25/08/2024
ناس كتير اوي ماتعرفش انواع عمليات تصحيح الابصار هيا ايه اغلب الناس بتفتكر انها نوع واحد بس وخلاص
في البوست ده هنحكي باختصار شديد اوي علشان الناس تفهم وتعرف التطور الي حصل 🙂
البدايه كانت سنه 1950 عالم اسباني في كولومبيا اخترع مشرط علشان يقطع بيه القرنيه قطع صغيره علشان يغير شكلها وبالتالي قوتها تتغير وتدينا مقاسات جديده
فضل الحال كده لحد سنه 1970 عالم روسي اخد فكره الراجل الاسباني ده وطور المشرط وطريقه القطع بحيث يعمل قطع في القرنيه بشكل عامودي داير مايدور 360 درجه بحيث القطع ده مايوصلش لنص القرنيه يبقى في الاطراف والعمليه ده اسمها بالعربي ( شق القرنيه الشعاعي )
في سنه 1980 شركه اي بي ام بتاعت الكمبيوتر عارفنها !!! ابتكرت ليزر اشعه فوق البنفسجيه يحرق حته معينه في نسيج اي كائن حي من غير ما يشوه باقي المكان الي حواليه
بعد 5 سنين جامعه امريكيه اخدت الليزر ده و قالت نعمل عمليه شق القرنيه الشعاعي فكرينها بس القطع بدل مايكون بالمشرط هيبقى بالليزر
طبعا مش عاوز اقولكو ان العمليه بتاعت شق القرنيه ده سواء بالمشرط او بالليزر كانت النتائج وحشه جدا والمريض كان بعد فتره بيشتكي جامد والمقاسات بتاعت عينه بتدهور لدرجه ممكن يوصلو انهم يعملو عمليه زرع قرنيه
في اواخر الثمانينات علماء من شركه اي بي ام بتاعت الكمبيوتر قالو نشوف طريقه تانيه نستخدم فيه الليزر على العين ومن هنا كانت بدايه (الليزك)
البدايه انهم شالو اول طبقه من القرنيه بكحول مخفف وبعدين ننزل ليزر عليها وسمو العمليه ده ( ليزك سطحي )
طبعا لقو في سلبيات وايجابيات ومن اهم السلبيات انه كان المريض بيقعد فتره من اسبوع لشهر عينه بتحرقه جامد والنظر بياخذ وقت شهر على الاقل ما الرؤيه تبقى صافيه فقالو ليه مانستخدمش المشرط والليزر مع بعض!!!!
سنه 1990 عملو مكنه فيها مشرط بتاع عمنا الاسباني زي بتاعت تقطيع اللانشون الي في السوبر ماركت يقطعو بيها القرنيه عند سمك معين ويضربو بعد كده الليزر عليها ... طبعا العمليه ده عملت طفره كبيره اووووي في جراحات العين من حيث الامان وان الرؤيه يوم عن يوم بتوضح وفي فتره قصيره - خلال اسبوع- والمريض بيكون راضي جدا وسمو العمليه ده ( ليزك او ليزك عادي )
بعد كده اتطور الليزر وطريقه العمليه بقى في حاجه اسمها
( ليزك تفصيلي و الترا ليزك ) وده انواع معينه من تصحيح الابصار فيه الليزر مختلف من حيث الدقه وده على حسب فحوصات المريض ومقاس نظارته
في سنه 2007 قالو ليه مانستخدمش وحده الفيمتو ساكند بتاعت زويل في الليزر راحو عاملين ال( فيمتو ليزك ).
ايه هوا الفرق بقى بين الفيمتو ليزك والليزك العادي؟؟؟؟
الفرق انه الليزك العادي بيكون القطع بالمشرط انما في الفيمتو الي بيعمل القطع هوا الليزر نفسه
ناس تيجي تقولي يادكتور طب ما كده الفيمتو ليزك احسن هجاوب واقول انه الاتنين بيدو نفس النتائج لو الدكتور شاطر
كل الي احنا قولناه ده بيصلح بس الناس الي عندها مشكله في المسافات البعيده جم الناس الي عندها مشكله في القراءه قالو اشمعنا احنا ... احنا مش عاوزين نلبس نظاره برضو
العلماء لاقو مشاكل ومعوقات كتير في تصحيح النظر للحاجات القريبه بس في حلول بنعملها زي اننا نعمل ليزك لعين للمسافات البعيده والعين التانيه نعمل ليزك للقراءه.
بعدين اخترعو طريقه ليزك للقراءه للعينتين لاقو انه النتايج مش حلوه بالذات لو انت كنت قاعد في ضوء ودخلت مكان مظلم
قالو خلاص بلاش ليزر ونزرع عدسه متعدده البؤر ( يعني بتصلح البعيد والقريب ) جوا القرنيه او جوا العين
اخر حاجه اكتشفوها للقراءه (سوبراكور) وبرضو مش لكل الناس ولازم فحوصات وكلام كتير عليه اغلب الدكاتره لسه مش بتثق فيه
ده باختصار موضوع الليزك او تصحيح الابصار بالليزر🙂
طبعا مش شرط انه العمليه تكون غاليه او حديثه يبقى ده افضل حاجه ليك ... اشعه تخطيط القرنيه ومقاس النظاره والكشف على العين هوا الي بيحدد انهي نوع مناسب لك
لو عجبك البوست ماتنساش تعمل لايك وشير للصفحه علشان تعرف وتفهم كل حاجه تخص العين👀👁👀👁
دكتور رامي حسين القاشر
#ليزك #شبكية #الليزك #ليزك #ألتراليزك #فيمتوليزك #التراليزك #ليزليزك #شبكية
