Dr Shihab Magdi

18/06/2022

انهارده هتكلم عن انيميا الفول G6PD ...
ده مرض بيصيب نسبه مش قليله من أطفالنا و لذلك واجب ان اي اب و ام يكونوا علي قدر من الوعي بكيفيه التصرف في حاله بعد الشر حصل لابننا كده...
اولا هذا المرض وراثي جيني قد يكون من الام او الاب ...و للأسف عاده بيكون مستخبي... يعني مش بنعرف غير لما يحصل الأعراض...مفاجأه غير ساره اطلاقا..... اكتر وقت بنشوفه من سن ٧ شهور لحد ٣ سنين (غالبا بسبب بدايه العرض في الاكل)
بيجي من مسببات كتير لكن اشهرهم عندنا هنا البقوليات ( الفول العدس اللوبيا) الطفل بياكل و خلال ١٢ ساعه بتبدأ الأعراض.... ممكن اقل في الحالات العنيفه
طيب ... ايه هي الأعراض...
اولا نظرا لاختلاف الدرجات لكل حاله... بس هقول اللي اي حد ممكن يلاحظه...
اول حاجه وارد تحصل لون احمرار في البول زي الشاي كده
خمول شديد ... سرعه تنفس...اصفرار حاد بالجسم و العين...
و طبعا خلال ١٢ ساعه الحل الوحيد هو التوجه للمستشفي مش العيادات او الدكتور في العياده اللي هو انا ....
وارد طبعا يكون حاجات تانيه كتير بس اخطرهم هو انيميا الفول لذلك أنا دايما بنصح باستبعاد الخطر و اي حاجه تاني تهون... لازم يتعمل نقل دم و يفضل التوجه لمستشفي كبيره فيها بنك دم... و حتي لو حكومه انا فعلا ببعت حالات و بلا مبالغه بيتعمل معاهم اسرع إجراءات لإنقاذهم و بشكر خاصه مستشفي الدمرداش لسرعه الاستجابه في الحالات دي مع كميه الضغط اللي عليهم....
يعني متضيعيش وقت و اتجهي بسرعه علي أقرب مستشفي مجهز.... حتي لو طلع مفيش حاجه هتكوني اتطمنتي لان للأسف هذا المرض قد يكون قاتل....
معلش الخبر الحلو ان مجرد ما يتم التشخيص الولد بتمنع من المسببات و بيعيش طول عمره سليم و معافي زي اي طفل بصحه و سلامه ( بس مينفعش ياكل اكا الغلابه الفول هخهههه)
ربنا يحفظ أطفالنا و هم مستقبلنا
د شهاب مجدي

02/04/2021

انهارده هتكلم في موضوع مهم جدا جدا في متابعه نمو اطفالنا من ناحيه المكملات و الفيتامينات..
اولا مهم جدا ان فيه قاعده مهمه جدا اسمها الالف اليوم الذهبي.. و دي بتكون اول ٣ سنين في حياه أولادنا...
#اولا من عمر شهرين ل ٦ شهور
فيتامين د مهم لتعويض قله التعرض للشمس لاننا في زمننا هذا اصبحنا تقريبا كلنا عندنا نقص في الفيتامين ده و نظرا لاهميته بندي للبيبي وقائيا لحد ٦ شهور
#من ٦ شهور ل ٩ شهور
كالسيوم و حديد ... اي انواع موجوده وقائيا و مهم اوي اوي نفهم ان ده مش علاج ده للاحتياط ... يعني مش لازم يتاخد يوميا و بالعقل كده انا و انت و ابوك و جدي و جدك مخدوش حاجه و كبرو و خلفونا و احنا خلفنا عادي... يعني النمو الصحه مش واقفه علي الفيتامينات...
ملحوظه .... لازم يكون في فرق ٨ ساعات بينهم عشان الاتنين لو اتاخدو مع بعض بيبطلو المفعول و المطلوب منهم في الاساس
بعد ال ٩ شهور انا بوقف الحديد بنصح بادخال اكل غني بالحديد من اكلنا
#من ٩ شهور ل سنه و نص
اي كالسيوم باسلوب الوقائى
علي سنه و نص انا بطلب تحاليل شامله و دي مهمه جدا جدا و في البلاد المتقدمه بتتعمل كل ٦ شهور لكن هنا احنا ماشيين بستر ربنا و طبعا مفيش احسن منه لكن بردو لازم نعملها من مبدأ نطمن ان مفيش مشكله و مش بندور علي مشكله ... زي فحص العربيه نفتح الكبوت نطمن و خلاص... و الفتره دي حتي لو الطفل هلا هلا بيكون من جوا يعلم الله.... و لهذا مهم جدا معمل التحاليل دي في اول سنتين و نص عشان لو في اي مشكله نلحف نصلحها خلال الالف يوم في عمر اولادنا.....
#بعد ال١٨ شهر...
طبعا بعد ما نكون اتطمنا علي كل حاجه و التسنين خلص بالسلامه بنبدأ ندي اوميجا ٣ و ده بيتاخد ٣ شهور في اول كل سنه دراسيه بعد كده و ده اكل للمخ عشان الحضانه و المدرسه و العيال تقلب يابانيه ههههههه..........
اخيرا الالف يوم الذهبي ... لو بتوفيق ربنا عدو علي خير من غير مضادات حيويه و ادويه عنيفه و متابعه كويسه
احنا كده بنكون طلعنا جيل سليم و العقل السليم في الجسم السليم و بكره هيبنوا مصر اكيد
دكتور الاطفال هدفه الاول و الاخير اخراج جيل صحيح معافي مش يعالج و خلاص ... الكلام ده للأمهات اللي بتتساهل و تمشي بمبدأ للاسف نعاني منه جدا مختلف عن اي مكان في العالم... مبدأ ... عبيله و اديله... للاسف
اولادنا مستقبلنا ... ربنا يحفظهم و يبارك فيهم
د شهاب مجدي

