What are the opening hours?

Monday 8am - 5pm Tuesday 8am - 5pm Wednesday 8am - 5pm Thursday 8am - 5pm Sunday 8am - 5pm

https://www.facebook.com/103385885416042/

Quality Café, Cairo (2026)

02/01/2026

☕️كعادته عم تحسين قاعد علي القهوة

عم تحسين:
قول لي يا دكتور… هو الجودة في الغسيل الكلوي أجهزة ونظافة وبس؟

الصديق:
لا يا عم تحسين، دي تقييمات شاملة قبل وأثناء وبعد الغسيل.

عم تحسين:
تقييمات مين بالظبط؟

الصديق:
تقييمات أساسية:
الطبيب – التمريض – التغذية العلاجية

👨‍⚕️ تقييم الطبيب

عم تحسين:
الطبيب بيعمل إيه غير إنه يكتب أمر الغسيل؟

الصديق:
ده أساس الشغل كله:
• تقييم الحالة العامة والأمراض المصاحبة
• تحديد مدة الجلسة، نوع الفلتر، ومعدل سحب السوائل
• متابعة التحاليل (Hb – Urea – Creatinine – Electrolytes)
و متابعه تحليل الفيروسات
• مراجعة الأدوية وضبطها مع الغسيل
• تقييم الوصلة الشريانية أو القسطرة

عم تحسين:
يعني من غير تقييم الطبيب… الجلسة تبقى خطر؟

الصديق:
بالظبط.

👩‍⚕️ تقييم التمريض

عم تحسين:
والتمريض؟

الصديق:
التمريض عين الوحدة:
• تقييم العلامات الحيوية قبل وأثناء وبعد الجلسة
• فحص الوصلة أو القسطرة
• التأكد من هوية المريض وخطة الغسيل
• ملاحظة أي مضاعفات (هبوط ضغط – تقلصات – نزيف)
• توثيق كل حاجة في ملف المريض

عم تحسين:
يعني التمريض مش تنفيذ بس؟

الصديق:
لا، ده تقييم وملاحظة وإنقاذ مبكر.

🥗 تقييم التغذية العلاجية

عم تحسين:
والتغذية ليها دور كمان؟

الصديق:
دور مهم جدًا:
• تقييم الوزن الجاف
• تقييم مستوى الألبومين والبوتاسيوم والفوسفور
• وضع خطة غذائية مناسبة للغسيل
• متابعة السوائل المسموح بها
• تثقيف المريض وأسرته

عم تحسين:
يعني الأكل ممكن ينجح أو يفشل الغسيل؟

الصديق:
نعم

☑️ الخلاصة

عم تحسين:
يبقى معيار الجودة بيقول إيه؟

الصديق:
يقول إن وحدة الغسيل الكلوي لازم تلتزم بـ:
• تقييم طبي موثق
• تقييم تمريضي مستمر
• تقييم تغذوي دوري
• والعمل بروح الفريق (MDT)
خطه رعايه

عم تحسين (يرشف القهوة):
كده فهمت…

الجودة مش ماكينة شغالة،
الجودة فريق شغال على المريض 💙☕

26/12/2025

☕️ كعادة عم تحسين قاعد علي القهوة
دخل عليه صاحبه علي

👨‍🦳علي:
صباح الخير يا عم تحسين… مالك سرحان كده؟

عم تحسين:
صباح النور يا علي… بفكر في موقف حصل في المستشفى، مريض حالته ساءت فجأة.

علي (بقلق):
يا ساتر… طب اتصرفتم إزاي؟

عم تحسين:
اتطبق معيار كود بلو حسب سياسة المستشفى ، وتم الإبلاغ فورًا.

علي:
يعني إيه حسب سياسة المستشفي؟

عم تحسين:
يعني كل حاجة كانت ماشية بنظام واضح:
• نداء كود بلو موحّد
• فريق استجابة طارئة مُدرَّب
• أدوار ومسؤوليات معروفة
• تدخل سريع خلال الزمن المحدد

علي:
يعني مش اجتهاد شخصي؟

عم تحسين:
أبدًا.
السياسه بتشدد إن:
• كل العاملين يعرفوا إمتى يعلنوا كود بلو
• إزاي يبلغوا
• ومين المسؤول عن كل خطوة

علي:
والتوثيق؟ ولا دي بتتنسى؟

عم تحسين (بحزم):
لا يا علي، التوثيق جزء أساسي:
• وقت اكتشاف الحالة
• وقت إعلان الكود
• وقت وصول الفريق
• الإجراءات اللي اتعملت
• نتيجة الإنعاش
كل ده بيتسجل ويتراجع.

