Psychotherapist.Mennatullah

27/10/2022

كمية البوستات اللي بتتكلم علي سعر الدولار والكارثه اللي داخلين عليها كفيلة جدا انها تجيب افكار ومشاعر وحشة جدا لكل اللي بيقراها ..

قبول الحياة بشروطها مش سهل ابدا و لازم تعود نفسك عليه واحدة واحدة و افتكر دايما ان مسئوليتك في السعي فقط لكن النتيجة مش بتاعتك ..

الله هو الرزاق ☝🏻

#الدولار
#تعويم

24/10/2022

ليه ممكن تروح لمعالج نفسي THERAPIST 🧠🤔؟

هو يعني ايه 🙄؟

دا شخص بيكون متخصص في دراسة علم النفس ومعالجة الإضرابات النفسية والشخصية ..

طيب ممكن نروح ليه؟ !

أحيانا الواحد في مرحلة ما بيكون محتاج حد يتكلم معاه يخرج كل اللغبطة والدوشة اللي في دماغه بدون ما الحد دا يحكم عليه او صورته في عينه تتهز ..

هو بيكون كل اللي محتاجه يخرج كل الدوشه اللي ف دماغه أو يعرف ايه سببها أو ليه وصل لكدا ؟

بيكون كمان محتاج حد يجاوبه علي الاسئلة الكتيرة اللي بتيجي في دماغه واللي بيعاني منها زي مثلا

ليه الموود بتاعي دايما رايح جايMood Swings🫥
أو ليه عندي دايما جلد ولوم ذات Self-Blame 😵‍💫
ليه عمال أخسر معظم علاقاتي 😓
ليه مابتحبش بالطريقة اللي ترضيني 😑
أو ليه بيحصل معايا كدا ⁉️

أسئلة كتيرة بيكون الواحد عايز يعرف ليها تفسيرات مع حد يحلله كل اللي حصله ف حياته حد يكون معاه ويخليه يقدر يفهم نفسه ويفهم طبيعة افكاره و يعلمه إزاي ما يكونش سجين لفكرة غلط ملغبطاله حياته و يخرجه من صدمة نفسيىة لسه مأثرة عليه وعلي قراراته ..

دا هنعمله مع بعض خطوة خطوة هندخل رحلة جوانا بنعرف فيها ايه اللي وصلني للنقطة اللي واصل ليها دلوقت و إزي أخرج منها وأزي أبدأ تاني صح..🧠

أعرف إن كل ما تيجي ف أول الأعراض كل ما كان الحل أسهل و المدة أقل فأبدأ وخد خطوة الحل والعلاج⏳

👈تقدروا تحجزوا من خلال رسايل الصفحة ..

10/10/2022

في اليوم العالمي للصحة النفسية، عشر حاجات تحافظ بيهم على صحتك النفسية:👇🏼

١.إتعلم تعبر دايمًا عن مشاعرك وعن اللي بيحصل جواك، سواء أفكار شاغلاك أو مشاكل بتمر بيها.

٢.إرسم حدود واضحة في علاقاتك تحميك، المساحات من وقت للتاني بتحتاج فلترة وإعادة نظر.

٣.ما تتكسفش تقول "لأ" لما تحتاج، أنت مش مُلزم بإرضاء الجميع ولا يمكن ترضيهم طول الوقت.

٤.عوّد نفسك على الإمتنان في يومك، كل حاجة صغيرة بتعملها ليها قيمة ومعنى محتاج تشوفها وتقدّرها.

٥.راعي جسمك وإهتم بيه، اديله إحتياجاته من النوم والراحة، قلل اللي بيضرّه من السكريات والكافيين الزيادة وخلّي الرياضة جزء من روتينك.

٦.حوّط نفسك بناس مُريحة تكون معاهم نفسك الحقيقية وتلاقي الونس في صُحبتهم والتواصل معاهم.

٧.خليك رحيم بنفسك، عاملها برفق وود، إقبل منها الأخطاء من غير جلد ذات أو عقاب مُبالغ فيه.

٨.وقتك الشخصي مهم في يومك مهما كان بسيط، وقت تقضيه بشكل مُرضي ليك وتستمتع بيه.

٩.خلي أهدافك منطقية هدفها تعيش سعيد ومرتاح مش تعيش بتحاول ترضي صورة المثالية والكمال في كل لحظة.

١٠.ماتستعيبش إنك تلجأ للمساعدة لما تحتاجها، لو حسيت إنك بتعاني أو بتمر بوقت صعب خد خطوة لحماية صحتك النفسية.

منشن اللي محتاج يسمع الكلام ده أو حاسس إنه هيفرق معاه ✋🏻


#مماقرأت

07/10/2022

حقائق عن مخدر الحشيش ..

..