17/03/2021

البوست ده طالع علي ترند التحرش للاسف الشديد كنت اتمني متكلمش خالص لاني كأب قبل ما اكون طبيب اطفال ... الموضوع بيحرق دمي....
ربنا سبحانه و تعالي حذرنا ان في بعض الخلق قلوبهم فيها مرض... العلم عرفنا ان في ناس مرضي نفسيين ... و في الاغلب بيكونو شبهنا تماما بل ممكن احسن مننا ...
ازاي نحمي اطفالنا ....؟؟؟
لازم اولا جسديا:
يكون في مبدأ من اول يوم من العمر ... ممنوع تما البوس من الفم ولا الاب ولا الام... اولا لوجود مخاطر من نقل اي حاجه من اول هربس فطريات عدوي بكتيريه...الخ في بقنا احنا الكبار للطفل اللي لسا جاي الدنيا طازه...
مع التقدم في العمر لحد سنتين... ممنوع تما البيبي يعد وسط رجليك حتي لو الاب او الخال او العم او الجد.... من غير ما حد يزعل او يتقمص... نفهم ان عقل البيبي مش مستوعبه صله القرابه يعني لو اخد علي كده ... مش هيفرق رجل البواب عن رحل ابوه و ده طبعا كارثه ممكن نتفاداها خالص بان يكون ممنوع تما البيبي يعد في المكان ده او يقف وسط رجل اي راجل قاعد....
بعد سنتين...
ممنوع تما بابا او ماما يقلعو قدامه ملط و لو هنستحمي نلبس مايوه في البيت... نبدأ نفهم الطفل ان دي منطقه مقدسه و محدش ينفع يقرب منها خالص
بعد ٣ سنين...
نفس المبادئ مفعله لكن كمان يضاف عليها اني انا شخصيا كطبيب اطفال بمنع تما اعطاء اي نوع لبوس شرجي الا طبعا للطوارئ الشديده... يعني نبدأ نحترم وجود و احساس الطفل و فعلا يصبح هذا المكان مقدس
بالطريقه دي احنا بنحاول نربي طفل لو لا قدر الله وقع في اي موقف بعد الشر... يكون فاهم من هوا ٣ سنين انه عيب و لا و يقاوم و في الاغلب النوع القذر ده من البشر بيكون جبان و هيخاف و يجري ....للاسف الشديد ... في اوقات لازم هيكونو بعيد عن عينيننا زي المدارس او الحضانات ... لازم نعمل اللي علينا ... طبعا في كلام كتير جدا لسه متقالش بس الكام كلمه دول يعتبره اهم الخطوات الفعاله للنشئه الجنسيه السليمه...
ربنا يحفظ اطفالنا و يبارك فيهم و يبعد عنهم كل شر
د شهاب مجدي

11/09/2020

انهارده هتكلم عن السؤال اللي بيشغل بال معظم الامهات و اللي كل ام جوا عقلها شايفاه حقيقه .... فقدان الشهية في الاطفال....
يمكن من اكتر الأسئله اللي بتجيلي .. ان الاولاد مش بياكلو و محتاجين فاتح شهيه....
طيب براحه كده نفهم ان في اسباب كتير جدا لفقدان الشهيه في الاطفال ... بس فعلا الاغلبيه العظمي تتلخص في نقطتين....
١. الولا حاجه.. يعني ايه... يعني ببساطه ان الطفل معندوش اي مشكله عضويه لكن ممكن نقول نفسيه... لاما الطفل اللي من منظوره البرئ جدا كل الكون بيتمحور حوليه و حول احتياجاته... يلاقي مامي و بابي مرعوبين و رايحين جايين يتحايلو عليه ياكل...غالبا ده بيبدأ في اول سنتين في العمر و ده بيكون السبب الرئيسي في فقدان الشهيه هو التسنين و بعد التسنين ما يخلص الاهل بيكملو نفس القلق و الرعب و السعي للعلاج و ده نفسيا في الاغلب بيدي احساس بالنشوه للطفل.. و بيبدأ كمان يعتبر عدم اكله وسيله لجذب الانتباه اكتر و اكتر...
معظمنا سافر بره او في اي قريه سياحيه بنلاقي الاجانب ولادهم بياكلو زي الالف المعدول و احنا بنجري ورا عيالنا... ايه السر ؟؟ ده طفل و ده طفل...السر ان معظم الاجانب ميري في المعامله يعني الطفل لو ماكلش علي الغدا لو اتنطط علي دماغه مش هياكل قبل العشا... و لو ماكلش العشا مفيش اكل قبل الفطار تاني يوم... مع الوقت الطفل بيفهم ان الاكل احتياج مش وسيله و الاكل اول ما يتحط .... يتوحش عليه عشان عارف ان مفيش حد هيجري وراه بل بالعكس ده ممكن يتعاقب بتفويت وجبه....
يعني قدر الامكان نحاول نعمل كده و النتايج بتكون هايله مع العلم بمدي صعوبه تطبيقه لان في النهايه احنا مش اجانب بردو هههههههه
٢. وجود مشاكل مستخبيه... و ده المفترض ان كل ٦ شهور بنعمل تحاليل شامله ليس للبحث عن مشاكل لكن للاطمئنان لعدم وجودها.... طبعا احنا هنا ماشيين بستر ربنا و مفي احسن منه طبعا لكن مفيش مانع نعمل التحاليل ديه كل سنتين او ٣ حتي... و مهم جدا جدا نعملها في اول سنتين في العمر(خلال ال ١٠٠٠ يوم الذهبي).. طبيب الاطفال بتاعك هيطلبها ...
اطفالنا مستقبلنا ربنا يحفظهم و يبارك فيهم
د شهاب مجدي

