24/06/2025
بصوا يا جماعه لكل الناس اللي بتبعت تسال عن التامين الشامل المفروض نحدث البيانات عن طريق احضار صور البطايق وشهادات ميلاد جميع الاطفال عند اخصائي المنافذ فالوحده او المركز اللي حضرتك تابع ليه ... واذا مش فاتح ملف اصلا تاخد نفس الورق وتسجل بياناتك لاول مره ... طب الموضوع ده هيفيدنى في ايه ؟؟؟
اولا التامين الصحي القديم اتلغي ومن ١ يوليو هيكون صرف العلاج تبع منشات التامين الصحي الشامل
ثانيا ..نفقه الدوله برضو تبع منشات التامين الصحي الشامل
فحاليا عاملين حملات توعيه للناس اي حد معاه بطاقه خضراء بتاعت التامين القديم او معاه قرار نفقه دوله يروح يسجل ادويته في الوحده التابع ليها عشان يطلبوها وفي ادويه هيبقي صرفها ليه طريقه معينه ودي هتتشرحلكم ف الوحدات
ثالثا الفحص المدرسي هيبقي تابع للتامين
فمن الاخر خدماتك الصحيه ولو لقدر الله احتجت ادويه غاليه او عمليات هتلجأله فاذا مش فاتح ملف هتضر في ايه ؟؟؟
اولا:الاشتراك اجباري ع كل المواطنين موظف او غير موظف ولو مدفعتش هيتراكم عليك زى ما حاصل ف الاقصر
ثانيا :لو مش فاتح ملف بجانب ان اتخصم منك فلوس الاشتراك هتتوجه تاخد خدمه ف الوحده هيدفعوك تاني لان بالنسبه ليهم انت مش منتفع ومش مسجل هيبقي دفعت مرتين
فنرجو توجه الناس للمنشات ف اسرع وقت لتسجيل البيانات ويا رب اكون قدرت اوضحلكم ولو ف استفسار تحت امركم
تعديل :
أن العدد لو اكتفي ف الوحده مثلا وهو مسجلش هيبعتوه يسجل ف مكان تاني وممكن ع مايروح يكون اكتفي يرجعوا يبعتوه مكان ابعد ف هيتعب ف تلقي الخدمه
ودا حصل ف الاقصر
