Mariam Magdy - Family Counseling & Child Psychology

12/04/2026

أماكن للعلاج النفسي بأسعار رمزية في القاهرة واسكندرية

🔹 مستشفى الدمرداش
- الكشف: ٥ جنيه
- أيام: الأحد والاثنين والأربعاء
- من ٨ لـ ١٠ صباحًا
- الجلسات بتبدأ من ٢٠ جنيه (ومش شرط أسبوعية)

🔹 مستشفى العباسية
- الكشف: ١ جنية فى العيادات الخارجية
- الجلسات النفسية بنفس السعر تقريبًا


🔹 مركز الإرشاد النفسي - جامعة عين شمس
- الجلسة بـ ٢٠ جنيه
- خدمات نفسية للأطفال والكبار

🔹مستشفى جيهان بالاسكندرية "شرق المدينة "
- فيها عيادة نفسي وبأجر رمزي

لازم تعرفوا إن القائمين على العلاج أكبر الأساتذة

فلو تعرف حد محتاج دعم نفسي ومش قادر ماديًا، ساعده يعرف الأماكن دي.
الأطباء محترمين، والعلاج متاح، والفرص حقيقية.

✋ بلاش نستهين بالاكتئاب أو أي اضطراب نفسي
✋ وبلاش نتنمر على اللي بيروحوا لطبيب نفسي

اللي محتاج يتكلم، يسمع، أو حتى ياخد استشارة... يستاهل فرصة.

09/04/2026

للأسف دي غلطة وقعت فيها أجيال كتيرة 😢

08/04/2026

04/04/2026

طب أنا هقولك ليه البنات بتطلق..
تخيل بيت تربى فيه ولد وبنت، والبيت مستقر عادي.. الولد طول الوقت بره ومع أصحابه يرجع البيت يلاقي ماما تمام والأكل معمول وينام ويصحى الصبح ينزل تاني.. وهكذا،
يتجوز الولد ده، عايز بيته زي بيت والده وأم زي مامته قليلة الكلام ومش بتشتكي وكل كلامه لزوجته (امي كانت عادية ومتقبلة تصرفات والدي أنتي ليه مش متحملاني!)

طيب البنت اللي اتربت في نفس البيت (أخته).. عكس كده تماما ، كانت أكثر احتكاكا بوالدتها ، شافتها أكتر وسمعت مكالماتها وهي بتبكي وحضرت قعدات سيدات وأد إيه بيعانوا من سوء طباع الرجال معاهم..
تخيل دي لما تتجوز هيبقى ال background بتاعها إيه عن الرجال والجواز عموما؟
قرارها عن التحمل وعدم الشكوى ايه؟ ده أصلا ممكن تكون وصية أمها لها (إياك تتحملي اللي أنا اتحملته) يعني مش بس شافت وسمعت، دي اتوصت!

أخوها الشاب اللي ذكرناه من شوية شاف صورة خارجية لبيتهم المستقر بسبب عدم كلام والدته.. وعايز يعيش نفس الحالة (أنا تمام والست لازم تسكت علشان البيت يستقر)
ولو شفنا نموذج تاني لشاب عاش في بيت مستقر استقرار حقيقي وفيه أم مبسوطة ورايقه، وأب بيسمح لها تتنفس وتعبر، وحياة زوجية حلوة..
الشاب ده هتكون زوجته بجد من حظها الحلو إنها تدخل عيلة زي دي، لإن خلفية الشاب ده عن المرأة وحقوقها وسعادتها، وخلفيته عن استقرار البيت ومفهوم الرجولة هيكون رائع..

عشان كده البنت والولد ممكن يكونوا خارجين من بيت واحد، لكن الحقيقة إنهم داخليا مش من بيت واحد!