06/09/2020

انهارده هتكلم تاني عن مشكله عويصه شويتين... مشكله ثقافه عامه... مشكله العلاج السحري الرائع اللي اختصب تلت تربع اطفالنا... بداعي و بدون داعي...
المضاد الحيوي....
المضادات الحيوية عائلات كتير و انواع كتير .. كان في وقت من الاوقات السبب حرفيا في انقاذ البشريه وقت اكتشاف البنسيلين... لكن الاختراع الجميل الرائع ده... جميل و سحر لما بتاخد في مكانه.... اللي هو امتي؟؟؟؟
هو بيعمل ايه اصلا....؟؟؟
طيب اولا في كائنات حيه.. اسمها الفيروسات... دي قصه تانيه...و فيه فطريات... قصه تالته..و فيه ميكروبات (ده البطل هنا)...كلهم يصيبوا البشر...
المضاد الحيوي ببساطه ... هو اختراع عشان نموت بيه الميكروبات ... بس كده ...
مشكلتنا هنا في مصر هو اعتقادنا السائد انه العلاج لاي حاجه... سخونيه ادي مضاد... ترجيع ادي مضاد... كحه ادي مضاد... حمو نيل ادي مضاد... و هكذا لحد ما بقي الطبيعي من الصيدلي بما انه ثقافه شعب يكتب المضاد و يصرفه... و ده طبعا كارثه ... فعليا كده... عبيله و اديله و العيار اللي ميصبش يدوش...
الكلام ده كارثي في اول تلات سنين ( الالف يوم الذهبي).........
معلومات علي الماشي
الميكروب كائن حي لما بنصاب بيه ... يا نموته يا يموتنا...
الحراره في اغلب الاصابات البكتيريه بتكون شديده و تعدي ٣٩ مستريح و كل ٦ ساعات بالكتير حتي بالخوافض
الواد شكله بيكون مسموم... في كائن حي جواه
المضاد حيوي اذا لا قدر الله و اضطرينا ناخده.... لازم لازم لازم نكمل الكورس بتاعه... مش الواد يخف بعد جرعتين خلاص نوقف... لا و الف لا... اول و تاني يوم المضاد بيموت تالت و رابع و خامس يوم بنتاكد ان الميكروب مات و عملنا العزه و الدفنه و الجنازه في ستين داهيه....
الموضوع كبير و ليه بقيه....
الاهم فعلا ... لكل اب و ام ...متستهلوش المضاد... لما بيتاخد من غير وجود بكتريا ده اسمه اختصاب لمناعه الطفل لان احنا كبشر في ملايين الميكروبات عايشه جوانا و جزء لا يتجزء من مناعتنا... المضاد مش بيفرق بيموت كله عاطل في باطل... وقت العدوي البكتيريا فعلا ده علاج سحري... لكن لو اي حاحه تانيه فانت كده اخدت علاج ضرك اكتر لانه موت البكتريا المفيده في جسمك...
اولادنا مستقبلنا ربنا يحفظهم
د شهاب مجدي

28/08/2020

انهارده هتكلم عن الغيره في الخلفه رقم ٢... و ده من واقع اني طبيب و اني الحمد لله مجرب
معظم الاطفال البكر... بيكونو محور اهتمامنا و نفسيا هما بيكونو فاهمين كده.. معتقدين بعقلهم الصغنن انهم محور الكون بالنسبه لبابا و ماما و طبعا دي حقيقه لكن زينه الحياه الدنيا المال و البنون... و لو ربنا كرم و رزق بمولود جديد... حرفيا الطفل الاول طالما اصغر من ٥ سنين حياته بتتشقلب ...
لو هندي مثال بسيط لاي ست... تخيلي جوزك داخل عليكي بزوجه تانيه .. الاغلبيه العظمي باما هتتنقط يا اما هتقتل جوزها ههههههه...
اهو ده نفس احساس الطفل سواء ولد او بنت ... بيكون الغيره و احساس انه تم التخلي عنه او الخوف من كده موجود و حقيقي جدا لكن بصوره غريزيه بريئه جدا...
ممكن الطفل يترجمها بكذا شكل حسب شخصيته.. في الغلبان اللي هياخد في نفسه و يحزن
في الممثل الخبيث اللي هيحاول يتقرب لحد ما يلاقي فرصه و يسكع البيبي قلم او علقه
في المتمرد اللي هيبدأ يمثل اي تعب او يعند كمحاوله للفت الانتباه....
اللي يثير التفاءل ... ان كل ده هيختفي تماما و مفيش في الدنيا حد هيحب البيبي اكتر من اخوه او اخته ... لكن لما البيبي يبدأ يتفاعل معانا و يكون كبر شويه تقريبا علي ٤ او ٥ شهور من العمر...
ايه المطلوب مننا كاهل...
١. نقدر ان في مشاعر حقيقيه عند الطفل البكر
٢. نحاول قدر الامكان اغراق الطفل بالمشاعر عشان نطمنه
٣. اوعي تدي الأمان و تقولي مستحيل يأذي البيبي
٤. لو حصل و انك اضطريت تعاقب الطفل الاول ... يكون بينك و بينه مش قدام حد و تفهمه غلطته عشان اي تعامل غلط مع البكر ... هيخليه يعمل اسقاط اكتر علي البيبي ( انت كمان بتضربني عشانه ... و تزيد الفجوه و الحزن)
٥. نجيب لعب و نقول للكبير اخوك او اختك اللي اختاروها لك......... ربنا يحفظ اولادنا و يخليهم ... هما امتدادنا للمستقبل
د شهاب مجدي

