عيادة د. ايناس السيسي

24/03/2020

نظرا للظروف اللي بنمر بيها سيتم إغلاق العيادة بداية من الغد حتى منتصف شهر أبريل
وخليكم في البيت
ونظرا لهذه الظروف ودعما لعدم النزول يتم استقبال استفساراتكم على جروب الواتس
https://chat.whatsapp.com/J1UzrY6xzSCD0OERonzoqy
دوس على اللينك هيتم اضافتك للجروب
دمتم سالمين

04/02/2020

شوية نصايح لكل ام:
- مش اي ارتفاع في درجة الحرارة معناه ان الطفل محتاج مضاد حيوي بالعكس معظمها بيبقى التهاب فيروسي.
- حقن المضاد الحيوي متفرقش حاجة عن المضاد الحيوي الشرب الا في سرعة الاستجابه عشان كده ممكن نبدأ بيها ونكمل بالكاد الحيوي الشرب
- مينفعش ندى حقن مضاد حيوي بس ومنكملش بشرب.
- اقل مدة لمعظم المضادات الحيوية ٧-١٤ يوم ماعدا بعض الانواع تؤخد ٣ ايام فقط.
- اي سخونية في طفل عمره اقل من شهر - - > علامة خطر لابد من الكشف عليه فورا.
- السوايل الدافية افضل من اي دوا كحة.
-اي كلكوعة في الرقبة او في اي منطقة في الجسم لازم كشف بس لو بتوجع اطمني إنما لو مش بتوجع لازم تحاليل وفحوصات لاستبعاد اسباب معينة.
وربنا يحمي أطفالنا جميعا

18/01/2020

أمهات كتير مبتكونش مقتنعة ان مش أي ارتفاع في درجة الحرارة بيكون محتاج مضاد حيوي.. أو بمعني آخر بتكون قلقانة جدا جدا انه الدكتور سايب ابنها سخن يوم واتنين و ساعات اسبوع " وده منتشر جدا الايام دي"
في الحقيقة هو مش استخسار ولا رغبة في الاختلاف.. السبب البسيط ان اكتر من 90 في المية بيكون السبب عدوي فيروسية بالذات في الأطفال. طب اوك.. اديله برده مضاد حيوي... مش هيضره...
هنا أختلف معاكي.. هو يمكن مش هيضره دلوقتي او كمان يومين او كمان شهرين.
لكن هو ممكن يضره بعدين..ومش هو بس.. ده هيضر أطفال تانيين..أكبر و أصغر..ده هيضر أطفال عمرهم ما أخدوا مضاد حيوي قبل كده...و هيضر أطفال خدوا مضادات حيوية كتير..و مش هبالغ لو قلت انه ممكن يضر أطفال لسه متولدوش...
الصورة اللي انا حطاهاه بتوضح ان البكتيريا الضارة جدا المقاومة للمضادات الحيوية زي ما هو واضح عددها قليل جدا في اول صورة من الشمال...قليل لدرجة انها متقدرش تعمل اي مرض او أي اعراض. ودي موجودة عندنا كلنا لكن متقدرش تعمل حاجة لان عددها قليل و لان وجود البكتريا بالانواع الاخري المسالة وحجمها كتير و منافساها علي المواد الغذائية.
نيجي احنا ندي مضاد حيوي..كل البكتريا تموت...ماعدا المقاومة له..اللي تلاقي فرضة ذهبية انها تبرطع و تتكاثر و تكبر..كل مرة بدي مضاد حيوي بدون سبب ..الفرصة بتكرر لها اكتر و اكتر لدرجة انها تقدر تنقل مقاومتها ديه لاجيال جديدة منها.. وتبدا يبقي عندها القدرة انها تتتنقل من طفل لطفل و تبقي المشكلة أكبر و اكبر و اكبر.لدرجة ان ممكن ييجي اليوم اننا نلاقي بكتريا مقاومة لكل انواع المضاد الحيوي علي وجة الارض.و ده بدا يحصل.
طب خلاص نسيب العيال تسخن ومنديش حاجة..لا طبعا.
خلي عندك توازن وتصرف صح..لا تجري عالصيدلية تشتري مضاد حيوي..و لا ترفعي سماعة التلفون او تكتبي علي اي جروب و تسمعي نصايح الناس اللي تقولك لا اوعي تدي مضاد حيوي..
ببساطة انزلي اكشفي و تخيري طبيب اطفال علي مستوي جيد و معروف انه مش اول خطوة عنده انه يدي مضاد حيوي..
و عشان افهمك اكتر..الطفل لما يسخن,,لازم يتفحص كويس جدا جدا جدا...لو فيه سبب واضح لارتفاع دجة الحرارة..زي ما الدكتور يقولك..خلاص نتخير نوع مضاد حيوي مناسب لطبيعة العدوي...مش نروح نجيب اقوي مضاد حيوي في العالم ونديه عشان الموضوع يخلص في يومين..
لو مفيش سبب واضح للعدوي و ده الدور المنتشر حاليا... يبقي دور الطبيب انه يتابع الولد يوميا برقم تلفون طواريء او اعادة كشف في خلال يويمين لعل و عسي حاجة تظهر او الحرارة تبدا تنزل..
في علامات خطر اي طبيب عارفها و ساعتها الموقف بيتقيم علي اسس فردية..
لو الحرارة طولت شوية يبقي الخطوة الصح تحاليل دم تساعدنا في التشخيص ..مش مضاد حيوي..
طيب في امهات كتير بتقول ان الطفل اول ما بياخد المضاد الحيوي الحرارة بتنزل..غالبا لانك استنيني كفاية و اديتي المضاد الحيوي في اللحظة اللي كده كده كانت هتنزل فيها..
و نداء لي طبيب أطفال فهم الأم كويس....علمها علامات القلق اللي تخليها تتحرك و العلامات اللي متقلقش و يكفيها خوافض حرارة بسيطة و مننساش اننا ليناا دور كبير في ثقافة الأمهات.
يومكم جميل.

