Dr Domin ENT clinic د أحمد دومين أنف وأذن وحنجره

08/12/2025

07/12/2025

01/12/2025

21/11/2025

مع الأخ والصديق الدكتور أحمد أبو يمن بعد العوده من رحله علاجيه موفقه.
نورت مكانك يادكتور أحمد وألف سلامه وإليك أهدى هذه الأبيات
لَيْسَ الصَّدِيقُ الَّذِي تَعْلُو مَنَاسِبُهُ
بَلِ الصَّدِيقُ الَّذِي تَزْكُو شَمَائِلُهُ
إِنْ رَابَكَ الدَّهْرُ لَمْ تَفْشَلْ عَزَائِمُهُ
أَوْ نَابَكَ الْهَمُّ لَمْ تَفْتُرْ وَسَائِلُهُ
يَرْعَاكَ فِي حَالَتَيْ بُعْدٍ وَمَقْرَبَةٍ
وَلا تُغِبُّكَ مِنْ خَيْرٍ فَوَاضِلُهُ
لا كَالَّذِي يَدَّعِي وُدّاً وَبَاطِنُهُ
بِجَمْرِ أَحْقَادِهِ تَغْلِي مَرَاجِلُهُ
يَذُمُّ فِعْلَ أَخِيهِ مُظْهِراً أَسَفاً
لِيُوهِمَ النَّاسَ أَنَّ الْحُزْنَ شَامِلُهُ
وَذَاكَ مِنْهُ عِدَاءٌ فِي مُجَامَلَةٍ
فَاحْذَرْهُ وَاعْلَمْ بِأَنَّ اللَّهَ خَاذِلُه

ملحوظه: استخرج من الصوره ٥ اختلافات 😃😃

26/10/2025

24/10/2025

فيديو شوفته بالصدفه لأحد الممثلين بيحكى قصه بنشوفها كتير فى مجالنا. ناس كتير فى حياتنا نعرفهم مولودين بيسمعوا بأذن واحده ولم يكتشفوا ذلك إلا فى سن كبير، خصوصا فى فترة ماقبل انتشار التليفونات والسماعات وظهور برنامج الكشف المبكر لضعف السمع لحديثى الولاده. الشاهد من الفيديو ان فيه حالات زى كدا ملهاش حل لكنه يقدر يعيش حياته ويتعامل عادى وينجح. شوفوا الفيديو

03/10/2025

البوست السنوى للتوعيه بنزلات البرد المنتشره فى بداية المدارس وفصل الخريفحفظ الله الجميع

11/09/2025

من المؤمنين رجال صدقوا ما عاهدوا الله عليه فمنهم من قضى نحبه ومنهم من ينتظر وما بدلوا تبديلا
علمت حالا برحيل الأستاذ محمد عبيد الدمياطى موجه اللغه العربيه بإدكو ورجل الخير والبر ولا نزكيه على الله.
سمعته الطيبه وسط أهله مصدر فخر لكل من يعرفه، لم يتعامل معه أحد إلا أحبه، من المؤمنين الصادقين الصابرين المحتسبين، عرفت عنه سعيه للخير ونشر العلم ومساعدة الغير.
من لحظة معرفتى بيه وعلى مدار السنين لم أجد منه إلا كل خير، رجل آية فى الاحترام والعلم والإخلاص والوفاء.
رجل ربانى لا يشغله شئ من أمر الدنيا، كل ما يهمه أن يكون من حوله بخير حال، مع إنكار شديد للذات وحب الخير للغير، ودود ومجامل وخدوم وصاحب واجب لا ينقطع عن السؤال والإتصال وإرسال السلامات.
كان يسعى دائما فى الخير ويساعد المحتاج ويخدم مجتمعه بكل ما أوتى من قوه.
رحم الله الرجل العظيم الصابر الصادق ورزق أهله وتلامذته ومحبيه الصبر والسلوان.
إلى روح وريحان ورب راض غير غضبان ياأستاذ محمد ياحبيب الكل، إن القلب ليحزن وإن العين لتدمع وإنا لفراقك ياأستاذ محمد لمحزونون.

04/09/2025

فى ذكرى ميلاد أشرف الخلق .. تدور بالرأس أسئلة لابد منها ..
أين نحن من تعاليمه وأخلاقه
هل نستحق شفاعته يوم القيامه؟
هل نستحق أن يباهى بنا الأمم؟
هل نصرنا المظلوم وأقمنا العدل وأدينا الحقوق؟
هل اقتدينا بسنته وانتهينا عما نهانا عنه؟
دعوه لنا جميعا لنسأل أنفسنا أين نحن من رسالة أكرم الخلق عليه الصلاة والسلام