28/07/2020

الاحد و التلات و الخميس من ٧ ل ٩

طب الاطفال وحديثي الولاده

02/03/2020

انهارده هتكلم بخلاصه عن الرعب اللي مقلقنا كلنا و هو فيروس الكورونا و بالاخص الفرد الاخير في هذه العائله ال كوفيد-١٩
اولا ... انا نفسي كنت مرعوب و خايف جدا علي اولادنا خاصه ان هذا الفيروس جديد مش معروف عنه حاجه... و طبعا دوامه الميديا و الفيديوهات اللي بتنزل بتخلي الواحد يخاف اكتر.....
لكن دلوقتي الموضوع بقاله فتره موجود و ابتدا فعلا يطلع معلومات عنه هقولها كمان شويه ....اخطر حاجه انه ممكن الشخص المصاب يكون معدي قبل ظهور الاعراض عليه و ده خطر جدا لانه معناه سهوله الانتشار للفيروس و صعوبه اكتشافه بردو..... لكن اهم و احسن نقطه ان الحمد لله لسبب غير معروف يبدو ان هذا الفيروس لا يصيب الاطفال اقل من ١٠ سنوات ... تقريبا نسبه الاصابه المؤكده منعدمه... صفر بجد ... و في طفل اتولد ١٣ يوم كان تحليله ايجابي لكن لسبب غير معروف بردو محصلش اي مضاعافات معاه يعني كان سليم تماما..و ده بالنسبالي انا شخصيا كطبيب اطفال كان كافي ان قلبي يبرد و مخافش علي ابني... انا اب قبل ان اكون طبيب
طبعا بما انه فرد جديد في عائله عريقه من الفيروسات ... فهو فعلا شبه اخواته في دوره حياته... يعني هياخد دورته قي جسم الانسان و يغور في داهيه و هذا من رحمه ربنا بينا... الاهم في اعراضه
الابسط...
حراره مش قويه اوي تستمر ٥ ايام
التهاب في الحلق
كحه ناشفه ... و ده تقريبا ال ٦ ايام الاولي ثم الشفاء او
اخطر مضاعافاته ....
التهاب حاد في الرئتين قد تؤدي الي فشل وظيفي للرئتين و الكليتين... و قد يؤدي للوفاه
مفيش علاج فعال حتي الان للاسف
العلاج التقليدي سوائل دافيه و راحه و اعتقد لو اي طبيب اتخبط فيه هنتعامل في اسوء حالاته التهاب رئوي و في اخف حالاته برد عادي
ملحوظه هامه جدا جدا.... كل الادوار شبه بعض... بس كورونا مش بيعمل التهاب في الجيوب الانفيه و تقريبا ده اكبر شئ يميزه .... يعني مفيش رشح ولا برابير
و ده يطمنا لان معظم ادوار البرد العاديه بتعمل رشح و برابير ههههه
انا فعلا مش خايف علي الاطفال ... الخوف علي اهالينا الكبار... لان حسب الاحصائيات معظم الضحايا من كبار السن و اصحاب الامراض المزمنه عافانا الله و عافاكم
طبعا في كلام كتير جدا لسه ممكن يتقال بس انا حابب اطمن الاباء و الامهات متخافوش علي العيال لدرجه الهلع و دايما بشجع تقويه المناعه من الاساس .......
الفيروس ده عرفنا اد ايه حجم البشريه ... بكل ما نملك من تكنلوجيا و علم تمكن هذا الكائن الشبه ميت من الحاق خسائر رهيبه علي مستوي العالم و لا يزال ينتشر و سينتشر بقوه....احنا هنا في مصر و البلاد المسلمه معندناش حاجه اقوي من ستر ربنا
اللهم احفظنا بسترك و ارحمنا و اغفر لنا و ارفع غضبك و مقتك عنا و استرها علي اهالينا و جميع عبادك الصالحين...
د شهاب مجدي

26/09/2019

انهارده هنتكلم شويه عن تغيير فصول السنه... الخريف بالاخص ...و مشاكله اللي بتصيب تقريبا ٦٠% من سكان كوكب الارض....الحساسيه الموسميه
سبحان الله في هذه الفتره من السنه تتغير دوره حياه معظم الكائنات الحيه كليا... و ده بينتج عنه وجود ملايين الجسيمات ماشييه في الهوا كده عادي (اتربه.. حبوب لقاح..فيروسات) ... تييجي بقي الجسيمات ديه تخبط في عنيك... او مناخيرك.. او ودنك .. او جلدك... لما التلامس ده بسبب تفاعل لجسمك ... انت دخلت كده رسميا في ال٦٠% هههه
العين تعمل رمد ربيعي ... الانف كلنا عارفين الجيوب الانفيه... الجلد كتير جدا بنشوف ناس زي السمكه الفتره دي و جلدهم مقشر خالص... الودان بتعمل افرازات كتيير جدا عشان تعمل زي الفلتر و تصتاد الجسيمات و تمنعها من الدخول للاذن....و اخطر نوع و ده اللي يحتاج تدخل طبي .. حساسيه الصدر... هنتكلم عنها باستفاضه ان شاء الله قريبا لاننا داخلين علي الموسم بتاعها...
بما اني دكتور اطفال لازم انبه عليهم الفتره دي .... مهم مهم مهم اوي كما ذكرت سابقا تنضيف الانف باستمرار خاصا الفتره ديه... سوائل دافيه و يا سلام اوي لو كوب ماء مغلي مع معلقه عسل ابيض و ليمون...النظافه الشخصيه مهمه جدا.... و يا ريت نستحمي قبل النوم علي طول عشان نغسل الجسيمات من جسمنا...
اطفالنا مستقبلنا ربنا يحفظهم
د شهاب مجدي

05/09/2019

انهارده هتكلم عن الاسهال.... لان بصراحه الواحد بيشوف حاجات غريبه و بيسمع حاجات اغرب....
الجهاز الهضمي عباره عن ممر مدخله الفم و مخرجه فتحه الشرج.... يعني من تحت ده باب الخدامين و الباب يفوت ميت جمل... كام معلومه عن الاسهال
اولا ... كلمه اسهال ... عشان تقال لازم يكون الطفل بيعمل اكتر من ٦ مرات براز خلال ال ٢٤ ساعه... يعني لو عمل مرتين ولا تلاته ده مش معناه نركب محاليل....
ثانيا... سبحان الله الاسهال في حد ذاته هو عمليه تنضيف للجهاز الهضمي و في اغلب ان مكنش كل الحالات بيقف لوحده خالص خلال ٥ ل ٧ ايام بالكتير اوي... يعني الاسهال لوحده مش مرض انما عرض او عمليه تنضيف توماتيكي هههه زي الغسالات الحديثه
ثالثا... و ده الاخطر .... ان لازم نكون فاهمين ان معظم ادويه الاسهال من اعراضها الجانبيه الترجيع و ده بقي اللي مصيبه بجد... ... لان الترجيع ده عكس الاتجاه الطبيعي للممر ... يعني زي التريلا اللي ماشيه عكسي علي الدائري هنروح في داهيه....فدائما نفتكر النقطه دي قبل استشاره الصيدلي و اخد اي علاج اسهال...
طب ايه اللي ممكن يتعمل في حاله ان العدد اقل من ٦ مرات و مفيش اعراض تانيه.... ولا اي حاجه سدي مناخيرك و اديله مياه بليله ... مياه ارز... جزر... جوافه... مهلبيه ... حمص... اي حاجه تحتوي علي نشا............
نقطه مهمه جدا جدا.... ابنك او بنتك بيسهولو بسيط هنعمل اللي فوق طب ... بقي في ترجيع لازم تروحي للطبيب الترجيع مفيهوش هزار...و بيدخل في جفاف و الجفاف بعد الشر من اخطر مشاكل الاطفال
الاسهال لو الطفل بينزل اي كان الكميه بدون ترجيع انا هعوضه من فوق... الكارثه لما فوق يقفل (ترجيع) ساعتها لازم نخش من الدم....و نركب محاليل عشان الجفاف... و بعد الشر طبعا

أولادنا مستقبلنا ... ربنا يحفظهم
د شهاب مجدي

09/12/2018

بوست مفيد جدا... نفس اللي بقوله دايما ...

