Dr. Ramy Gaber; OMFS

02/09/2025

هل الماجستير في طب الأسنان له لازمة ؟

رأيي الشخصي ، انه بشكله و نظامه الحالي لازم يتلغي و يتغير لنظام تاني خالص.

عشان بس اوضح وجهة نظري ، لازم نعرف ليه الناس بتقدم ماجستير..الناس بتقدم للماجستير لسبب من اتنين بشكل رئيسي
١- الحصول على تخصص اكلينيكي و يبقى اخصائي بدل ممارس عام
٢- احتياج و متطلب وظيفي أساسي للعاملين بالجامعات أو الهيئات البحثية

هنا بقى يظهر سؤال جوهري .. لما هو اغلب الناس عايزاه عشان تاحد تخصص اكلينيكي. ايه لازمة الجزء البحثي اللي هو الرسالة. اجابتي قطعا ، ولا له اي لازمة حاليا وما هو الا مجرد موروثات من نظام عفى عليه الزمن.. و كمان دلوقت مع انتشار آليات الذكاء الاصطناعي و ووجود مكاتب بتعمل الرسايل و تكتبها بالفلوس، مبقاش حد مستفيد من القصة ديه وأصبحت عبء على المشرفين و الطلبة.
عشان كدة رأيي ان فكرة الماجستير الاكلينيكي فكرة عبقرية لاي حد مش محتاج الشهادة للترقي الوظيفي

طيب لو حبينا نبص بشكل اوسع على وضع تخصصات طب الأسنان الاكلينيكة في مصر ، ازاي اقدر ابقى اخصائي .. للأسف في مصر حتى الآن الوضع فوضوي جدا في النقطة ديه، انك تقدر تبقى متخصص عن طريق اكتر من طريقة
١- شهادات الجامعات المصرية ماجستير اكاديمي او اكلينيكي او الدكتوراة
٢- الزمالة المصرية او البورد المصري
٣- في الجراحة البورد العربي
٤- الزمالات الأجنبية او عضويات الكليات الملكية البريطانية

هل كتر الطرق ديه ميزة ولا عيب... هي ميزة للفرد اللي عايز يبقى اخصائي ان قدامه اكتر من اختيار لكنه على المدى الطويل عيب للمنظومة و الخدمة الطبية.. لان مفيش اي مسطرة واحدة تقدر تقارن او تقيس عليها مستوى المتخصص او حتى تعرف بيها هل تم تدريبه بشكل كافي او لأ...
يعني بشكل تاني ، انهي طريق من دول يخلي الطبيب المتخصص ملم و متمكن بأغلب متطلبات تخصصه و يقدر يعالج ٧٠-٨٠ % من حالاته ؟

هل المحتوى الدراسي لوحده كافي عشان نحكم ولا عدد الحالات ولا صعوبة الامتحان؟

لو رجعنا للاختيارت هتلاقي ان مثلا الماجستير محتواه الدراسي اعلى لكن الزمالات الجزء العملي فيها اكبر و الزمالات الأجنبية امتحاناتها أقيم

طيب برضه نختار ايه.

لو بصينا لأغلب دول العالم بتعمل ايه ، هنلاقي ان التخصص بيكون ليه طريق واحد معروف..
١- برنامج اكلينيكي بمسمى واحد لكل المتدربين في البلد بغض النظر عن مكان التدريب سواء مستشفيات جامعية او هيئات أخرى
٢-المحتوى العلمي أو الخطوط العريضة ليه مكتوبة
٣- عدد السنين ثابت
٤- امتحان موحد على مستوى البلد من جهة مستقلة عن التدريب و التدريس لمنح شهادة الاختصاص

ده اللي المفروض يحصل في أغلب التخصصات ما عدا الجراحة (لان ليها وضع مختلف هابقى اتكلم عنه في وقت تاني و ده لطبيعة التدريب و نوعية الحالات وتدرج صعوبتها الخ)

