10/01/2022
10 نصايح , لو الصيدلي نسى يقولهم للمريض , تحصل مشاكل كتير !! ..
1. المضادات الحيوية اللي على هيئة "شراب" لازم يتم رجّها قبل الاستعمال في كل مرة , ما عدا كلاسيد و كلاريمكس و أي حاجة فيها مادة Clarithromycin و كمان Linezolid زي زيفوكس مثلا
2. كبسولات و أقراص "بران - Bran" لازم يتشرب معاهم 2 كوب ماء كبيييييييير , عشان فاعليتهم تزيد , و في نفس الوقت , نمنع حدوث انسداد معوي بسببهم لا قدر الله
3. الرياضيين و كبار السن , ممنوع عليهم الـ Quinolones (السيبرو و اخواته) خوفا من التهاب الأوتار , و تحديدا وتر أكيليس , اللي فوق العقب مباشرة !! ..
4. مستحضرات حب الشباب المحتوية على Adapalene (زي ماربالين) و Tretinoin (زي أكرتين) , الأفضل تتحط قبل النوم , في الظلام الدامس , مع عدم التعرض للضوء , خوفا من حدوث التهابات بسببها للبشرة .. و لو حصل احمرار بسببها في البداية ، نبقى نمسحها بعد عشر دقائق من الاستخدام ..
5. قبل وضع ماسك إزالة الرؤوس السوداء , يفضّل عمل حمام بخار للوجه لفتح المسام , و تسهيل خروج الرؤوس السوداء , و على العكس , يفضّل تدليك البشرة بقطعة ثلج بعد الانتهاء من تنظيف البشرة , لغلق المسام سريعا حتى لو بشكل مؤقت ..
6. بالتزامن مع استخدام الفازلين و المرطبات المعروفة للقضاء على خشونة و تشقق الكوعين و الكعبين , يفضّل الالتزام بشرب 30 مل مية لكل كجم من وزن الجسم , لعمل ترطيب داخلي للجسم ..
7. قبل صرف "نيت لوك" لحب الشباب (حتى لو بروشتة) , لازم نسأل على تاريخ عمل "ليزك" للعيون , لإن الاتنين بيسببوا جفاف العين , و ممكن يسببوا مشاكل شديدة في الإبصار لو حصلوا سوا بفارق أقل من شهر و نص ما بينهم !! ..
8. قبل صرف الـ Metronidazole بالفم (في فلاجيل أو أمريزول أو خلافه) , لازم نتأكد إن مفيش تناول لـ Mebendazole (بتاع الديدان) , خوفا من التعارض المؤدي لـ Stevens Johnson Syndrome , و اللي حيعمل "تسلّخ في الجلد" بشكل قاتل و العياذ بالله ..
9. لازم ننبه على إن مستحضرات العيون فيما عدا القطرات , المفروض تتحط بعد شد الجفن السفلي لتحت شوية , عشان نملاه بالجيل أو المرهم , قبل قفل العين مرة تانية , يعني الدهان ماينفعش يحصل من بره , زي ما بنشوف عند أغلب العيانين ! ..
10. المفروض نفصل بين تناول المضادات الحيوية , و مضادات الحموضة (قدر الإمكان) , عشان تواجد الاتنين سوا في المعدة , بيقلل من فاعلية المضادات الحيوية , و ممكن يضطرنا لطول فترة استخدامهم ..
