Dr Ahmed R Elwany د.أحمد رجب علواني

28/05/2023

أكيد كتير مننا سمع عن طرق العلاج بدون أدوية زي الحجامة والإبر الصينيه والكي والفتلة وغيرها من الأساليب المختلفة 📍💊
عايز رأيكم في الأساليب دي و لو حد مر بتجربة معينه ياريت يذكرها في التعليقات ⬇️⬇️
وإنتظروا الفيديو القادم

21/04/2022

للاسف فيروس جديد ظهر فى بريطانيا وكندا وبعض الدول بيسبب التهاب كبدى حاد للاطفال من سن سنه ل ١٣ سنه اى طفل يحصله صفرا او همدان شديد لفتره طويله ياريت الاهل تتابع حالته عاجلا مع دكتور كبد اطفال ..
ربنا يرفع الوباء ..

03/02/2022

القاتل الصامت ☠️🚫👽

30/01/2022

تورم وإحمرار أطراف الاصابع سواء القدم أو اليد نتيجه البرد الشديد والتي تسمي Raynaud Syndrome أو Frostbite وهي عضة الصقيع :

🔴 #سببها /
بيحصل انقباض في الاوعيه الدمويه نتيجه الحساسية الشديدة للبرد وبالتالي بيقل تدفق الدم للاطراف ، بالاضافه لخروج ماده الهيستامين المسببة للحساسية والاحمرار ويحدث التورم والإحساس بالهرش والأكلان بها .
كما يحدث إلتهاب في الاصابع ونقص الامداد الدموي لها ودا لو استمر لفترة طويلة دون علاج ممكن يؤدي لموت الأنسجة ومضاعفات أكبر .

🔴 #علاجها /
🟦 التدفئة المستمرة للأطراف ولبس شربات وجوانتي ثقيل . وتجنب التعرض للبرد .
🟦 تجنب شرب القهوه والكافيين و الأدوية المسببة لإنقباض الأوعية الدموية
🟦 عمل كمادات مياه دافئة للقدمين واليدين "تجنب التدفئة الشديدة او المياه الساخنة جدا "
🟦يمكن إستخدام مضادات التورم مثل كريم هيموكلار او ريباريل جل و أقراص ألفنترن و أمبيزيم "تحت إشراف طبي"
🟦 يمكن إستخدام مضادات الحساسية مثل أقراص زيرتك قرص قبل النوم .
🟦 يمكن إستخدام الكريمات المحتوية علي الكورتيكوستيرويد زي بورجازون ونتيجتها كويسه في الحالات دي .
🟦 بعض الأطباء يستخدم أدوية تزود تدفق الدم للأطراف زي ترنتال 400 مجم مرتين يوميا " ولكن لابد من روشتة طبيب لانها تسبب هبوط في ضغط الدم .
وفي النهاية الوقاية خير من العلاج
حافظوا علي نفسكم من البرد الشتا السنادي صعب 😄

