عياده د/صموئيل حنا إيليا للتوليد وأمراض النساء

26/01/2026

٥ خطوات بسيطة للحوامل الجدد اذا كانوا راغبين فى الولادة الطبيعية ..
اول خطوه .....التثقيف الصحى ومحاوله القراءه من بدايه الحمل والبحث عن الموضوع و الاهتمام بمعرفة الملابسات المتعلقة بالولادة الطبيعية وانك تمتلكى المعرفة السليمة الخاصة بالولادة بعيدا عن الموروثات و الافكار المغلوطه
ثانيا ...الحركة و الالتزام بحد معين من النشاط اليومى وعدم النوم فترات طويله عن الحد الطبيعى
المشى المستمر بيسهل كتير حدوث الولادة ...
ثالثا ..التغذية السليمة الاهتمام بالخضار والفواكه والألبان والجبن والتقليل من النشويات والسكريات و الاهتمام بان زيادة الوزن اثناء الحمل تكون بدرجة معقولة علشان تتجنبى المشاكل الكتير المتعلقة بزيادة الوزن ومنها صعوبة الولادة الطبيعية ...

رابعا ...الانتظار و عدم الاستعجال اثناء الشهر التاسع طالما كل العوامل مستقرة
٥٠٪ من السيدات الحوامل قد يتأخر حدوث الم الولادة حتى نهاية الشهر التاسع ......
خامسا..... عدم تطبيق تجارب الأخرين على حالتك دون رجوع للطبيب
لكل حاله ظروف صحيه وبدنيه ونفسيه قد تسهل او تمنع الولاده الطبيعيه واللى حصل مع قريبتك او اختك او جارتك مش بالضروره يحصل معاكى

22/01/2026

♥️مريم ماركو عادل نشأت ♥️
مكس من تيتا وبباها ومامتها
حلويات الشرق
حلويات العيله
ومتابعتها كانت من أحلى المتابعات
ربنا يفرح قلب بابا وماما بكى
وشكرا لتيتا الجميله لأنها إهتمت بمشاركه الصور معانا

21/01/2026

الجيل الجديد بيتعامل مع فصيله الدم كأنها تحليل تافه ملهوش لازمه
بعد الولاده بيتصلوا يسألونى هو فصيلتنا ايه علشان دكتور الأطفال طالبها لمتابعه الطفل
لما ببساطه اسألهم كنوع من الفضول
مش التحليل لما طلبته من حضرتك روحتى به بيتك انا سجلت البيانات منه عندى وسيبتهولك تحتفظى به
بتكون الأجابه صادمه
اصل رميته لما روحت البيت
طيب السؤال التانى قبل ما ترميه ما فكرتيش تسألى عن فصيلتك ليه سواء من المعمل أو منى
دا معناه ان معلومات الجيل الجديد عن الفصيله وأهميتها يكاد يكون صفر
أبائنا كان بطايقهم مكتوب فيها نوع فصيله الدم
علشان لو لا قدر الله حصل حادث او أى مشكله المستشفى ما تضيعش وقت فى عمل تحليل للفصيله ويتم نقل الدم بسرعه
جيل أبائنا حتى لو مش متعلم كان حافظ فصيلته وبيسمعها ولو فرد من العيله احتاج نقل دم ييجوا المستشفى ومعاهم المتبرعين مختارينهم لانهم عارفين فصيلتهم
الفصيله مش بتتغير بالتحليل ذى باقى تحاليل الجسم يعنى هتفضل هى هى لغايه اخر العمر
وهتحتاجيها اكيد فى يوم من الأيام
فبطلب من الجميع لما نعمل التحليل نحاول نحفظ نوع فصيلتنا ونكتبه عندنا
وياريت زملاءنا فى المعامل وهما بيسلموا التحاليل للناس يعمقوا فى أذهانهم اهميه الحفاظ على المعلومه دى

19/01/2026

التدخين السلبى هو تعرض غير المدخنين لاضرار التدخين عن طريق التواجد فى اماكن بها مدخنين ...
التدخين السلبى يمثل نفس خطورة التدخين التقليدى على الناس عموما و على السيدة الحامل بصفة خاصة ...
من الاضرار المثبتة للتدخين التقليدى او السلبى على الحمل الاتى ...
زيادة احتمالات الاصابة بالجلطات اثناء الحمل ..
زيادة احتمال الاصابة بامراض الرئة ..
نقص وزن و نمو الجنين ..
زيادة احتمالات اصابة الاطفال بالربو و امراض الرئة
الولادة المبكرة ..
زيادة احتمالات الموت المفاجئ لحديثى الولادة ...
وغيرها كتييير ..
علشان كدة لو حضرتك حامل و احد افراد العيلة مدخن لابد من اتباع الاتى ...
ممنوع تماما التدخين داخل المنزل حتى ولو فى غرفة اخرى لان اثار التدخين قد تستمر لمدة ٣ ساعات فى الاجواء المحيطة و قد لايكون هناك اى لون او رائحة ملحوظة ..
التأكد من عدم التدخين داخل و سائل المواصلات ...
دمتم اصحاء ...