ابنك عيان وصدره بيقفل و بيكح طول الشتاء و اتهرى ادوية و مفيش دوا نافع ؟؟

طيب اقولك على حاجات تخليكي متديهوش ادوية خالص ؟؟ .. شوفي يا ستي

في الكحة الغلسة اللي مش بتروح بسم الله الرحمن الرحيم اول حاجة حضرتك تتأكدي منها ان مناخيره سالكة و مافيهاش افرازات عمالة ترمي بلاوي على صدره ..

بتسألي تسلكيها ازاي ؟؟
اقولك على حاجة حلوه ؟ وجديدة ؟؟ و مثبتة طبيا كمان ؟؟ بخاخات محلول الملح لتنظيف الانف ((زي الفيزيومير مثلا)) اهم و انفع من اي دوا للرشح و الاحتقان .. بس تستخدميها صح .. يا سلام بقى لو تدي معاها سوائل دافية باستمرار ،، يبقى كده انتي بتعملي احسن من اي دوا للاحتقان و الرشح ممكن يعمل ((وكلهم زي بعض على فكرة)).

طيب ابنك مناخيره مقفولة طول الشتا و محتقنة على طول و حمرا ؟؟؟؟ يبقى ابنك عنده شوية حساسية للانف ،، مفيش ادوية ،، في الحالة دي بعد ما الدكتور يشوفه هتستخدمي بخاخات الانف المضادة للحساسية ((زي النازونيكس مثلا)).. و تبعديه عن الحاجات اللي ممكن تهيج الانف زي الجو الرطب و البرفانات و الحيوانات و التراب))

طيب ابنك صدره حساس و مع اي برد بيصفر و يزيق و بتحسي ان نفسه مكتوم ؟؟ ،، اقولك على حاجة و متتخضيش ؟
التوصيات العالمية كلها بتحط الادوية في الحالات دي كآخر ملاذ و مش بتنصح بيه غير في حالات الاضطرار الشديد خصوصا في الاطفال اللي اقل من ٥ سنين !! تخيلي بقى !!

شايفك يالي بتسألي امال اعمل ايه يا دكتور حيرتني ؟؟؟ احط له جرنال على صدره يعني ؟!!!
لا يا ستي مقلتش كده .. اساسا مفيش حد بيقرا جرايد اليومين دول
اقولك الانسب و الافضل من غير ما تتخضي و تجادلي كتير ؟؟
جلسات النيبيولايزر موسعة الشعب او البخاخات للسن الاكبر ..

ازاي يا دكتور !! جلسة و بخاخة ؟؟ يا نهار مش فايت !!
مالها الجلسة مش فاهم ؟ هي علاج زي الشرب و الحقن و اللبوس ،، و افضل في التأثير و اقل في الاعراض الجانبية ،،، و مفيش حاجة اسمها هيتعود عليها !! ،، كلمة في سرك ؟ الدكتور اللي بيبتدي معاكي بالجلسات بس في الاول و مش بيكتب ادوية ده راجل فاهم و دارس خليكي معاه متغيرهوش !

طيب يا دكتور خد الجلسات و لسه صدره بيقفل ،، اديله دوا بقى ؟
-لا
امال اعمل ايه بس يا دكتور ؟
جلسات برضو ،، هنحط فيها المرة دي محلول نقط مضادة للحساسية ((زي البلميكورت)) و هنستخدمها بالتزامن مع موسعات الشعب ..
عارفة ؟ ٩٥٪‏ من الاطفال مش بيحتاحجوا غير كده و مش بيمشوا على ادوية اساسا !!

و كمان لو انتي ام واعية و عارفة ان تطعيم الانفلونزا بقى من الحاجات الاساسية اللي منظمة الصحة العالمية بتوصي بيها اول كل شتاء .. و بتدي ابنك فيتامين د و أ بانتظام و عارفة ان ده بيحمي من البرد ..يبقى انتي كده عملتي اللي عليكي كله ،، و ربنا يحمي ولادنا كلنا

الخلاصة ،، الاطفال كلهم طول الشتاء مناخيرهم نازلة و بيكحوا.. و مفيش حاجة اسمها دوا سحري بيقضي على البرد و الكحة وكمان كل الادوية شبه بعضها في المفعول ،، و الاهالي طول الشتا دايخيين عليهم من دكتور للتاني و مش بيخفوا ،، و معظم الدكاترة للاسف مش بيوصلوا الكلمتين اللي قلتهم دول بشكل واضح للعيانيين و بيخافو يوصفو البخاخات والجلسات احسن العيان يزعل و يقلق