26/09/2022

مهمة الأمهات في التربية أمر في غاية الخطورة بس أنا نفسي أخص الكلام للامهات اللي عندهم أولاد ذكور.......
ودة لأن مهمتها في الحالة دي أكبر وأعظم وأدق لأنها بتأهل الرجل ...اللي حيبقي مسئول عن منصب في الدولة وحيكون مسئول عن بيت وأسرة وحيكون مسؤول عن حاجات كتير أوي ...
خللي بالك من بعض النقاط اللي حتفرق كتير في تركيبة شخصية إبنك :
1. احضنيه ....احضنيه ....احضنيه كتير ....إديه الحنان كله ...حنان مش دلع ...اشبعيه علي أد ما تقدري.... عشان أما يجي يحب ويختار يحب بنت تكون له زوجة الأول مش يدور علي واحدة تقوم له بدورك اللي انتي فشلتي فيه ... وأما هي تحاول لأنها تتعامل معاه علي انها زوجته ميتقبلش دة وتحصل المشاكل ويبقي متمسك بصورة الأم اللي افتقدها....
2. حافظي علي كرامته فوق الوصف بينك وبينه وقدام الناس خليه عنده ثقة في نفسه وفي تصرفاته إديله الأمان ومتحسيسهوش إنه شخص غير موثوق فيه ....متفتشيش وراه بالشكل اللي يحس إنه خصوصيته انتهكت وإن مفيش حدود بتحترميها.....
3. إنتي أول شخص بيتعامل معاه من الجانب الانثوي وإنتي اللي بتشكلي كل معتقداته وأفكاره عن المرأة ...فمفيش داعي يعرف إن المرأة كدابة لما يلاقيكي بتكدبي أو خاينة لأمانة أما بتفتشي في حاجة باباه...مفيش داعي تمحي صورة أبوه وتحسسيه إن الكلمة كلمتك لأن بالتبعية حيرمي كل مسؤولياته علي زوجة المستقبل...مفيش داعي لتكوين أي ذكري مؤلمة حتكون أساس اختياره الغلط في شريكة حياته..
4. علميه يبكي ....يعبر عن مشاعره مهما كانت ....شيلي من قاموس التربية البكاء مش للرجالة أو متضعفش وخليك راجل ... سيدنا أبي بكر كان كتير البكاء وكان ما أعظم الرجال ...
5. علميه العفة ... وإن العذرية مش للبنات بس ....غض البصر والعفاف من شيم الرجال ..... الكحرتة واللف والدوران والتجارب الكتيرة بتخلص طاقة الراجل بدري ... بيبقي عرف كل حاجة وشاف كل حاجة وأي شئ من زوجته حيكون ولا حاجة... العفة مش للبنات بس ...
النقاط دي مش بحث ولا منهج علي أد ما هي للمثال وليس الحصر ....بس هي نقاط بتقتل الرجولة ببطئ وتحول حياة الرجل اللي جاية لمعاناة مش حياة..
مهمة أمهات الذكور هي إنها تدي المجتمع رجل ...بس بمعايير سوية بعيدة عن معتقدات وافكار وموروثات فاشلة...بتعتمد علي فهمها لسيكولوجية الرجل وإنها تبعد عن تربيته بمنظور أنثوي فاشل ...بيخرج للمجتمع اشباه رجال ....
أمهات الذكور .... عايزين رجال أسوياء ....ارجوووووكم🙏🏻

#الزتونة

#مماقرأت

20/09/2022

لما أكتر حاجة بيحبها بسحبها منه
كده ابقى بعاقبه ولا بذله!!!
هيفهم ايه عن نفسه ؟
ج/ أنا لا استحق

هيفهم ايه عنك ؟
ج/ ماما مش بتحبني
ج/ ماما بتضايقني

هيفهم ايه عن الحياة والدنيا والعالم ؟؟
ج/ ملهاش أمان

انا متأكدة انك متقصديش كل ده

عارفة ان كل اللي انتِ عايزاه انه يعرف الصح من الغلط

وده هيعرفه بالحب🤍 أكتر من العقاب ،
بالحزم ،، أكتر من الحدة

بالقواعد والتدريب عليها

بالمحاولة والخطأ والتكرار يعلم الشطار 👌

بتحمل عواقب الأمور 👌يتحمل نتيجة خطأه
مش يتحرم من اللي بيحبه..

🚩علشان لما يكبر ميحرمش نفسه من تحقيق أهدافه
بسبب غلطة غلطها بيعاقب نفسه عليها

🚩ميحرمش نفسه من السعادة بدل ما يصلح الخطأ
ويستمتع بالحياة

✴️مشاكل وتحديات وعوائق بنقابلها واحنا كبار

ولما بندور على أصلها بنلاقيه موقف اتفهم غلط في الصغر

والنهاردة .. ودلوقتي

🌱 ربنا رزقك المعلومة علشان تطبقيها

🌱 وتفتحي لنفسك صفحة جديدة بيها

مش علشان تلومي نفسك عليها 🙅‍♂️

🌱 كلنا بنتعلم وبنغلط ونتعلم مع اخطائنا 🌱

وده اللي بيحصل لأولادنا 🌱

فكوني رحيمة بنفسك وبيهم 🤍🤍🤍

#مماقرأت

16/09/2022

خرافات عن الصداقة

الصحاب بالسنين: فى الحقيقة الصحاب بالمواقف .. الناس برصيدها عندنا .. قيمة الصحبة مش فى عدد السنين أنما باللى بيجمعنا دلوقتي وجودته

