Dr . Hendawy Kids Clinics - عيادة الدكتور هنداوي لطب الأطفال

02/12/2025

25/11/2025

خمس اسباب لفشل علاج حساسية الصدر فى الأطفال :

** في عوامل تانية مهمة جدا غير البخاخات كتير بتتنسي و بتكون هي للاسف السبب في فشل العلاج ، زى إيه ؟؟؟

✅ ️اول و اهم سبب هو مشاكل الانف :
يعنى ساعات كتير بنعالج الصدر ، و ننسى نقفل الحنفية المفتوحة فوق ، و خصوصا لو عرفنا إن ٧٠ % من الاطفال اللي عندهم حساسية صدر بيكون عندهم حساسية أنف .

✅️ثاني سبب: البعد عن مسببات الحساسية :
ما انا لو هعالج مهما اعالج، و ابن حضرتك بيقعد مع حد مدخن مثلا.. يبقى العلاج و لا له لازمة ..
مسببات الحساسية زي دخان السجائر ، وبر الحيوانات ، الحشرات ،عث الفراش، الروائح و العطور النفاذة ، حبوب اللقاح ، الرطوبة في الجدران ، تيارات الهواء الباردة و أحيانا بعض انواع الاطعمة و حاجات تانية كتير ..
لازم تعرفي هل في حاجة بتزود الحساسية عند ابنك، و تحاولي تتفاديها ، لأنه لو بيتعرض لها باستمرار و بياخد علاجات مصر كلها برده حالته مش هتستقر 🤷‍♂️

✅️ثالث سبب : عدم الالتزام بالعلاج :
الموضوع غلس ..
انا عارف ..
اني اطلب منك انك تدي ابنك بخاخة أنف او بخاخة صدر طول الشتاء .. كل يوم .. كل يوم .. كل يوم.. مرتين او اكثر يوميا .. الموضوع صعب و محتاج ارادة و التزام ..
و لكن لانه الحساسية عبارة عن التهاب مزمن في الانف و الصدر .. فهي محتاجة علاج مزمن برده ..
و لو طنشتي العلاج كام يوم .. هتسمعي صوت الكحة و الرشح من تاني للاسف 😭

✅️رابع سبب : عدم توصيل الدواء بطريقة صحيحة :
لازم تتعلمي ازاي تستخدمي البخاخة صح ..
و جهاز البخار..
و ال spacer ..
و انه مثلا .. لازم الانف تكون نضيفة كويس قبل استخدام بخاخة الانف ..
لازم نتأكد انه الطفل بياخد الدواء بطريقة صح و منتظمة قبل ما نقرر فشل العلاج 🙃

✅️خامس سبب
= الاسباب المخفية :
*زي زيادة الوزن مثلا ..
السمنة عند الاطفال بتجعل استجابتهم لعلاج الحساسية أصعب و أصعب..

* او وجود زوائد لحمية بالانف ..

* و من اهم الاسباب المخفية
الارتجاع .. اي كحة ليلية بصورة مستمرة و غير مستجيبة لعلاجات الانف و الصدر لازم و لابد نفكر في الارتجاع ..

🫡الخلاصة .. انه علاج حساسية الانف و الصدر مش بخاخة و اقلب و خلاص .. و إنما خطة موضوعة و بحث في الاسباب و قصة منفصلة خاصة بكل طفل ..
و محتاجة متابعة مستمرة و تعاون مثمر بين طبيب الاطفال و الام و الطفل 👍💪
ربنا يشفي أولادنا جميعا ...

18/11/2025

🎀 معلومة فى كبسولة 🎀
( الجزء الأول )

الاطفال عادةً بتصاب بالبرد من ٥ إلى ٧ مرة فى السنة

و دى عدوى ڤيروسية يتم الشفاء منها بإذن الله خلال إيام بالسوائل الدافئة و ڤيتامين سى مع أدوية الرشح أو نقط الأنف عند اللزوم ما لم تكن هناك أى مضاعفات أخرى مثل النزلات الشعبية أو التهابات الجزء العلوي من الجهاز التنفسي

بلاش مضاد حيوي على الفاضي و المليان إلا للضرورة القصوى حسب تشخيص حالة الطفل ...

و بلاش حقنة كوكتيل السخونية اللى فيها كورتيزون و ڤولتارين اللى بعض الصيدليات بتديها للأطفال علشان ممكن تقفل صدر الطفل بالإضافة إنها ممكن تضعف المناعة اللى إحنا المفروض ننشطها أكثر

و ممنوع شراب و حقنة الكورتيزون إلا للضرورة فى حالات حساسية الصدر أو ضيقة النفس الشديدة

بلاش أدوية طاردة للبلغم فى الأطفال الصغيرين اللى مش حيعرفوا يطلعوا البلغم و ممكن تزود الكحة أكثر ...