29/08/2025

وانا لسه طفل صغير كنت بحلم دايما أكون دكتور، كان دايما فى ذهنى الصوره الورديه للدكتور اللى بيعالج الناس ويخفف آلامهم أو ينقذ أرواحهم ويكون سبب فى رسم بسمه على وجوههم.
ربنا أكرمنى ودخلت كلية الطب زى ما كنت بحلم وفى أوائل المحاضرات فى الكليه دخلنا الأستاذ الدكتور صبحى الكفافى فى مادة الفسيولوجى وإلى جانب شرحه الممتع للماده قعد يكلمنا عن مواصفات الطبيب وأخلاقه وانضباطه وحتى طريقة لبسه، والكلام دا فضل محفور فى ذهنى وزملائى من ساعتها.
بعد ما خلصت الكليه وربنا أكرمنى إنى أكون طبيب مقيم فى قسم أنف وأذن جامعة الإسكندريه واتعامل مع أساتذه هم أساطير فعلا فى مجالهم، كلهم بلا استثناء، العلم الغزير، الكفاءه، الأخلاق والتفكير العلمى المحترم، كل واحد مميز جدا فى تخصصه الدقيق، الناس بتجيلهم من كل مكان من خارج مصر حتى بناءا على سمعتهم وشطارتهم وكانوا ومازالوا بالنسبه ليه نماذج وقدوات واقعيه للطبيب الحقيقي.
مفكرتش أبدا أفتح عياده خاصه بيا إلا بعد ما خلصت ماجستير بفتره طويله لأنى دايما كنت معتقد ان دا الصح وان كل الناس بتعمل كدا.
فى البدايه كنت معتقد انى علشان اشتغل فأنا مش محتاج غير يافطه وشوية ورق وبعض الإعلان عن ان فيه دكتور جديد تخصصه أنف وأذن فى المكان الفلانى وتواصلت ساعتها الزملاء علشان اعرفهم بنفسي ومؤهلاتى وشغلى لو كان عندهم حالات محتاجين يبعتوها.
ودا لأن قناعتى الدائمه كانت وستظل ان أفضل دعايه للطبيب إن مريض يقول لمريض تانى ان الدكتور دا كويس وشاطر وعنده ضمير. ومع مرور الوقت أصبح أكتر كلمه بسمعها فى العياده "احنا جايينلك على السمعه" أو "فلان قالى أجيلك وهمشى مرتاح" ، طبعا على قد ما بيفرحنى الكلام دا لكنه برضه بيحط عليا مسئوليه وحمل تقيل بدعى ربنا أكون دايما قده.
والحقيقه ان دا أسلوب كل أساتذتى اللى اتعلمت منهم دون استثناء، دايما المريض جاى بناءا على توصيه من مريض آخر ودايما بيلاقى ضالته.
كل الكلام دا من غير شركات تسويق وفيديوهات فيها طبيب بيرقص أو بيغنى أو عروض وهدايا وكلام ملهوش علاقه بصلب ممارسة الطب.
مكنتش أعرف أصلا لحد وقت قريب ان فيه حاجه اسمها شركات تسويق طبي، تتعاقد معاها فتصنع منك أسطوره على السوشيال ميديا لكنها أسطوره فى الكلام أو الرقص والكلام الفاضى، أسطورة الطب الحقيقيه بتكون فى الكتب والمذاكره وتراكم الخبرات اللى تنفع المريض.
لكن شركات التسويق فسيبلهم نفسك وهما هيعملوا كل حاجه، تصوير، سكريبت جاهز للكلام اللى هتقوله، مواقف هتتألف، شرح لعمليات انت أصلا مش بتعملها وبتجيب حد يعملهالك، فيديو وانت بتطبخ، بودكاست وانت بتتكلم كخبير وغيره وغيره من الحاجات اللى ملهاش علاقه بصلب ممارسة الطب لكنك هتبقى مشهور جدا وعندك فولورز كتير 😃.
فى يوم من الأيام من حوالى ٤ سنوات طبيب زميل حديث التخرج كان معجب بشغلى ونفسه يعمل حاجه علشان يخلينى مشهور أكتر والناس تعرفنى أكتر🙂
لقيته فى يوم جايلى العياده ومعاه شخص تانى، الشخص التانى دا عرف نفسه انه صاحب سركة تسويق ودعايا وانه ممكن يساعدنى انه يعملى دعايه ويصورلى فيديوهات وانا مش هشغل بالى بحاجه وهو هيعمل كل حاجه حتى الكلام اللى هيتقال فى الفيديوهات هو اللى هيكتبه 🤔 وقعد يورينى شغل وفيديوهات هو عاملها لأطباء مشهورين. طبعا شكرته وهو فهم طبعا انى مش متقبل الفكره، ومكنتش قادر أفهم أصلا ازاى حد مش طبيب هيكتب كلام طبي يقوله طبيب .. شئ غريب وعجيب جدا.
تمر السنين وأفاجأ ببعض الزملاء بيعملوا كدا ومتعاقدين مع شركات فعلا بيدفعولها مبالغ طائله لدرجة انى لقيت أكتر من حد معرفوش أصلا بيقول كلام انا كنت كاتبه سواء فى فيديو أو واخده كوبي بيست😀.
بكتب الكلام دا بعد واقعة فيديو الشخص اللى كان بيرقص بطفل لسه مولود وعلى الترولى اللى عليه ست لسه والده بمنتهى الابتذال والرخص.
والأعجب من كدا هو تقبل بعض الناس لحاجات زى كدا وانها فعلا بتجيب شغل لبعض الدكاتره اللى بيعملوا الكلام دا مهما كان مستواهم الحقيقي.
دايما هكون مؤمن بأن الطب الحقيقي مختلف عن كدا وان التوعيه والتثقيف الصحى وحتى الدعايا ليهم طريقه محترمه ومختلفه عن العك والإبتذال اللى بيحصل دا وإن اللي بيبذله الطبيب لتطوير نفسه وتحسين كفاءته أحسن 100 ألف مرة من فيديوهات الرقص والعروض و الجوايز.
تحياتى