طب و الناس اللي شغالة في جامعة يعملو ايه...
هنا لازم يكون في فصل ما بين التخصص الاكلينيكي و الشهادات البحثية اللازمة للترقي الوظيفي.
من رأيي ان الجزء الاكلينيكي لازم انه يتم استبداله بالشهادة الاكلينيكة الموحدة و يتعمل معاه جزء بحثي عشان يبقى ماجستير.
و بعد كدة يقدر انه يعمل دكتوراة بحثية بدون جزء اكلينيكي...مش عايز اقولكم لما باقابل اساتذة او اطباء من دول تانية بيبقو مش مستوعبين يعني ايه دكتوراة قيها تدريب اكلينيكي.

النقطة المضيئة في الحكاية ان المفروض فكرة البورد المصري متحقق فيها كل المكتوب فوق ده.. لكن مازال حتى الآن في معوقات في التنفيذ ولم يتم تطبيقها بشكل كامل..

15/08/2025

📸 حالة اتبعتتلي من أحد الزملاء لطلب الرأي في خطة العلاج
واستوقفتني كمثال ممتاز لمراجعة بعض أساسيات التخطيط الجراحي لحالات أمراض الفك الكبيرة 👇
Surgical Treatment Planning & Sequencing

---

🔍 Radiographic findings:
1️⃣ Pre-operative panoramic + CBCT show a large radiolucent mandibular lesion extending from the first molar to the ramus.
2️⃣ The lesion appears unicystic with well-defined margins.
3️⃣ Axial views (not posted) show significant buccolingual expansion of the mandible.

---

🧠 Ideal next steps based on the provided data:
✅ Aspiration → to evaluate content and rule out vascular lesions
✅ Incisional biopsy → to confirm histopathological diagnosis
✅ Then → finalize a proper surgical plan based on the pathology report

---

🚫 What was actually done:
a- An excisional biopsy was attempted through total enucleation
b- The sample was sent to a non-specialized lab unfamiliar with maxillofacial pathology

---

⚠️ Consequences of this approach:
🔸 Radiographs show residual teeth still embedded within the lesion → indicating incomplete removal
🔸 Histopathology report says "ameloblastoma" — but with no mention of the histologic variant, which is crucial for surgical planning
➡️ (e.g.,unicystic and its variants vs follicular vs plexiform vs desmoplastic — each requires different management)

---

📌 ايه الحل المناسب للمريض ده حاليا.
1️⃣ إعادة فحص الشرائح و الأنسجة في معمل متخصص في أمراض الوجه والفكين
أو
2️⃣ أخذ عينة جديدة من الأنسجة المتبقية و فحصها في معمل متخصص

---

🦷 💡 Take-home messages:

Don’t skip biopsy before treatment in large lesions

Work with specialized pathology services — not all labs are equal

Always confirm the variant when dealing with tumors like ameloblastoma — it determines the extent of surgery

---

🤔 لو الحالة دي كانت عندك… كنت هتبدأ بإيه؟
هل قابلت حالة مشابهة قبل كده؟ شاركنا رأيك أو تجربتك في التعليقات 👇

11/08/2025

عايز أشكر شركة LAMA Medical على اللوبس الجديدة من تصنيعهم، ماركة Macto 👓✨

تجربة شراء مميزة جدًا كما هو معروف عنهم، واللوبس رائعة في الاستخدام (تجربة أسبوع واحد بس حتى الآن) — وزنها خفيف، والرؤية واضحة والمجال واسع جدًا.

📌 وبهذه المناسبة، قررت أودّع رفيقة الدرب في السنين اللي فاتت، بابيع اللوبس القديمة:
Ergovision 3.5x loupes (flip-up model) + Light original
✔️ بحالة جيدة جدًا
✔️ مثالية لأي زميل لسه هيبدأ يستخدم التكبير لأول مرة

📷 (الصور المرفقة)

لو حد مهتم، يتواصل معايا للتفاصيل.

