د. دعاء حافظ

10/04/2026

🤰عند ٣٦ اسبوع الام جاتلي بناءا علي ترشيحات صديقة لها ولدت معايا فيباك - البيبي كان مقعدي ووزنه كبير ٢ كيلو و٩٠٠ جرام
شرحت لها تفاصيل استعدال الجنين المقعدي واديتها ميعاد بعد أسبوع للمحاولة.
🤰عند ٣٨ أسبوع البيبي بقي ٣ كيلو ونصف حاولت اعدل البيبي واتعدل وفرحنا جدا بيه وعملت لها فحص تحفيزي للولادة الطبيعية بعد الاستعدال
عنق الرحم كان ١ سم
🤰عند ٣٩ أسبوع البيبى بيكبر بسرعة وكررنا الفحص التحفيزي
وكان الفحص رائع عنق الرحم بيتمدد الي ٢ ل ٣ سم
ولين وعملت تحفيز يدوي كويس جدا

🤰عند ٣٩ اسبوع + كررنا الفحص التحفيزي
وفحصها ٣ سم بيتمدد ل ٤ سم وعنق الرحم لين - البيبي ظهره لظهرها

🤰عند ٣٩ + كلمتني ان جيب الماء فتح وبعتها المستشفى- الفحص لسه ذي العيادة ومفيش طلق والماء رائق
لكن ال CTG فيه بعض علامات ال stress
قررت احجزها وننتظر الولادة الطبيعية وهي محجوزة وبنكرر
CTG
ولو علي الصبح بعد ١٢ ساعة ما ولدتش - هنعمل التحفيز الهرموني

⏰️الساعة ٩ صباحا الفحص ذي ما هو وال CTG كويس
وبدأنا التحفيز الهرموني باللبوسة الأولي

⏰️الساعة ١١ ظهرا الطلق قوي والأم طلبت مسكن واخدت بيثادين
والفحص بقي ٦ سم
⏰️ الساعة ١٢ ظهرا تغيرات علي CTG بتوري علامات stress لكن لما بغير وضع الأم بترجع طبيعية دا بيدل علي ان غالبا الحبل
السري لافف حوالين رقبة البيبي
ووارد يكون البيبي في stress حقيقي- لازم اراقب واشوف وافرق بين الاحتمالات ......
⏰️ الساعة ٢ ظهرا الأم طلبت ابيديورال وأصرت عليه - الأم فاهمة ان الفحص لسه ٦ سم وانها متعطلة علي ٦ سم وفيه علامات stress بتيجي وتروح وان الإبيديورال ممكن يزود التأخير وبيقلل مساعدتها ليا في الحزق وبيزود احتمالية استخدام آلة للولادة- الجفت والشفاط .....
⏰️ الساعة ٤ ل ٥ لسه البيبي بيوري علامات stress مع تغير وضع الام وبتتحسن لما اقعدها في وضع معين
والفحص لسه ٦ سم
كده الأم متأخرة علي منحني الولادة وظهر انتفاخ رأس البيبي caput لانها واقفة علي نفس الفحص بقالها ٦ ساعات
اتناقشت معاها ان لازم طلق صناعي
وبدأ نا الطلق الصناعي....
⏰️ الساعة ٥ الفحص بقي ٧ سم وبحاول اعدل وضع الرأس مع الفحص والبيبي نفس الكلام علي CTG - اي تغيير للوضع علامات stress لحد ما ارجعها للوضع السابق
الساعة ٦ الفحص ٨ ل ٩ سم - وبعدل وضع البيبي واوسع مع الفحص
⏰️ الساعة ٧ مساءا ولدت بالجفت- الولادة كانت صعبةوالحبل السري ملفوف حول الرقبة مرتين ومحكم بشدة وفكيته بعد ولادة الرأس عشان احاول اولد الكتف - manouvers لولادة
الكتف
👶 بيبي ٤ كيلو ١٠٠ جرام بسم الله ماشاء الله تبارك الله
الأم دي مش مصرية وكنت طول الوقت اتمني انها تستمع بالولادة في مصر
واتمني انها تكون فعلا استمتعت بالولادة في مصر رغم صعوبتها
✅️الأم اتحجزت تقريبا ٧ مساءا اليوم السابق وولدت بعد ٢٤ ساعة
١٤ ساعة انتظار و
الولادة من وقت التحفيز استغرقت ١٠ ساعات
انا لغيت مواعيدي وفضلت مع الأم ٧ ساعات - لاني كنت قلقانة من CTG
✅️حكيت القصة دي لان كل أمهات الاستعدال للجنين المقعدي اللي بعدل لهم البيبي وبيكملوا ولادة معايا بحكي قصصهم عشان تكون ملهمة لكل أم البيبي بتاعها مقعدي وبخليها تقرأ القصص دي قبل الإستعدال............
❤️حبيبتي الأم حمدا لله علي سلامتك وربنا يبارك في البيبي ويرزقك بره يا رب 😘

10/04/2026

🏖الماء حول الجنين : السائل الأمينوسي:
هو سائل شفاف (ديناميكي - متغير الكمية دائما ) في النصف الثاني من الحمل يكون مصدره الأساسي بول الجنين مع تبادل مستمر بين الجنين والمشيمة والبيبي بيشرب منه (زائد مساهمه بسيطة من بلازما الام وارتشاح الأنسجة ورئةالبيبي )

🏝أهميته: بيساعد البيبي علي نمو الرئتين بممارسة حركات التنفس ، ويساعد علي نمو العضلات والمفاصل بشكل صحيح عن طريق إتاحة الحركة للجنين. وبيمتص الصدمات الخارجية عن البيبي.

🏝الكمية الطبيعية للسائل الأمينوسي : ٥ سم ل ٢٤ سم.

🏝 أعلي كمية عند ٣٤ أسبوع حمل- بيكون الماء حوالي ٨٠٠ مل تقريبا وبعدين بينقص فسيولوجيا (طبيعي انه ينقص ) لحد حوالي ٦٠٠ مل عند ٤٠ أسبوع(أخر التاسع) وأقل كمان في الشهر العاشر. دا لان المشيمة بتتقدم في العمر Placental aging دا طبيعي.

🛑في أي وقت في الحمل:
السائل الامينوسي زاد أو قل يبقي البيبي عنده خلل في توازن إنتاج البول وابتلاع السائل دا التفكير المنطقي في كل التفاصيل القادم ذكرها.

