د.محمد صلاح Dr.Mohamed Salah

04/09/2025

18/08/2025

من المشاكل الموجودة في الاكتئاب الطريقة اللي بتتكلم بيها مع نفسك.. كلامك لنفسك وفكرتك عن نفسك ليهم دور كبير أوي في التأثير على مشاعرك وقراراتك.

04/06/2025

فيه نظرية نفسية مهمة جدًا في فهم العلاقات اسمها "نظرية التعلق"، بتقول إن طريقة تعامل أهلنا معانا، وإحساسنا بالأمان معاهم وإحنا صغيرين، بتأثر جدًا على شكل علاقاتنا وإحنا كبار.

الطفل اللي اتعامل باحتواء واهتمام وقت الخوف أو الزعل، بيكبر حاسس بالأمان، وبيعرف يحب ويثق في اللي حواليه.
أما اللي اتعامل بتجاهل أو قسوة أو لخبطة، ممكن يكبر عنده مشاكل في علاقاته، سواء بيخاف يفقد الناس، أو بيبعد عنهم من الأول.

فيه كذا نمط من أنماط التعلق:
١- التعلق الآمن:
بيحس بالأمان وسط الناس، بيحب وبيتحب، وبيعرف يطلب الدعم وقت ما يحتاجه.
٢- التعلق المتجنب:
بيحس إن الاعتماد على حد ضعف، فبيبعد عن الناس، ومابيعرفش يطلب مساعدة، دايمًا عامل نفسه مش محتاج.
٣- التعلق القلق:
عنده خوف من إن اللي بيحبه يسيبه، بيطلب حب زيادة، وبيقلق بسرعة، وبيبقى مش واثق في الناس.
٤- التعلق غير المنظم:
ده غالبًا بيكون نتيجة تجارب صعبة زي الإهمال الشديد أو العنف، وسلوك صاحبه بيكون متلخبط، ساعات يقرب وساعات يبعد من غير سبب واضح.

مهم جدًا تعرف إن حتى لو علاقاتك وانت صغير كانت مؤذية، وتعلقك أصبح غير آمن سواء تجنبي أو قلقي، إنت ممكن تتعافى، وتتغير.
العلاقات الآمنة، والوعي، والعلاج ممكن يغيروا حاجات كتير.

التعلق مش ضعف.. التعلق احتياج إنساني أساسي.
كلنا محتاجين نتحب، ونتشاف، ونتطمن إننا مش لوحدنا.

يا ترى أنت شايف نفسك أقرب لأي نمط من دول؟ وهل عمرك حسيت إنك بتتصرف بطريقة مش فاهمها بسبب جرح قديم؟

كل نمط وراه قصة.. يمكن قصتك فيها وجع، لكن الأكيد إنها ممكن تكمل بالوعي مش بالوجع.

02/06/2025

فيه ناس لما بتغيب.. بتاخد معاها حتة من روحك، من قلبك، من تفاصيل أيامك.
ويمكن أصعب ما في الفقد إنك تفضل شايفهم في كل تفصيلة، حاسس بيهم في كل لحظة، من غير ما يكونوا موجودين.. الأماكن اللي بتنادي عليهم، والذكريات اللي بتفضل حية كأن الزمن واقف مش بيتحرك، والتفاصيل اللي كانت بسيطة وهما فيها، وبقت تقيلة قوي من غيرهم.

الفقد وجع ساكن، صوته هادي، لكن صداه ما بيختفيش..
ممكن تعدي سنين، وتفتكر إنك بقيت تمام، وفجأة كلمة، صورة، ريحة، ترجعك لأول لحظة وجع، كأنك لسه فيها.

إحنا مابننساش، إحنا بنتعايش.. بنحضن ذكرياتهم، ونحكي عنهم، ونفضل شايلينهم جوانا بحب لحد ما نتقابل من تاني.

#الفقد

04/04/2025

تخيل تكون قادر تتكلم عادي مع أهلك في البيت، تضحك، تحكي، تعبر عن نفسك، لكن أول ما تلاقي نفسك وسط ناس تانية، صوتك يختفي!
تحاول تتكلم، تلاقي الكلام محبوس جواك، كأن فيه حاجة كاتمة صوتك ومش مخلياك تقدر تنطق، مش لأنك مش عايز، لكن لأنك مش قادر.

