Marwan Chest Clinic

29/08/2025

سعدت وشرفت بالمشاركة في تنظيم المؤتمر السنوي العاشر للرعاية التنفسية المقام علي مدار يومين في فندق شيراتون القاهرة بالدقي
كما قمت بإلقاء محاضرة
بعنوان Modes of mechanical ventilation in daily clinical practice: Safety and efficacy
خالص الشكر والتقدير لاستاذي الفاضل ا.د خالد حسين علي الدعوة الكريمة Khaled Hussein
وألف ألف مبروووك نجاح المؤتمر وعقبال كل سنة إن شاءالله

13/08/2025

عيادة نقادة - الجمعة اسبوعيا اعلي مركز الصفوة للأشعة

10/08/2025

إلقاء محاضرات عن الأنماط المختلفة التي يمكن أن نتعرض لها عند مناظرة الاشعة المقطعية علي الصدر
لعدد من الأمراض الشائعة في تخصص امراض الصدر
ضمن فعاليات المؤتمر السنوي الرابع عشر لقسم الصدر جامعة اسيوط

10/08/2025

مشاركتي في ورشة عمل تدريب النواب والأطباء بمستشفيات الصحة وأسيوط الجامعي علي استخدام الموجات فوق الصوتية علي الصدر في تشخيص بعض الأمراض الشائعة في تخصص امراض الصدر ضمن فعاليات المؤتمر السنوي الرابع عشر لقسم الصدر جامعة اسيوط

10/08/2025

عيادة الاقصر -السبت اسبوعيا

16/02/2025

11/01/2025

هنتكلم عن الالتهابات الفيروسية المنتشرة حاليا وكل شوية نسمع عن اخبار في الصين أن مستشفياتها مليانة مرضي.

هو احنا عندنا في مصر موجودة الفيروسات دي اه موجودة ومن زمان كمان.

هل في علاج يعالج الفيروسات دي؟
للاسف مش كل الفيروسات ليها علاج أو تطعيم
بس الحاجة المطمئنة أنها بتبقي اعرضها خفيفة وبتخف
مع استعمال خافض الحرارة والسوايل.

النقطة الأهم ازاي نحمي نفسنا من الفيروسات دي!!!

لازم نلبس الكمامة في الأماكن المزدحمة (المواصلات،العيادات،المستشفيات،المولات الكبيرة).
لازم تعقم ايديك بكحول بعد لمس اي شئ ،ومتلمسش وجهك أو أنفك
غسل اليدين جيدا
شرب السوائل بشكل جيد
اكل الفواكه والخضروات
بلاش اكل المطاعم والسناكس
لو حد اخد الدور يعني رشح ،عطس ،سخونة،تكسير بالجسم،كحة ،نهجان يفضل يعرض نفسه علي الطبيب
ويعزل نفسه بمعني يلبس كمامة وأدواته
ويبعد عن الاطفال وكبار السن ذوي الأمراض المزمنة لأن الدور معدي واعراضه شديدة في هاتين الفئتين.

11/01/2025

هنتكلم علي نقطتين مهمين في مرضي حساسية الصدر ومرضي الربو الشعبي (السدة الرئوية المزمنة).

اولا: الجلسات التي تعطي بجهاز الفاركولين هل المريض هيتعود عليها؟؟
قولا واحد لا. بالعكس دي بتبقي مفيدة جدا في الحالات دي
بس بشرط يبقي الدكتور هو اللي كاتبها وبجرعات محددة.

وبالنسبة للبخاخات بأنواعها المختلفة هل المريض بيتعود عليها؟؟
هنا لازم عزيزي المريض لازم تبقي عارف نقطة مهمة،ان مرض الحساسية والربو الشعبي دي أمراض مزمنة زي الضغط والسكر لازم تمشي علي علاجها اللي هو البخاخة.

وهنا ييجي السؤال أنا مش عايز امشي علي البخاخات عايز امشي علي برشام أو شراب!!!!!
للاسف حالات الحساسية والربو الشعبي العلاج بالبخاخات افضل وسيله للعلاج،البرشام والدواء أضراره الجانبية اكتر وخصوصا انك محتاج تمشي عليه فترة طويلة.

لو تسمحلي مريضي العزيز ليه مش عايز البخاخة ؟؟؟؟؟

علشان مظهرك وخصوصا في السيدات!!! أعتقد صحتك اهم.

علشان هتولف عليها زي مبتقولوا!!! لا لأن ده علاج بيعطي بهذه الطريقة.

ممكن حضرتك مريضي العزيز هو ليه الحساسية أو الربو بتاعي شديد واجبر الطبيب علي كتابة البخاخات لفترة طويلة ؟؟؟

ايه رايك في التدخين سواء سجائر ،شيشة،مضغة،سجاير إلكترونية او سجائر لايت اللي بتقولوا عليها اخف.
او زي مبتضحكوا علي نفسكم وتتفاخروا انك قللت من علبتين وتلاتة الي علبة واحدة وحضرتك معتبر ده إنجاز!!!!!

