19/02/2018
نحو صحه أفضل لأطفالنا
لصحه افضل لأطفالنا احنا محتاجين حاجات كتير بصراحه انا مش عارف ابدأ من فين ولكن خلينا نبدأ بدرى شويه من قبل الجواز (حسن الاختيار) اختيارك لشريك حياتك ليه دور كبير ومردود عظيم على الاطفال لأن االأب والأم الواعيين هم اساس تنشئه صحيه ودينيه وثقافيه ونفسيه سويه للطفل هديك مثال حصل معاى شخصيا كنت نوبتجى وجاتلى أم ومعاها طفلها عمره 12 يوم والواد لونه اصفر زى الكركم قسنا نسبه الصفراء بالدم طلعت رقم عالى خالص طبعا الواد مخه ادمر وهيعيش طول حياته معاق ذهنيا وبدنيا لان الواد فعلا كان كانت اموره متأخره
المهم بسال الأم انتى مش واخده بالك ان ابنك اصفر قالتلى واخده بالى بس الجيران قالولى الصفره هتمشى لوحدها..............
طيب بعد الجواز بشويه حصل حمل لابد للام من المتابعه الجيده للحمل مع طبيب او طبيبه النساء والتوليد ودا بيشمل المتابعات الدوريه للحمل ولو حصل أى مشكله لابد من الرجوع للطبيب المعالج ..وطبعا من الحاجات المهمه ف الموضوع دا التوعيه بضروره التغذيه الجيده وبعض الادويه اللى يتتاخد خلال فتره الحمل وايه اللى مينفعش مع الحمل ....على سبيل المثال حمض الفوليك اللى ليه اهميه كبيره فى تكوين الجهاز العصبى للأطفال وياما شفنا حالات فيها مشاكل زى مثلا ان الطفل تقريبا الجمجمه بتاعته مفيهاش مخ واغلبها سائل بسبب ان الام مكانتش بتاخد حمض الفوليك ....وبالمناسبه حمض الفوليك المفروض يتاخد قبل الحمل اصلا اه والله زى ما بقلك كدا .
طيب الحمد لله الحمل عدا على خير وخلاص عرفنا بالتقريب معاد الولاده حاولى تتأكدى ان مكان الولاده مكان مجهز وتتاكدى من تواجد طبيب اطفال اثناء الولاده عشان يتولى هو مسؤليه الطفل بعد الولاده لأن اول دقايق بعد الولاده دى اهم وأخطر الدقايق فى حياه الطفل وياما فى اطفال بيحصلها مشاكل وبتعانى طول حياتها بسبب ان المكان مكانش مجهز او مكانش فيه دكتور اطفال والامثله على دى كتير خالص وأشهرها ان الطفل ينزل بعد الولاده ومش بيتنفس ودى حالات كتير جدا والتعامل معاها ليه قواعده العلميه اللى ف الغالب لواطبقت الامور هتمشى كويس وان شاء الله بتعدى زى الفل لكن للأسف احيانا كتير بيحصل تأخير ولا يتم التعامل مع الحاله كما ينبغى وللأسف بتنتهى بنتائج كارثيه كتدمير خلايا المخ بسبب نقص الاكسجين
طيب الأمور عدت على خير والطفل الحمد لله اموره زى الفل دا بقا اسمه طفل حديث الولاده ودا هيبقى لينا ان شاء الله كلام كتير عنه فى مقالات جايه ان شاء الله
