23/08/2025
عايزين عيال متربية زي اجيال زمان
تتقال الكلمة تتسمع فورا ،
العيل يخاف بس من بصة كدة،
الكلمة اللي يقولها الكبير تبقى صح فورا من غير نقاش، مابيقولش لحد لأ، نقوله يمين يبقى يمين شمال يبقى شمال، مش بيجادل ولا بيرد الكلمة بكلمتها ، واثق اننا عايزين مصلحته و اللي بنقوله يتعمل فورا لو على رقبته ، مايتجرأش يغلط قدامنا، مركز في مذاكرته بس ملوش ف اي حاجة
لو بالنسبة لمفاهيمك الكلام اللي فات ده هو تعريف العيّل المتربى !
فبراڨو عليكي انتي كدة ماشية فالطريق اللي يوصلك للنتيجة دي .. كملي .. و قضي يومك صويت و زعيق ..
و اعجنيهم و ربيهم صح ( حسب بوست متداول كدة متفاجئة من عدد ال shares اللي عليه و الكومنتات اللي موافقة على المنطق ده ) 😄
لكن تبقى متوقعة الضريبة ..
شخص مهزوز، بيغرق ف شبر مية، يضرب لخمة و ميعرفش يتصرف من غيرك، مش قادر يكوّن علاقات، مش واثق ف نفسه ولا مقدر قيمة نفسه بيسعى بس لإرضاء اللي حواليه عشان بيستمد قيمته من المدح اللي بيقولوه
و زي ما بينفذ اي حاجة تتقال له ف البيت من غير ما يفكر، هينفذ اي حاجة تتقال له من برة من غير ما يفكر برضو ..و هو و حظه بقى يا يتقال له حلو ، يا يتقال له بلاوي الدنيا .. وهينفذها عشان اتعود انه لازم يقول حاضر و لازم يعجب اللي حواليه
هيحتاج يبذل مجهود كبير اوي و يشتغل على نفسه كتير عشان يصلح بنفسه نتايج طريقة التربية دي و يا اما ينجح يصلحها او لأ !
لكن لو عايزاه شخص يكبر سوي...
قادر ياخد قرار ، قادر يتحمل المسئولية، يعتمد على نفسه ، عنده مهارات اجتماعية، و قادر على التفاوض و المناقشة..
واثق من نفسه ، لبق و متحدث جيد و قادر يعبّر عن نفسه و افكاره ، عارف يحط لنفسه حدود و يحافظ على مساحته الشخصية، و قادر يعبر عن رفضه لكن بذوق .. مش مستنى توكيدات اللي حواليه عشان يتصرف حسب اعجابهم ، مهتم بمذاكرته بس مش هي الحاجة الوحيدة اللي شاطر فيها و عنده اهتمامات تانية،
بيلتزم بمبادئ محددة عشان التزامه نابع من جواه مش عشان خوف من احكام اللي حواليه، و ف الخفا يعمل اي غلط براحته
فمهم تعرفي 3 حاجات💙
الأولى:
الإهانة مش اوبشن مسموح ( لا شتيمة ولا ضرب ولا تهزيئ ولا تقطيم ولا تقليل منه .. خصوصا لو قدام حد )
التانية:
النقاش الصحي حاجة ضرورية .. نتعلم نطول بالنا و نصبر على انه انسان لسة مفاهيمه بتتكون و احنا اللي بنكونها و ضروري نوضحله كل تفصيلة لإنه مش إنسان آلى المفروض نبرمجه، و ينفذ احلامنا
الثالثة :
التربية السوية مش يعني عيال سايبة .. و يعني ان مفيش عقاب ..
لازم يكون في ثواب و عقاب ( العقاب بمعنى انه يتحمل نتيجة فعله و مسئولية تصحيح خطأه .. مش يعني ضرب و شتيمة )
و مهم يكون في حزم .. و الحزم مش هو التهديدات و الشدة و تفريغ شحنات الغضب في ولادنا ..
لكن يعني قواعد واضحة متفقين عليها مخالفتها ليها نتايج واضحة متفقين عليها برضو
الحزم و العقاب .. بنحط قصادهم رصيد احتواء و محبة و حنية و تواجد و تفهم و دعم عشان لما نيجي نشد يكون لنا عند ولادنا رصيد يتفهموا بيه اننا بنعودهم على اللي يفيدهم ، مش بننتصر لنفسنا و نمشي كلامنا و خلاص عشان كلام الكبار لازم يتسمع
تمام؟
اتمنى يكون تمام ...
#أسرة #أمومة #تربية #صحةنفسية #طفولة #مراهقة