🥃السائل الأمينوسي 《 ٥ سم :Oligohydraminos
-أخطر سببين لابد من استبعادهم ان :
🚦يكون الدم الواصل من المشيمة خلال الحبل السري للبيبي قليل (=الدوبلر سئ) فبالتالي البول بتاع البيبي قليل نتج عنه الميه حواليه قليلة.
(الاسباب كتير : مرض تجلط وراثي
Hereditary or Aquired Thrombophilia
أو تسمم حمل او ضغط عالي أو سكر أو جلطات في المشيمة أو مرض مزمن للأم أو ...........أحيانا لا نجد السبب.)
🚦يكون جيب الماء فتح والسائل الامينوسي بينزل فالميه حوالين البيبي قليلة .

دا خطر لان ممكن الميكروبات المهبلية الضعيفة تسبب التهابات داخل الرحم (chorioamnionitis) وقد تؤدي لعدوى للجنين وتلوث حوله وقد يصل الأمر إلي تسمم في الدم، فلازم خطة محكمة للمتابعة والولادة بتختلف باختلاف وقت انفجار جيب الماء من عمر الحمل.
🚦أو وجود مشكلة في كلى الجنين تقلل تكوين البول (مثل عدم تكوّن الكلى أو انسداد المسالك البولية)

🍺السائل الأمينوسي 》 ٢٤ سم : polyhydraminos
-بيزيد في الغالبية العظمي لسبب غير معروف Idiopathic

أخطر سببين مهمين للاستبعاد:
💣سكر الحمل أولا (لان البيبي بتعرض لسكر كتير فبيعمل بول كتير ملئ بالجلوكوز يجذب معه ماء كتير - فتزيد الميه حواليه)
💣وجود عيب خلقي: عيوب تمنع البلع مثل انسداد المريء أو الاثني عشر
لذلك الماء حوله كتير أو عنده فقرات مشوهه تسرب ماء من حول الحبل الشوكي للجنين.
أو البيبي اتعدي بأحد الفيروسات الخطيرة أثناء الحمل التي تسبب انيميا للبيبي أو تشوهات خلقية أختصارها STORCH
او اتنين اجنة توأم وواحد بيتغذي علي حساب واحد من المشيمة

🤽‍♂️يبقي السائل الامينوسي في حد ذاته زيادته أو نقصانه هو عرض لمرض أخر لابد من تشخيصه وعلاجه أو بناء قرارت علي أساسه...

🤰السائل الامينوسي قل أو زاد ليس سببا في حد ذاته للقيصرية، حتي لو قليل أو كتير ممكن نقيم الموقف ككل ونقرر الولادة بناءا عليه ...
🤰السائل الامينوسي متجدد دائما لان البيبي بيعمل بول دائما حتي الولادة لكن النقص أو الزيادة تهمنا في انها عرض لمشكله أكبر لازم أحلها وأخطط لها جيدا.

🤔السائل الأمينوسي بحسب دراسة واحدة فقط قد يزيد لو صلحت الأم الجفاف - الافضل ميكنش فيه جفاف (يعني تأخذ سوايل كافية.)

🤰السائل الأمينوسي
عندما تستلقي الأم علي جنبها الشمال دا بيزيد تدفق الدم الواصل للرحم وبالتبعية للبيبي لكن تأثيره المباشر على السائل محدود

🤰السائل الأمينوسي قد يقل لو الأم بتاخد مسكنات من عائلة NSAIDs ذي الكتافلام والبروفين والفولتارين أثناء الحمل (دا ممنوع أساسا لهذا السبب وأسباب أخري)
لان المسكنات دي بتقلل الدم الواصل للكلي للبيبي فبيقل بول البيبي.

🤰بعد كل الرغي والدوشة اللي قلتها فوق دي - بتسأل فيها ٣ مرات يوميا - 🎯بإختصار لو الميه قلت:

لازم تكون قلت عن ٥ سم
-لازم نعرف قلت ليه ونتابع البيبي ونحط خطة الولادة خصوصا لو في الشهر التاسع.
-والميه القليلة ليست سببا مباشر للقيصرية إنما هي سبب للولادةالميه القليلة قد تستدعي إنهاء الحمل حسب عمر الحمل وحالة الجنين...

أرجو أن أكون أجبت الإجابة الجامعة المانعة 😀

24/03/2026

#التحفيز
🤰🤰🤰🤰🤰لو رأس البيبي عالية أو قريبة ، دخلت الحوض أو ما دخلتش ؛ فحص عنق الرحم وحش أو كويس ، عظام الحوض فيها أرش ، عضمة صعبة ، شكله ضيق ، أم قصيرة، بيبي كبير, الحبل السري حوالين رقبته ، الميه قلت ، زادت ، اتعكرت، مابتسحمليش وفرفوره .......إلخ كل دول مادام البيبي بالرأس يبقي معظم الأمهات غالبا ممكن يخوضوا تجربة الولادة الطبيعية أو حتي يعرفوا ان بإمكانهم خوض التجربة لو يحبوا إلا في استثناءات قليلة جدا ذي
🔸️المشيمة السابقة لازم قيصرية
🔸️قيصرية سابقة بالطول لازم قيصرية
🔸️البيبي فيه stress علي CTG تستدعي قيصرية
🔸️طوارئ ذي انزلاق الحبل السري- تسمم حمل شديد او تشنجات .....إلخ تستدعي قيصرية

🤰🤰🤰🤰🤰غالبية الأمهات ينفعهم التحفيز اليدوي أو الصناعي. بقول غالبية لان فيه بعض الطوارئ اللي لازم فيها قيصرية فورا .

👶عمر نضج الجنين حوالي ٣٧ أسبوع من الحمل .
🤰لكن الانتظار أفضل ل ٣٩ اذا سمحت حالة الام والجنين لتفادي صعوبة تنفس البيبي التي قد تتطلب الحجز بالمحضن وأملا في ان الولادة الطبيعية تبدأ لوحدها دون تدخل.
والانتظار خطر بعد ٤١ اسبوع
🤰الأفضل أن كل الأمهات تدخل في ولادة غريزية لوحدها (التحفيز اليدوي - بنعتبره لوحدها برده☺️)

🤰لان لو دخلت ولادة بادئة تلقائيا غريزية دون تدخل نسبة الولادة الطبيعية ٨٠% (يعني ٤ من كل ٥ أمهات هيولدوا و ١ من ٥ هتاخد وجع الطبيعي ومش هتولد هتعمل قيصرية) الولادة الغريزية لوحدها ولادة اسرع نسبيا وأقل ألما.