و أفضل مذيب للبلغم للأطفال هو السوائل الدافئة ...

الأدوية غير الضرورية ضرر في حد ذاتها . . .

💢 أنشروها share لتعم الفائدة 💢

16/11/2025

بلاش تطعيم الانفلونزا اثناء دور البرد والسخونية..... الأفضل ننتظر على الأقل ١٠ ايام بعد انتهاء جميع الأعراض وتحسن الحالة بشكل كامل

16/11/2025

📍 تطعيم المكورات الرئوية Pneumococcal Vaccine :

>>> المكورات الرئوية دى نوع من البكتريا ، و هى من المسببات الرئيسية ل....
📌الالتهاب الرئوي Pneumonia
📌التهاب الاذن الوسطي Otitis Media
📌التهاب الاغشية السحائية بالمخ Meningitis

📌كمان آخر دراسة اتعملت في ٢٠١٩ علي تطعيم المكورات الرئوية اثبتت ان التطعيم ده بيقلل معدل مقاومة البكتريا للمضادات الحيوية ( Antibiotics Resistance )

⭕️ طيب ازاي نحافظ علي اولادنا من العدوي بالمكورات الرئوية ؟

📌 عن طريق التطعيم للأطفال الرضع = ٣ جرعات ( حقن فى العضل ) بنبتدي اول جرعة عند عمر شهرين و بعدين عند ٤ شهور و ٦ شهور و جرعة تنشيطية عند ١٥ شهر
و التطعيم ده موجود فى هيئة المصل و اللقاح أو بعض الصيدليات

⭕️ طيب لو الطفل عدى أول سنة و ما خدش التطعيم ده و بيتعب كثير بالأعراض المذكورة فوق ، أعمل إيه ؟

⬅️ الأطفال من ٢ - ٥ سنوات ممكن يآخذوا جرعتين من التطعيم بينهم شهرين
الجرعة الأولى : من نوع Prevenar 13 أو Synflorix
الجرعة الثانية : من نوع Pneumo 23

15/11/2025

٤٠ نصيحة مهمة جداً لحديثي الولادة :

١_رضعي طبيعي

٢_بلاش أعشاب

٣_بلاش بيبي درينك

٤_بلاش جلوكوز

٥_ڤيتامين "د" من أول يوم ٤ نقط ڤيدروب .

٦_تطعيم ڤيروس بي أول ٢٤ ساعة حتى في أيام الجمع و العطلات الرسمية .. في الوحدات الصحية و أقسام النساء في المستشفيات الحكومية

٧_ما تربطيش حاجة على السرة

٨_ماتخليش الحفاضة تغطي السرة

٩_نظفي السرة بالكحول ٤ مرات يومياً .

١٠_ لو السرة بتجيب دم كتير ممكن يحتاج حقنة ڤيتامين ك لو الطفل ما أخدهاش بعد الولادة فى المستشفى

١١_ إختبار قياس السمع متاح بالمجان للأطفال حديثي الولادة لغاية سن شهر فى كل المراكز الصحية الحكومية

١٢_تحليل الكعب من اليوم الثالث للسابع يوم السبت و الثلاثاء في كل الوحدات الصحية..

١٣_الطفل حديث الولادة إنسان و بيحتاج النظافة ..و بيستحمى عادي

١٤_ممنوع بوس الطفل من الفم.

١٥_بلاش بوس أحسن ..بينقل أمراض.

١٦_تطعيم الدرن "حقنة الكتف الشمال " ..في أول أسبوع ما تتأخريش.

١٧_ممنوع في السبوع غربلة الطفل الغربلة=نزيف في المخ لا قدر الله

١٨_تكحيل الطفل بالبصل = ممنوع

١٩_ نقط مطهرة للعين روتين لكل الأطفال في أول أسبوع.

٢٠_ ورق مهم و هتحتاجيه شهور : كراسة التطعيمات..منحنيات النمو تشمل الوزن و الطول و محيط الرأس

٢١_ احفظى وزن طفلك عند الولادة ، الوزن الطبيعي عن الولادة من ٢,٥ الى ٤ كجم و بنزيد واحد كجم فى أول شهر.

٢٢_٦٠٪ من المواليد كاملى النمو و ٨٠٪ من ناقصى النمو بيصفروا ، ، ، صفراء طبيعية فسيولوچية حميدة ما تقلقيش.

