28/03/2021
بعد الماما ما عرفت تعمل ايه ف عينة البراز وعرفت تحليل البول بيتعمل ليه من بوستاتنا الى فاتت,
تعمل ايه بأة ف عينة البول؟
ورقة وقلم واكتبى معايا يا ست الكل :-D 📝
خلينا متفقين ان افضل عينة هى الى بتتجاب فى المعمل وفى عبوة من المعمل لانها بتبقى فريش
بس ساعات بنضطر طبعا نجيبها ف البيت
علشان المدرسة, يمكن على سفر, او العينة نفسها مطلوب احضار اول عينة صباحا لعمل مزرعة او لفحص الصديد, او بعض التحاليل بيتطلب لها تجميعة بول 24 ساعة
الحل ايه بأة؟ احنا دلوأتى ناس واعيين وعارفين ان فى فحص كيميائى, فبسم الله الرحمن الرحيم احضار عينة مجيبش علبة دوا واغسلها بصابون سايل واقول للمعمل نضيفة والله .. دى اسمها جريمة مركبة :-D
لان مش كل دوا هيروح من جدار الازازة بالمية
اكتفى بهذا القدر بأة؟ لاء حطيت عليه مادة كمان تعمل تفاعل جديد الا وهى الصابون السايل :-D .. تحلفى ايمانات الله ان الازازة ناشفة هنقول لك متنفعش برضه .. لان حتى لو نشفت بيتبقى منها اجزاء على جدار العبوة وبتتفاعل مع البول اول ما يتحط
تيجى ام متفتحة :-D وبتاخد وتتدى كدة تقول لك بلاش ازازة الدوا خالص طالما مزعلاكو .. العينة اهى و ف علبة نضيفة جدا والله, وترتسم على ملامحها نشوة الانتصار .. نفتح الكيس .. جواه كيس .. جواه الكيس الى جوا الكيس كيس تانى 🧐 .. مفاجأة .. علبة زبادى 😆 .. انا محدش يتوقعنى 😅
سيبونى اضربها على بؤها الولية دى 🤪
بالاضافة ان علبة الزبادى ينطبق عليها الكلام اعلاه الا انها كمان بتحتوى على البكتريا, الى وجودها تحت الميكرسكوب بيودى الطبيب لسكة معينة بفحوصاتها بتشخيصاتها
طيب انا عندى علبة جديدة بس قديمة .. كانت مرمية كدة وجبت فيها العينة, جميل .. مش هيبقى ليها تأثير على الفحص الكيميائى اد كدة .. لكن هتفرق تحت الميكرسكوب .. لو فيها شوايب كتير هتغطى على الى مفروض اننا بندور عليه
علشان كدة افضل عبوة لتحليل البول هى العبوة المعقمة .. بتتجاب من المعمل او الصيدلية, تتحط ف التلاجة .. متزيدش عن ساعتين .. وشكرا 🙋♀️
ولو حابين نزيد ف القَيامة يعنى ونمشى زى ما الكتاب بيقول 🤓
فيفضل غسل المنطقة كويس بالمية والصابون وتجفيفها قبل احضار العينة لازالة احتمال البكتريا او الفطريات من خارج مجرى البول
ويكون البول midstream .. يعنى نفرغ جزء ف الحمام الاول قبل ما نفرغ ف العبوة
احتياطات احضار العينة امان وثقة ليك ولنتيجتك 📜.. مش غتاتة من المعمل صدقنى 😅
دمتم بكل خير
طيب افكرك لو نسيتى بالاخطاء اللي بتعملها الام المصريه في عينه البراز؟ شكلك مش عارفها .طيب الحقي اعرفيها >> من هنا 👇
https://www.facebook.com/makka2009/photos/a.685652158486234/685652118486238/?type=3&theater
طيب لو عايز تعرفي تحليل البول بيتعمل ليه ؟ ممكن تعرفي >> من هنا 👇
https://www.facebook.com/makka2009/posts/688867244831392?__tn__=-
لو شايف انك استفدت .ياريت تفيد غيرك وتكون و تعرف الناس معلومه ممكن تفيد حد...وادعوا اصحابك للاعجاب بالصفحه..لايك وشير بقا كتير .وانتظرونى في معلومات تانيه
ولو فيه موضوع حابين نكلم عنه ياريت تقولوا اقتراحاتكم في التعليقات
--------------------------
بلقاس شارع محمد فريد بجوار استوديو حسنى
01014186361
الفرع الثانى: بلقاس ميدان المحطة بجوار موقف المنصورة
01093767801