07/07/2021

متلازمة تكيس المبايض 🚺
او تكيسات المبيض وعلاقتها بزيادة الوزن وهل هي سبب في تأخر الحمل والإنجاب ولا لأ .
🟣الأول تعالوا نعرف يعني إيه ؟!
هو وجود أكياس أو حويصلات في المبيض نتيجة خلل في الهرمونات "FSH " ينتج عنه فشل في التبويض وإكتمال خروج البويضة . وعشان كدا بيتكون أكتر من كيس داخل المبيض وبتبدأ الأكياس دي تكبر في الحجم وتؤدي إلي تضخم حجم المبيض .
يعتبر بين كل عشر ستات في واحده مصابة بتكيس المبايض يعني نسبتها عالية جداً
كمان يعتبر هي أشهر سبب من أسباب تأخر الحمل والإنجاب
🟣طب إيه #أعراضه ومشاكلة ؟!
عدم إنتظام الدورة الشهرية
زيادة الشعر في الوجه والجسم وظهور حب الشباب ودا نتيجة زيادة هرمون الذكورة
زيادة الوزن ودا بيكون نتيجة مقاومة الأنسولين
وفي علاقة كبيرة بين زيادة الوزن وتكيس المبايض لأن الاتنين سبب لحدوث بعض "يعني زيادة الوزن تعمل تكيس المبايض والعكس "
🟣طب لو حصل تكيسات في المبيض هل بيأثر في ؟!
اكيد بيأثر في تأخر الحمل نتيجة نقص التبويض ولكن النتائج كويسة جدا بعد العلاج و 70 في المية من الحالات بتحمل وتنجب بشكل طبيعي بعد العلاج .
🟣 #تشخيص تكيس المبايض يعتمد بشكل أساسي علي تلت حاجات """ الأعراض - الكشف بالموجات الصوتية وفوق الصوتية علي المبيض - تحليل الهرمونات """
🟣طب إمته نقول فعلا إن دا تكيس المبايض
لمايكون في أكتر من 10 أكياس في المبيض وكل كيس وصل 10 مل و المبيض كله يزيد لحد 10 سم ودي اللي بنسميها ADAM'S CRITERIA
🟣طيب #علاجها ايييييييييه ؟؟!!!
علي حسب الشكوى الرئيسيه للحالة بيكون العلاج الأنسب
يعني لو كانت مشكلتها عدم انتظام الدورة الشهرية بنلجأ ل "أقراص منع الحمل " لمدة طويلة قد تصل ل 6 شهور
ولو المشكلة التأخر في الحمل
بيتم تنشيط التبويض عن طريق أدوية محفزة للتبويض
زي Clomid و زي هرمون ال HCG
وأحياناً بيتم إستخدام عقار الميتفورمين " علاج للسكر "
في علاج بعض الحالات وتقليل مقاومة الأنسولين ودا بيساعد ف العلاج بشكل كبير .
ولو المشكلة وجود شعر زايد في الجسم بيتم إستخدام بعض انواع أقراص منع الحمل أو بيتم معالجتها بالليزر عند دكاترة الجلدية .
وما ننساش طبعا الرياضه والمحافظة علي الوزن والتغلب على السمنة ليها دور كبير وفعال في الوقاية والعلاج .
وقد يتم اللجوء للحلول الجراحية في بعض الحالات زي : عملية إسمها Laparoscopic Ovarian Drilling
ودا بيتم عن طريق المنظاز الجراحي .
ونسبة الحمل بعده عالية تصل ل 70 في المية
وأحياناً بنلجأ لإستئصال المبيض في بعض الحالات كبيرة السن أو في حالة حدوث مضاعفات أو زيادة حجم المبيض بشكل كبير ودا في بعض الحالات القليلة جداً .
طبعا ما ننساش إن كل التدخلات دي بتكون عن طريق الدكتور فقط 👌
👌حافظي على صحتك و وزنك و في حالة وجود أي مشكلة من دول التوجه للطبيب المختص وهو هيرشدك للازم .
👏منتظر #تعليقاتكم و #مشاركتكم معانا وأتمنى البوست يكون عجبكم وإستفدتم منه ♥️

10/03/2021

لازم نحمي بناتنا الأطفال ونفهمهم بالطريقة الصح .. 👌
شارك المنشور عشان يوصل لكل الناس ونحمي بناتنا وأطفالنا ..👶🧒🧑

05/03/2021

مختصر تطعيم الأطفال للدكتور أحمد الخطيب 😄

لكل اللي محتاسه في التطعيمات 👀
يلا نتعلم التطعيمات في أغنية تنفع كوووول الأمهات من يوم لحاااااد سنتين 😃

..❤️

بسم الله ❤️

********

التطعيم كله ف أغنية ... نحفظها سوا مِيّة المِيّة

م التالت للسابع غُدة ... اسمها يا مدام الدرقية!

لو نسيتيها ف أيُّها معمل ... بس هتتكلفى يا عنيا😭

وكمان تحليل بى كي يو .... مرض وراثى لا تنسوه ..

تطعيم للسُّل متنسيش ... أغلى من السفرة وم النيش😂

ومعادها قبل امّا "يربعن" ... واللى بييجى ف الريش بقشيش...!

افرض مش سايبالها علامة 😥 .. عادى يا ماما ومتعيديش ..👍

********************

تطعيم الشهرين ده صداع ..
سخونية غير الأوجاع ..
شلل الأطفال عضلى هديه ..
غير الحملات كل شويه ..
ادي سيتال بعد السخونية ،،
كمادات بارده بحنيه ،،
وبلاش خافض من غير لازمه..
ولو عيط .....

عادى مش أزمة 👍

********************

الأربعه طول عمره شديد..!
بيعيط مينامش اكيد !

احتياطاتك هيه هيه !
لو يسخن حميه بالمياه!