👩‍💻التحفيز الصناعي بيتعمل عادة عند ٤١ أسبوع و ٣ أيام (٩ شهور و١٠ أيام ) كحد أقصي.

(دي المدة الأقصي للحمل كما حددتها الأبحاث الطبية ودي توصيات
National Institute of Health and Clinical Excellence - NICE guidelines
المعمول بها في انجلترا )

🤰أحيانا بنعمل تحفيز هرموني بدري شوية عند (٣٧ أسبوع- ٣٩ أسبوع) لو فيه أمراض مع الحمل ذي السكر أوالضغط أو ارتفاع انزيمات الكبد أو الجنين أصغر من ١٠% من الرينج أو أكبر من ٩٠% من الرينج حسب تقييم كل حالة أو تسمم الحمل أو الدوبلر فيه مشكلة .......إلخ.
أحيانا ممكن نحاول بالتحفيز الهرموني حتي قبل ٣٧ أسبوع - في حالات مرضية معينة من الحمل.

🤰التحفيز الصناعي Induction of labour
نسبة نجاحه (٦٠%ل ٨٠% يعني تقريبا ٢ من ٣ أمهات هيولدوا طبيعي. ١ من ٣ هتعمل قيصرية)

🤰ممكن التحفيز الصناعي الأفضل أن يسبق بتحفيز يدوي أملا في تقدم الحالة واستجابتها .

👩‍💻التحفيز الصناعي له طرق كثيرة كلها تشترك في ٣ مراحل: بصي علي الصور
١- تحريض علي ليونة عنق الرحم حتي أصل لجيب الماء خلفه.
لانه بيكون ضيق وطويل مثل عنق البالونة ، لازم يطري وبعدين ممكن يقصر و يتسع (كالحلقة أو الاسورة ) فيكون أكنك نفخت البالونة للأخر فأختفي عنقها. ( ملحوظة : التشبيه بالبالون أو الانبوبة التي تتحول لحلقة من خيالي لتقريب الفكرة - بصي علي الصور)
(كل الغرض هنا ان أصل لجيب الماء خلف عنق الرحم)
٢-الخطوة التالية فتح جيب الماء .
٣- ثم تحريض علي إتساع عنق الرحم (الاسورة ) ليصل إلي ١٠ سم ودفع بالطلق لنزول رأس البيبي من البطن للحوض ثم للخارج(برده بنديها درجات لتسهيل لغة الفحص)

🤰طرق التحفيز الصناعي (الهرموني وطرق أخري ) :

١- التحفيز الهرموني بالبروستاجلاندين ( جرعة كل عدد من الساعات - بندي غالبا ٣ جرعات لتمهيد ليونة عنق الرحم ) ثم يتبعه فتح جيب الماء وتعليق الطلق الصناعي علي المحلول الاوكسيتوسين.

٢. التحفيز بالديلابان Dilapan دي بالضبط ذي أعواد كبريت في طرفها خيط ، بنحط ٣ أو ٤ (بالعافية ) في عنق الرحم الضيق جدا واسيب الأعواد ٢٤ ساعة بتمتص الماء وتكبر وتكون شبه السوسيس فتضغط علي عنق الرحم من الداخل وتفتح فيه. (انظري الصور )
ثم فتح جيب الماء.
ثم نبدأ الاوكسيتوسين(الطلق الصناعي )
الديلابان مش في مصر لكن بديله اللامناريا (شبه عود واحد فقط)
٣- التحفيز بالبالون : بتركب بالونة التحفيز أو قسطرة بولية داخل عنق الرحم ، وتنفخ البالونة جوا عنق الرحم ، واسيبها ٢٤ ساعة تضغط ميكانيكيا علي عنق الرحم ، ثم أفرغها من الماء و اخرجها بيكون عنق الرحم فتح قليلا بما يساعد علي فتح جيب الماء ثم بدأ الطلق الصناعي الاوكسيتوسين.

🤰طبعا مش لازم كل أم تعدي بكل مراحل التحفيز، ممكن خلال أي مرحلة من مراحل التحفيز الولادة الطبيعية تبدأ فألغي باقي المراحل وتكمل الولادة الطبيعية دون أي مساعدة مني.

🤰 التحفيز بيخلي الولادة تحتاج لمتابعة دقيقة وابقي مفتحة عيني والوصول للعدد المناسب من الطلق وعدم تجاوزه وعدم الدخول في تحفيز زائد Hyperstimulation ومتابعة البيبي ب CTG وقت تعليق الطلق الصناعي خوفا من الطلق الزائد الذي له مخاطره(البيبي يتبرز حواليه -انفصال المشيمة - انفجار الرحم - ظهور علامات خطر ونقص اوكسجين علي CTG .......إخ أخره)
خصوصا ان بعض السيدات ممكن تستجيب بعنف شديد لأول جرعة محفز هرموني أو حتي للبالونة.

🛑ليه بقول كده مع اني بعمل تحفيز لمعظم الأمهات قبل ما اخد اي قرار للقيصرية، علشان في أمهات بتبقي مصرة اصرار وهمي انها لازم تعمل تمارين أثناء المرحلة الأخيرة للتحفيز بعد انفجار جيب الماء وتعليق طلق صناعي وتسيب ال CTG وأنها مش هتاخد الطلق علي ظهرها.
الام غالبا بسيبها بتقعد بزاوية ٤٥ درجة ، أو تنام علي الجنب الشمال left lateral side, أو تتحرك فيما يسمح لها سلك الCTG , مش لازم تقعد علي السرير. زائد ان تتبع نبض البيبي بيكون متقطع كل ٦ ساعات في أول يوم أو يومين في بداية التحفيز و لحد ما أفتح جيب الماء واصنع طلق منتظم. وبين ال ٦ ساعات الام حرة تماما تعمل اللي هي عايزاه بس في المستشفي ماتروحش البيت .

