21/02/2025
👈 لما تزور دار مسنين و تسمع حكاياتهم هتفهم و تتعلم ..(ان العطاء بلا هدف حتى لو لأولادك منتهى الغلط)،
هتعرف ان و انت بتسعى تدي اولادك حياه كريمه و تساعدهم يحققوا أحلامهم لازم تعمل لنفسك حياه و تسعى في تحقيق احلامك انت كمان لأنك هتتحسر لما تكبر ..(و تلاقي ولادك اللي انت خليتهم رقم واحد في حياتك خلوك رقم ١٥.) مش عشان هما وحشين لا عشان دي سنة الحياه و بقى عندهم عائله غيرك و الحياه مشاغل ، هتحس بالحسره لما تلاقي دكتور و لا رجل اعمال و اي شخص ميسور الحال بعد أبوه مات اخد بيت وورث امه و رماها في دار مع ناس ماتعرفهاش و حرمها من بيتها و ذكرياتها و خصوصيتها و نفس الكلام مع الأباء
هتسمع من أم انها كانت بتاكل بواقي أكل ولادها عشان توفرلهم هما الوجبه الكامله و لما كبرت و مابقتش عندها قدره صحيه و لا ماديه استخسروا فيها حتى بواقي الاكل و شافوا ان ولادهم اولى بكل حاجه و انتي مش هتعيش قد اللي عيشتيه
هتسمع من اب أتغرب عمره كله عشان يوفر لأولاده حياه كريمه انه لما كبر و قرر يرجع يعيش وسطهم قالوله احنا مشغولين محدش فاضى والدنيا تلاهى و احمد ربنا ان هندفعلك رسوم دار
هتسمع قصص تخليك تراجع نفسك مليون مره بس اصعب جزء هو دموع كبار السن و رعشة أيديهم و هما بيحكوا
خلاصه الموضوع
راعى عيالك كبرهم علمهم. اتقى الله فيهم. بس متنساش نفسك.👌
لايك ومتابعة ليصلكم كل ماهو جديد ❤❤❤