03/11/2019

أعلنت وزارة الصحة والسكان بجمهورية مصر العربية عن بدء الحملة القومية للتطعيم ضد الحصبة، والحصبة الألمانية ، يوم 4/11 وستستمر 3 أسابيع.

وتستهدف الحملة تطعيم الأطفال ابتداءً من سن 9 أشهر وحتى 6 سنوات في جميع المحافظات
وفي المحافظات الحدودية سيتم التطعيم ابتداءً من سن ٩ شهور وحتي ١٠ سنوات

ويتم التطعيم من خلال الوحدات الصحية، القوافل الطبية، ومكاتب الصحة، والحضانات والمدارس، ابتداءً من أول شهر نوفمبر وتستمر لمدة 3 أسابيع.

15/10/2019

معلومة طبية مهمة
فيتامين د من اهم الفيتامينات للطفل للتطور العقلي والبدني
اوصت منظمة الصحة العالمية أن جميع الاطفال من الولادة لابد من اخذ 400 وحدة ( 4 نقط) من فيتامين د حتى عمر سنة

15/10/2019

معلومة طبية مهمة
90%من حالات الرشح والسخونية والكحة بتبقى دور برد فيروسي لاتحتاج لمضاد حيوي
منتسرعش وندي مضاد حيوي لكل طفل بيسخن وندي فرصة لجهاز المناعة يقضي عليه
لابد من استشارة الطبيب وفي معظم الحالات لايعطي الطبيب مضاد حيوي الا للضرورة.

30/09/2019

معلومة طبية للامهات
مفيش اي اثبات علمي ان حقن الكورتيزون بكل انواعها بتستخدم في خفض السخونية
بل بالعكس اعطاء حقن الكورتيزون لخفض السخونية تؤدي لخفض مناعة الجسم وقد يؤدي إلى تدهور حالة المريض من دور برد بسيط لدور شديد
متديش ابنك حقنة السخونية ارجوكي

31/08/2019

استقبلوا عامكم الهجري الجديد بالتوبة.. وأروا الله من أنفسكم خيرا.. فكم من مستقبل يوم لا يستكمله ..
كل عام وانتم بخير

05/08/2019

طرق التبرع للمعهد القومي للأورام بعد تفجير امس

03/07/2019

01/07/2019

التطعيمات الاختيارية:
بوست مهم اوي اوي احفظيه عندك عشان تدي ابنك التطعيمات دي بالاضافة للتطعيمات الاجبارية اللي بياخدها
التطعيمات دي من اهميتها في دول كتير بتديها اجباري للاطفال

1- تطعيم الروتا
(Rotarix ) أو(Rotateq )

للوقاية من النزلات المعوية و مضاعفاتها اللي اخطرها الجفاف

غالبا بندي ال Rotarix جرعتين ..عند عمر شهرين و 4 أشهر ( 2،4 )

لو حندي Rotateq يبقي عند 2،4،6

2- تطعيم المكورات الرئويه

( Prevenar) أو ( Synflorix)

للوقاية من الالتهابات الرئوية وإلتهابات الأذن الوسطي وإلتهابات المخ

2،4،6،15 شهر (4 جرعات) ... (يمكن للجرعه الرابعه المنشطة ان تعطي حتي عمر 18 شهر)

لو نسينا ومخدش اول جرعة عند عمر شهرين

# لو لسه مكملش 6 شهور ياخد ال 3 جرعات الاولي عادي بين كل جرعة والتانيه شهرين (بمعني لو أخد اول جرعه عند عمر 4 شهور ..ياخدهم 4،6،8 ولو اخدها عند عمر 6 شهور يبقي 6،8،10 ) وياخد الجرعه المنشطه ف ميعادها عادي (15 شهر)

3- تطعيم الجديري المائي

( Varilrix ) أو ( Varivax)

للوقاية من الطفح الجلدي الذي يسببه chickenpox virus

- لا يأخذ قبل سن سنه

- لا يؤخذ لذوي المناعة الضعيفة والمصابين بسرطان الدم و الإيدز و ممنوع للأطفال اللي ماشية على كورتيزون

