Inside Out Nutrition-DR.Amira Mahmoud Yousufأخصائي التغذيةد.أميرةمحموديوسف

21/07/2024

عن تغذية الأطفال

لا تقتصر التغذية السليمة على يوم ممارسة الرياضة، بل هي رحلة طويلة، لهذا نحرص على أن يتناول الطفل من 4 لـ5 وجبات يوميًا، فكيف ننظم ذلك؟ وما هي مكوناته؟

28/04/2023

في رحلة تظبيط الأكل والدايت والذي منه، في حاجات قد تبدو صغيرة لكنها بتفرق فعلا، حاجات مش متعلقة بالأكل نفسه لكن بعادات صغيرة في التعامل مع الأكل، زي ايه مثلا؟

-الأكل بمعلقة صغيرة، أو شوكة، لما بتاكل بمعلقة كبيرة الكمية هتزيد والأكل يخلص بسرعة، الشوكة هترفعها كتير عشان تاكل، فتحس إنك بتاكل وقت طويل وده بيساعد في الشبع، كل ببطء وامضغ كويس.

-الأكل كله في طبق واحد، مش يكون قدامك الحلل والصواني وتعيش حياتك، طبق واحد متقسم فيه الخضار والبروتين والنشويات، والنشويات مش أكتر من ربع الطبق مهما كان نوعها، حتى لو كانت بشاميل عادي.

-شرب كوباية أو ٢ مياه قبل الأكل، وبداية الأكل بالشوربة والسلطة، تملى مكان، على ما توصل للنشويات يكون المكان الباقي قليل بإذن الله.

-التركيز في الأكل، متاكلش قدام تليفزيون، تاكل وحواسك منتبهة للأكل: طعم الأكل، ريحته، ملمسه، قد يبدو هذا زي كلام العيال بتوع اليوجا :D ، لكنه في الحقيقة مهم عشان هتحس إنك بتتبسط بكل لقمة، وواعي بتاكل ايه، مش بتحدف في بقك قدام التلفزيون وخلاص.

-خلي في بطنك مكان يكفي كوباية مياه على الأقل بعد الأكل، يعني متقمش وأنت مش عارف تاخد نفسك.

-متاكلش إلا وأنت جعان، مش لازم ده وقت فطار أو غدا، عادي صاحي مش جعان استنى لحد ما تجوع، أول ما تبدأ تجوع كل، متاكلش شبعان، ومتاكلش وأنت ميت من الجوع، لما تبدأ تحتاج الأكل كل.

-لو في طبق فيه مشاركة، زي البطاطس مثلا أو المكسرات، خد منه بالواحدة، واحدة لب أو واحدة لوز، وكلها ببطء وخد واحدة تانية، مش خمسة مرة واحدة، ده بيساعد في تقليل الكمية، وبالمناسبة سنة عن الرسول صلى الله عليه وسلم.

-متفضلش فترة طويلة قاعد من غير أي حركة، حتى لو خمس دقايق كل ساعة تقوم تلف حوالين اللابتوب، تتنطط، أي دوشة، بعيدا عن الرياضة خلي شكل يومك نفسه فيه حركة كتير على أوقات متقاربة.

-متختبرش نفسك، يعني ميبقاش البيت مليان شوكولاتة وشيبسي وبيبسي وتقول هعتمد على إني هقاوم، لا الأحسن تبعد أصلا، متبقاش الحاجات قدامك، وشيل أبلكيشينز الأكل، وهكذا.

-بلاش العصير، المياه، المشروبات الدافية بدون سكر، حتى مشروبات الكافيين، بديل أحسن كتير.

-الحلويات مش سناك، لو هتاكل حلويات يبقى بعد وجبة كاملة عشان تكون شبعان ومتحكم في الكمية، وقطعة زي ١٠٠، نفس الطعم يعني.

-اتنفس كويس، في العموم، التنفس بعمق وتنظيم التنفس بيفرق جدا في صحتك في العموم، وطبعا اشرب مياه..النصيحة المعتادة.

-جهز ليست بحاجات تعملها لو متضايق، بدايل للأكل، عشان وقتها مش هتفكر، فميبقاش الأكل هو أقرب وأسرع حاجة.

-أنت أدرى بالنقطة اللي أنت جاي منها، يعني اللي باديء من ٤ معالق سكر لما يوصل ٢ ده كدا برافو، جاي من ٢ لتر بيبسي وصلت لكانزاية دايت يبقى برافو، متستناش تبقى بيرفكت من أول يوم وشوف انجازك التدريجي.

-متدورش على نتايج بدري، ومتحبطش، ومتوزنش كل يوم، الرحلة طويلة، ولو مش باين دلوقتي مش مهم، شوية وهتحس بنفسك، بعدين هتشوف بنفسك التغيير، بعدين هتسمعه من اللي حواليك.

وبالتوفيق والهنا والشفا :D

12/01/2023

هالو يا أصدقاء ويا صديقات❤
بإذن الله هكون موجودة في chillax في التجمع، يوم ٢٣ يناير، كورس عن المحاور المختلفة للحياة الصحية، وازاي تقدر تبدأ حياة صحية بطرق بسيطة، والتغذية والأشياء، الكورس للسيدات والبنات وأي كروموسوم x طبقا لسياسة المكان لأنه مكان نسائي فكرته جميلة، بيساعد الستات تعيش أحسن وتتعلم حاجات جديدة في مجالات مختلفة.

متحمسة جدا للتجربة وكنت عايزة أعمل الكورس ده من زمان، تجربة تعليم الحياة الصحية وأن الأدوات تبقى معاك تكمل بيها حياتك عموما، ومتوترة شوية بصراحة :D، وبإذن الله لو ربنا ييسر هيكون فيه إصدار أون لاين من الكورس قريبا، عشان عارفة أن التجمع بعيد :D
الحجز بيكون عن طريق المكان مش طريقي، الرقم موجود في الصورة، وهحط لينك الصفحة والبوست عليها في أول كومنت.

هستنى اللي تقدر تيجي وبإذن الله نتبسط سوا❤

05/01/2023

الحمدلله
بحسه رزق أن يكون في ناس لطيفة طيبة تقول كلام جميل زي ده
وبحب أوي الفيدباك اللي بيتضمن أن الموضوع بقى لايف ستايل مش أرقام ميزان وخلاص
واحدة من ألطف الناس اللي تابعت معايا حقيقي:))