الصحاب للعمر: المتوقع أن بعد فترة ممكن نحس أن بعض الصداقات مبقتش بتسعنا .. كل واحد راح فى طريق ومبقتش حاجة بتجمعنا وفى وجودنا سوا مبقناش نحس بنفس درجة القرب كأننا أغراب متمسكين بنسخ قديمة من بعض فممكن ساعتها نتفهم ده ونقره بيه

الصحاب بالعدد: الحكمة أن ميبقاش عندك أكتر من اتنين تلاتة بتسميهم صحابك لأن للصاحب عليك حق أنما المعارف فدى على مدى كونك اجتماعى

لازم يكون عندى صاحب انتيم: النضج أنك تعرف أن نادر ما شخص واحد هيغطى كل احتياجاتك من الصداقة .. ممكن يكون عندى رفيق للجيم ورفيق للسفر ورفيق للدراسة وهكذا .. صديقي الصدوق دى لما تبقي محظوظ

الصاحب صاحب: الصحاب درجات حسب عمق العلاقة من زميل لأنتيم فالذكاء تعرف أنت فين عند الناس والعكس عشان التوقعات من بعض تتضح

لو معنديش صحاب عندى مشكلة: فى فترات فى حياتك ممكن تلاقى نفسك معندكش صاحب تأتمنه غالبا بعد أزمات ومحن أو تغيير أسلوب حياة كبير زى الهجرة .. عادى جدا جمع قواك ودور من جديد على ناس شبهك .. أو عادى تأخد فترة تركز على حالك قبل ما تطلع للدنيا

الصحاب بالوقت: الصاحب مش اللى اكلين نايمين صاحين سوا ولا اللى جمعتكم سيلفى ونزلك بوست على السوشيال ميديا بمدح فيك كأنك ملاك .. لا الصحاب بمدى قدرتك على الاعتماد عليهم وكونهم دعم وسند .. اللى معاك لحظة لحظة وفى ضيقتك لا ده فاضى وواطى أنما اللى منشغل بحياته وبيفضيلك وقت فى جدوله أو بيلغيه كله عشان يكون معاك فده الصاحب الحق فمتتخدعش عشان متندمش

الصداقة بتحصل لوحدها: يوم ورا التانى سبحان الله بقينا صحاب .. لما تكبر الفعال أنك تعمل مسح بالناس فى حياتك وتقرر بشكل واعى تستمر في مين

الشغل مش مكان نعمل صحاب: فى الحقيقة أى مكان تجمع أشخاص خاصة بشكل دورى هو أفضل مكان تعمل صحاب لأنك بتعاشر الناس قبل ما تصاحبها ودى فرصة عظيمة

صحاب زمان عفا عليهم الزمن: ممكن الحياة تجمعكم تانى خاصة لو افترقتوا بسبب ظروف حياتية أو موقف صادم وبعد فترة نقدر نسامح .. الصداقات اللى صعب ترجع هى اللى انتهت بغدر أو خذلان أو خيانة أو مبقناش شبه بعض بشكل مهول

أحنا صحاب مش حبايب: ناس كتير بتقلل من وجع خسارة الصحاب عن العلاقات بينما فى الحقيقة فى ناس بتدمر نفسيا عشان فقدت حد كانت تظنه صاحب العمر

أنا مختلف عند صاحبي: صاحبك زى ما بيعامل صحابه هيعاملك .. بينم عليهم معاك خاف على أسرارك .. كان بيتلكك عشان ميقفش جنب حد عنده ظروف مش هيكون سند فى محنتك وهكذا .. الصحاب أخلاق مش مكانة .. افهم ده كويس

الحكمة الوحيدة المنتشرة ومش خرافة هى صاحب الكل ملوش صاحب ودى للأسف صح اللى ملوش انتماء ليك وبياخد صفك وفى فريقك ووجعك وجعه يفضل تخلق مساحة أمان ما بينكم

ايه الحكمة اللى اتعلمتها عن الصداقة؟

05/09/2022

لما يكون عندك مشاكل في حياتك وتعباك ونفسك تحلها وتكتشف مع الوقت والاستشارات والجلسات إنك انت السبب في المشاكل دي ، أو مسؤولية حلها عليك انت بشكل كبير »، قول الحمد لله على النعمة.

الاكتشاف ده مش معناه انك معيوب ، ده معناه ان الحل عندك انت؛في ايدك انت ،وده في حد ذاته قوة وقدرة على امتلاك زمام الأمور .

مش مقتنع؟
طب تخيل كده بالراحة والتصوير البطيء
لو المشكلة اللي انت فيها دلوقتي حلها في ايد حد تاني حرفيا، تفتكر مشاعرك هتكون إيه؟
تخيلت؟ 👀

= شكراً ✋🏻



🎬

31/08/2022

30/08/2022

الحمد لله كما ينبغي لجلال وجهك وعظيم سلطانك 🤲🏻💚