****************
والسادس جامد ومتين ...
أصله بييجى مع التسنين😂

و التسنين عضاضة وچل ..
برضه حرارة تزيد وتقل ..
طفلك "متقريف" و "ممل" ....😭

ممكن مياكلش لأيااام !
إنما يرضع فلّ تمام ...
ريّل يابنى !
لسّه تاعبنى 😥..
امتا هتكبر بأا وتسيبنى ..
آخد راحتى شوية وانام😭..!

طب يعمل رشح وإسهال ؟
ممكن جداً ،،
مش بطال !

بس ضرورى ،،
نعرف انه
مش "شماعه" لكل عيانا ..!

حاجه بسيطه تعدى قوام ..
عمره ما بيطول يا مدام ..
لو عديتى تلات ايام ،،
يبقى المشكلة مش ف "السِّنّه"
ده عيالنا هيا التَّعبانه ..!

*****************

والتاسع ده النقطتين ...
والكبسولة يا صلاة الزين 😂

الكبسولة مش موجوده ؟
"أ ڤيتون" أصلاً بأه موضه😉

******************

السَنَة مش هحكيلكوا عليه ... بس بيوجع يا اسمك إيه..😂

ممكن "تعبُه" ٣ أسابيع ... "طفح الجلد" مع "الترجيع"!

*********************

السنة ونص ده جباااااار .. والعيال بتولّع نااار🔥

غير وجعه يا ختى ياختاااى ... ادى سيتال ٣ سنتى 😂

حمى الواد علطول علطول ... ولبوس بالعرض وبالطول😂

ويا ريت ينفع كمادات .. فى الحته "الوارمة" بالذات..!

ومابيجيبش توحُّد يابا ... دى داتا قديمة و كدابه 😂

****************

كل التطعيمات معروفه ..
أضرارها كويس موصوفه!

سخونية وقريفة وزنّ ..
يبنى ماتهدا!! راكبك جنّ؟ 😢

الخافض بحدود علشان ..
بيخلّى التطعيم" تعبان"

احتمال يوجع ويرَجّع ..
وارد جدا ماهو بيصدّع!

ولو النونو أغمى عليه😱 ..
عبّى الأدرينالين رجليه👍

**********************

لو محصلش وجع وسخونة .. مش لازم نقلق أكماعة 😂

منعيدش التطعيم عالفاضى .. متخليش قلقك شماعة 😂

*********************

التأخير عادى على فكرة .. ومفيش مشكلة طعّم بُكرة!

ممكن تتأخر لشهور ... وتعوض كله بالدور..👍

والتقديم ده لأ بحساب ! .... لازم ناخد بالأسباب 😉


***************

التطعيم عُمرُه ما كان حامى ... ربّك هوا اللي بيسترها !

بس احنا بناخد أسبابنا ... قالّك "اتوكّل ...و......"

********************

...

❤️

...

..

لطلب كتاب الطب فن مش عن عن و ماما دكتورة طوارئ والوصايا العشر للحساسية لدكتور أحمد الخطيب من جميع أنحاء العالم :
التواصل معنا على رسائل الصفحة m.me/darbedaia
او واتساب https://wa.me/201005738030
أو كلمنا على 01005738030

02/02/2021

تعالوا نشوف معلومات محيرة جدا عن بعض الديدان :

في نوع من انواع الديدان اسمها ( الديدان المسطحة – Planarian ) ودي بتعيش في المستنقعات والبرك والأنهار وحتى ممكن تلاقيها على الشجر.. يعني بإختصار موجودة في كل حتة تقريبا.. الديدان دي تكوينها مُسطح، ولو قسمتها بالطول لنصفين؛ هتلاقي النص الشمال واليمين متماثلين تماما وعندها جهازين تناسلين ( ذكر وانثى) في نفس الجسد..

طيب احنا ليه بنتكلم عنه هنا برضه؟ هقولك:

زي ما انت عارف ان في انواع كثيرة من الحيوانات لو فقدت عضو من جسدها بتقوم بإنتاجه مرة ثانية في عملية اسمها ( التجدد - regeneration ).. زي مثلًا نجمة البحر – بعض انواع الضفادع و السحالي..