علي:
طب ليه كل التعقيد ده؟

عم تحسين:
عشان:
• نضمن سلامة المريض
• نقيّم الأداء
• نحسّن النظام
• ونمنع تكرار الأخطاء

علي:
يعني كود بلو مش بس لإنقاذ مريض؟

عم تحسين:
صح…
ده كمان:
• تدريب مستمر
• محاكاة دورية
• مراجعة حالات (Code Review)
وده كله مطلب أساسي في معايير لسلامة المرضى.

علي:
والناس اللي مش طبية؟

عم تحسين:
حتى غير الطبيين،
السياسه بتطلب توعيتهم:
• يعرفوا العلامات الخطيرة
• يعرفوا يبلغوا بسرعة
وده بيفرق في الثواني الأولى.
و مش بيفرق في المستشفيات بس ده كمان ممكن التدريب ده يساعدهم ينقذوا حياة اي انسان تظهر عليه العلامات ديه في اي مكان ( نادي -مول ….الغ)
عشان كده عايزين كل الناس تكون مدربة علي BLS و الاطباء تدرب علي ALS

علي(بإعجاب):
كده فهمت… الجودة مش أوراق.

عم تحسين (مبتسم):
بالظبط يا علي…
الجودة معناها نظام ينقذ حياة.

علي:
ربنا يبارك فيكم…
هات شاي تاني بقى على حساب الجودة ☕😉

19/12/2025

☕️كعادته عم تحسين قاعد علي القهوة و يدخل عليه صاحبه

عم سعيد:
صباح الخير يا عم تحسين… شكلك متفائل النهارده.

عم تحسين:
صباح النور يا سعيد، متفائل فعلاً… شوفت مريض جلطة اتحسّن بفضل إعادة التأهيل في الـ Stroke Unit.

عم سعيد:
إعادة تأهيل؟ ما هو خد العلاج وخلاص!

👨‍🦳 عم تحسين:
لا يا سيدي، العلاج بداية بس. الشغل الحقيقي يبدأ بعد كده.

عم سعيد:
إزاي يعني؟

عم تحسين:
يعني مريض الجلطة محتاج فريق كامل: علاج طبيعي، تخاطب، علاج وظيفي، وتمريض مدرّب… مش دكتور وبس.

عم سعيد:
طب والـ Stroke Unit دي بتفرق إيه؟

عم تحسين:
بتفرق كتير. وحدة متخصصة، متابعة دقيقة من أول يوم، وتحريك مبكر يمنع التيبّس ويقلل الإعاقة.

عم سعيد:
يعني الحركة بدري مفيدة؟

عم تحسين:
طبعًا، بس بحساب. كل حاجة بتتعمل حسب حالة المريض، علشان نحافظ على الأمان وما نضغطش عليه.

عم سعيد:
والكلام ده بيأثر نفسيًا كمان؟

عم تحسين:
جداً. لما المريض يحس إنه بيتقدم ولو خطوة صغيرة، معنوياته تعلى، وده نص العلاج.

عم سعيد:
طب وأهل المريض؟

عم تحسين:
دورهم مهم. بنعلّمهم إزاي يساعدوه في البيت من غير ما يضرّوه، وإزاي يشجعوه مش يشفقوا عليه.

عم سعيد:
يعني إعادة التأهيل رجوع للحياة مش بس للمشي.

عم تحسين:
بالظبط… رجوع للكرامة والاستقلال. والـ Stroke Unit معمولة علشان ترجع الأمل.

عم سعيد:
كده فهمت ليه بتقول إن القهوة معاك دايمًا مفيدة!

12/12/2025

☕️ كعادته عم تحسين قاعد على القهوة بيشرب شاي بالنعناع. يدخل صديقه علي ويقعد معاه.