🤰الولادات التحفيزية دي غير خالص الام اللي جاية بتولد طبيعي غريزيا من البيت ، عشان كده بشجع جدا علي التحفيز اليدوي وانتظر ان الأم تدخل في ولادة لحد أخر يوم وربنا يكرمنا بدون تحفيز صناعي.
اول ما بدأنا طلق صناعي وفتحنا جيب الماء خطر ترك جهاز التتبع لنبض البيبي CTG
لازم تفضل علي الCTG، لأنها ولادة عالية الخطورة ولازم اضبط عدد الطلق واشوف علي الجهاز البيبي متحمل ولا لأ.
المشكلة دي بالذات مع بعض الأمهات ببقي فعلا مش عارفة أقنعها ازاي - هي سمعت كلمتين أو أخدت كورس قالها اتحركي - فخلاص مصممة .
في أوربا وفي انجلترا- كان عندي أمهات بتركب Wireless CTG وترقص علي مزيكا مشغلاها في غرفتها أو تقعد في الميه ال pool .
Wireless CTG بيلقط عن بعد وانت بتتحركي ومتعلق لك الطلق الصناعي ، وانا مطمئة ، دا مش موجود في مصر .
اسمعوا الكلام الله يكرمكم.

🤰قبل بداية الطلق الصناعي لابد من تخيير الام إذا كانت ترغب في ايا من المسكنات وخصوصا الابيديورال. لان الطلق الصناعي أكثر ألما من الطلق الطبيعي.

🤔البوست دا كله مبني علي التوصيات الطبية البريطانية للمعهد القومي للصحة NICE وبعض التوصيات الطبية الأمريكية
أكيد البوست صعب ومعقد وطويل .
مش عارفه قدرت ابسط المعلومات ولا لأ لكني أجتهدت في ذلك.
الغرض من البوست انك تبقي فاهمة كويس ايه اللي بيحصل حواليكي 🙄
مش يبقي ناس بتعلق حاجات وتركب أجهزة وانت مش معانا. انا ممكن اكون زودت في المعلومات لمستوى الأطباء بس تاني هاقول في كل دول العالم المتقدم الام مهما كان مستواها التعليمي بتبقي فاهمة كل دا ، وانا بشرح كل دا لامهاتي☺️.....

24/03/2026

#التحفيز
🎯وصلت لنهاية الشهر التاسع ومش عارفة أولد واتحدد لي ميعاد قيصرية، أعمل إيه؟

🤰أولا لو انت أم لأول مرة وما عندكيش سبب للقيصرية،،،أرجوكي دوري علي طبيب داعم ، غيري الدكتور لحد ما تلاقي طبيب داعم .

🙆بعد ما تعملي القيصرية الأولي افتكري انك هتفضلي تدوري علي طبيب داعم للVBAC ، بلاش الغلطة الاولي دوري من دلوقتي.

🤰ممكن تحاولي في تمارين اللي تساعد ان الرأس تنزل الحوض والتمارين والحركة بوجه عام مع الآتي :
💣الجماع: السائل المنوي فيه نسبة من البروستاجلاندين(هرمون التحفيز )
💣تحفيز الحلمات :بيساعد علي فرز هرمون الاوكسيتوسين (هرمون الطلق الصناعي )
💣بعض الأكل ذي التمر : دراسة أردنية صغيرة وجدت ان الأمهات اللي تأكل أكثر من ٦ تمرات في اليوم من أول الشهر التاسع بتدخل في ولادة لوحدها دون تحفيز صناعي ووقت ولادتها ممكن يكون أقصر نسبيا من الأم اللي لم تأكل ٦ تمرات يوميا في الدراسة.
💣 الأناناس .Pineapple مفيش دليل قوي لكن قد يحفز الولادة.
💣 أشربي حلبة حصي وقرفة وورق التوت البري قد تحفز الطلق
💣تجنبي الإمساك ولو فيه إمساك دلوقتي بقي ممكن تأخدي ملين.

🛑لو سمحتي ما تأخديش اي حاجة الا تحت اشراف طبي ذي زيت خروع ولا كبسولات بريمروز ولا ماغنيسوم- لان مفيش ابحاث تعرفني الجرعات ايه وممكن يحصل Hyperstimulation
طلق عنيف زائد يفصل المشيمة أو يخلي البيبي يتبرز حواليه واضطر اعمل قيصرية ونبقي خسرنا حتي المحاولة.

💣 طبيبك يعمل تحفيز يدوي من قبل الميعاد المتفق عليه للتحفيز الصناعي بأسبوع - لأسبوعين
وممكن يكرر التحفيز اليدوي كذا مرة . فيه دليل علمي ان دا ممكن يدخلك في ولادة - ارجعي لبوست التحفيز اليدوي.

💣 لو مفيش سبب علمي طبي للقيصرية ممكن تنتظري ل ١٠ أيام في الشهر العاشر(٤١ أسبوع و ٣ أيام ) في الغالبية العظمي للسيدات (حمل غير عالي الخطورة ) مع المتابعة والتأكد ان كله تمام إلا في أحوال طبية معينة لا يجوز الانتظار ل ٤١ أسبوع.

🛑أشهر الأحوال الطبية التي لا يجوز فيها الانتظار للشهر العاشر من الحمل: (لتسيهل اللغة : تحفيز صناعي = تحفيز هرموني / دايلابان/لاميناريا/بالونة ثم فتح جيب الماء ثم طلق صناعي. )
الكلام كله مبني علي التوصيات البريطانية للكلية الملكية لأمراض النساء والتوليد في انجلترا RCOG :

١- تسمم الحمل Pre eclampsia
لو* تسمم حمل شديد يبقي فورا تولدي مهما كان عمر الجنين (ممكن الطبيب يحاول تحفيز صناعي وهو بيضبط لك التحاليل والضغط في مستشفي مجهزة وبيديكي كورتيزون لو الوقت يسمح للبيبي )
لو*تسمم حمل بسيط بتاخدي تحفيز صناعي وتولدي عند ٣٧ - ٣٨ أسبوع.

٢-- الضغط العالي مع الحمل : تحفيز صناعي ٣٨ أسبوع.

