07/01/2023
تحضير اللي هتاخديها معاكي المستشفى من الحاجات المهمة اللي لازم تكوني عارفه تنظيمها وتجهيزها علشان متاخديش معاكي حاجات مش ضرورية وتنسي الحاجات المهمة, علشان كده #ماما هتقولك إزاي تحضري شنطة المستشفى ليكي وللبيبي
1- هتقسمي الشنطة جزئين, علشان حاجاتك وحاجات البيبي متتحطش على بعض ويبقى في لغبطة أو تعطيل.
2- الجزء بتاعك هتحطي فيه المشط أو الفرشاه وفوطة قطن خاصة بيكي وشامبو.
3- هتحتاجي كمان لبعد الولادة على طول فوط صحية خاصة ببعد الولادة, وهدوم داخلية قطن, وجلابية أو ترينينج بس يكونوا بسوستة أو زراير بتتفتح من قدام لتسهيل الرضاعة.
4- متنسيش تحطي حاجة مريحة تلبسيها في رجلك وتكون من غير كعب, والروب أو الإسدال علشان لو الدكتور طلب إنك تقومي تمشي بره الغرفة.
5- الجزء الخاص بالبيبي هتحطي فيه شامبو مخصص للأطفال وفرشاه الأطفال والقصافة وفوطة قطن وحفاضات مخصصة لحديثي الولادة.
6- هدوم البيبي اللي هتحتاجيها في الشتا هي اللفة أو الكوفرته القطن, بطانية سالوبيت قطن بكم وسالوبيت اتقل قطيفه وطاقيه للرأس أو جلابية حديثي الولادة بتكون عبارة عن جلابيه صغيره وبنطلون وطاقية للرأس, وهدوم داخلية.
7- متنسيش أدوات تعقيم السرة, الكحول الطبي والقطن.
8- ممكن بعد ولادة الطفل الدكتور يلاقي حالتك متسمحش للرضاعة, فهتحطي في الشنطة ببرونة مخصصة لحديثي الولادة إحتياطي.
دي أهم الحاجات الأساسية اللي لازم تكون موجودة في شنطتك اللي هتروحي بيها المستشفى, وشاركينا بحاجات تاني اكتشفتي إنها مهمة أو حد تعرفيه احتاجها وقت الولادة
