09/05/2023
اليومين دول حالات منتشرة بين الأطفال بشكل كبير 🚫
و ده طبيعي ومتوقع في الوقت ده من السنة علشان محدش يرعبكم .. ✋
و قبل ما اقول الأخطاء ..
احب اوضح نقطة مهمة جدا ..
أخطر حاجة مع الإسهال و النزلات المعوية هي" الجفاف"..
ولذلك روحي لطبيب اطفالك فورا إذا لاحظتي اي عرض من الاعراض الخطر دي :
▪ لسان ابيض و ناشف, عينين داخلة لجوه , جلد مكرمش على سطح البطن أو فقدان ملحوظ في الوزن ..
و كلمة السر هي "محلول علاج الجفاف" ..
المحلول .. المحلول.. المحلول 👉👉
⛔و نبدأ بأشهر ٦ أخطاء في التعامل مع حالات الإسهال و النزلات المعوية :
⬅️الخطأ الاول : المضاد الحيوي :
ممنوع تماما تماما إعطاء المضاد الحيوي بدون كشف ❌
⬅️الخطأ الثاني : أدوية القئ :
أدوية القئ معظمها مش امان ، جرعة أدوية القئ لابد من حسابها بواسطة الطبيب أو الصيدلي، و متنزليش تاخدي حقنة للترجيع من نفسك بدون كشف 💉
⬅️الخطأ الثالث: أدوية الإسهال :
معظمها مالوش لازمة ..
والعلاج الرئيسي هو محلول معالجة الجفاف و المتابعة شبه اليومية لضمان عدم حدوث مضاعفات ..
⬅️الخطأ الرابع : الفلاچيل " الميترونيدازول " :
هو دواء فعال جداً في علاج الطفيليات بس لو فعلا موجودة و متشخصة بالتحليل مش تروحي تديه للطفل مع نفسك ..!
⬅️الخطأ الخامس: منع الاكل او الشرب او الرضاعة :
مفيش اكل ممنوع بس اكيد مش محشي يعني !
الأرز المسلوق و الجزر و التفاح من الاكلات الجيدة مع الاسهال.
⬅️الخطأ السادس : تطعيم الروتا :
مش سبوبة .. و مش رفاهية ..
وإجباري على معظم الأطفال في معظم دول العالم ..
لو ابنك سنه لم يتخطى الاربع شهور انزلي طعميه الروتا فورا قبل الندم 🤷
النزلات المعوية من أكثر أمراض الأطفال شيوعا، ومعظم الحالات بتعدي على خير و لكن لازم و لابد من المتابعة المستمرة شبه اليومية مع طبيب أطفالك حتى تمام الشفاء.
⭕ملحوظة ✋
▪ كل ما كانت الأدوية قليلة كل ما كان احسن لطفلك و لمعدته .
▪ الافضل والاهم هو محلول معالجة الجفاف .
▪ اكلي و شربي حتى لو بيرجع .
▪ لو الترجيع شديد الحجز فورا .
▪ طعموا البيبي ضد الروتا .
وربنا يحفظ اولادنا جميعا 🙏