علي:

إزيك يا عم تحسين؟ شكلك مهموم كده، مالك؟

عم تحسين:

أهلاً يا علي… كنت براجع شوية حالات في المستشفى. عندنا مرضى مشرفين على الوفاة، وده محتاج رعاية خاصة جدًا.

علي:

“مشرفين على الوفاة” يعني إيه بالظبط؟

عم تحسين:

يعني المريض عنده مرض خطير ومافيش علاج شافٍ ليه، والأطباء متوقعين إن حالته هتتدهور تدريجيًا. فبنركز على تخفيف الألم وراحة المريض بدل العلاجات اللي مالهاش فايدة.

علي:

طب وإنتو بتتعاملوا معاهم إزاي في الجودة؟

عم تحسين:

بص يا سيدي… في شوية مبادئ مهمة:
1. احترام كرامة المريض.
2. التحكم في الألم والأعراض.
3. دعم نفسي للمريض ولأهله.
4. بنعمل تقييم لحالة المريض و عن طريقها بتتعمل خطة رعاية متفصلة واضحة وموثقة في الملف.
5. ونعمل MDT meeting علشان الفريق كله يكون متفق على خطة العلاج.

علي:

طب والأهل؟ ساعات بيبقوا مش فاهمين الوضع أو متعلقين بأي أمل.

عم تحسين:

بالظبط… عشان كده لازم جلسات تواصل صريح. نقول الحقيقة من غير قسوة، ونسألهم عن رغباتهم، ونحترم ثقافتهم ودينهم وقراراتهم.

علي:

يعني الرعاية هنا مش علاج بس… ده إنسانيات برضه.

عم تحسين:

بالظبط يا علي. المريض في المرحلة دي مش محتاج أجهزة ومحنّة… محتاج راحة، ووجود حد يسمعه، وصلاة، ودعم، ووداع بكرامة.

علي:

كلامك جميل يا عم تحسين… ربنا يجعل شغلكم في ميزان حسناتكم.

عم تحسين:

آمين يا ابني… أهم حاجة إن المريض يمشي من الدنيا مرتاح، وإحنا نكون عملنا اللي علينا.

05/12/2025

☕️ جمعتكم جودة مع تحسين
في قهوة وسط البلد كعادته كل جمعة، عم تحسين قاعد بيشرب شاي مع صاحبه

عم تحسين: عامل ايه يا علي مالك ؟ ايه الشاغل تفكيرك ؟

علي:
يا عم تحسين… الواحد بقى يخاف يروح المستشفى. حاسس إن خصوصية المريض ما بقتش زي زمان.

عم تحسين:
ليه بس يا علي؟ المستشفيات دلوقتي بقت أكثر حرص على الخصوصية. القانون نفسه بيشدد على ده.

علي:
ما هو ده الكلام… بس ساعات تلاقي حد من الطاقم بيتكلم عن حالة مريض قدام ناس. ده ينفع؟

عم تحسين:
أبدًا طبعًا. دي معلومات سرّية. ممنوع أي حد يتكلم عن حالة المريض أو اسمه إلا للطاقم المعني بعلاجه. غير كده يبقى مخالفة صريحة.

علي:
طب ولو حد من العيلة بيسألني عن المريض… أرد؟

عم تحسين:
لازم الأول يكون مصرح له. في حاجة اسمها الموافقة المستنيرة. المريض هو اللي يحدد مين يعرف معلوماته.

علي:
والموبايلات؟ ساعات ألاقي ممرض يصور ورق أو يبعته على الواتساب!

عم تحسين:
يا راجل! ده ممنوع منعًا باتًا. المستشفيات عندها سياسة واضحة: مفيش تصوير، لا لورق المريض ولا لغرفته، إلا بإذن رسمي.

علي:
صح… الخصوصية دي أمان للمريض وراحة نَفسه.

عم تحسين:
بالضبط. وده كمان بيزود ثقة الناس في المستشفى. المريض لو حس إن معلوماته محفوظة، يعالج وهو مطمّن.

علي:
والله عندك حق يا علي… الخصوصية مش رفاهية، دي حق من حقوق المريض.