٢٣_الصفرا الطبيعية عايزة رضاعة و متابعة فقط ، ، ، ، الحضانة و العلاج الضوئي لو نسبتها عالية أكثر من ١٥ ، بس مش عايزة لمبة نيون و لا نقط ڤيتامينات زى ما جارتك ما بتقولك

٢٤_المولود إنسان ..إحساسه بالجو زينا..بلاش بطاطين في يوليو و أغسطس ..

٢٥_الزغطة و الخنفرة و الحزقة ظواهر طبيعية هتقل مع الوقت.

٢٦_ظواهر تقلقك :
الطفل رافض الرضاعة أو مش قادر يرضع ، لونه بيزرق، نفسه فيه نهجان ، مدروخ و مش بيصحى » يبقى لازم نزور الدكتور للأطمئنان . . .

٢٧_ اهتمي بنفسك و صحتك عشان تقدري تهتمي بمولودك..كلي أكل صحي و متوازن ، خذى كالسيوم و حديد و أشربى سوائل كثيرة ، اشربي لبن ،،، و بلاش اكل حراق أو بهارات كثيرة فى أكلك حتعمل انتفاخات و مغص لطفلك و بلاش منبهات زى القهوة و النسكافيه و المشروبات الغازية علشان ممكن تأثر على نوم طفلك اللى بيرضع طبيعي .

٢٨_ الطفل حديث الولادة بينام كتير حوالي من ١٤ - ١٦ ساعة فى اليوم بس متقطع من ٢ : ٤ ساعات و أول إسبوعين معظم نومه بيكون بالنهار و بيبدأ نومه يتظبط بعد ٨ أسابيع من الولادة ، معلش نومك هيتلخبط ، ربنا يعينك و يقويكى ..... بس المهم و لازم يرضع كل ساعتين . . .

٢٩_ حاسة السمع مكتملة عند الطفل حديث الولادة من بعد الولادة مباشرة ... يعنى لو مش بيتفزع أو بيتخض من الصوت العالي لازم تطمنى على سمعه .

٣٠_لازم طفلك يعمل براز في أول ٢٤ ساعة ( الحمام الأسود أو تنظيف البطن ) ..لو معملش استشيري طبيبك ، بعد كده لون البراز بيبقى أخضر ثم الأصفر العادى

٣١_أنماط الإخراج مختلفة عند حديثي الولادة..فيه طفل بعد كل رضعة يعمل براز و طفل يعمل مرة في اليوم أو كل يومين مرة بس المهم البراز طالع طرى مش حتت ناشفة و لا الطفل بيعيط جامد و هو بيعمل حمام

٣٢_النوم على البطن ممنوع إلا بعد الرضاعة للتكريع فقط و لمدة معينة مش على طول و انتي قاعدة صاحية جنبه .

٣٣_غيري الحفاض من ٣_٤ مرات يوميا و نشفي برفق بدون فرك للجلد بمنديل عادى مش مبلل و ادهني كريم الوقاية و يُفضّل يكون محتوى على زيت الزيتون..هتحميه من التسلخات.

٣٤_لو بنت اتأكدي من وجود فتحة المهبل..لو ولد حسي الخصيتين و شوفي فتحة القضيب في مكانها الطبيعى و لا لأ.. و هل فيه إنتفاخ فى كيس الخصية و لا لأ

٣٥_الأب : فينك ؟
واحشنا و الله ما حدش شافك من زمان 😂 »» ساعد زوجتك على قدر المستطاع علشان كدة الموضوع كتير عليها 💯💯

٣٦_أول ما فترة النفاس تخلص شوفي وسيلة منع حمل مناسبة ما تنسيش ..طفلك محتاج رعايتك قبل ما تعمليها تاني و صحتك هتروح

٣٧_طفلك بيعيط كتير ..عليكي تخمني السبب و مع الوقت هتفهميه ، يعنى لو » جعان _رضعيه ،،، شبعان و منفوخ كرعيه ،،،، عنده مغص دلكيه ،،،،، و ما تعوديش البيبى على الشيل على طول و بلاش تهزيه جامد علشان ما يرجعش .