17/01/2026

لينك الاستبيان للناس المهتمه
انصح الجميع بمحاوله الأستفاده من المبادره

إجرائك لفحص سرطان عنق الرحم مبكرًا يقلل من فرص إصابتك ويحميكي من المضاعفات الخطيرة في حالة الإصابة👌

مبادرة رئيس الجمهورية للكشف المبكر وعلاج الأورام السرطانية تقدم خدماتها من الكشف والمتابعة والعلاج بالمجان✅

الاستبيان الإلكتروني الخاص بالمبادرة:
https://shorturl.at/anBHM

16/01/2026

بناتنا شرق النيل
قمرات الشرق
♥️كادى هشام ربيع♥️

14/01/2026

من ٨ سنين ونص يا مون
مينا الصغير
ذى ما العيله كلها بتندهله
اول مره اساعد معاك
كان يوم مميز بحضورك اتعلمت فيه منك دروس كتير
ولسه لغايه النهارده كل يوم بتعلم منك حاجه يا غالى
وحشتنا كتير يارب نشوفك على خير قريب

13/01/2026

حبيب خالو إتبسطت بالزياره بتاعتك يا أمور
♥️مراد ♥️ Ester Ayad Mina Safwat

12/01/2026

من المهم جدا جدا ان السيدة الحامل تتوخى الحذر و تكون حريصة اشد الحرص اذا كانت بتتعامل مع اطفال او رضع سواء كان ده من خلال وظيفتها زى اطباء الاطفال او التدريس او رياض الاطفال او اذا كان من خلال تواجدهم فى البيت اذا كانت ام لاطفال صغار ...لان تعامل السيدة الحامل مع الاطفال ممكن يخليها عرضة للاصابة ببعض الميكروبات اللى ممكن تمثل خطورة على الحمل زى
العدوى الفيروسية بالجديرى او الحصبة الالمانية او فيروس بارفو او الفيروس الخلوى (CMV)..
او بعض الطفيليات زى التوكسوبلازما
و دى كلها ميكروبات قد تهدد سلامة الحمل ..
لذلك من المهم لكل سيدة حامل لها اختلاط مستمر بالاطفال اتباع التعليمات الاتية ....
١- الاهتمام بغسل الايدى المستمر خاصة بعد ملامسة فضلات الاطفال ..
٢- استشارة الطبيب المعالج اذا لاحظت اى نوع من انواع الطفح الجلدى عند الاطفال المتواجدين معها فى نفس المكان ..
٣- عند حدوث اى اعراض شبيهة بنزلات البرد للسيدة الحامل ..
٤ - تجنب التقبيل الفموى للاطفال لتجنب انتقال العدوى عن طريق اللعاب ...

11/01/2026

هل فى أى حد من مواليد العياده تاريخ ميلاده
٢/٢٠

10/01/2026

اكتر من ١٠ بالمائة من السيدات صغيرات السن بيعانوا من مشكلة اضطرابات نمو الشعر الزائد فى اماكن معينة من الجسم اهمها الوجه ..
السبب الاشهر هو تكيسات المبيض فى اكتر من ثلثين الحالات
هناك اسباب اخرى زى اضطرابات الغدة الكظرية
انما فى حوالى ٥٪ من الحالات بيكون بدون سبب واضح .....
طرق العلاج متعددة ..منها استخدام اقراص منع الحمل او بعض مضادات هرمون التستوستيرون بالاضافة الى طرق التجميل زى الليزر
نتائج العلاج بتبان بعد حوالى ستة اشهر او سنة من بداية استخدامه علشان كدة متستعجليش و توقفى العلاج من بعد شهر او اتنين من استخدامه ....
فى بعض الحالات بيكون استشارة الطبيب امر ضرورى جدا و عاجل جدا لو كان الموضوع مفاجئ و عنيف او مصحوب بأعراض اخرى زى تغيير الصوت او لو كان ابتدأ يحصل بعد سن انقطاع الدورة ....
دمتم اصحاء ....