عم تحسين:
بس كده يا علي… نشرب الشاي بقى؟

علي:
هات يا سيدي… وخلّي خصوصية الشاي بينا! 😀

28/11/2025

سارة: سمعتِ كلام في محاضره عن حقوق المريض قالوا ان
له حق الوصول للخدمات في المستشفى؟

تحسين : آه طبعًا! ده من أهم المعايير لأنه بيضمن إن المريض يوصل للخدمة الصح في الوقت الصح، ووفق القوانين والتنظيمات

سارة: بالضبط. اللي عجبني فيه إنه مش بس تسجيل ودخول… ده بيهتم بكل حاجة من أول ما المريض يفكر ييجي المستشفى

تحسين : خصوصًا موضوع ال
pre-admission screening. بيحدد هل المستشفى يقدر يخدم المريض ولا لأ، وبيسهل الفرز ومنع الزحمة

سارة: وكمان بيركّز على الفئات المختلفة… زي النساء اللي بيحتاجوا مقدم رعاية أنثى، أو ذوي الاحتياجات الخاصة

تحسين : ده غير أهمية وجود سياسة واضحة hospital-wide تشمل الخدمات، طُرق الوصول، التعامل مع الحالات اللي خارج نطاق الخدمة، وطرق الإحالة. معيار بسيط في شكله… لكن تأثيره كبير جدًا على تجربة المريض وسلامته

سارة … واضح إنه بيهتم بفكرة إن مفيش مريض يتم منعه من الخدمة بسبب سوء تنظيم

تحسين : فعلًا. أهم نقطة إن المستشفى لازم توفّر معلومات كاملة وواضحة للمريض من أول خطوة… مواعيد العمل، الأسعار، نوعية الخدمات، ومسار الوصول

سارة وكمان لازم يكون عندهم نظام حجز وطوابير واضح
في العيادات الخارجية. ده لوحده يقلل شكاوى نص المرضى

تحسين : ومش ناسيين الطوارئ! الدخول من الطوارئ لازم يبقى آمن ومناسب لحالة كل مريض

ساره : ولو المستشفى مش بتقدم الخدمة اللي المريض محتاجها… لازم يتم تحويله أو مساعدته يعرف فين يقدر يلاقي الخدمة

تحسين : لما المعايير دي تتطبق… تجربة المريض كلها بتتغير 180 درجة.

21/11/2025

☕️ جمعتكم جودة مع تحسين

(على القهوة… صوت عربيات من بعيد، وتحسين قاعد متوتر شوية)
جمعة: مالك يا عم تحسين؟ وشّك مصفر!
تحسين: يا عم… كنت لسه في المستشفى مع واحد صاحب ابني… اتخبط في حادثة بالعربية، ونقلوه على الطوارئ جري.
جمعة: يا ساتر! عملوا معاه إيه؟
تحسين: ولا ثانية ضايعة… أول ما دخل واسعفوه وعملولو اشعة قالو فيه نزيف بالبطن ونزلو علينا بالصدمة 👀
قالوا: “جاهز للعمليات”…
وقبل ما حد يفتح بقه ويسأل ازاي؟… عملوا حاجة اسمها Brief Assessment.

جمعة: برييييف إيه يا عم! ده الواد بينزف!
تحسين: ما هو ده المهم…
في الحالات دي مفيش رفاهية الوقت.
الدكتور لازم يعرف أهم 5 حاجات… بسرعة البرق.
جمعة: طب قالوله إيه؟ سألوا إزاي؟
تحسين: بص…
وهو على السرير، الدكتور كان بيكلمه وهو بيجري معاه:
– “حاسس بإيه؟”
– “بتاخد أدوية؟”
– “عندك حساسية؟”
– “اتخدرت قبل كده؟”
– “آخر مرة كلت إمتى؟”
وهو نفسه بيقيس الضغط والنبض والتنفس…
وبيشوف النزيف…
وبيعمل تقييم للمجرى الهوائي علشان التخدير.
كل ده في أقل من دقيقة!
جمعة: دقيقة؟!
ده احنا بناخد أكتر من كده عشان ندفع الحساب في القهوة!
تحسين (يضحك):
هو اسمه “تقييم سريع” بس هو اللي بينقذ.
مش لازم يعرف تاريخ العيلة كله…
هو بس يدور على أي حاجة تمنعهم يدخلوا للتخدير من غير ما يكونوا مستعدين.