- لو عمره أقل من 13 سنة >> حياخد جرعة واحدة والأفضل ياخد جرعتين بينهم 3 شهور

- لو عمره فوق 13 سنة >> حياخد جرعتين بينهم شهرين على الأقل

- اللي جاله جديري قبل كده مياخدش التطعيم

- لازم نفصل شهر بينه وبين اي تطعيم حي زي ال ( الروتا..نقط شلل الاطفال .. MMR )

4- تطعيم الالتهاب الكبدي الوبائي A

(Havrix )

للوقاية من الالتهاب الكبدي الوبائي A

- لا يأخذ قبل سن سنه

- اي سن فوق سنه >> ياخد جرعتين بينهم 6 شهور او ممكن بينهم حتي 18 شهر لو نسينا

- الأطفال الأكبر من عمر سنة ومسافرين بلاد نائية فيها التهاب الكبدي الوبائي A منتشر لازم يتطعموا على الاقل ياخدوا جرعة واحدة شهر قبل السفر

- الأطفال الأصغر من عمر سنة بياخدوا أجسام مضادة للفيروس "immunoglobulins" قبل السفر

5-تطعيم_الإلتهاب_السحائي

(Menveo )

- للوقاية من إلتهاب المخ و إلتهاب الحبل الشوكي والحمى الشوكية

- لا يتم إعطاءه قبل سن شهرين ويفضل أن يؤخذ بعد سن سنتين

- لو عمر الطفل شهرين >> حياخد 4 جرعات عند سن 2 و 4 و 6 و12 شهر

- لو عمر الطفل من 7 شهور وحتى 23 شهر >> حياخد جرعتين ما بينهم 3 شهور على الأقل إلى سنه.

- اللي جاله حساسية قبل كدة من تطعيم الديفتيريا او من الجرعة الاولى من التطعيم ده مياخدش جرعة تانية منه

- يفضل إعطاءه لو حد ناوي يسافر الحج خلال شهور وهياخد معاه اطفال

6-تطعيم الانفلونزا الموسمية

( VAXIGRRIP ) أو ( INFLUVAC)

للوقاية من نزلات البرد

- لا يأخذ قبل 6 شهور

- لو عمره 6 شهور ل 3 سنوات >> نص الحقنه (0.25 مل)
- لو اكبر من 3 سنين >> الحقنة كاملة (0.5 مل)

- تأخذ سنويا ف بداية الشتاء شهر سبتمبر و اكتوبر و نوفمبر و ممكن ديسمبر ( جرعة واحده )

- ماعدا ف الاطفال من 6 شهور ل 9 سنوات .. في اول مره ياخدوا فيها التطعيم بياخدوا (جرعتين بينهم شهر) وبعدين عادي كل سنة ياخدوا (جرعة واحده سنويا )

التطعيمات دي مش رفاهية لو تقدر تقدمهم لطفلك متتاخرش لان زي مابنقول دايما الوقاية خير من العلاج

26/06/2019

قواعد مهمة لحديثي الولادة
1- رضعي طبيعي
2- تطعيم الدرن في اول شهر
3- اربع نقط فيتامين د في دروب من اول يوم
4- بلاش اعشاب وبيبي درينك
5- كحول للسرةوقطرة للعين
6- تطعيم فيروس بي في اول 24 ساعة
7- لو طفلك اصفر استشيري طبيب غالبا صفرا طبيعية وهتروح بالرضاعة
8- مفيش حاجة اسمها لبن او فيتامين للصفرا الصفرا حلها يا رضاعة يا حجز في حضانة
9- اي سخونية في اول شهر من العمر انذار بالخطر ولازم كشف
10- لازم يكون عندك ترمومتر في البيت تعرفي طفلك سخن ولا لا
درجة الحرارة الطبيعية للجسم 36.8-37.2
11- لازم تعرفي وزن ابنك عند الولادة ودكتور الاطفال لازم يحطه علي منحنيات النمو ويتابعه
12- متخليش حد يقنعك باللبن الصناعي حاولي مرة واتنين وتلاتة ترضعي طبيعي لبنك افيد لابنك وليكي كمان
13- لو السرة طالعة بره متربطيش عليها حاجة هتخف ان شاءالله قبل سن سنتين
14- لحد سن 6 شهور ابنك مش محتاج غير لبنك فقط
15- الزغطة، الخنفرة، الحزقة عادي جدا وهتختفي مع الوقت
16- حاجات تقلقك لو ابنك رافض الرضاعة، بيزرق او ينهج مع الرضاعة، مدروخ ومش واعي
17- ابنك لازم يعمل براز في اول 24 ساعة من العمر لو معملش لازم استشارة عاجلة
18- لو بنت اتاكدي من فتحة المهبل ولو ولد حسي الخصيتين واتاكدي من فتحة القضيب في مكانها ولا لا
ابنك او بنتك نعمة ربنا ادهالك ومسئولية لازم تكوني ادها