٣- سكر الحمل أو السكر نوع أول وتاني
تحفيز صناعي للولادة عند ٣٨ ل ٤٠ أسبوع حسب الكنترول للسكر كويس ولا لأ وحسب وزن الجنين وعشان في حالة في الطب لمرضي السكر اسمها Sudden stillbirth الموت المفاجئ للجنين.
ربنا يعافي الأمهات .
٤- الزيادة في انزيمات الكبد والعصارة الصفراوية بسبب الحمل Obstetric cholestaisis
ترجمته بالعربي ; الركود الصفراوي ، لازم تولدي عند ٣٧ ل ٣٨ أسبوع ، تحفيز صناعي.
٥- الدوبلر سئ والدم اللي واصل للبيبي قليل والميه قلت
: تحفيز صناعي فورا مادام الدوبلر سئ.
٦- الأم تعاني من فشل كلوي أو امراض مزمنة أو أمراض مناعة ذي الذئبة الحمراء أو تاريخ مرضي حزين في ولاداتها السابقة كالاجهاض المتكرر أو الإجهاض المتأخر أو جنين توفي من قبل غير معروف السبب ؛ تحفيز صناعي عند ٣٨ أسبوع
٧- التوأم (الطفل الأول بالرأس - حتي لو مشتركين في المشيمة ) : تحفيز صناعي عن ٣٦ ل ٣٨ أسبوع اعتمادا علي اشتراكهم في المشيمة من عدمه و فروقات وزنهم والدوبلر.

٨- طفل كبير عن المعدل الطبيعي:حسب تقييم كل حالة علي حدة بنعمل تحفيز هرموني عند ٣٨ ل ٤٠ أسبوع.
٩- طفل صغير عند المعدل الطبيعي: تحفيز عند ٣٧ ل ٣٩ أسبوع (حسب صغير علي نسبة كام في المائة إحصائيا والدوبلر)
١٠- الانفجار المبكر لجيب الماء في الشهر السابع أو التامن : تحفيز صناعي من ٣٤ أسبوع - ٣٧ أسبوع حسب خبرة ورأي الطبيب المتابع وجودة الحضانات وسلامة البيبي.
١١- انفجار جيب الماء بعد أول التاسع (بعد ٣٧ أسبوع ) والأم مش في ولادة : الاطمئنان علي سلامة البيبي وCTG ولون الماء طبيعي غير ملوث ببراز البيبي ولا دم يبقي ننصح بالانتظار ٢٤ ساعة (٧٠% من الأمهات هيدخلوا في ولادة لوحدهم مع الانتظار في أول ٢٤ ساعة )
لو ما دخلتش في ولادة، تيجي تعمل تحفيز صناعي بعد أول ٢٤ ساعة .
١٢- إنفصال المشيمة أو النزيف غير معروف السبب ؛ تحفيز صناعي فورا.
١٣- الشكوي من ضعف حركة البيبي بعد عمر النضج (٣٧ أسبوع ) حتي لو لا يوجد سبب يفسر ذلك : تحفيز صناعي فورا
١٣- سقط متقدم أو بيبي متوفي : تحفيز صناعي في وقتها دون انتظار.
١٤- الجنين المستعرض أو المائل أو الغير ثابت الوضع (غالبا بيكون حواليه ميه كتير )
دا الانتظار بعد ٣٨ أسبوع خطر لان الام معرضة لانفجار جيب الماء في أي لحظة ولو دا حصل أول وأسهل حاجة هتنزل من عنق الرحم هيبقي الحبل السري ، ودي من أسوأ الطوارئ في امراض النسا والتوليد، لازم قيصرية فورا والبيبي مهدد بنقص أكسجين. لتجنب ذلك بنعمل تحفيز صناعي بفتح جيب الماء وتثبيت الرأس وطلق صناعي فورا عند تشخيص الوضع المستعرض أو الغير ثابت (ممكن ننتظر مده أقصاها ٣٨ أسبوع)

١٥- الأم اللي عندها ٤٠ سنة فأكثر لازم تحفيز صناعي عند ٣٩ أسبوع.

👩‍💻في الأحوال اللي ذكرتها دي بموازنة الضرر والنفع فإن خطورة الانتظار علي الأم والجنين أعلي من الفائدة المحتملة وهي ان تبدأ الولادة الطبيعية.
👩‍💻 عدم الانتظار لا يعني ابدا ابدا قيصرية وإنما يعني التحفيز الهرموني للولادة ولو فشل بنعمل قيصرية (إرجعي لبوست التحفيز الهرموني )

☺️يا رب أكون أفتكرت كل الأحوال التي لا يجوز فيها الانتظار لان بتضايق جدا ان الأمهات بتنصح بعضها تنطش الدكتور وتنتظر.

22/03/2026

✍️البوست دا حابه اشرح فيه للأم اللي وصلت لأخر الحمل الفحص ...
👍 يعني ايه فحصها كويس ؟
أو 👎فحصها سئ ؟

🤰بصي علي الصور 🤔
عنق الرحم ممكن نتخيله ذي بالضبط رقبة البالونة🎈
لما الدكتور بيفحص بيدور علي رقبة البالونة (الأنبوب) ويديها درجة...✍️
🎀 واسم التقييم Bishop score
( عادة من صفر ل ١٣ )
التقييم بيعتمد علي درجات تدريجية لخمسة عوامل هي :
💣 إتساع عنق الرحم فاتح قد إيه (١ - ١٠ سم)
💣 ليونة عنق الرحم (لين - متوسط - ناشف)
💣 عنق الرحم طوله قد ايه (أنبوبة من ١ ل ٤ سم )
💣 وضع عنق الرحم (أمامي- خلفي - متوسط)
💣 رأس البيبي قريبة ولا لسه بعيدة.
( أكنها قطار له محطات من البطن وحتي الولادة -٣ وحتي +٣)

👩‍💻حسب درجة الأم في تقييم بيشوب بيكون مدي توقعنا لسهولة الولادة الطبيعية أو صعوبتها

👍الأم اللي بتأخذ ٨ ل ١٣ أو أكتر بيبقي فحصها رائع.
👍الأم اللي درجتها >= ٤ بتكون معقولة - هتستجيب للتحفيز غالبا وفي وقت معقول.
👍الأم اللي تحصل علي ٠ ل ٤ بتحتاج وقت اطول وبتتحسن تدريجيا...
أمهات كتير ممكن تأخد صفر وبعد التحفيز بالبروستاجلاندين أو بالبالون تولد طبيعي لكن بنكون عارفين انها محتاجه شغل كتير وصبر لان التحسن تدريجي .