Dr. Ahmed Amin

نعيد نشره تاني بمناسبة الشتاء و الكحة

04/08/2018

انهارده هتكلم شويه عن المناعه...
المناعه هي اهم حاجه ربنا خلقنا بيها عشان نعرف نتعايش في الدنيا... المناعه قصه كبيره اوي يطول شرحها ... لكن انا هركز شويه في الجزء المتعلق بالمضادات الحيويه و كميه المضادات اللي اطفالنا بياخدوها عمال علي بطال بطريقه غريبه تصل اوقات الي الجنون...
زي ما قلت قبل كده ... اغلب الامراض اللي بتصيب اولادنا بتكون فيروسيه في الاصل و بتبدأ من الانف او المخاط... ورا الفيروس بتيجي العدوي البكتيريه و هنا فعلا لازم يتاخد مضاد حيوي ... فقط في الحاله البكتيريه...
طيب بالنسبه للكميات الرهيبه لاستهلاك المضادات معناها ايه... معناها اننا بندمر المناعه الطبيعيه بتاعت اولادنا بايدينا ...قصه ظريفه زي ما اساتذتنا علمونا ...
تخيل اتنين بيتخانقوا في الشارع ( واحد المناعه و التاني البكتريا ) و نازلين طحن في بعض ... عشان نحل الموضوع نزلنا كبير البلطجيه ( المضاد الحيوي ) راح ضارب الاتنين الاولاني ( المناعه ) اتكسر و قعد علي جنب و التاني ( البكتريا ) مات في ستين داهيه ... لحد هنا كلام جميل و صح جدا
الكارثه بئا ... تخيل اتين بيتخانقوا في الشارع ( واحد مناعه و التاني فيروس ) نفس الكلام ... راح نازل البلطجي ( المضاد ) ضرب المناعه و بيلف عشان يضرب التاني الفيروس معرفش لانه عفريت... و قعد يطلعله لسانه و جري.. النتيجه المناعه اتضربت علي الفاضي بدون اي فايده... لا و كمان بنكون قتلنا البكتريا المفيده في جسمنا اللي هي جزء لا يتجزء من المناعه
طيب نعمل ايه او نعرف ازاي ان المفروض ناخد مضاد ولا لا؟؟؟
اولا..طبعا نكشف عند طبيب كويس و الحمد لله ابتدي اخيرا يكون في وعي عند معظم الزملا في استخدام المضادات
ثانيا... اغلب الامراض بتسبب حراره ... الفيروس معظم اذا مكنش كل حالاته لا تتعدي الحراره فيه 39 ... اما البكتريا غالبا بتكسر ال 39 و تعديها ممكن احد 41 درجه و طبعا لازم ساعتها العلاج يكون في مضاد و انا عن نفسي بتبعه بكورس ارفع المناعه لتفادي استخدام المضاد تاني
ثالثا... الحراره اذا استمرت لاكتر من اسبوع و مش بتنزل بالخوافض

اخيرا بقول لكل الناس بلاش بلاش بلاش ندي عيالنا مضادات حيويه بدون داعي و انا فخور بكل ام عندي عرفت تعمل الكلام ده ... الواحد بئا يسمع حاجات غريبه ... ربنا يحفظ اولادنا ... هما المستقبل

د شهاب مجدي

14/06/2018

امبارح حصل موقف ادامي ضايقني جدا و عمال افكر فيه لحد دلوقتي...
كنت في مكان ما مع اسرتي و دخلت ابني يلعب علي الترامبولين او النطاطه...طبعا اتسحل و قعد يلعب مع ولد من سنه يمكن اكبر بكام شهر (3.5 سنه) ... المهم الوقت خلص فرحت انا و امه عشان نجيبه طبعا مش عايز ييجي و منفضلنا... و الولد اللي معاه نفس النظام بس باباه قعد يزعق جامد و يصرخ في الولد و يقوله طالما قولتلك تيجي يبئا تيجي و الولد بردو منفضله و بيلعب مع ابني ويتنطط.... راح ابوه دخل جابه من دراعه و قعد يلطش في الولد علي وشه و جسمه ادام الناس كلها... طبعا ابني طلع بسرعه و جري في حضني ساعتها و انا كنت واقف مذهول .... بجد حاجه وحشه جدا تضرب ابنك ادام حد و قد ايه بتسيب اثار هيعيش بيها العمر كله و تدمر احساسه بالثقه و تخليه مذبذب بعد كده..... بلاش بلاش بلاش الضرب و اذا قفلت كل الوسائل ... متضربوش ادام حد بالذات في السن الصغير ...
انا عارف ان الوضع بيكون صعب لكن في الحالات دي شيله و امشي ... سيبه يصرخ و يصوت و يعيط...شيله و امشي و خلال 3 دقايق هيسكت او حتي لو فضل يعيط تمالك اعصابك و اهدي ... نزله علي الارض و امشي وراه... لكن بلاش بلاش الضرب ادام حد
الموضوع مش طبي لكن نفسي جدا
د شهاب مجدي

12/06/2018

النهارده هتكلم علي السبب اللي هيدخل الامهات الجنه.... التسنين
التسنين بيختلف من طفل ل طفل لكن في العاده عمليه التسنين بتبدأ من اول 3 او 4 شهور و بيكون الوقت المتوقع لظهور الاسنان من 7 ل 9 شهور... زي العماره لما بتيجي تطلع ... بيتم حفر الاساس اولا ثم البناء
العمليه دي بتكون مقرفه جدا للطفل و بتعمل 4 اعراض هيفضلو قاعدين لحد 18 شهر من العمر ....
1 .حراره.... رايحه جايه طول الفتره دي و اكتر مكان سخن هو راسه او بقه ... في الغالب لا تتعدي الحراره 39 درجه الا نادرا او وقت شق الاسنان لللثه فقط و ممكن الام تلاحظ ان الطفل بيعرق اوي و ده طبيعي لان رد الفعل بتاع الجسم للحراره هو العرق لمحاوله انزال الحراره..
2. كحه بسيطه...و دي كل 3 او 4 ساعات كام كحه ورا بعض زي الشرقه كدهو سبب الكحه هنا عادي جدا هو كتر افرازات الرياله بسبب تأكل اللثه نتيجه عمليه التسنين فجزء بييجي علي القصبه الهوائيه و يسبب كحه بسيطه
3. قريفه .... و دي اللي هتدخلك الجنه... خدي من النكد كتير... عياط طول الليل ... ايده علي طول في بقه... زن ليل نهار... يشد في راسه او ودنه.... في اطفال وقت الانياب بتلطم بجد ... افتكري وقت خروج ضرس العقل عندك الواحد بيكون متعصب ة اللي يجي يسلم عليكي بتكوني عايزه تلطشيه بلقلم علي وشه... تخيلي بقه انك كمان كبيره و وراكي 1000000 حاجه في دماغك... البيبي معندوش غير حاجه واحده فقط مطلعه عينه و عين امه هههه الاسنان
4. اسهال... ميزدش ابدا عن 6 مرات و دايما ريحته قاتله... ده بردو بسبب الرياله اللي بيبلعها طول الوقت... يعني كوكتيل بي بي مع رياله ... مدمر......................................
نقطه مهمه اوي ان لازم نعرف ان التسنين عباره عن التهاب مزمن في الفكين... بيجي لكل الكائنات علي وجه الارض و لذلك مش بنعتبره مرض لانه حصلنا كلنا ... لكن... المناعه بتكون ضعيفه شويه وقت خروج الاسنان فلازم نعرف امتي نتجه للطبيب
لو الحراره بتعلي بسرعه جدا و الخافض البسيط مش بينزلها او تخطت 39
لو الكحه موجوده باستمرار و بتيجي عنيفه و مستمره او في رشح جامد في الانف
لو الاسهال زاد عن 6 مرات او حصل ترجيع..........................................
لكل المهات لما تيجي تتجنني و اعصابك تفلت ... خدي نفس و اهدي و افتكري ان المرمطه اللي انت فيها هتشفغلك يوم القيامه هههههه
اولادنا مستقبلنا ربنا يحفظهم و يبارك فيهم كلهم
د شهاب مجدي