02/08/2025

من حوالي ٢٠ سنة كدة سنة ٢٠٠٦.. وقت ما كان عدد كليات طب الأسنان في مصر ميكملش ٢٠ كلية..
في السنة ديه اتفتحت اكتر من كلية في جامعات خاصة و بعد اعلان نتيجة الثانوية العامة ابتدت الطلبة تقدم فيهم و فعلا اتقبلو و خلاص بدأو الدراسة.
فجأة و بدون أي مقدمات صدر قرار من وزارة التعليم العالي باغلاق كليتين أو تلاتة منهم و توزيع الطلبة المقبولين فيهم على الكليات الخاصة الأخرى. و على ما أذكر كان السبب هو عدم استيفاء التراخيص و الموافقات بانشاء كليات طب الأسنان بهذه الجامعات.

وفعلا الطلبة دول اتوزعو و الكليات اتقفلت لمدة سنين طويلة ، لغاية ما نفس الكليات ديه فتحت تاني و زاد أضعافهم كمان و لسة هيزيد حكومي و أهلي و خاص.

كما أذكر برضه بعدها بعدة سنين ، كان في كليات طب أسنان مفتوحة و شغالة لكن مكنتش معترف بيها من المجلس الأعلى للجامعات (و متسألش ازاي الطلبة اتقبلو و درسوا في الجامعة أصلا)... في الوقت ده كانت كل سنة النقابة بتنزل تحذير في الجرايد لأولياء الأمور من التقديم على الجامعات ديه... بس طبعا بعد ما الطلبة اتخرجو ، كل حاجة اتصلحت و تم قيد الخريجين.

الخلاصة، الفوضى و التخبط في تعليم طب الأسنان بقالها سنين طويلة ... مش مجرد آخر كام سنة

24/07/2025

أطباء كتير أفاضل من زملاءنا و أساتذتنا كتبو كتير عن سوق عمل طب الأسنان في مصرو نصائح للشباب اللي خلصو ثانوية عامة هما و أسرهم بالنسبة انهم يدخلو أو لأ.
طيب لو القرار اتاخد خلاص و نويت على طب أسنان.. المهم تبقى عارف هدفك من الكلية (دراستها و شغلها صعب و متطلب جدا). لو الهدف بتاعك هو انك تتعلم بجد و تطلع دكتور بجد كمل قراية، لو ليك هدف تاني من الكلية (وده حق مشروع مش غلط) زي اللقب او الوجاهة الاجتماعية او تسهيل حياتك من جوانب تانية يبقى الكلام التالي مش ليك.

تختار ازاي كلية و جامعة مناسبة وفيها تعليم حقيقي تقدر تستفيد منه. كلامي ده ممكن يزعل ناس زملاء مني ، بس ديه الحقيقة .

١- نسبة النجاح و التخرج و معدل الدرجات مش مقياس لأي حاجة. بل بالعكس ، كل ما النسب بقت أعلى خاصة في الجامعات ذات المصاريف العالية ده معناه في أغلب الأحيان طعم لاصطياد أهالي دافعين اكتر عشان ولادهم ينجحو

٢- هل الكلية فيها عيادات مؤهلة ؟ طبعا لو جامعة جديدة صعب تلاقي اجابة .. لكن في كليات فيها طلبة وصلو لمراحل التدريب الاكلينيكي و لسة العيادات مشتغلتش

٣- هل الكلية فيها عدد من أعضاء هيئة التدريس كافي. ده سؤال غالبا محدش هيدي ليه اجابة حقيقية ؟ بس في كليات فيها أقسام كاملة فيها تدريس وتدريب و امتحانات و مفيهاش غير أستاذ و معيد في كل قسم

٤- هل الكلية معتمدة من هيئة الاعتماد المصرية ولا لأ ؟ الكليات المعتمدة الوضع فيها أحسن حالا من الكليات الغير معتمدة شوية.