اللي بيعاني من الصمت الانتقائي مش حد خجول أو بيعمل نفسه ساكت، ده شخص عنده خوف شديد بيخليه يفقد القدرة على الكلام في مواقف معينة، خصوصًا مع الناس اللي مش متعود عليهم.. وده مش عناد ولا عدم رغبة، ده قلق حقيقي بيشل اللسان وبيخلي أي محاولة للكلام شبه مستحيلة.

الموضوع بيبدأ من الطفولة، لما الطفل يكون عنده قلق اجتماعي شديد، أو يكون مر بتجربة مخيفة خلت عقله يربط الكلام بالخطر..
في البيت أو مع الأشخاص اللي بيحس بالأمان معاهم، بيكون طبيعي جدًا، لكن أول ما يخرج للمدرسة أو أي مكان جديد، يحس كأن الدنيا اتقفلت عليه، وصوته يختفي.

والتحدي الأكبر إن الناس حواليه مش دايمًا بتفهم، ساعات يفكروه بيتدلع، أو بيعمل نفسه غامض، أو حتى يعاقبوه على سكوت مش بإيده، وده بيزود الضغط عليه أكتر.. وبدل ما المشكلة تتحل، تكبر، ويبقى الخوف أقوى، والصمت أعمق.

العلاج مش في إننا نقوله "اتكلم وخلاص"، ولا نحطه تحت ضغط عشان يواجه مخاوفه بالعافية.. الموضوع محتاج علاج نفسي يساعده يتعامل مع الخوف، وياخد خطوات صغيرة تخليه يقدر يعبر عن نفسه من غير ما يحس بالخوف الشديد. لأن المشكلة مش في صوته.. المشكلة في الخوف اللي حبسه جواه.

30/03/2025

كل عام وأنتم بخير بمناسبة عيد الفطر المبارك.. أسعد الله أيامكم، وأعاده عليكم بالخير واليمن والبركات. تقبل الله منكم الصيام والقيام، وجعل العيد فرحة تملأ قلوبكم وسعادة تغمر أرواحكم.. عيد سعيد.

29/03/2025

تخيل تصحى في يوم تلاقي نفسك مش قادر تحرك إيدك أو رجلك، أو فجأة صوتك يختفي، أو تحس بتنميل وشلل في جزء من جسمك من غير أي سبب عضوي واضح.. تروح لدكتور، يعمل لك فحوصات وتحاليل، وكل حاجة تطلع سليمة، ومع ذلك الأعراض مستمرة! هنا ممكن تكون بتواجه اضطراب عصبي وظيفي (FNSD).

الموضوع مش تمثيل، ولا ضعف، ولا مجرد أوهام.. ده اضطراب نفسي حقيقي بيحصل لما العقل يعجز عن التعامل مع مشاعر صعبة أو ضغوط كبيرة، فيبدأ يعبر عنها بطريقة تانية، عن طريق الجسم.. كأنه بيقول لك.. أنا مش قادر أستحمل أكتر من كده، فيترجم المعاناة النفسية لأعراض جسمية واضحة.

الأعراض دي ممكن تكون فقدان حركة، رعشة، تشنجات، فقدان الإحساس، أو حتى مشاكل في الرؤية والسمع، وكلها بتحصل من غير أي سبب عضوي يفسرها.. وده اللي بيخلي الشخص اللي بيعاني منه يتوه بين العيادات والفحوصات، من غير ما يلاقي تفسير واضح لحالته، وده في حد ذاته بيزود الضغط النفسي عليه.

لكن رغم إن السبب نفسي، ده مش معناه إن الأعراض مش حقيقية، بالعكس.. هي مؤلمة ومرهقة وبتأثر على حياة الشخص بشكل كبير.. والعلاج مش بيكون مجرد إهدى وماتقلقش، لأن المشكلة أعمق من كده ومحتاجة علاج نفسي يساعد الشخص يفهم إزاي الضغوط أثرت عليه بالشكل ده، ويتعلم طرق صحية للتعامل مع مشاعره بدل ما جسمه يتحمل العبء لوحده.

لو حسيت إنك أو حد تعرفه بيعاني من أعراض مش مفهومة رغم إن كل الفحوصات سليمة، ماتتجاهلش الموضوع، لأن الحل مش في التجاهل، الحل في الفهم والعلاج.. لأن الجسم ساعات بيصرخ عشان يقول اللي بيعجز عنه اللسان.

27/03/2025

يوسف أخيراً اتكلم.. بعد فترة كبيرة من الكتمان والخوف، وكأنه كان مستني لحظة أمان، عشان يخرج كل الكلام اللي كان شايلها جواه.