ولكن النوع ده من الديدان عندها خاصية مش موجودة في اي كائن حي على وجه الارض (حاليًا) وهي:
إن خاصية التجدد مش مقتصرة فقط على الأعضاء المفقودة لأ:

الديدان دي لو قطعت اي جزء منها سواء الرأس او المنتصف او الذيل هيعيد إنبات باقي الأجزاء اللي خلاها واحدة من أكبر الألغاز العلمية:
هو انك لو حتى قطعتّ أي جزء ولو كان في حجم حبة الأرز من أي جزء في جسدها ( رأس، باطن، رأس) هتلاقي بعد شوية الجزء ده اصبح دودة كاملة بعينين ورأس وجميع اجزائها العصبية والخلوية..


العملية دي كانت محيّرة كل العلماء في جميع انحاء العالم لإن ده الكائن الوحيد اللي عملية التجدد بتشمل كامل الجسد وتحديدًا الرأس!!
وسبب الحيرة هو ان طبيعي اي كائن حي بيكون عبارة مجموعة من التجارب والخبرات اللي بتشكل سلوكه في تحصيل الطعام والدفاع عن نفسه.. طيب بالنسبة للدودة المُعاد إنتاجها دي هل بتكون نسخة من الجديد للكائن الاصلي من حيث السلوك ولا بيكون كأنه لسه مولود؟

وعلشان يجاوبوا على السؤال ده اثنين علماء امريكان" قاموا بتجربة رائعة ونشروا نتيجة البحث في مجلة شهيرة لعلوم الأحياء وهي " The Journal of Experimental Biology ..
في البداية جابوا مجموعة من الديدان وعرضواها لحاجة همه بينفروا منها -فطريا- الا وهي الضوء..

وبدؤا يطوروا اسلوب يخلوا بيه الديدان تتصرف عكس طبيعتها؛ بإنها تتعود على الضوء وتالفه وعلشان يوصلوا للنتيجة دي وضعوا ليهم الطعام بالقرب من مصدر للضوء علشان يوصلوا ليه لازم يعبروا من خلال متاهة، ومع مرور الوقت وزوال الرهبة بالفعل الديدان بعد فترة قِدرت تمشي فالمتاهة بسرعة، ومش بس كده دي اعتادت الضوء واصبحت مش بتخاف منه..

بعد كده أخذوا الديدان اللي اتعودت على الضوء دي وقطعوها لنصفين: نصف فيه الذيل ونصف فيه الرأس وبعد 14 يوم كل جزء اصبح دودة كاملة.. وراحوا واخدين الديدان اللي نبتت من الذيل المقطوع ( يعني الديدان الجديدة ) وقاموا بتعريضها للضوء بإعتباره خوف فطري يعني المفروض بيتولد معاهم.. والمُبهر بقى ان الديدان الجديدة دي لاحظوا انها هي كمان مش بتخاف من الضوء وقدروا يعبروا المتاهة في زمن أقل من اللي لم يتم تدريبهم..


طيب معناه ايه الكلام ده؟
التجربة اثبتت ان مش بس الديدان بتعيد انتاج جسدها بالكامل من مجرد جزء صغير ( اي جزء مهما كان صغير) لا.. دول بينقلوا كمان الذاكرة ( عن طريق الحبال العصبية) يعني كل جزء في الدودة عنده نسخة من الحمض النووي ( Memorial RNA ) للدودة الأصل.. واستنتجوا من ده انها مش مجرد نسخة في الشكل والتكوين؛ دول بينقلوا نسخة من الذكريات السابقة..

طيب عارف ده بيحصل ليه؟
الديدان دي بطبيعتها ( في معظم الأحيان) حجمها صغير، وتكوينها الفسيولوجي والجسماني ضعيف جدًا، ومعندهاش اي وسائل دفاعية زي بعض الحيوانات الصغيرة حجمًا.. بالإضافة لإنها بتكون موجودة في اماكن مُعرضة فيها للخطر، فتقوم ناقلة مع الديدان الجديدة الذاكرة علشان تقدر تتجنب الأخطار المُحيطة بدل متتفاجئ بحاجات لم تتعلمها بالتجربة زي اقرانها..

لو انت لسه مش متخيل اهمية الموضوع ده، فلازم تعرف انهم حاليا بيحاولوا يعرفوا الجين المسؤول عن إعادة الإنبات، علشان يكون نواة يقدروا يستفيدوا منها على البشر الذين فقدوا اعضائهم في الحوادث والحروب.. يعني تخيل شاب أُصيب بفقد لأحد أطرافه، فياخد حقنة او يتعرض لمُحفزّ ما، فيعيد إنبات الجزء المفقودة..

