24/11/2025
رداًعلى أسئلة البوست اللي فات عشان طلع ان ناس كتير اطراف ايدها او رجلها بتزرق او بتغير لونها في البرد ... هل كله يتخض ويقول ده مرض مناعي .. ولا هل كله يقول بسيطة هاتدفى كويس ومش مشكلة ؟!....................................................
1️⃣ لو الاطراف بتزرق بس من غير اصفر وابيض او احمر ..وبترجع للطبيعي على طول مع التدفئة .. مابنقلقش وده ممكن يبقى طبيعة ناس ومش عرض لمرض معين بإذن الله....................................................
2️⃣ لو الاطراف بتصفر او تبيض كأن الدم هربان منها وبعد كده تزرق ولما ادفيها تحمر جدا اكتر م الطبيعي .. ده اللي بنسميه ظاهرة رينود ودي ممكن تحصل لوحدها بدون أي مرض مصاحب .. أو تكون عرض مصاحب لمرض مناعي اشهرهم تصلب الجلد (سكليروديرما) والذئبة الحمراء والنسيج الضام المختلط ( الصورة رقم 1) ....................................................
3️⃣ لو الاطراف بيحصل فيه زي بقع حمرا او بنفسجي في البرد (من غير تسلسل الالوان) ومعاها هرش شديد ومش بنستحمل ندفيها .. دي اسمها حساسية برد او chilblains ودي بردو ممكن تحصل لوحدها او تصاحب الامراض المناعية (الصورة رقم 2)....................................................
👈 في الحالة الاولى غالبا مش محتاجين زيارة الطبيب خصوصا لو مفيش اي شكوى أخرى وعلاجنا اننا ندفيها وبس ....................................................
👈 الحالة التانية والتالتة محتاجين زيارة الطبيب لاستبعاد وجود أي مرض مناعي مصاحب ولاعطاء العلاج المناسب لكل حالة لانها بتبقى مؤلمة جدا للاسف ....................................................
👈 سواء رينود او chilblains لو لوحدهم بدون مرض مناعي بيكونوا ابسط واقل في الشدة والتطور ....................................................
👈 لو الاطراف بقى لونها ازرق او فيها طفح او بقع بنفسجي مابترجعش للطبيعي وبقت ثابتة هنا لازم نجري ع المستشفى لان دي مرحلة ان الدم مش واصل للاطراف وممكن نلحق فيها المريض بإذن الله ..
ممكن يكون سببها ظاهرة رينود شديدة جدا مارجعتش للطبيعي او سببها التهاب اوعية دموية مناعي....................................................
👈 لو مش عارف انت مين فيهم بلاش تشخص نفسك او لو فيه أي اعراض اخرى زي الم او تورم في المفاصل او طفح جلدي يبقى هانزور طبيب او الجلدية او جراحة الأوعية الدموية ولو شكوا في مرض مناعي نتحول على #روماتيزم و #مناعة بردو
