04/09/2024
أكتر شكوى بتخوف الأمهات و بتسبب الرعب فى بعض الناس هى " السخونة " .. يا دكتور الطفل سخن اديله ايه مضاد حيوي ؟ هل كل سخونة تحتاج مضاد حيوي ؟ هل كل سخونة تقلق ؟
السخونة يعنى درجة حرارة الجسم أكبر من ٣٨ ✋🏻
اولا : معظم الأطفال اللى بتسخن بتبقى بسبب عدوى فيروسية و الغالبية بتخف لوحدها و نخلى بالنا فيروسية يعنى مش محتاجة مضاد حيوي 🤷♂️
ثانيا : ممكن نسأل نفسنا ايه سبب السخونة ؟ السخونة بتحصل نتيجة استجابة مناعة الجسم للميكروب بتطلع مواد أهمها prostaglandin E2
و يشتغل على منطقة فى المخ مسئولة عن تحديد درجة حرارة الجسم و يخلى درجة الحرارة تعلى عن طريق مثلا الرعشة و انقباض الأوعية الدموية اللى فى الجلد . السخونة مفيدة لأنها بتمنع تكاثر الميكروب داخل الجسم 👌🏻
ثالثا : ايه الحاجات اللى تقولنا ان سبب السخونة عدوى سواء بكتيرية او فيروسية
١ _ فى فرد فى الأسرة غير الطفل تعبان
٢ _ فى مرض منتشر فى المجتمع ( زى كورونا دلوقت )
٣ _ الطفل مش واخد التطعيمات كلها
٤ _ الطفل أو حد من الأسرة راجع من سفر ( التهاب كبدى ، حمى التيفود )
٥ _ فى اتصال بحيوان فى البيت كلب او قطة
٦ _ الطفل عنده مرض من أمراض نقص المناعة
رابعا : ايه العلامات اللى تخلينا نقلق و يستدعى عمل فحوصات 😮
١ _ درجة الحرارة اكتر من ٣٨ فى طفل اقل من ٣ شهور او اكتر من ٣٩ و عمره من ٣ ل ٦ شهور
٢ _ لون الطفل متغير زى مزرق cyanosed او باهت او مبقع mottled
٣ _ فى اضطراب في درجة وعى الطفل يعنى تايه كده و مش فايق كويس
٤ _ أعراض عصبية زى تشنجات او رقبته مخشبة ، أو الحتة الطرية اللى فى الجمجمة بتاعته بارزة برة شوية Bulging fontanelle
٥ _ فى صعوبة تنفس
٦ _ ترجيع و خصوصا لو فيه العصارة الصفرا
٧ _ جفاف شديد
٨ _ طفح جلدى ( حصبة ، حصبة المانية ، الحمى الوردية ، الحمى القرمزية )
و طبعا لازم نروح للدكتور و يتعمله فحص كامل
خامسا : التعامل مع السخونة فى البيت لغاية ما نروح للدكتور ؟ أدوية السخونة التى تحتوى على مادة البارسيتامول بالتبادل مع الأدوية التى تحتوى على مادة ابيوبروفين
مفيش دليل علمى واحد يؤكد أن لما نستخدم خوافض الحرارة ده هيؤدى إلى تقليل خطر التشنجات الحرارية
سادسا : الطفل سخن و خد علاج و السخونة متحسنتش و طولت 😮 ايه ممكن تكون الاسباب
١ _ عدوى بكتيرية زى التيفود أو السل
٢ _ التهاب فى القلب Infective Endocarditis
٣ _ عدوى فيروسية زى EBV ,CMV , HIV
٤ _ أمراض مناعية زى الزئبة الحمرا SLE او التهاب المفاصل المناعى JIA
٥ _ التهاب فى الأوعية الدموية زى كاواساكى Kawasaki
٦ _ أورام سرطانية زى لوكيميا و ليمفوما 😥
صحة طفلك تهمنا 😍