٥- عدد الطلبة في الدفعة ؟ كل ما العدد بقى أقل كل ما جودة التعليم هتزيد. عشان كدة جامعات كتير بتسعى لزيادة أعداد المقبولين لزيادة الربحية بالنسبة ليهم و طز في جودة التعليم

٦- مكان الجامعة ؟ لو الجامعة مكانها مش مأهول و حواليه كثافة سكانية.. بشكل او آخر التدريب الاكلينيكي هيتأثر

٧- لو في دماغك تسافر برة مصر بعد التخرج.. حاول تشوف في البلد اللي بتفكر فيها هل الجامعة ديه معترف بشهاداتها ولا لأ

٨- لو عندك فرصة انك متبقاش أول دفعة في جامعة لسة فاتحة ، يبقى أفضل انك تختار جامعة ليها خريجين في سوق العمل.

٩- أغلب الأطباء و الخريجين هيكونو متحيزين للجامعة اللي اتخرجو منها و شايفين انها احسن جامعة في مصر.

١٠- مصر بدأت تطبيق نظام امتحان الحصول على رخصة مزاولة المهنة. النتائج الأولية تشير ان في جامعات عندها مشاكل في التعليم لأن الطلبة بتوعها نسب كبيرة منهم مش بيعدو الامتحان من أول مرة. اعتقد لو نتائج الامتحانات هتكون معلنة و متاحة للجميع، ده هيكون مؤشر قريب من الدقة لمستوى التعليم في الجامعات المختلفة.

١١- شياكة و نضافة الجامعة تعني ان الطالب هيقضي وقت مريح نفسيا فيها هو واصحابه (وديه حاجة مهمة طبعا) بس ده لا يعني انه هيتعلم كويس ، مش شرط خالص.

و بالتوفيق للجميع

12/06/2025

حاليا كتير مننا بيلجأ لاستخدام وسائل التواصل الاجتماعي لل
Personal branding
بأساليب مختلفة..فيه اللي بيحط صور حالات، وفيه اللي بيكتب معلومات طبية ، وفيه اللي بيحاول يشرح ويبسط مواضيع طبية معقدة.... الخ

في عيب قاتل للحكاية ديه خاصة من ناحية تبسيط العلم، ان في جزء كبير من الأطباء الغير مختصين بيتعامل مع البوستات و الصور ديه على انها معلومات علمية موثقة ، في حين انها في أحسن الظروف هتكون مجرد قشور مكتوبة صح لموضوع معقد. المشكلة انه بينسى او بيتغافل عن ان الشخص اللي كتب المعلومة المبسطة ، المفروض انه اتعلمها في مكانها الطبيعي سواء من الكتب او في برنامج تعليمي متخصص او دراسات عليا مش من الانترنت.

العلم الحقيقي مكانه الكتب و قاعات المحاضرات مش على وسائل التواصل الاجتماعي.

يا ريت نفتكر دايما ان مهما كان الموضوع مشروح كويس في بوست او صور، وراه مجهود كبير و قراية ومذاكرة.. يعني مينفعش نتعامل مع البوستات على انها مصدر شامل ووافي .

23/05/2025

عندي كام نصيحة للشباب الباحثين عن فرص عمل في مجال طب الأسنان. النصائح ديه من خبرة تقرب من العشرين سنة من الممارسة في مصر ، ومن حسن حظي اني اشتغلت في أغلب المستويات من أول المستوصفات المجهولة في المناطق الشعبية لغاية أكبر أسامي من مراكز الأسنان.

الكلام هيفيد أكتر الشباب اللي عندهم خبرة عملية ولو بسيطة.