✍️إعطاء درجات بيسهل لغة الحديث بين الأطباء لكن حبيت ادي فكرة بسيطة للأمهات قد يكون صعب لغير الأطباء فهم الموضوع بس الغرض من العرض هو اني أوصل فكرة ان كل تفاصيل الفحص مقننه وممكن تحسينها بالتحفيز ان لزم الأمر....
كما انها ليست أحكام نهائية تصنف من ستلد طبيعي ومن لا تستطيع لان غالبا معظم الامهات تستطيع ان تلد طبيعي ..
✍️حتي اللي بتاخد درجة صفر بتتحسن وتولد بالتحفيز.
✍️من حق معظم الأمهات انها تخوض تجربة الولادة الطبيعية.

22/03/2026

🎀انا هاتكلم في الموضوع دا بصفتي كنت المسئول عن إحدي عيادات الإجهاض المتكرر في
Shrewsbury. U.K. 2013
🎀بحسب تعريف الكلية الملكية لأمراض النساء والتوليد RCOG هو إجهاض في أول شهور الحمل قبل الشهر السادس و٣ مرات

🤔 الام اللي اجهضت مرة أو اتنين ليست إجهاض متكرر وكل ما حدث لها قد يكون بمحض الصدفة لان
🎀 كل ٥ أمهات حوامل - فيه واحدة هيحصل لها إجهاض. يعني نسبة الإجهاض ١٥ل ٢٠ % حتي من غير اسباب ، الإجهاض common وفيه قاعدة في الطب اسمها what's common, is common
🌹التوصيات الطبية ACOG وال ESHRE
بتبدأ البحث عن الأسباب بعد ٢ اجهاض
لكن مش هاجري ورا كل حالة إجهاض مرة واحدة وادور علي اسباب لان الإجهاض منتشر فلازم يكون منتشر
الا في حالات قليلة جدا .
طبعا الأم لأول مرة بتزعل من الكلام دا وتحس بالتقصير. بس دا كلام العلم.
سواء لسبب واضح أو بلا سبب (غالبا كروموسومات) الإجهاض في أول ٣ شهور للحمل مش بندور علي سبب.

😓في مصر: الأم المسكينة اللي اجهضت مرة وبتجيلي معاها كمية رهيبة من التحاليل والعلاج والخوف - ببقي فعلا مشفقة عليها جدا.
😓في مصر: عيادات قائمة علي متابعة وعلاج الإجهاض المتكرر لا تتبع ايا من الإرشادات الطبية الانجليزية أو الأمريكية، وتطلب كمية تحاليل رهيبة لا أصل لها في العلم ، وبتدي علاج كتير جدا وغالي جدا جدا للأمهات وليس له أي دليل علمي ، ومع ذلك امهات العيادات دول لما بيجولي - رغم اقتناعهم ان العلاج غير مفيد وليس له أي دليل علمي - بيخافوا يوقفوه وبسيبهم براحتهم.
فعلا مهزلة بكل المعايير.
(😀طبعا هما بيجولي في منتصف الحمل تقريبا عشان يولدوا طبيعي مش عشان أعالجهم من الإجهاض المتكرر- )

✍️تحاليل الإجهاض المتكرر (٣ اجهاضات ) تنحصر في الآتي بحسب ارشادات RCOG:
١- تحاليل
Acquired Thrombophilia and
أحيانا some of Heritaditary Thrombophilia
دي مجموعة من تحاليل المناعة الوراثية والمكتسبة.
٢- أشعة تلفزيونية علي الرحم وعنق الرحم لو الإجهاض بيحصل بعد أول ٣ شهور لمعرفة العيوب الخلقية للرحم واحتمالية احتياج الأم لازالة حاجز رحمي أو للربط أثناء الحمل القادم .
٣- تحليل الغدة الدرقية للأم ومضادات الغدة الدرقية.

٤- تحاليل جينية وكروموسومات للعينة والأبوين .

🎀طبعا بحسب التقييم الاكلينيكي للحالة وتاريخها المرضي بختار هاعمل ايه من كل التحاليل دي واحيانا ممكن اعملها كلها.

🎀طبعا فيه حالات كتير هتكون نتيجتها Unexplained يعني منعرفش ، ودا عادي جدا اننا منعرفش ، بس مش عادي اني اديها كمية علاج رهيبة يمكن حاجة فيها تنفع .
🎀 الإجهاض لا يحدث عشان الأم قصرت في الراحة أو في حاجات المفروض تعملها ماعملتهاش ومش بيحصل عشان عملت حاجات غلط مكنتش المفروض تتعمل.
🎀اسمحولي انتهز الفرصة وأقول ان الراحة علي ظهرك وانت حامل عشان الحمل يكمل خرافة منتشرة جدا للأسف و ليس لها اساس علمي نهائيا بالعكس من كتر الراحة ممكن يجيلك جلطة في الاوردة العميقة للساق أو الرئة (قابلية الحامل للتجلط هي ٥ أضعاف الغير حامل)

🎀دا لينك الإرشادات الطبية للسادة الأطباء أو المرضي .
https://obgyn.onlinelibrary.wiley.com/doi/10.1111/1471-0528.17515

20/03/2026

السلام عليكم
كل عام وانتم بخير ❤️
🔸️ بناءا علي رغبة الأمهات تم اضافة عيادة مدينة نصر
فيها تأمين صحي وتعاقدات....

🔸️لسه معانا عيادة المعادي والتجمع للحجز 01010081549.

🎀 مدينة نصر: البرج الطبى لمستشفى دار الفؤاد - الدور التالت عيادات كايرو سكان -
الثلاثاء للحجز والاستفسار 01068820784

Find local businesses, view maps and get driving directions in Google Maps.