في البداية، لما أبوه سأله ليه مش بيحكي له عن اللي بيضايقه، كان الرد بسيط جداً.. عشان إنت طول الوقت مشغول.. هنا الجملة دي مش مجرد شكوى.. دي أول علامة على إن الطفل لما يحس إنه مش مسموع، هيختار الصمت بدل الكلام، وهيبدأ يدور على حد تاني يسمعه.

لكن لما سأله عن وسام، كل حاجة اتغيرت.. هنا يوسف نطق بالحقيقة الصعبة.. وسام وحش.. وسام هو اللي علّمني اللعبة الوحشة اللي كنت بلعبها مع ياسين.

الجملة دي تهز أي حد.. مش بس عشان الحقيقة اتكشفت، لكن لأنها بتورينا قد إيه الطفل اللي بيتعرض للأذى ممكن من غير قصد يتحول لوسيط ينقل الألم لحد تاني.. ودي واحدة من أخطر الحاجات اللي بتحصل في حالات الإساءة، إن الطفل اللي اتعرض للانتهاك ممكن يعيد تمثيل التجربة مع غيره، مش بدافع الأذى، ولكن بدافع الفهم.. لإنه بيحاول يفسر اللي حصل معاه بنفس الطريقة اللي عاشها.

وهنا تيجي الصدمة الأكبر للأب.. لما أدرك إنه مش بس ماعرفش يحمي ابنه، لكنه كمان شكك في اللي بيحصل طول الوقت.. رد فعله كان تلقائي، طبيعي لأي أب يحس إنه فشل في أهم حاجة.. الحماية.

- أنا آسف.. أنا آسف يابني.. أنا اللي وحش عشان ماكنتش جنبك، ماعرفتش أحميك.
الجملة دي لوحدها بتختصر كل المشاعر اللي ممكن يحسها أي حد يكتشف إن ابنه كان طول الوقت بيتعرض للأذى وهو مش واخد باله.. لكن الحقيقة اللي لازم تتقال هنا إن الاعتراف بالخطأ بداية الإصلاح.. مافيش أضعف من طفل بيتعرض للأذى وماحدش مصدقه، ومافيش أقوى من طفل قادر يحكي ويتسمع ويتصدق.

27/03/2025

مشهد بسيط، بكلام قليل، بس كل كلمة فيه كانت سكينة بتغرز في قلب نيللي..

ياسين إبنها الصغير بيحكي بكل براءة عن لعبته الجديدة..
لعبة سر.. بيلعبها مع أخوه يوسف، والهدية اللي بياخدها بعد كل مرة، نجمة سحرية.. الصبح بتبقى عادية، وبالليل بتنور في الضلمة.

كلامه عادي، صوته عادي، ملامحه فرحانة.. بس المعنى اللي وراه كان أكبر من إنها تكون مجرد لعبة.

في اللحظة دي، الدنيا كلها اتقلبت عند نيللي.
الخوف، الصدمة، الأسئلة اللي مش قادرة تستوعب إجاباتها..
كل حاجة كانت بتنهار في لحظة، بس هي عارفة إنها لازم تسمع، لازم تستوعب، لازم تفهم..

مشهد هادي من برا، بس عاصفة بكل ما فيه من جوا.

النجمة دي ما كانتش مجرد لعبة..
النجمة دي كان وسام بيديها ليوسف بعد كل مرة كانوا بيلعبوا لعبتهم السرية.. يوسف وقتها كان فاكر إن دي طريقته في الدلع، في الاهتمام، وإنها حاجة بينهم محدش غيرهم يفهمها.
ومع الوقت، النجمة دي اتنقلت من يوسف لياسين.

هنا المشهد بيقول حاجات أكبر بكتير من اللي ظاهر..
بيحكي عن دايرة بتبدأ بضحية، وبدون وعي، ممكن تستمر وتتنقل لشخص تاني. عن الأثر اللي ممكن يفضل موجود، حتى لو اللي اتعرض له يوسف انتهى.

بس يوسف فهم.. فهم قبل فوات الأوان، وعرف إن النجمة دي ماينفعش تفضل موجودة.. النجمة اللي بتنور في الضلمة.. كان لازم تطفي قبل ما الضلمة تكبر أكتر.

21/03/2025

كل سنة وكل أم بخير..

الأم مش مجرد كلمة، دي حياة كاملة جوه شخص واحد.. أول حضن، وأول سند، وأول ضحكة حقيقية في الدنيا.. اللي مهما كبرت أو بعدت، بتفضل شايفاك طفل صغير محتاج لها، واللي حبها مالوش شروط ولا مقابل..