03/04/2018

انهارده هتكلم عن اكبر اسرار طب الاطفال.... مفتاح معظم مشاكل الاطفال... السر ورا معظم امراض اطفالنا ربنا يحفظهم.... هوا السر ده معفن شويه بس هو المفتاح... السر ده هو الانف او البرابير... ايوه ... بجد ... ياع انا عارف...لكن سبحان الله ... ربنا خلق الاطفال ملايكه يعني مش بيعرفو يعمله العفانه بتاعتنا... لا بيعرفو يتفوا او ينفو ... ياع ... لكن دي الحقيقه... و هنا تبدأ دوره المرض...
معظم انواع الفيروسات من رحمه ربنا بينا دورتها في جسمنا 9 ايام...
3 جايه... ديه مفيش فيها اي اعراض...
3 قاعده... هنا بئا الفيروس بيبهدلنا و مناخيرنا ترشح و نكح و نسخن و نتمرمط خالص... احنا الكبار بنعمل العفانه المذكوره فوق ... نتف و ننف ... و نخف ...
3 ماشيه... و هنا الاعراض بتقل تدريجيا حتي الشفاء
المشكله في الاطفال لحد 6 سنين... يشنوا و يبلعو الارف ده كله و من هنا تبدأ النزلات المعويه و التهابات الحلق و دايره العيا كله و طبعا العك هنا يبدأ اكتر مع علاجات عنيفه جدا و للاسف الشديد مع تكرار المرض و العنف في العلاج المناعه بتتسوح و تضعف و ولادنا كل شويه عيانين و متبهدلين... هتكلم قريبا في موضوع المناعه باستفاضه ان شاء الله...
طب و الحل؟؟؟
اسهل مما تتخيل... ماء البحر يا سيدي... ازاي... ربنا سبحانه عمل لمياه البحر ميزه رائعه و هي القدره علي تفتيت المخاط و اذابته تماما... عشان كده لما بننزل البحر مناخيرنا بتسيب و نعد نبربر ههههه.... يعني هجيب منين بحر .. مش هقول انواع معينه لكن في بخاخات في كل الصيدليات اسمها ماء البحر ... دي تبقي معاكي في كل مكان ... نضافه شخصيه زي الاصافه بتاعت الاظافر... يوم ما تلاقي ابنك بيخنفر او مزكم او مناخيره سايبا او فاتح بقه و هو نايم ... جري تنضفي الانف و بكده بتقفلي علي نفسك و علي ابنك مشوار عذاب هيحصل بعد يومين او تلاته... معملتيش كده يومين او تلاته و هترشقي في حيطه... افتكري كده هتلاقي معظم امراض الولاد بتبدأ برشح خفيف و بعد كده الدنيا بتقلب... بس ونبي بلاش افوره يعني فقط عند اللزوم ننضف الانف مش يوميا لان اللي بينزل البحر كتير بيجيله تسلخات كذلك الجيوب الانفيه.... فقط لما يكون الطفل محتاج...احنا مش بنقص الاظافر كل يوم....
معلش البوست مقرف شويه بس انا شغلي كده و بحب الارف ده كله لانه باذن الله بيكون سبب شفاء اطفالنا
ربنا يحفظ اطفالنا و يحميهم ... هما نواه المستقبل
د. شهاب مجدي

20/02/2018

انهارده هتكلم عن الصفرا الفسيولوجيه بطريقه عامه جدا...
ايه هي الصفرا اصلا...البيبي جو الرحم بيتغذي عن طريق الحبل السري اللي جواه الدم بتاع الام ... بعد الولاده مباشره بنقوم بقطع و ربط الحبل السري ... و طبعا دم الام بيكون لسه جوا البيبي.... هنا بئا بتبدأ عمليه تكسير دم الام و التخلص منه عند البيبي سبحان الله لتكوين الدم الخاص به اللي هيكمل بقيت عمره بيه.... العمليه دي بينتج عنها ماده اسمها بيليروبين ... او اللي تسبب اصفرار ... الصفرا...
الفتره غالبا بتبدأ من اليوم التالت لليوم التامن من العمر...
العلاج او الوقايه... هو الغذا كويس للبيبي ... البيليروبين بينزل عن طريق البراز... البراز هيجي من الرضاعه الجيده... و ده سبب لون اصفرار البراز اول 10 ايام... مشكله دلوقتي هو زياده عدد الولادات القيصري جدا مما ينتج عنه ضعف الرضاعه اول 3 او 4 ايام بالتالي ازدياد حالات الصفرا ... كان زمان قليل اوي لان كان معظم الولادات طبيعي و بعد الولاده بنص ساعه الام ترضع ....البديل للقيصري هو الاعتماد علي لبن صناعي مع الام اول كام يوم و بعد كده يقف لحد ما نعرف الوزن اخباره ايه مع المتابعه....بلنسبه للوقايه ... بنقيس الصفرا علي اليوم التالت مش شرط دم ممكن بجهاز متوفر في معظم المراكز و اهم حاجه نلاحظ اعراض الصفرا و ده مهم جدا..... الاعراض بتكون خمول تاااااام الواد مبيصحاش خالص و لما ببعيط ميكملش ثانيه و ينام تاني ... مننساش انه طبيعته اكل و مرعي و قله صنعه.. بس يصحي كل 3 ساعات علي الاكثر ... لكن الخمول هنا نايم 4 او 6 او 8 ساعات مببصحاش خالص ولا بيعيط... مع لون اصفرار حاد بالجسم و العين.... ساعتها التوجه فورا لقياس الصفرا بلدم.....
علي اليوم العاشر بيكون في الاغلب خطوره الصفرا انتهت و حمد الله علي سلامته و نتقابل مع العيل اللي جاي ههههه
نخلي بالنا كل ده صفرا فسيولجيه يعني بتيجي لكل الكائنات الحيه لاننا كلنا جينا من بطن امهاتنا هههه لكن في نوع تاني خالص اسمه صفرا مرضيه و ده بنعرفه من ظهور الاعراض اللي مكتوبه اول او تاني يوم... ساعتها التوجه فورا لاقرب طبيب او مركز ....
ربنا يحفظ اطفالنا و يبارك فيهم كلهم
د شهاب مجدي