09/03/2026

🤰الأم والدة قبل كده طبيعي ثم قيصرية ثم فيباك ناجح معايا من ٣ سنوات والبيبي كان ٣ كيلو و٧٠٠ وكانت صعبة وكلها فن وهندسة - حاليا حامل في البيبي الرابع
🤰بتابع معايا لما تكون في القاهرة لانها من محافظة بعيدة جدا -
🤰عند ٣٤ أسبوع البيبي كبير وبيكبر اكتر من الحد الأقصي للنمو والميه كتير حواليه واصريت انها تعمل المنحني السكري وطلع عندها سكر حمل ....
نصحت الأم نضبط القراءات بالأكل والدايت أولا لكن القراءات كان الصائم دايما عالي ....
🤰اختفت الأم وجاتلي متأخر عند ٣٩ أسبوع+ ٢ لظروف خاصة
البيبي في السونار وزنه ٣ و٧٠٠ والميه كتير حواليه لكني بخيله في المقاسات واعتقد انه اكبر من كده كمان - البيبي ظهره لظهر الأم بالضبط حاولنا تحفيز يدوي وعنق الرحم كان خلفي جدا وفاتح ٢ سم - الام كان لازم تولد عشان السكر ووزن البيبي من اكتر من اسبوع فات ومفيش وقت لتكرار التحفيز اليدوي ...
وحجزنا التحفيز الهرموني عند ٤٠ أسبوع دا أقرب ميعاد لقيته للاسف...
الأم كان بيجلها وجع كتير لكنه لا يكتمل للولادة- والآلام معروفة جدا مع البيبي اللي ظهره لظهر الأم - مؤلم جدا لحد ما يلف
back to back (occiputo- posterior )
🔸️ الأم فاهمة ان التحفيز الهرموني هيزود احتمالية انفجار الرحم للفيباك للضعف من ١ في ٢٠٠ الي ١ في ١٠٠
لكن الإختيار الأخر هو القيصرية
⏰️عند ٤٠ أسبوع الساعة ١٢ ظ الفحص ذي ما هو ذي العيادة عنق الرحم خلفي جدا والبيبي ظهره لظهر الأم وبدأت الجرعة الأولي للتحفيز الهرموني الأم بكت من الفحص ودا أثر فيا جدا وطلبت ابيديورال من الأول وانا وافقت - دا ليس مثالي ...
⏰️الساعة ٤ عصرا بعد الجرعة الأولي بأربع ساعات بيجي طلق بسيط ومتكرر وعنق الرحم حوالي ٣ سم وقررت ألغي الجرعة التانية - وانتظر- البيبي كويس علي CTG
⏰️الساعة ٦ عنق الرحم بقي حوالي ٤ سم ولسه طلق بسيط والبيبي كويس علي CTG وقررت انتظر قلقانة من اني لو فتحت جيب الماء دلوقتي ممكن البيبي ما يلفش الافضل ان الولادة تتقدم لوحدها
ان لم تتقدم ماعنديش اختيارات غير فتح جيب الماء والطلق الصناعي لتثبيت الرأس Stabilising induction
لان الميه كتير والبيبي Direct Occipto-post
⏰️الساعة ١٠ مساءا لسه عنق الرحم ٤ سم والبيبي كويس علي CTG وكده استنفذت الانتظار ولازم افتح جيب الماء .....
فتحت جيب الميه وعدلت الرأس للأمام قدر الإمكان وثبتها ونزلت اكبر قدر من المياه وبدأت الطلق الصناعي فورا لمنع الرأس من الرجوع للوضع السابق...
(حصل ذي كده بالضبط Stabilising induction في تحفيز الولادة السابقة لنفس الأم )
🤔الأم حرارتها ٣٨ و٧ شرط والبيبي نبضه سريع علي CTG
ماعنديش تفسير للحرارة إلا ان كان عندها دور برد وهي جايه تولد بحرارة بسيطة - وارد يكون جفاف برده لكن هي اخدت سوائل كويسه وحاولت انزلها الحرارة نزلت نصف درجة والبيبي اتحسن علي CTG
⏰️الساعة ١١ مساءا فجأة البيبي وري علامة Stress عنيفة ونبض قليل ووقفت الطلق وغيرت وضع الأم وعرفتها ان لو كمل علي كده هنعمل قيصرية لكن مع تغيير الوضع رجع النبض ذي ما كان في دقايق - وارد انضغاط الحبل السري او انضغاط الرأس وقت الولادة يعمل كده ودي اسباب طبيعية ومفيهاش خطورة
الخطر هو لو البيبي عمل دا نتيجة Stress حقيقي من انفصال المشيمة او انفجار الرحم او عدم تحمل البيبي لطلق لولادة
بتفرق بين الأسباب بصعوبة لكن غالبا لو رجع البيبي علي CTG ذي ما كان يبقي مفيش خطر واللي حصل كان false alarm

رجعت الطلق تاني وكملنا
الأحداث كتير .....
⏰️الساعة ١٢ ليلا البيبي كويس علي ال CTG والفحص بقي ٦ سم والرأس اتعدلت ذي ما ضبطتها وثابتة ومنطبقة علي عنق الرحم- الحمد لله فرحت جدا

⏰️الساعة ١ ص الأم حاسة بتقل والفحص بقي ١٠ سم ونزلنا العمليات
⏰️الساعة ١ ونصف في العمليات الأم مجهدة ومش قادرة تحزق وطبعا الإبيديورال مسؤل عن دا واخدت رأيها واستخدمنا الشفاط
واتولد البيبي بسم الله ماشاء الله تبارك الله بدون شق ولا قطع سليمة تماما مع ان البيبي كان ٤ كيلو و٢٠٠ جرام وكتفه كان صعب في الخروج (بسبب الوزن وسكر الحمل )
❤️الأم دي حبيبتي ولها معزة خاصة في قلبي ذي كل الأمهات الفيباك اللي ولدتهم مرتين طبيعي
✅️الولادة الطبيعية بالتحفيز الهرموني أستغرقت ١٣ ساعة - انا مريت علي الأم الصبح وبعدين قعدت مع الأم في المستشفى أخر ٤ ل ٥ ساعات خوفا من اي مشاكل .
✅️القصة دي شبه القصة اللي الأخيرة اللي انفجر فيها الرحم وهنا البيبي اكبر كمان ٤ كيلو و٢٠٠ جرام - واستخدمت تحفيز هرموني وطلق صناعي فتره اطول لكن القاعدة ان احتمالية انفجار الرحم فقط ١ في المائة والأم فاهمة دا كويس جدا ومدركة ومختار اختيار مستنير وأنا قايلة لها علي القصة اللي فاتت.....
والإجراءات آمن وطبقا لتوصيات الكلية الملكية لأمراض النساء والتوليد في انجلترا- استخدام الهرمونات في الفيباك مسموح به تحت إشراف استشاري وبموافقة الأم
عشان بس الناس والزملاء الأطباء اللي بيهاجموا في التعليقات وإني بخاطر بالأمهات عشان الشو - الموضوع في مصر فيه سجن ونيابة وابعد ما يكون عن الشو الاعلامي - كمان انا لو عايزة شو اعلامي اكيد مش هاكتب عن المضاعفات- أنا مؤمنة بحق الأمهات في انهم ياخدوا نفس الخدمة الطبية اللي بقدمها في انجلترا كما هي تماما .....

