10/04/2026
لا نتعلم من "نصائح" الآخرين....و لكننا نتعلم من "خدوشنا"!!!
الحياة طبيعتها أنها بتدينا صفعة...و لو متعلمناش بتدينا "صفعه" تانيه...و تالته و لو متعلمناش من التالته يبقي نستاهل "توالي" الصفعات لحد ما نتعلم...و هتفضل الحياة تدينا لغاية ما نسلم إن:
١- ليس المؤمن بالطعان، ولا اللعان، ولا الفاحش، ولا البذيء...ادب الحوار أهم...الفحش مش من علامات الشخصية القوية..
٢- الخير في أمتي إلى يوم الدين: في ناس طيبين كتير و حوالينا...و لو ملقتش خليك انت الطيب ال الناس تتلف حواليه.
٣- مِنْ حُسْنِ إِسْلَامِ الْمَرْءِ، تَرْكُهُ مَا لَا يَعْنِيهِ.: خليك في حالك.
٤- مَا مَلَأَ ابْنُ آدَمَ وعَاءً شَرًّا مِنْ بَطْنٍ.
٥-قَالَ رَسُولُ اللَّهِ ﷺ: مَن كان يؤمن بالله واليوم الآخر فليقل خيرًا، أو ليصمت..و قال لقمان الحكيم:الصَّمْتُ حِكْمَةٌ، وقَلِيلٌ فَاعِلُهُ....
ياريت نقلل ش**ة الكلام....متخليش من ضمن أولوياتك انك تكسر الصمت في أي قاعدة.
٦- قَالَ رَسُولُ اللَّهِ ﷺ: إِيَّاكُمْ والْحَسَدَ؛ فَإِنَّ الْحَسَدَ يَأْكُلُ الْحَسَنَاتِ كَمَا تَأْكُلُ النَّارُ الْحَطَبَ...
بجد أسوأ الأمراض النفسية بدايتها الغيره...كل واحد بيغير من حاجة معينه و لو سألت اي شخص انت بتغير من إيه هيقولك: انا مش فيه الخصلة دي
الأنسب: مراقبة النفس، فهم النفس، تحجيم مشاعر الغيرة، الاشتغال و الانشغال بما ينفع.
٧- قَالَ رَسُولُ اللَّهِ ﷺ: لَيْسَ الشَّدِيدُ بِالصُّرعَةِ, إِنَّمَا الشَّدِيدُ الَّذِي يَمْلِكُ نَفْسَهُ عِنْدَ الْغَضَبِ
كلنا للأسف عصبيين من ضغوط الحياة...و محتاجين تجديد "النيه" اليومية إننا نشتغل علي نفسنا و نبقي "اهدي حبه صغيرين"...و بمرور الأيام و الشهور و النيه السليمة هنلاقي نفسنا بنتحسن.
٨- قال تعالى: ﴿وَلَا تَهِنُوا وَلَا تَحْزَنُوا وَأَنْتُمُ الْأَعْلَوْنَ إِنْ كُنْتُمْ مُؤْمِنِينَ...و قال رسول الله صلى الله عليه وسلم: «لا يحقرن أحدكم نفسه..
نبعد عن التريقه و الشكوي و التقليل من نفسنا و عيالنا و شريك العمر ... لأن الشكوي مش رقوه خالص...و تاني حاجه ده مش هزار ولا لذاذة..الأفضل "وَلَا تَبْخَسُوا النَّاسَ أَشْيَاءَهُمْ"..نتكلم بطريقة لطيفه عنهم و عن نفسنا. و ندعي لهم "بدل" ما ندعي عليهم....و بدل ما نذم فيهم نحاول نتكلم ب إنصاف...ننصفهم بالكلمه و الفعل و نحاول نخرج اجمل ما فيهم.
٩- من راقب الناس مات هما: مراقبة الناس علي مواقع التواصل الإجتماعي مضيعه للوقت والجهد...و إنت مش "ناصح" خالص و لا بتربط الأمور ببعض و بتعرف تجيب التايهه..انت للأسف بعد فترة هتحس إنك علي طول مش مبسوط و مش راضي.
١٠- وَمَا يُلَقَّىٰهَآ إِلَّا ذُو حَظٍّ عَظِيمٍۢ...
تجاهل الأمور لبقاء الود... الإحسان للمسيء و مسامحته...ال بيعمل كده الناس بيقولوله "إنت ضعيف و خد موقف و بين لهم إنت مين" ورب العرش العظيم بيقولك إنت لو عارف تحافظ علي سلامك النفسي و تدفع ب إحسان ف انت "محظوظ و ذو حظ عظيم و سهل إن الواحد يكره كل الناس و صعب الواحد يملك نفسه و يسامح و يصبر...
انت عايز تصدق الناس...ده قرارك.
يوم سعيد علينا كلنا.
#يومسعيدعليناكلنا