الأم هي اللي بتشيل همك من قبل ما تحس بيه، وبتدعيلك أكتر ما بتدعي لنفسها، واللي مستعدة تديك كل حاجة حتى لو هتتعب أو تستحمل عشانك.. مافيش حاجة في الدنيا ممكن توفيها حقها، لا كلام، ولا هدايا، ولا حتى عمر كامل تعيشه عشان ترد لها جميلها..

مش لازم تستنى يوم في السنة عشان تقول لأمك بحبك.. مش لازم يكون فيه مناسبة عشان تسأل عليها، أو تفرحها بكلمة حلوة.. كل لحظة ليها معنى، وكل دقيقة معاها نعمة.. واللي لسه أمه معاه، مايفرطش في اللحظة، واللي فقدها، يدعيلها من قلبه، لأن حب الأم مش بيتقطع، بيفضل في القلب والعقل والروح مهما فات الزمن..

ربنا يحفظ كل الأمهات، ويرحم اللي سابونا بجسدهم ولسه روحهم حوالينا.. كل سنة وكل أم طيبة وبخير وسعادة.

18/03/2025

تخيل كل مرة تبص لنفسك فيها تشوف صورة مش حقيقية، تفاصيل مش موجودة غير في دماغك.. تحس إن وشك مش متناسق، جسمك مش مقبول، أو فيه حاجة غلط حتى لو كل اللي حواليك بيأكدولك عكس كده.. الموضوع مش مجرد عدم رضا عن الشكل، دي حالة نفسية بتخليك مركز طول الوقت على تفاصيل صغيرة محدش بياخد باله منها غيرك، ومع كتر التفكير والقلق، بتبدأ تشوف نفسك بشكل مختلف تماماً عن الحقيقة.

الموضوع أكبر بكتير من حد شايف نفسه تخين وهو رفيع أو مش عاجبه حاجة معينة في شكله.. الشخص اللي بيعاني من المشكلة دي ممكن يقعد بالساعات قدام المراية يدور على العيوب أو يتجنبها خالص عشان ما يشوفش نفسه، ممكن يفضل يقارن نفسه بالناس، يدور على الفلاتر والزوايا اللي تخفي العيوب، أو حتى يلجأ لعمليات تجميل واحدة ورا التانية على أمل إنها تتصلح، لكن عمره ما بيشوف نتيجة ترضيه.

الاضطراب ده مالوش سبب واحد، أحياناً بيبدأ من تعليقات سلبية أو تنمر في الطفولة، وأحياناً بيكون سببه خلل معين في كيمياء المخ، وطبعاً السوشيال ميديا لعبت دور كبير في تكوين صورة مثالية خيالية، وخلت الناس تحس إنهم دايماً في سباق مع معايير مش واقعية.

الحل مش إننا نقول للشخص حب نفسك، لأن ده مش مجرد وهم، ده اضطراب نفسي حقيقي ومحتاج علاج.
ولو حسيت إنك إنت أو حد تعرفه بيعاني من ده، ماتترددش في طلب المساعدة، لأنك مش لوحدك، ومشكلتك ليها حل.

15/03/2025

لما تبقى حياتك رايحة جاية زي المرجيحة.. يوم فوق، طاقة وحماس، الدنيا حلوة وكل حاجة ممكنة.. ويوم تاني تحت، حزن وملل وضيق بدون سبب واضح. مش مجرد تقلب مزاجي عادي زي اللي كل الناس بتعدي بيه، لكن دايرة مستمرة من الصعود والهبوط بتأثر على حياتك، شغلك، علاقاتك، وحتى إحساسك بنفسك.

اللي بيعاني من اضطراب المزاج الدوري بيحس إنه عايش بين حالتين:
🔹 فوق: ثقة زايدة، أفكار كتير، طاقة كبيرة حتى لو مش نايم كويس، تفاؤل واندفاع.
🔹 تحت: إحباط، حزن، فقدان اهتمام، إحساس إن مافيش دافع لأي حاجة.

المشكلة إن التغيرات دي بتحصل بدون أسباب واضحة، وبتحطك في حالة من عدم الاستقرار النفسي. ممكن الناس حواليك يشوفوك متقلب المزاج أو مش ثابت على حال، لكن الحقيقة إن ده اضطراب محتاج فهم وتقبل وعلاج لو بدأ يأثر على حياتك اليومية.