30/11/2021
#منقول
بس مكتوب بطريقه سهله وبسيطه فحبيت أنقله عالصفحه
تغذية الطفل من عمر 6 شهور وحتى سن البلوغ
المرحله الأولى ... من عمر 6 شهور وحتى عمر سنتين ( سن الفطام )
اتكلمت عن المرحله دي قبل كده في بوست تغذية الرضع وشرحتلكم الاكل يدخل تدريجيا ازاي ويكون شكله ايه ابتداء من بيوريه (مهروس جدا ) ليزداد سمكا كل شهر عن التاني لحد مانوصل للقوام الصلب مابين 10-12 شهر
بالنسبه لنوع الاكل ... مبدئيا كده الطفل في المرحله دي بندربه ع الاكل وحده وحده يعني بنعرفهم ع بعض معنى ذلك الاكتئاب والهلوسه الي بتصابوا بيها عشان ابنك الي عنده 10 شهور مبياكلش غير معلقتين ملهمش أي تلاتين لازمه هو قدرته ع الاكل كده تحمدي ربنا وتبوسي ايدك وش وضهر :-D :-*
من الشهر 6-8 ...هتبدئي بانواع الاكل الامن نسبيا من ناحية الحساسيه الي هيا : سيريلاك الأرز، الخضراوات ، والفواكه المسلوقه والمهروسه (أي نوع الطفل يتقبله ) كلهم مسموح بيهم ... بطاطا , بطاطس , بروكلي , قلقاس , كوسه, جزر , تفاح , خوخ , مانجو , موز , كمثرى , جوافه المهم تراعي الفروق المسموحه في دخول كل نوع عشان لو حصل أي عرض من اعراض الحساسيه تعرفي من انهو نوع
بالظبط ... في المرحله دي هيكون الاكل وجبه وحده لوجبتين بالكتير .
من الشهر 8-10 .. هنزود ع الي فات البروتينات الحيوانيه زي ... الفراخ والسمك وصفار البيض طبعا تستوي كويس جدا جدا وتتهرس بيوريه , الزبادي ( كامل الدسم ) بحذر شديد جدا , منتجات القمح من عيش أو مكرونه أو سيريلاك قمح .. قوام الأكل هيزيد سمكا فالمرحله دي وممكن نوصل لوجبتين فاليوم
من الشهر 10-12 ... كل الاكل الي فات ولكن سمكه يزيد يبقى شبه صلب زي احنا مابناكل ومع تقبل الطفل للاكل وانواعه هيزيد عدد الوجبات ل 3 وجبات يوميا ونثبت مواعيدهم .
ملحوظه.... ابنك هيشرب ميه عادي جدا من 6 شهور وزي ماهو عايز مفيش كميه محدده بس متنسيهوش
لو ابنك عجبته فكرة ال finger feeding يعني يمسك الاكل في ايده احترميها واديه اكل ينفع يمسكه فايده
الممنوعات في المرحله دي ..
الملح ... لأن كلى الطفل غير مستعده للتخلص منه
العسل ... بسبب احتماليه حدوث تسمم بعدولى بكتيريه منه
السكر وممكن تستخدمي المحليات الطبيعيه في وجبته زي الموز أو الفواكه المجففه
بعض أنواع الاسماك زي سمك القرش :-D
الشاي والقهوه , الوجبات منزوعه أو قليله الدسم لأننا في المرحله دي محتاجين كل سعر حراري زياده
المنتجات الي تدخل بحذر شديد وذلك لاحتمالية الاصابه بالحساسيه وخصوصا في الاطفال ذوي التاريخ العائلي أو المصابين بحساسيه صدر ...
الحبوب وذلك لاحتوائها ع مادة الجلوتن ,الأسماك , الحمضيات , زبدة الفول السوداني , فول الصويا , البيض , اللبن البقري .
أعراض حساسيه الطعام بتيجي في شكل ... مغص , اسهال , قئ , طفح جلدي
من عمر 12-24 شهر ... الطفل بياكل كل حاجه وأي حاجه مدام معندوش منها حساسيه هيقعد معاكم ع السفره وهياكل من اكلكم مع مراعاة اكتمال الوجبه وشمولها للعناصر الغذائيه الاساسيه ( نشويات, بروتين , خضراوات , منتجات البان , فواكه
نظرا لأن الطفل في هذه المرحله بيبقى غتيت وبياكل بالتيله فالعيال الرزله دي هنستمر معاهم بالفيدروب وفيتامينات وليكن مثلا مارفيت او البافيت وطبعا لازم يكونوا محللين صورة دم كامله ومتطمنين ان مفيش انيميا .