جمعة: يعني التقييم السريع ده زي ما تقول…
“إيه اللي لو ما عرفتهوش دلوقتي… هيعمل مصيبة؟”
تحسين: بالظبط!
في الحوادث أهم 4 نقاط هما:
1– العلامات الحيوية
2– التشخيص
3– المشاكل الموجودة بالعيان
4– الهدف و النتائج اللي عاوزينها ايه من العملية

جمعة: طب ما يعملوا فحوصات وتحاليل؟
تحسين: مينفعش نستني كتير… الوقت ضدك.
المريض لازم يدخل غرفة العمليات…
وهم يعملوا التحاليل المهمة جوه أثناء التجهيز.
لكن الأساسيات لازم تتعرف قبل التخدير… علشان ما تحصلش حاجة خطر

جمعة: يعني اللي فهمته يا تحسين:
– التقييم السريع ده مش “استعجال”…
– ده “إنقاذ حياة”.
– بيجمع أهم المعلومات اللي تمنع كارثة.
– وبيخلّي فريق العمليات والتخدير جاهزين قبل ما يمدّوا إيديهم.
تحسين: أيوه يا عم…
ولو من غيره؟ الحادثة ممكن تبقى أهون من اللي يحصل بعديها.
جمعة: خلاص… الطوارئ ليها نظامها.
مالكش دعوة… ربنا يسترها على الجميع.
🤲🤲🤲🤲

14/11/2025

جمعتكم جودة مع تحسين☕️
عمّ تحسين ، راجل بسيط صحته كانت تمام، وفجأة بدأ يحس بدوخة شديدة وخفقان وتعب مفاجئ.
قلق وراح مستشفى…
المستشفى عملت له شوية تحاليل وفحوصات، والدكتور قاله إن المشكلة “نقص في الأملاح”. وكعادة أى مريض مصرى ما اقتنعش، وقرر يروح مستشفى تانية…🤷‍♀️
هناك عملوا تحاليل مختلفة تمامًا، والدكتور قاله: “أنت عندك مشكلة في القلب”.
اتلخبط أكتر… فرجع على مستشفى ثالثة، وهناك عملوا فحوصات غير اللي اتعملت قبل كده، واتقال له تشخيص ثالث!
عم تحسين احتار وقلق اكتر من الأول ازاى اكون أنا
نفس المريض…
نفس الأعراض…
لكن 3 خطط فحص مختلفة و 3 تشخيصات مختلفة.🤦‍♀️
وده يخلينا نسأل:
ليه المريض في كل مستشفى بيتعمله حاجة شكل؟ وليه التشخيص مش ثابت؟🤔
السبب ببساطة إن في مؤسسات صحية كتير مفيهاش بروتوكولات إكلينيكية موحدة، أو موجودة بس مش مُفعّلة.
💡 طب إزاي البروتوكولات الإكلينيكية بتحل المشكلة؟
🔹 البروتوكولات الإكلينيكية هي “خريطة طريق” بيتم الاتفاق عليها بين المتخصصين علشان كل مريض مهما راح لمستشفى مختلفة يتعمله:
• نفس الفحوصات الأساسية
• نفس الخطوات التشخيصية
• نفس أسس العلاج الصحيحة
• بنفس مستوى الجودة

مش بتمنع الطبيب إنه يضيف من خبرته، لكنها بتحط خط أساس موحد يمنع التضارب العشوائي.
✔️ طيب البروتوكولات دي بتتعمل إزاي؟
1️⃣ تتجمع الأدلة العلمية من مصادر موثوقة (guidelines عالمية زي NICE، WHO، UpToDate).
2️⃣ تنعمل لجنة من التخصصات المختلفة: أطباء غالبا بيكونوا رؤساء الأقسام الأكلينيكية، صيادلة إكلينيكيين، تمريض، جودة.
3️⃣ يتفقوا على خطة موحدة للفحص والتشخيص والعلاج لكل مرض.
4️⃣ تتراجع وتتعتمد من الهيئة الطبية.
5️⃣ تتوزع على الأقسام ويتعمل تدريب للفريق علشان كل الناس تمشي عليها.
6️⃣ قياس متابعه التزام الاطباء بتطبيق البروتوكولات وفي حاله عدم التزام أحد الأطباء يتم تشكيل لجنه استماع لمناقشة حاله المريض وامكانيه تعديل البرتوكول إن امكن طبعا لطبيعه الحالة
🎯 وبعد كل دة هتكون النتيجة؟
لو عمّ تحسين راح لأي مستشفى هيتعمله نفس الفحص الأساسي، وهيتقال له نفس التشخيص، وهيبدأ علاج صحيح من أول زيارة… بدل اللف والدوران والمعاناة.😊