١- لو هتنزل بوست طلب عمل ، يا ريت تنزله باسمك... انا ليه كصاحب عيادة اتواصل مع حد مجهول مش عارف حتى اسمه، حركة زي ديه هتقلل فرصك

٢- وانت بتعرض خبرتك العملية، ابعد عن المبالغات الغير منطقية. يعني ميبقاش خبرتك ٣ سنين بعد التخرج و تقول انك شغال ٢٠٠٠ حالة زراعة مثلا او متمكن من الجراحات الكبرى..... الخ

٣- على قد ما التوثيق و تصوير الحالات مهم، بس هو مش كل حاجة. لسبب بسيط ، ناس كتير بتاخد صور من الانترنت و تنسبها لنفسها. الأهم من صور الحالات ، ان يكون في اشخاص
Reference
ممكن نرجع نسألهم عنك وعن شغلك . ولو صاحب العيادة اللي كنت شغال معاه انا اعرفه شخصيا (المجال اوضة وصالة ) . كلامه هيكون عامل مهم و حاسم في التعيين او الرفض.

٤- على قد ما تقدر طور من نفسك ومهاراتك، التعليم الطبي مش بيقف طول العمر و الدنيا بتتغير بسرعة جدا. آخر ١٠ سنين او ٥ سنين، حاجات كتير اختفت و ظهر بديلها.

٥- لو انت لسة متخرج او في امتياز. دور على عيادة تنزل فيها متفرج او مساعد عشان تستفيد حاجة او اتنين حتى لو بدون مقابل مادي او مقابل مادي ضعيف. ١)التعامل مع المرضى وادارة العيادة. ٢) خبرة علمية عملية لو الطبيب متميز في مجاله.

٦- العيادة اللي هتنزلها لازم يتحقق فيها شرطين. ١) التعامل باحترام، لو مش موجود امشي. ٢) تكون في نفس المستوى او التخصص اللي انت عايز تشتغل فيه، غير كدة هتبقى بتضيع وقتك.

٧- الاشهر في المجال مش دايما الافضل او الاشطر (في كتير متميزين فعلا، عشان محدش يفهم غلط)، هو اشطر في التسويق والدعاية لنفسه. بس في ناس أقوياء جدا و عياداتهم مبهرة و مش محتاجين التسويق والدعاية.

٨- لو جاتلك فرصة شغل، لازم تشوف نقطتين مهمين تقيم بيهم المكان قبل الفلوس. ١) هل العيادة فيها ابسط الامكانيات المطلوبة لتقديم خدمة طبية محترمة، ٢) اخبار مكافحة العدوى ايه ؟.. يعني اسأل نفسك سؤال، لو حد من عيلتك هترضى تشتغله في العيادة ديه ولا لأ. لو اجابتك اه يبقى تمام، لو جاوبت بلأ يبقى متشتغلش ، واللي مترضاهوش لأهل بيتك مترضاهوش للناس.

انا عارف ان المنافسة بقت صعبة و الفرص تبان معدومة، بس مع السعي الابواب بتتفتح. وربنا يوفق الجميع

18/04/2025

الحمد لله..

My latest international publication in the reputable journal "dentomaxillofacial radiology" with my colleagues and professors at the oral and maxillofacial radiology department.

ده تالت بحث مرجعي systematic review
أشارك فيه و يتم نشره دوليا في مجلة علمية متخصصة مرموقة.

27/03/2025

For young surgeons interested in raising their level in oral surgery. This is a short course for a limited number of attendees

Surprises from Ain Shams University Continuing Dental Education are not over yet!!!
is a whole different mood!!🎉

Join "Mastering the Removal of Impacted Teeth, A Condensed Course for Young Surgeons" with Assoc. Prof. Dr. Ramy M. Gaber

Condensed course consists of:
✅️ 2 Day Intensive Lecture & Live Demo followed by Preclinical Hands-on Workshop & Practice (May 31st and June 1st)
Followed by
✅️ 1-on-1 Mentoring accompanying each participant as each performs 3 specialized cases (scheduled individually - flexible)

🎯Practice with Confidence! Gain Mastery!

💡
Don't miss out on this opportunity to

🥼Register now and secure your spot!

🎲 6 seats only!

🔗https://forms.office.com/r/2vrDYAR1LM

26/02/2025

https://www.facebook.com/share/p/1DuEdbk5od/