08/08/2025

مرض السكرى بعبع حتى لمشاكل الأنف والأذن
مريض ستينى يعانى من مرض السكرى ويتناول علاجه بانتظام إلا أنه لا يتابعه مع طبيبه المتخصص بانتظام، يعتمد فقط على بعض التحاليل العشوائيه، حياة طبيعية هادئه، لكنه فجأه أحس بتورم فى عينه اليمنى، ذهب لطبيب الرمد، وصف له بعض المضادات الحيويه وطلب تحليلا للسكر وأشعة للعين، بدأ فى تناول العلاج لكن التورم زاد فذهب لعمل الأشعه ليكتشف طبيبه وجود خراج بمحجر العين وطبعا ارتفاع فى تحاليل السكر فقام بتحويله لطبيب أنف وأذن زميل مخافة أن يكون السبب هو التهاب مضاعف بالجيوب الأنفيه.
هاتفنى زميلى يناقشني فى الحاله وصدمت عندما علمت أن الرجل بهذه الحال منذ أسبوع وأنه أصبح لايرى بعينه الآن وأن السكر غير منضبط فأدركت فداحة الحاله لكن لابد من التدخل الجراحى لإفراغ الخراج جراحيا وعلاج السبب لكن كل ذلك لن يجدى نفعا إذا استمر تدهور مستوى السكر والحاله العامه للمريض.
راجعت الأشعه وفحصت المريض قبل الجراحة مباشرة وكان رأيي أن سبب الخراج هو التهاب الكيس الدمعى رغم وجود التهاب بالجيوب الأنفية أيضا وكان القرار هو التعامل مع المشكلتين معا.
فوجئ طبيب التخدير بمنظر العين وبالحالة العامة المتدهورة للمريض وتردد قليلا قبل أن يجدد نيته فى نفع المريض مهما كانت العواقب، جراحات لمضاعفات بهذه الخطوره لا تخلو من مشاكل أو مضاعفات لكنه نوى الخير وزاد اطمئنانه عندما أريته صورا لحالات مماثلة وكيف تم إنقاذها.
توكلنا على الله وبدأنا إفراغ الخراج من جرح خارجى بين الأنف والعين ثم بحثنا عن المصدر لنجد أنه الكيس الدمعى فعلا فأتممنا عملنا الخارجى وأكملنا عملنا بالجيوب الأنفية بعد ذلك لتتم الجراحة بخير بفضل الله لكن هناك أسئلة مازالت تدور فى رأسي،
لماذا يستهين الناس دائما بمرض السكرى الذى قد يقلب الأوضاع رأسا على عقب بين ليلة وضحاها؟ وماذا كان ليفعل هذا المسكين لو لم يجد من يساعده؟ وماذا كنت لأفعل أنا إن لم أجد من يعلمنى كيف أتعامل مع هذه الحالات الخطره ويعلمنى ألا أتردد فى مساعدة المريض ونصيحته مهما بلغت خطورة حالته؟ وماذا لو لم يكن توفيق الله هو عونك الأساسي؟
الحاجه المهمه اللى لازم نعرفها إن مرض السكرى لابد من متابعته بحرص لأنه بيأثر حرفيا على كل حاجه فى الجسم وأحيانا بيتسبب فى مضاعفات لا يمكن حلها ودا واقع بنشوفه يوميا للأسف.
وأحيانا الناس بتتصور ان الجراح دا صانع للمعجزات لكن الحقيقه ان الشفاء بالأساس هو من عند الله فقط وما نحن إلا أسباب وظيفتنا فقط نعمل كل اللى نقدر عليه وناخد بكل أسباب العلم لكن يد الله هى الشافيه.
كل حاله بنعالجها أو بنعملها جراحه بنتعامل معاها انها اختبار جديد لينا بنبذل فيها كل مجهودنا لكن مهما بلغنا من مهاره أو شهره بندعى ربنا قبل وأثناء كل حاله انه يسترها معانا وبنتحمل ضغط نفسي رهيب لكن كل التعب والضغط بيختفى بمجرد ما بنشوف تحسن حاله كانت فاقده الأمل أو نشعر بدعاء الناس لينا.
ربنا يحفظكم جميعا

01/08/2025

أحدهم عند دكتور الأنف والأذن