانا دي حاجه تخلينا نفتخر بنفسنا .. تساعدنا اكتر نفسر الامور والازمات اللى بنتعرضلها بطرق تانيه .. بتدينا بدايل ايجابية نفكر بيها يعني ، لأننا فالاوقات الوحشة بنسيب كل ده ونركز على وجعنا بس .. وحنا حاسين بأيه

يعني بنبص للجانب المُظلم فينا بس

بدايل ايجابية بقي زي اني اشوف ده اختبار من ربنا لصبرى .. لارادتي .. لأي قدرة من قدراتي اللى ربنا منّ عليا بيها

زي اني اشوف ده توظيف لقدراتي .. دعوة لاني اتأمل نفسي اكتر واكتشفها

زي اني اشوف ده حاجه ميزتني .. وطلعت الحلو اللى جوايا وعرفتني حاجات مكنتش واخد بالى منها عن نفسي

بدايل كلها كفيلة تخليك تشوف وجعك ده او ازمتك دي بصورة ألطف وأبسط 🤍