07/11/2025

جمعتكم جودة مع تحسين

قاعد استاذ تحسين بيشرب قهوته لا بيه ولا عليه وفجأة يلاقي استاذ ممتاز داخل عليه باين انه على اخره 😥

استاذ تحسين: ازيك يا استاذ ممتاز ☺️
استاذ ممتاز: لا سلام ولا كلام كده يا استاذ تحسين نبقى قاعدين في الاجتماع قدام المدير وتقول منتظرين مشروع تحسين من ادارة استاذ ممتاز قصدك يعني ان الاداره عندي مش شغاله كويس
كل ده عشان معزمتش عليك على الفطار اول امبارح
استاذ تحسين: يا استاذ ممتاز استهدى بالله كده ان بعض الظن اثم يا راجل
هو احنا مش اول السنه قعدنا مع بعض وكتبنا الخطة بتاعة المستشفى
استاذ ممتاز: حصل
استاذ تحسين وقولنا لازم ولابد اهداف الخطة تكون قابلة للقياس
استاذ ممتاز: اينعم
استاذ تحسين: وانت بنفسك عملت المؤشر اللي هتقيس بيه الشغل بتاعك واللي بتبعهولي كل شهر
استاذ ممتاز: تمام ، يعني انا عامل الشغل بالمظبوط اهو
استاذ تحسين: مهو انت لو تصبر عليا تعرف اني بحبك
استاذ ممتاز: يا سلااااام
استاذ تحسين : انا كل شهر كنت باخد المؤشر واعمله تحليل وتفسير عشان نتأكد ان الشغل عندك ماشي ناحية تحقيق اهداف المكان وما شاء الله عليك الادارة عندك حاجه فوق العظمه
استاذ ممتاز: اومال مقولتش كده قدام المدير ليييييه😡
استاذ تحسين: لما جينا حطينا المؤشر بتاعك على control chart واحنا بنحلل المؤشرات النصف سنويه لقينا ان المؤشر بدأ ينزل على غير العاده

ده خلانا محتاجين نعمل deep analysis عشان نعرف اسباب التغيير ده
وكان لازم اطلب انك تشارك معايا
نعرف هل في مشكلة حصلت في امكانيات المكان عندك محتاجه تصليح
ولا انت عندك موظفين محتاجين تدريب ولا مثلا حصل عندك عجز في اعداد الناس اللي في الاداره ومحتاج تعمل اعلان توظيف

استاذ ممتاز: ايه ده يعني انت بتساعدني 😅
ده انا اكتر من مره اتكلم في الموضوع التدريب ده بس كان بيتأجل
استاذ تحسين: مهو اي قرار لازم يتاخد بناء على ارقام و إحصائيات ولازم نتأكد ان في مشكله وان حلها في التدريب

او يمكن يكون حلها في حاجه تانيه ونعالجها بمشروع التحسين

استاذ ممتاز : حقك عليا يا استاذ تحسين انا اتسرعت في الحكم على الاجتماع اللي فات

وان شاء الله نقعد مع بعض ونشكل لجنه من كل الادارات اللي ممكن تساعدنا عشان نحسن ال system
استاذ تحسين: طبعا ، ماحنا كلنا هدفنا في الاخر واحد وهو تقديم احسن خدمه للعميل وتحقيق أهداف المؤسسة ☺️

31/10/2025

☕️ جمعتكم جودة مع تحسين

في قهوة وسط البلد كعادته كل جمعة ،كان عم تحسين قاعد بيشرب القهوة مع صاحبه وهو مرهق.
👴كريم:
عامل إيه يا عم تحسين ؟ شكلك مرهق كده، المستشفى تعباك كالعادة؟

👨‍💼تحسين :
ما تقوليش بقى يا كريم… اليومين دول في حملة جديدة عندنا في المستشفى عن “تقديم رعاية موحدة لكل المرضى”، والدنيا مقلوبة.