احب اطمنك لو سيجارة واحدة،نفس واحد من السيجارة أو الشيشة هيفضل صدرك وحش.

من الاخر لازم الاقلاع عن التدخين نهائيا لو عايز تحافظ علي الرئيتين.

اكيد حضرتك مش هتسيبني وهترد عليا فلان بيشرب من هو صغير وعمره لم يشتكي من صدره !! هذا لايعني صدره سليم عزيزي المريض ولو عمل فحص وظائف الرئة هيلاقي في تأثر أكيد.

طيب فلان مش بيدخن وماشي علي البخاخات وصدر وحش ايه رايك بقي يادكتور!!!! احب اقولك أن التدخين ده سبب من الأسباب ،وفي حاجات تانية بتأثر علي الصدر وعوامل وراثية كمان في بعض الأحيان.

مش هسيبك يادكتور أنا بطلت ماشاء الله ليه يومين ولسه صدري زي مهو!!!
اكيد تأثير التدخين مش هيختفي في يوم وليلة بس دي الخطوة الصح ياريت متدخنش تاني وهتدعيلي.

طيب يادكتور أنا مش قادر اوقف التدخين، ضغوط الحياة والمشاكل والخ ،كل دي اعذار ملهاش لازمة.

الإقلاع عن التدخين هو إرادة وعزيمة.

في أدوية بتساعد بس بتبقي غالية ولازم تكون معاها إرادة قوية.

وفي حاجات تانية بتزود الحساسية والربو الشعبي
التدخين السلبي ،انك تجلس مع مدخنين أو في كافيه غير جيد التهوية مليان مدخنين.
الافران البلدي في الريف المصري
حرق مخلفات الذرة
وجود المصانع في أماكن سكنية زي مصانع السكر،والطوب.

حاول تحافظ علي صحتك .الصحة غالية ولاتعوض.

11/01/2025

هنبدأ نتكلم بعض النصائح والتوصيات للمريض لما يروح يكشف.
اولا: المريض لازم يحدد المشكلة اللي رايح يكشف عليها بناء علي ذلك يتم اختيار الطبيب المتخصص
مفيش حاجة اسمها الدكتور بيعرف في كل حاجة،او سمعت أن الدكتور ده مسمع او أيده طايله وهيعرف يعالجني
لو مش في تخصصه مش هيفيدك.
في حد ممكن يقولي المريض مش بيعرف يحدد.
ومثال على ذلك:
علي الاقل متبقاش مثلا مشكلته السكر مش متظبط ويروح لدكتور صدر أو قلب .حتي لو بيعرف؛ المتخصص بيبقي متمكن لازم يروح لدكتور غدد صماء .لو مش متاح يبقي دكتور باطنة افضل .
حضرتك بتشتكي من كحة مزمنة أو تزييق في الصدر.
او نهجان تتوجه لدكتور صدر هيقيمك أفضل.
لو الم بالمعدة أو ترجيع ،اسهال الافضل تتوجه لطبيب جهاز هضمي .مش متاح يبقي طبيب باطني

ليه النقطة دي لأن كل تخصص ده بحر من العلم صعب اي طبيب يبقي متمكن في كل التخصصات.

ثانيا: في حاجة اسمها بيانات المريض والتاريخ المرضي

لازم لما يسألك عن اسمك مثلا بلاش اسم الدلع أو الشهر
لازم اسمك اللي في البطاقة أو شهادة الميلاد للأطفال
وطبيعة العمل مهمة لأنها ممكن تكون سبب أو بتزود المرض اللي عندك.

أما التاريخ المرضي ده مهم جدا لانه بيتبني عليه التشخيص
وده بيتمثل في الأعراض اللي بتشتكي منها ومدتها ،الاعراض لو لها ايام اكيد هتفرق لو لها سنين.

حاجة تانية مهمة لو عملت فحوصات سواء تحاليل أو اشعات قديمة مهم انك تاخدها معاك،بلاش إن الدكتور مش بيعترف بها أو هيطلب جديد.
ممكن يطلب جديد بس سواء اشعات أو تحاليل بتكون غالبا للمتابعة أو الدكتور شايف حاجة معينه تستدعي ذلك هتفيده في التشخيص أو وصف العلاج.

حاجة اخيرة الأدوية اللي انت ماشي عليها بصفة مستمرة
لازم تاخدها معاك أو تبقي حافظ اسماؤها، بلاش حتة العلبة لونها ازرق او اخضر.او البرشام علي شكل قلب أو مثلث.

مريضي العزيز حاول مضيعش وقت الكشف في المناهدة
ترتب كلامك ،تاخد ادويتك واشعاتك معاك.

دمتم في افضل صحة وحال