هياكل كام وجبه بأه .... اهم حاجه هنا العدد وليس الكم بمعنى ان ابنك وجبته رزله وصغيره خليكي انتي ارزل منه وكل ساعتين او 3 تأكليه ولومعلقتين بالتالي لما أقولك انه المفروض يأكل 3 وجبات رئيسيه معاكم ووجبتين سناك مش هيجيلك صدمه عصبيه وهتتقبلي الموضوع بابتسامه صفراء :-D
حاجه بأه انا شايفاها هتساعدك شويه فتنظيم وجبة ابنك ... هاتي طبق متقسم 4 خانات عشان وانتي بتحضري وجبته هتحطي في كل خانه النوع بتاعها وبالتالي هتغطي كل احتياجاته ومش هتنسي
لو حصلت ظروف وفطمتيه بدري أو كان بيرضع صناعي وهتحولي للبن بقري او جاموسي يبقى ابنك له 3 اكواب لبن كامل الدسم يوميا .
من سن سنتين ل 6 سنين طبعا الاحتياجات مش بتزيد بالعكس بتفضل زي ماهيا بس لان ابنك مكانش بياكل كويس قبل السنتين عندنا أمل انه يوفي احتياجاته كل مايكبر مش هشغل بالكم بحساب سعرات حراريه أو غيره بس هقولك ثبتي عدد الوجبات ومواعيدها , ادي وجبتين سناك يكون بيحبهم يوميا , ركزي ع العصائر الفريش ومتكسليش تعمليها , امنعي الحلويات الي رايحه جايه من الماركت لأنها بتسد نفسهم , اتأكدي بصفه دوريه ان ابنك لايعاني من الأنيميا وعالجيها وتابعي وزنه وطوله باستمرار .
من سن 7 سنين في اطفال بيكونوا بيجهزوا لمرحلة البلوغ خصوصا الإناث والاكل والتغذيه السليمه مهمه جدا لأن سوء التغذيه بؤدي الى تأخر البلوغ
مفيش كلام هقدر ازوده فالسن الي اكبر من كده بس هركز ع شوية نقاط ...
الكتاب والهرم الغذائي بيقولوا ان ابنك او بنتك فالوجبه لازم نغطي العناصر الاساسيه كلها ولكن لو ابنك في نوع معين مبيحبوش ميجراش حاجه ومش لازم نبات ونقوم نندب حظنا :'( :'( في حلول كتير للتعويض يعني ع سبيل المثال
مبياكلش فاكهه ... اعمليله عصير فريش هيا هياها ماعدا حبة الالياف الي في قشرة الفواكه ممكن نستبدلها باننا بدل العيش الابيض يبقى اسمر ونزود في اكل الخضراوات شويه بقشرها طبعا
مبياكلش خضار مطبوخ ... عاااااادي جدا ياكل الخضار الفريش وركزي ع الخضراوات الورقيه
مبياكلش لحمه .... طيب مالفراخ والسمك والبيض بروتينات حيوانيه برضه ولو مأكلش اي نوع منهم اي حاجه منهم بتنوب عن التاني وبيؤدوا نفس الغرض ... اه والله :-D
مبياكلش الجبنه .... يشرب لبن وياكل زبادي مش اخر الدنيا
مبيشربش لبن .... حطي اللبن ع معظم اكلك ... رز . كيك . بشاميل . عصائر . كريم كراميل . رز بلبن وهكذا
بالمناسبه من عمر سنه وحتى 18 سنه المفروض يشرب 3 اكواب لبن يوميا عشان توفر الكالسيوم المطلوب فالسن ده ويكون لبن كاااااااامل الدسم متخترعوش ابوس ايديكم :-\
مبياكلش فاكهه ولا عصاير يبقى نعوض احتياجنا للفيتامينات من الخضراوات
طالع اسم الله عليه نباتي بحت خلاص هنديله البروتين الي محتاجه من البروتينات النباتيه زي الفول والعدس والحمص .... ويفضل لو تعملي ميكس لنوعين منهم في صنف واحد عشان يغذيه بال essential amino acid الي مش موجوده غير فاللحوم الحيوانيه زي الكشري المصري مثلا
طيب ابنك في سن المراهقه وشبطان في الأكل الجاهز.... في امهات كتير اعرفهم بيحيبوا الاطباق والفويل ويعملوا السندويتشات او البيتزا أو أو ويغلفوها لعيالهم كأنهم شارينها !!:-D :-D
الخلاصه .... متعمليش من اكل ابنك مشكله طالما انتي ممكن تحليها وتطوره ونموه الجسدي تمام ... احنا بنعتبرها مشكله تستاهل انك تروحي لدكتور لما الطول والوزن والنشاط يتأثر هنا يدق ناقوس الخطر ..
تنبيه بأه عايزه اقوله مفيش حاجه اسمها طفل يعمل رجيم أو دايت حتى لو وزنه زياده ... في حاجه اسمها هننظم اكله يبقى صحي وسليم ونشوف نظامه ايه متخلوش حد يضحك عليكم .
يارب كون عرفت اجمعلكم معظم اسئلتكم ومااشوفش سؤال تاني بيقول أأكل ايه لاني ممكن يجرالي حاجه .
من جروب
دكاترة عيال علي اد الحال
