04/09/2025
متابع معايا ف العيادة طفلة ٣ سنين كان والدها و والدتها ييجوا يكشفوا عليها و بعدين اتولد ليها من شهرين أخ الأب هو اللي جه يكشف عليه أول أسبوع .
ع عمر شهر لقيت الأم جاية تكشف عليه و عرفت ان الأب عمل حادثة و مات !!
و بعدها بشهر تقريبا جت تكشف و معاها حماتها و أخت جوزها و وقتها الطفل كان تعبان و محتاج حجز....
طريقة الكلام مع الأم انها هي السبب و الكلام من تحت لتحت بيقولوا ليها كمان مش كفاية أبوه !! كأن هي السبب ف الحادثة . رغم المصيبة اللي حصلتلها و اللي عايشة فيها و زعيق ليها ف العيادة بطريقة غريبة و طبعا هي كانت بتقولهم هو اللي كان بيحميني منكم !!
هو احنا ليه كده ؟!!! آه ابنك مات و ربنا يرحمه و يكون ف عونك بس مرات ابنك اللي مات ده فقدت زوجها و كمان ف رقبتها طفلين لسه صغيرين خالص محتاجة حنانك عليها و رحمتك بيها . ليه دايما بنقدم الشر و العداوة ؟!!! ليه منبقاش بيت واحد و عيلة واحدة و نساعد بعض اننا نتحمل المصاب اللي حصل و نربي العيال اللي اتيتموا بدل م يعيشوا ف مشاكل و يطلعوا مش أسوياء ؟!!
احنا محتاجين نرجع لربنا بجد و نخاف ربنا ف كل تصرفاتنا و منسيبش الشيطان يتحكم فينا بالطريقة دي ...