٣٨_السخونية و الكحة في حديثي الولادة ( أقل من شهر ) مش طبيعية و مش حميدة ..لازم دكتور و فحوصات لإستبعاد حاجات معينة

٣٩_حبي طفلك ..ولد أو بنت..أسمر أو ابيض ..سليم أو مريض ..ده قطعة من روحك ماتخليش حد أبدا يصنفه 💓

٤٠_مع نهاية الشهر الثاني الطفل بيبدأ يبتسم لو لاعبتيه ..لو بيعيط و اتكلمتي معاه هيهدأ ..
اتعاملي معاه على إنه إنسان محتاج غذاء و حب و عناية 🌹🌹🌹

# شير الوعى ( Share ) لتعم الفائدة

13/11/2025

ابنك عنده حرارة مرتفعة و كحة شديدة مع نهجان و سرعة التنفس انزل اقرب مستشفى او عيادة و اكشف عليه فورا علشان حالات الالتهاب الرئوي والنزلات الشعبية كثير جداً اليومين دول

و دمتم جميعاً سالمين

03/11/2025

" مواعيد العيادة "
يومياً ما عدا الجمعة
٦ إلى ٩ م
الكشف بأسبقية الحضور

04/05/2024

- طمنى يا دكتور المدام مالها ؟

= المدام محتاجة متذاكرش للأولاد و هتبقى زى الفل . . . 😂😂😂

03/05/2024

💢 موضوع مهم مع بداية فصل الصيف :

07/10/2023

..وهم تحليل مقاومة الانسولين..واحد من اكثر التحليل شيوعا في الفترة الأخيرة هو تحليل مقاومة الانسولين مايسمي مجازا بتحليل HOMA IR او homeostatic model of insulin resistance..التحليل بيتحسب من خلال معادلة بتعتمد علي قياس السكر الصائم والانسولين الصائم بعد صيام ليلي فترة زمنية لا تقل عن 8 ساعات..هل التحليل حاسم في تشخيص مقاومة الانسولين:
قطعا الاجابة لاااااااا..معظم الدوريات العلمية اتفقت ان تشخيص مقاومة الانسولين هو تشخيص اكلينكي وان دور الفحوصات المعملية محدود جدا وان تحليل مقاومة الانسولين HOMA IR هو تحليل يستخدم لاغراض بحثية بالاساس وقد ينتج عنه تشخيصات خاطئة في حالات كتير لانه ببساطة بيقيس مستوي الانسولين الصائم اللي بيفرز في نبضات pulses افراز متفاوت من وقت لاخر وبالتالي لا يمكن الحكم عليه وانه ممكن لقياسه تضطر تاخد 3 عينات متتالية وتحصل علي متوسطهم وداصعب جدا عمليا حدوثه وبالتالي يستخدم فقط لاغراض بحثية ..كمان بنلاقي الناس ذهبت لقياس مقاومة انسولين في حالات سكر النوع الاول اللي اصلا الانسولين جزء من علاجهم فبالتالي لا يعبر بتاتا سوي عن جرعة الانسولين اللي تم حقن الطفل بها..في تفكير خاطئ ايضا ان مقاومة الانسولين هي السبب في ثبات الوزن وعدم نزوله ..العكس هو الصحيح معظم الحالات مقاومة الانسولين ناتجة عن زيادة الوزن مع عوامل وراثية وعادات غذائية خاطئة وقلة ممارسة المجهود البدني دا كله ممكن يسبب مقاومة انسولين وبيبقي الحل عند تخصص التغذية العلاجية في تصميم برنامج غذائي يساعد في انقاص الوزن مع ممارسة الرياضة وحتي دور الادوية مثل الميتفورمين محدود جدا تحت اشراف طبي فقط يتم وصفه في حالات معينة تتمحور معظمها في مرحلة ماقبل السكر مع وجود عوامل خطورة لحدوث السكر..والجدير بالذكر ان حتي في مرحلة ماقبل السكر كان مساهمة تغيير نمط الحياة من نظام تغذية صحي ورياضة في منع حدوث السكر حوالي 58% مقارنة بمساهمة الميتفورمين في منع حدوث السكر في 31% من الحالات..طبعا عارف الكلام صادم وممكن يثير هجوما بس دا خلاصة متابعة توصيات ومؤتمرات مصرية ودولية والله اعلم..في الصورة ملمح من ملامح مقاومة الانسولين بنسميه الشواك الاسود واحد من اشهر ملامح مقاومة الانسولين بيبقي لون اغمق من لون الجلد المعتاد له ملمس محبب ملمس السجاد في الرقبة والابط والعانة acanthosis nigrican وماتنساش تقيس محيط الخصر وضغط الدم مع متابعة السكر ودهنيات الدم وتاخد تاريخ مرضي من المريض دا اهم كتير من التحليل.


د . عمرو عمر

26/12/2022