14/08/2017

انهارده هتكلم عن مشكله كل الامهات و الابهات بيعيشوها و بيمورو بيها...المغس و الانتفاخ عند البيبي...
اول حاجه المغس و الانتفاخ هو واحد من 3 اسباب يخلو البيبي يعيط ... يمكن يكون اوقات ارخم سبب فيهم ... الاسباب كتير جدا لكن الاهم ان ده شئ طبيعي جدا ...ليه؟؟؟سبحان الله عضلات بطن الطفل بتكون ضعيفه جدا عند الولاده و بتكون مفتوحه من النص... تخيل الراجل اللي علي بوستر الجيم.. شفت السيكس باكس... اهو دي بئا عند البيبي بتبقا راميه شمال و يمين ... منفصله خالص ... و الحزء بيكون طريقه لا اراديه لتقويه هذه العضلات... سبحان الله... ممكن كتير جدا يحصل فتاق في السره و حزء متواصل و عياط طول الليل الخبر الحلو ان تقريبا كل ده هينتهي علي 5 او 6 شهور لان العضله هتكون خلاص قويت و اكتمل ارتباط الجزء اليمين بالشمال... الخبر الوحش ان ساعتها هيبدء الاضل و الالعن ... الكابوس ... النكد كله.. التسنين... هههه امال انت فاكره انك هتخشي الجنه كده بسهوله..قدام هنتكلم عليه كتير......
طب نفهم من كده ان لا مفر من المغس و الانتفاخ؟؟؟ ايوه يا فندم... لكن... نقدر نحاول نسيطر عليه ... ازاي؟؟
1. اسلوب الرضاعه اللي ذكرته في البوست السابق مهم جدا و يعتبر مفتاح الاساس للسيطره علي المغس و الانتفاخ...
2.لازم نحاول نكرع البيبي بعد الرضاعه و نعد دقيقتين نخبط براحه علي دهره براحهههه من تحت لفوق عشان نطلع الهوا اللي رضعه حتي لو بنرضع صح هياخد هوا بردو
3. بعد الرضاعه ننيمه علي بطنه و ده بيخلي فتحه الشرج تكون متجهه لفوق و بالتالي تسهل اخراج الغازات او البمب ههه من 10 ل 15 دقيقه و مهم اوي نراقب الانف عشان ميخنؤش نفسه بعد الشر
4. تحاول ننظم الرضاعه كل ساعتين علي الاقل عشان ندي فرصه للمعده تهضم اللبن... مش كل ما يعيط تجري ترضعي... غلط...
5. لو مش راضي يهدي بردو يبئا هنشيله من بطنه او تحطيه عاي ركبتك... و ده بيعمل ضغط علي العضلات الضعيفه اصلا و بيهدي المغس شويه... نفس فكره القرفصه و انتي عندك البريود ....اسف الاكس.. ههه
6. ممكن نعمل تمارين للطفل ... موجوده علي يوتيوب بالعبيط .. لازم تشوفيها بعنيكي اما عن طريق النت او زياره طبيبك... و كمان نعمل مساج بزيت جونسون علي الدراعات و الضهر
7. في ادويه كتيييييير اوي تساعد علي السيطره لكن لازم طبيبك هو اللي يحدد لان ده له اعتبارات كتير....
8. ممكن لو الوزن بيزيد حلو ندي رضعه اعشاب مره يوميا زي تليو . كراويه. شمر. نعناع. و ممكن تضيفي رشه كمون خفيفه و بلاش ابدا سكر... طعم لبنك مقرف و مر جدا و البيبي مش عبيط لو داق الحلو ممكن اوي يتمرد علي المر... اللي يلاقي الدلع و ميدلعش يبقي .............
نقطه مهمه جدا ان اهم علامه ان ابنك سليم هو زياده الوزن... و ده الطبيعي بتاعه 30 جم يوميا اول تلات شهور من العمر يعني تقريبا ربع كيلو اسبوعيا .. مهم جدا نتابع الوزن...
البيبي اللي بيطافس و يزيد اكتر ... بيكون عرضه للمغس و الانتفاخ اكتر ... لكن انا بشوف ان ظه بيكون وجع قلب بس حلو لان في الاول و الاخر ابني بيزيد بزياده.. طبعا الفاتوره بتكون عياط طول الليل و حرمان ليكي و لابوه من النوم... لكن بردو بيكون حلو... انا بحب البيبي الطفس ههههه.....
البيبي اللي بيزيد مزبوط ... بيجيله بردو مغس و انتفاخ بس بيكون اخف كتير و النقط اللي فوق كفيله تسيطر علي الموضوع...
بالنسبه للبيبي اللي مش بيزيد!!!!... طبعا بنعمل كل المحاولات لزياده الوزن بس بنعمل اعتبار ان ممكن يكون في مرضا ما و لازم طبيبك يفحصه كويس جدا...
عشان كده اول 3 شهور مهمين جدا في متابعه الطفل عند طبيب شاطر....
تقريبا ديه معظم المعلومات العامه ... المره اللي جدالجايه هتكلم عن تلصفرا ان شاء الله
اولادنا مستقبلنا ... ربنا يحفظهم و يشفي المرضي منهم و يرزق المشتاق ليهم... شكرا للقراءه