❤️حبيبتي الأم حمدا لله علي سلامتك انت والبيبي وربنا يبارك في البيبي ويرزقك بره يا رب 😘
أنا فخورة بيكي جدا وسعيدة اكني انا اللي ولدت الحمد لله الذي بنعمته تتم الصالحات

07/03/2026

🤰الأم والدة قيصرية سابقة من ٣ سنوات بيبي ٣ كيلو ٧٠٠ - ولدت قيصرى بسبب قلة حركة البيبي..
متابعة معايا من ٢٨ أسبوع والبيبي بيكبر أعلي من الحد الأقصي للنمو
🤰عند ٣٨ أسبوع+٢ وزن البيبي ٣ كيلو و ٤٠٠ جرام و دا كبير بالنسبة لأسابيع الحمل والأم بتشكي من قلة حركة البيبي - دا سبب للولادة- وليس للقيصرية- وعملنا تحفيز يدوي- عنق الرحم خلفي جدا ولين وسميك وفتحته نصف سم

🤰عند ٣٩ أسبوع+٢ جيب الميه فتح وبعتها المستشفى
البيبي كويس علي CTG وعنق الرحم فتح ٢ سم لكن لسه خلفي وسميك وبيجلها انقباضات ضعيفة بس مؤلمة...
✅️الخطة هنا هي الانتظار ٢٤ ساعة لان ٧٠% من الأمهات هيدخلوا في ولادة لوحدهم ولو ما حصلش يبقي الاختيارات هي:
🔸️تحفيز هرموني للولادةالطبيعية وتقبل المخاطرة الزيادة لانفجار الرحم مع استخدام الهرمونات وهتبقي ١ من ١٠٠ بدلا من ١ من ٢٠٠
🔸️او قيصرية

⏰️الساعة ١٢ ظ بعد ٢٤ ساعة انتظار ومفيش طلق فعال - انقباضات مؤلمة لكن مفيش تقدم في الفحص - الام اتحجزت عشان التحفيز الهرموني للولادة الطبيعية
البيبى كويس علي ال CTG والفحص ذي ما هو واخدت الجرعة الأولي للتحفيز ....
⏰️الساعة ٤ البيبي كويس علي CTG و بعض الطلق الغير منتظم والفحص ذي ما هو ٢ سم والأم طلبت ابيديورال ووافقت
⏰️الساعة ٦ البيبي كويس علي CTG والأم واخده ابيديورال والفحص ٢ ل ٣ سم و بدأت طلق صناعي
⏰️الساعة ٧ الأم بتشكي ان الوجع رجع تاني وفي مكان الجرح لكن البيبي كويس علي CTG والطلق منتظم ومفيش مشاكل أخري ......🤔
⏰️الساعة ٨ ال CTG فصل ومش عارفين نحطه علي مكان البيبي لان النبض اختلف وفيه علامات Stress اتحسنت مع المحاليل 🤔🤔
🔸أنا محتارة ليه البيبي بيدي علامات stress - مع انها اتحسنت - فحصتها ️عنق الرحم فاتح ٤ ل ٥ سم لكن الرأس بعدت جدا وفيه ميه مختلطة بدم مع الفحص !!!!
الأعراض قليلة لكني شكيت بعنف - حاسة الخطر ..........
وجرينا علي قيصرية فورا
🛑والجرح كان فعلا فتح وولدت البيبي اللي كان بفضل الله ورحمته بيعيط علي طول بدون اي مساعدة أول ما اتولد ومكنش فيه نزيف داخلي الا حاجات لا تذكر وقفلت الجرح وما احتجناش نقل دم الحمد لله
✅️التحفيز الهرموني استغرق ٨ ساعات فقط الام أخدت جرعة واحدة ولغيت الجرعة التانية عشان كان عندها طلق وبعدين اخدت ابيديورال وبعدين طلق صناعي ساعتين فقط ومع ذلك الجرح القديم فتح !!!
الأم كويسة والبيبي كويس وكان ٤ كيلو وروحتهم بعدها بكام ساعة لكن الصدمة كانت عنيفة ......
✅️اتكلمت مع الأب والأم لكن اكيد متأثرين جدا خصوصا ان كنت مشغولة مع ام تانية فيباك في مستشفى اخري وولدتها الحمد لله بدون مشاكل ...
وضحت للأم والأب ان ربنا ستر جدا والبيبي اتولد بيعيط لوحده والأم لم تنزف شيئا يذكر وان مفيش مخاطر مستقبلية ان شاء الله إلا أنها لازم الحمل الجاي تولد قبل أسبوع لأسبوعين من الآن عشان مايحصلش تكرار لانفجار الرحم تاني ......
الشغلانة دي ملهاش كبير ....

✅️فيه مفارقارت غريبة ذي إن مثلا البيبي بنت واسمها آمنة ودا نفس اسم البيبي بنت اللي حصل فيها انفجار رحم معايا برده في شهر ١١ اللي فات !
✅️من يوم ما قلت في مؤتمر لجامعة عين شمس ان ماحصلش معايا انفجار رحم بقالي ١٠ سنين - حصل ٣ انفجارات رحم في اخر ٤ شهور توبة افتح بقي تاني - التلاتة كانوا أمهات تحفيز هرموني وكتبت قصصهم علي صفحتي والثلاثة بخير وربنا أكرمني فيهم والتلاتة كانوا لبيبي بنات ومنهم اتنين نفس الإسم للبيبي !!

✅️حسيت ان من الأمانة العلمية اني اكتب حالات المضاعفات كمان عشان ماكنش بضلل الأمهات ولا بصور لهم الحياة وردية في حين ان الواقع مختلط - الغالبية العظمي فعلا آمنين ومابيحصلهمش حاجة حتي لو المحاولة انتهت بقيصرية لكن لازم أبرز في الصورة اللي بيحصلهم كمان عشان الصورة تبقي كاملة وتساعد الأمهات ياخدوا قرارات مستنيرة ........
✅️ الفيباك اجراء آمن ومتبع عالميا في انجلترا وكل أوروباوأمريكاوالدول العربية..........
وحدوث المضاعفات لا يعني أنه غير آمن لان نسبتها من نصف الي ١ في المائة

✅️حبيبتي الأم حمدا لله علي سلامتك وسلامة البيبي وربنا يبارك فيها ويرزقك برها