👴كريم:
رعاية موحدة؟ يعني إيه الكلام ده؟

👨‍💼تحسين:
يعني كل مريض يخش المستشفى ياخد نفس مستوى الرعاية و كل واحد حسب حالته و تشخيصه… سواء غني ولا فقير، معروف ولا أول مرة يشوفونا. نفس الاهتمام، نفس السرعة، نفس المعاملة.
يعني مثلا مريض منتظر يدخل الرعاية وملوش سرير يأخد نفس خدمة المريض الواخد سرير في الرعايه.

👴كريم:
طب ده حلو جدًا والله! بس هو مش المفروض كده من الأول؟

👨‍💼تحسين:
هو المفروض، بس في الواقع ساعات بيحصل تفاوت… حد يعرف دكتور فيتسهل له، وحد تاني يفضل مستني. إحنا بقى بنحاول نمنع ده ونخلي الخدمة كلها بمستوي واحد.

👴كريم:
طب وده سهل؟ يعني الناس كلها تلتزم بنفس الطريقة؟

👨‍💼تحسين:
مش سهل، بس بنشتغل عليه بخطة. تدريب، رقابة، وتوعية للطاقم كله. حتى طريقة الترحيب بالمريض بقينا بنراجعها.

👴كريم:
والله دي حاجة محترمة جدًا. لأن المريض لما يحس بالعدل في المعاملة، بيرتاح نفسيًا وده جزء من العلاج أصلاً.

👨‍💼تحسين:
بالضبط! بنقول دايمًا: “الرعاية ما تفرقش بين حد وحد… المريض هو المريض.”

👴كريم:
عجبتني الجملة دي… المفروض تكتبوها شعار في المستشفى.

👨‍💼تحسين :
فعلاً، ممكن نطبعها على البانرات الكبيرة… “الرعاية حق لكل مريض.”

👴كريم:
بس كده… تعجب الناس وتغير فكر كتير

🎯 الرسالة:
الرعاية ما تفرقش بين حد و حد …المريض هو المريض.
تقديم رعاية موحدة لكل المرضي .

☕️

24/10/2025

☕️ جمعتكم جودة مع تحسين

المعلومه مش تطويل كلام
ده فهم وعى و مشاركه كمان

في قهوة وسط البلد كعادته كل جمعة، كان عم تحسين قاعد بيشرب القهوة وبيحكي لأصحابه عن موقف حصل قدامه في المستشفى.

قال وهو بيضحك:
"يا جماعة شفت النهارده مريض زعلان أوي!
الدكتور والممرضة قعدوا يشرحوله عن حالته والعلاج خطوة بخطوة، والراجل طالع بيقول:
"هو لازم كل ده؟ أنا عايز آخد العلاج وأمشي!" 😅

👨‍💼 سامي ضحك وقاله:
"يمكن الراجل زهق يا عم تحسين، هو الدكتور بيشرحله ليه كتير كده؟"

ابتسم تحسين وقال:
"لأ يا سيدي، اللي حصل ده الصح 100%.
الطبيب والممرضة عملوا اللي المفروض يتعمل:
شرحوا له حالته، وأهمية العلاج، والمضاعفات اللي ممكن تحصل لو ما التزمش، وحتى نصحوا أسرته يشاركوا في المتابعة.
ده واجب علينا إننا نثقف المريض

👨‍🦳 عم حسين قال متعجب:
"يعني حتى لو المريض مش عايز يسمع، لازم يشرحوله؟"

ضحك تحسين وقال:
"أكيد!
المريض ليه حق يعرف، لكن كمان الفريق الطبي عليه واجب يوصّل المعلومة بطريقة تناسب المريض.