طيب معلش تأمل كده: جيش من العلماء في كل انحاء العالم من جميع الجنسيات ، بما فيهم وكالة "ناسا" اللي شغالة على مشروع لدراسة النوع ده من الديدان، وأخذت عينات منهم بالفعل معاها للفضاء لدارسة امكانية الإستعانة بقدرتها في علاج الإصابات والجروح لرواد الفضاء عن طريق دراسة قدرتها على التجدد..

تخيّل كل دول مكرّسين اموالهم وجهودهم علشان يقدروا يعرفوا حقيقة واحدة فطرية عند كائن طوله ممكن لا يتعدى سنتيمتر واحد -في أغلب الأحيان-، وهو نفسه مش مُدرك انها بتحصله..
وتخيل الطفرة والقفزة الطبية والعلمية اللي هنسفيد منها كبشر لو ده حصل..
منقول

09/01/2021

بعض التمارين المنزلية وفوائدها ...

06/01/2021

✏ جرثومة المعدة 🐛 "Helicobacter pylori "
الأول نعرف إيه هي جرثومة المعدة ودي عبارة عن بكتيريا حلزونية موجودة في الأغشية المخاطية اللي بتبطن جدار المعدة والإثنى عشر واللي ممكن تؤدي إلي الإصابة بتقرحات في المعدة .
وطبعا عدد المصابين بيها في مصر حدث ولا حرج 😢
ويعتبر 80% من الناس اللي عندهم جرثومة المعدة بيكونوا من غير أعراض ظاهرة .
📌 طرق إنتشار جرثومة المعدة غير محددة لكن أكثرها هي الأطعمة الملوثة و مياه الشرب و مشاركة الأواني مع شخص مصاب وكذلك بالنسبة للأطفال عن طريق تقشير اللب وغيره ليهم و مص ببرونة الطفل من أكثر الطرق إنتشارا بين الأم والطفل .
📌 أعراض جرثومة المعدة
-حرقان في المعدة🔥 ومنطقة الصدر وبيزيد مع الجوع أو قبل النوم أو الصباح الباكر
- الغثيان و القيئ
- فقدان الشهية ونقص الوزن
-ألم في البطن " خاصة أعلى البطن "
- الإنتفاخ والتجشؤ
- رائحة كريهة في الفم
وقد يكون في هبوط وصداع متكرر

📌 بيتم تشخيص جرثومة المعدة إكلينيكياً عن طريق الأعراض ثم يقوم الطبيب المختص بطلب التحاليل الطبية واللي بتكون عن طريق كشف الأجسام المضادة للميكروب في الدم أو البراز .
هناك طرق أخري للكشف عنها زي " إختبار التنفس - المناظير الطبية "
قد تكون نتيجة التحليل إيجابية بدون أعراض الجرثومة "وقد لايتطلب علاج " حسب رؤية الطبيب .
🚫 يجب زيارة الطبيب في حالة
- ألم شديد ومستمرفي البطن او منطقة المعدة
- ظهور دم في القيئ
- تلون لون البراز بالأسود او ظهور دم في البراز .
- فقدان الوزن بدون سبب
- فقر الدم والأنيميا .
📌 بروتوكولات العلاج
يعتبر أفضل بروتوكول لعلاج الجرثومة هو البروتوكول الثلاثي وإن كان بعض الدكاترة يفضل فصلهم ولكن الأهم هو 👇
👌يفضل أن تكون مدة العلاج لاتقل عن 7 أيام
👌لا يكرر العلاج في حالة عدم وجود اعراض إلا تحت استشارة الطبيب .
👌 في حالة التحيل الايجابي يرجى التوجه للدكتور المختص لتحديد نوع العلاج المناسب .
وطبعا في أدوية كتير بتستخدم لعلاج قرحة المعدة واللي بيتم تحديد أفضلها هو الطبيب المختص .
📌 وبما إن الوقاية خير من العلاج تتم الوقاية من جرثومة المعدة عن طريق
-تجنب طرق الإصابة اللي قلناها فوق 👆
- تجنب الأطعمة اللي بتسبب تهيج المعدة وزيادة حموضة المعدة .
- تجنب الأكل قبل النوم .
🔷دمتم بكل صحة وعافية 🌹
🔷 منتظر إستفساراتكم وإقتراحاتكم 🍀
l