وزي ما الطلاق من أسبابه مشكلات سببها تسلط وندية وسوء معاملة وتدخل الأهل وأسباب كتييييييير من المرأة أو الرجل

في حاجات محدش بياخد باله منها..
إن في بنات كتير مش عايزه تعيش معاناة والدتها .. فتطالب بحقوقها، في حين إن الرجل لا يعلم إن دي حقوق فعلا لإنه ما شافش أمه بتطلب كده، وكان منتظر زوجة بنفس الصمت والهدوء ظنا منه إن السكوت معناه استقرار
ما يعرفش إن سكوت الست يحمل وراه مليون دمعة استخبت من كتر الخذلان ~

01/04/2026

الفكرة اللي في الصورة بتوصف حالة نفسية بنشوفها كتير، لما حد بيأذينا أو بيكون مصدر ضغط ووجع، بدل ما نبعد ونحمي نفسنا، بنفضل نبرر له ونجري وراه كأننا مستنيين منه يغيّر أو يعوّضنا. ده غالبًا بيكون مرتبط بالحاجة جوانا للاهتمام أو الخوف من الفقد، فبنضحي براحتنا عشان نحافظ على العلاقة حتى لو مؤذية. المشكلة إن ده بيخلّي الشخص يكرر نفس الأذى، وإحنا بننزف نفسيًا أكتر.
الصحة النفسية هنا بتبدأ لما نعرف إن مش كل اللي بنحبه آمن لينا، وإن حماية نفسنا مش أنانية، ده وعي وحدود.

31/03/2026

الفقد لا يمرّ دون أن يترك أثرًا فينا.
أحيانًا نشعر أننا لم نعد كما كنا، وأن أبسط الأمور أصبحت تحتاج جهدًا أكبر، بل وقد نفقد الرغبة في المحاولة من الأساس. هذا ليس ضعفًا، بل هو أحد وجوه الحزن التي تغيّرنا بهدوء من الداخل.
فالفقد يعيد تشكيل طاقتنا ونظرتنا للحياة، ويجعلنا أكثر هشاشة… لكنه أيضًا، مع الوقت، يعلّمنا كيف نعيش بقلوبٍ تحمل الألم وتستمر رغم ذلك.

29/03/2026

خيبة الأمل العاطفية في العلاقات ..
بتحصل لما توقعاتك في الاهتمام والتقدير والحب الحقيقي تتبدل بمعاملة سطحية أو فيها إهمال.
بتوضح الفرق الكبير بين إنت عايز تتعامل إزاي — بحنان وتقدير — وبين الواقع اللي أوقات بيحسسك إنك متاخد كأمر عادي أو مش مُقدَّر.
هي إحساس بإحباط مكتوم، مش بس بسبب التصرفات، لكن كمان بسبب غياب الاهتمام الحقيقي والفهم.

29/03/2026

#مماأعجبني

مش كل اللي بيسمع عايز يفهم

26/03/2026

الفكرة الأساسية أن الاحترام والتقدير لازم يكونوا واضحين ومتبادلين، فلو لقيت نفسك بتبرر أو تشرح قيمتك و احتياجاتك باستمرار، فهيكون الأفضل تبعد وتحافظ على كرامتك و صحتك النفسية 🙏🏻

08/07/2025

#مماأعجبني

سمعت مصطفى حسني بيقول:
"من أسباب ذبول الإنسان في الحياة: عدم الانتماء لأحد، وانعدام طعم الحياة بسبب انعدام الأُنس.."

وحقيقي ده أكتر كلام واقعي سمعته مؤخرًا..
الرحلة مش فردية، وعمرها ما هتنفع تكون فردية ياجماعة! اوعى تسمع للكلام اللي بيحسسك إن طبيعي تبقى لوحدك.. مفيش أحلى من الوَنَس في الدنيا،
أنا لما كبرت اقتنعت إن المُتعة مش في الوصول ولا في الرحلة ولا في الطريق، المُتعة في الرفيق.. ومن غير رفيق لا هيفرق معاك وصول ولا طريق!
الدنيا صعبة ومُجهِدة عايزة حد معاك يهوّنها عليك ويعينك عليها.. ‏الإنسان هيفضل يلف ويدور وينجح ويتطور ويلم فلوس، وفي الآخر السعادة الحقيقية هترسى على قعدة مع شخص بتحبه كلها كلام مع كوبايتين شاي. ♥️

07/07/2025

#مماأعجبني 🌷