👨‍💼 سامي قال مبتسم:
"يعني اللي كنا فاكرينه تطويل
طلع مهم و تأثيره كبير

تحسين ضحك وقال:
"بالضبط يا سيدي!
الكلمة اللي بتتقال للمريض
مش تضيع وقت إنما مشاركه ،فهم ،وعى للمريض و أهله

ورفع الكوباية وقال وهو بيبتسم:
"نفهم الأول، ونتكلم بعدين… ده طريق الجودة يا رجالة!" ☕️

🎯 الرسالة:
التثقيف الصحي مش كلام زيادة،
ده حق للمريض وواجب على الفريق الطبي.
افهم، اسأل، واسمّع المعلومة و شارك فى خطه علاجك

☕️

17/10/2025

☕️ جمعتكم جودة مع تحسين

دواءك أمانك.. احفظ اسمه عشان يحفظ سلامتك
خطوة صغيرة ممكن تحمي وتمنع غلطة كبيرة

في كافيه في وسط البلد كان تحسين اللي دايما بيتكلم عن “الجودة” قاعد مع أصحابه بيشربوا قهوة بعد صلاة الجمعة بيتكلموا ويضحكوا عن اللى حصلهم طول الاسبوع و فجاءة بدأ سامي يحكي:
يا تحسين الأسبوع اللي فات كنت في المستشفى والدكتور أول ما شافني فضل يسألني: بتاخد إيه؟ واسم الدوا إيه؟ وجرعته كام؟ حتى سألني عن الفيتامين اللي باخده من نفسي! قلت له هو التحقيق ده كله ليه 😅

👨🏻‍💼 ضحك تحسين وقاله بهدوء:
يا سيدي ده مش تحقيق دي خطوة مهمة جدا بنسميها مطابقة الأدوية أو بالإنجليزي
‏Medication Reconciliation

👨🏻سامي استغرب🤔
مطابقة يعني إيه؟ هو ظابط في كمين هو مش كفاية يعرف أنا مريض بإيه؟

👨🏻‍💼 رد تحسين وهو بيشرب القهوة :
بص يا سيدي لما المريض يدخل المستشفى بيبقى أحيانا بياخد أدوية من بره والدكتور جوه المستشفى ممكن يضيف أدوية جديدة ولو محدش قارن القديم بالجديد ممكن بالغلط:
* ينسى دواء مهم
* أو يكرر دواء موجود
* أو يغير جرعة كانت ماشية كويس
* او دوا بياخده هيأثر على مفعول دوا هيكتبه فمحتاج يظبط الجرعة.
وكل ده ممكن يعمل ضرر بدل ما يساعد عشان كده أول ما المريض يدخل الفريق الطبي بيكتب قائمة الأدوية الحالية كل حاجة بياخدها: أدوية، فيتامينات ،أعشاب حتى المسكنات اللي بيشتريها من الصيدلية بعد كده بيقارنوا القايمتين (القديمة والجديدة) ويتأكدوا إن كله تمام ومفيش حاجة اتسابت أو اتكررت او مش متظبط جرعتها

👨🏻سامي ابتسم وقاله يعني كأنهم بيعملوا تصالح بين الأدوية القديمة والجديدة؟

👨🏻‍💼ضحك تحسين وقال بالضبط بنخليهم أصحاب ومايتخانقوش مع بعض ثم مال عليه وقال بجدية

بس خد بالك يا سامي علشان الخطوة دي تنجح لازم المريض يكون متعاون يعني يا ريت كل مريض أو حد من أسرته يحتفظ بورقة فيها أسماء الأدوية اللي بياخدها أو حتى صور على الموبايل لما تروح لأي دكتور أو مستشفى وريهاله هتوفر عليهم وقت وتحمي نفسك من أي خطأ دوائي

👨🏻سامي قاله وهو بيضحك: يعني بدل ما أقول للدكتور معرفش الاسم بس لونه أبيض صغير أكون مجهز نفسي😅

👨🏻‍💼ابتسم تحسين وقاله اهو كده بقى اسمك مريض ذكي وده أول طريق الجودة 💪

الرسالة:
كل دواء بتاخده معلومة مهمة احرص دايما تكون معاك.
مطابقة الأدوية مش إجراء شكلي دي خطوة بتحافظ على سلامتك وجودة علاجك.

☕️

Quality Café

02/01/2026

26/12/2025

19/12/2025

12/12/2025

05/12/2025

28/11/2025

21/11/2025

14/11/2025

07/11/2025

31/10/2025

24/10/2025

17/10/2025

Address

Opening Hours

Website

Alerts

Shortcuts

Share

Category

Monday	8am - 5pm
Tuesday	8am - 5pm
Wednesday	8am - 5pm
Thursday	8am - 5pm
Sunday	8am - 5pm