14/12/2022
الجو متقلب جداً اليومين دول وادوار الكحه زياده اوي بمختلف انواعها ،، خدوا بالكم 🚫
☝️بلاش خروج بالليل غير في الضرورة ،، تغيير درجة الحراره من أقوي اسباب عدم تحسن الكحه او زيادتها،،
☝️التهاب شُعبي يعني موسع شعب ودا الافضل ويستحسن يكون جلسات استنشاق وبالأخص في السن الصغير ،،الكحة بتاخد ١٤ يوم علشان تنتهي لكن المهم ؛
الطفل ينام كويس
ومتأثرش علي نشاطه اليومي
ويرضع كويس بدون نهجة
غير كده حجز افضل ..
متابعة الدكتور ضرورية علشان الالتهاب الرئوي بينه وبين الالتهاب الشعبي حُب زياده شويتين 😔
☝️حاسبوا من الكروب (الخناق)
-كحة منبوحة وصوتها مزعج وتحسي فيها الطفل مخنوق
-علاجة استنشاق بخار الميه ،، مع كورتيزون شراب
-وممكن نحتاج جلسات الأدرينالين بجرعات الدكتور يحددها لو الحاله محتاجه
-مفيش أدرينالين !! بنوصف مكانه جلسات بالميكورت
-لأ،، مينفعش معاها موسع شعب
☝️سوايل دافيه
ينسون+نعناع+تليو+ ملعقة عسل ابيض
مفيدة جداً ونتايجها هايلة بالتجربه مع الاطفال بعد سن سنه
طب قبل سنه هي هي من غير عسل ..ودا افضل مذيب للبلغم في الوقت دا ،، لأ ،، بلاش امبروكسول ولا برونكو برو (مذيبات للبلغم) قبل سن سنه ،، لانها بتزود البلغم والطفل مش بيقدر يكحه
☝️النقر علي الصدر من الأمام والخلف والجانبين ،، ودا نوع من العلاج الطبيعي اللي بيساعد في التحسن ،،
والطريقة في اللينك ده 👇
http://youtu.be/4W1PSPJReRI
☝️حساسية صدر وماشي علي بخاخات
نلتزم بيها ،، واكيد الدكتور عملكم خطة طواريء بيها لو الكحه زايدة
☝️نبعد عن المُثيرات
برفيوم-بخور-تراب-دخان-سجااااااير-والروايح النفاذه عموماً
☝️اللي بيروح حضانه او مدرسه وتعبان،، يريح في البيت بدون نقاش ،، دا علشان الدور عنده ميتطورش،، وعلشان خاطر الاطفال اللي هناك ،،معظم اسباب الكحة من الإختلاط للأسف
☝️عنده حساسية انف ومناخيرة سايبه ،،
معلومات مهمه لازم تعرفوها:
٩٠ ٪ من الكحه سببها الإفرازات الخلفيه للأنف
٣٠ ٪ من حساسية الصدر مشترك معاها حساسية أنف
٦٠ ٪ من أدوار البرد والرشح بتقلب بإلتهاب شُعبي بسبب الافرازات الخلفية للأنف
يعني #الأنف باللي فيها عامل مشترك في معظم أدوار الكحه حالياً
مش معقول بقا نكون عارفين كدا وسايبين الواد مرشح أوووفر من غير ما تنظفي مناخيره من البلاوي اللي فيها ✋️
:
🔴سلكوا مناخير عيالكم ،، دعوة لكل الأمهات تتعلم ازاي تغسل مناخير طفلها بإستخدام بخاخ ماء البحر او محلول الملح وشفاط الأنف
🔴مستحيل صدر ابنك ينضف الا اذا منعتي مصدر الافرازات من فوق
🔴مستحيل بخاخات الكورتيزون (نازونكس-آفاميس-نازوكورت ) تشتغل في وسط الكم الهائل من الافرازات اللي موجوده بالأنف
🔴جلسة محلول ملح فقط ،، لها تأثير عجيب في اذابة المخاط اللي موجود داخل الأنف والباقي عليكي .. شفطيه
🔴التنظيف بالبخار steam cleaning
مقصدش سجاد البيت ،، لأ 😂
أقصد مناخير البيه الصغير ،، خديه علي الحمام وشغلي المياه السخنه وخليه يستنشق البخار اللي طالع ،، بتفرق كتير
🔴المواد الطبيعيه زي:
صبغة جاوي للإستنشاق او فابوزول،، ملعقة علي مياه دافيه بس تتحكمي فيه ليضربها بإيده ،، وتحطي فوطه علي راسه ويشم البخار اللي طالع ،، بفضلها للسن الكبير 👌
🔴كريمات الاستنشاق زي -vicks -snuffle baby
تأثيره فظيع وبالأخص للبيبيهات .. بندهنه علي منديل ونسيبه علي صدر البيبي في اقرب مكان لمناخيره
ربنا يحمي أطفالنا ❤️
