Dr.Ruqia Elshennawy

06/11/2021

أول علاج لفيروس كورونا بياخد موافقة في المملكة المتحدة 👏❤

The tablet - molnupiravir - will be given twice a day to patients recently diagnosed with the disease.

30/05/2021

🐝🐝

تنويه: 🤓
الكلام الجاي كله عن ليه العسل ما ينفعش بديل صحي للسكر وخاصة لمريض السكري.. وليس الهدف منه التقليل من أهمية العسل كحاجة طبيعية فيها فوائد كتير، لينا كلام عنها في بوست منفصل إن شاء الله 😊
العسل والسكر متشابهين في إنهم :
بيتكونوا من نوعين من السكريات : الجلوكوز + فركتوز
نسبتهم في السكر الأبيض 50:50
في العسل 40:30
الفركتوز والجلوكوز بيتكسروا بسرعة جدا في الجسم ودا بيعلي سكر الدم بسرعة كبيرة جدا.. رغم ان العسل أقل من السكر في دا، بس الفرق بينهم بسيط ، في النهاية هيسبب مشكلة، خصوصا لمريض السكري.
الكالوريز في العسل أعلى من السكر، المعلقة من العسل فيها 64 كالوريز بينما معلقة السكر فيها 49 كالوريز، بس في نفس الوقت طعمه مسكر أكتر..
الفكرتين دول يخلونا ما نقدرش نعتبر العسل بديل مناسب للسكر - وخصوصا لمرضى السكري- وخصوصا إن في ناس بتستخدمه بشكل مفرط لمجرد انه طبيعي وأنه مفيد.. ودا بيعمل مشاكل كتير إحنا في غنى عنها.. 🤗

طب نحلي بإيه؟ 🤔

سكر الإستيڨيا من البدايل الممتازة وخاصة لو مريض سكري لإنه بيزود افراز الإنسولين وبيقلل المعاوقة ليه..
كمان ممكن ناخد تمرة أو تمرتين مع المشروبات أو نحطها في الحلويات والجرانولا مثلا..
في كمان سكر جوز النخيل دا من الحاجات الظريفة والمفيدة جدا كبديل للسكر الأبيض..

لكن بلاش السكر البني لإنه الفرق بينه وبين السكر الأبيض مش كبير بالإضافة إن معظم الموجود في الأسواق بيكون خليط بينه وبين الأبيض 🤷‍♀️

اكسر التابوو - عيش صح ☑️
سنة جديدة.. بداية جديدة 💪🏻


#دايت #سكري #حمية

26/05/2021

🎈🎈

الفرنسيين 🇨🇵 من أكتر شعوب العالم استهلاكا للعيش والمعجنات 🥐🍞 ومع كدا معدلات السمنة وأمراض القلب والسكر أقل من أمريكا مثلا🍕🍟
الصينيين واليابانيين أكتر ناس في العالم بتاكل رز لدرجة انهم ممكن ياكلوه في ال3 وجبات..🍚🍚 ومع كدا معدلات السمنة والسكر وأمراض القلب أقل بكتير جدا عندهم 🤔
في سنة 1939 ظهر نوع دايت اسمه "دايت الأرز" لمرضى الكلى والضغط.. كان معتمد بشكل رئيسي عالرز وتقليل الدهون وأكل الخضار.. كان بيجيب نتايج ممتازة مع المرضى 🤔
كل الحاجات دي تخلينا نفكر.. هو الرز والعيش في حد ذاتهم بيتخنوا؟ ولا طبيعة وأسلوب الأكل هو اللي بيفرق؟🤔
الإجابة بنسبة كبيرة واضحة.. كتير من الأبحاث مالقوش اي رابط بين الرز والعيش وبين زيادة معدلات السمنة أو السكر اأو أمراض القلب.. المشكلة كانت دايما في الإفراط في الأكل..
لكن لما بيتاكلوا ضمن نظام معتدل السعرات مش بيعملوا حاجة خالص.. لدرجة إن فيه أبحاث اعتبروهم مش مؤثرين لا بالسلب ولا بالإيجاب ... 🤷‍♀️
طبعا مع إعطاء الأفضلية للعيش الأسمر على الأبيض.. والأرز البني و البسمتي على المصري.. لإن فيهم بروتينات وألياف وفيتامينات أكتر..
وبالنسبة لمريض السكر.. فالأرز البسمتي هو الأفضل على الإطلاق يليه البني 🤷‍♀️ والعيش الأسمر بالتأكيد هو الخيار الأفضل دائما 🤗
اكسر التابوو.. عيش صح
سنة جديدة.. بداية جديدة

د. رقية الشناوي
أخصائي التغذية العلاجية والغدد الصماء والسكري
كلية الطب جامعة عين شمس
الجامعة الأمريكية بالقاهرة

10/05/2021

"في القدس من في القدس.. لكن لا أرى في القدس الا أنت"

الصورة لمسجد قبة الصخرة والأقصى مع كنيسة القيامة - القدس ❤️

🇵🇸
🇬🇧
🇺🇸
🇷🇺
🇹🇷
🇩🇪
🇫🇷
🇪🇦
🇮🇹

08/05/2021

العيد يعني لمة وكحك وفرحة.. وعشان الظروف اللي العالم فيها فاللمة والخروجات مش هتكون زي ما متعودين 😷😷
فمش فاضلنا غير الكحك والبسكويت والغريبة والبيتيفور 😂😂
هيبقى صعب جدا اننا مناكلهمش.. وعارفة الناس بتحاول تاكل أكل صحي أو بيحاولوا يحافظوا على وزنهم أو بيخسوا بالفعل هيكونوا حاسين بتأنيب ضمير كبير 😅
الحقيقة اننا كلنا من حقنا ناكل الكحك ومن حقنا ننبسط 😂
هناكل بس هناخد بالنا من كذا نقطة :
🍪 مناكلش الكحك أول حاجة الصبح أو عالفطار.
🍪ناكل قبليه تمراية أو أي فاكهة مجففة عشان تكسر رغبتنا في السكريات.
🍪نأكل ببطء شديد.. ونستمتع بالقطعة الواحدة جدا.. كإننا بنعمل إعلان شوكولاتة 😂
🍪يفضل نأكل الكحك بدون السكر المرشوش أو نمسحه كويس بعد ما نرشه
🍪 نشرب مية كتيييير جدا
🍪 يفضل ناكل الكحك السادة..
🍪 وأهم حاجة اننا نحاول نحسب سعراتنا.. ونخلي الكحك داخل احتياجات اليوم.. زي كدا 👇🏻
الكحكاية السادة فيها حوالي 200 سعر حراري
والكحكاية بملبن فيها 220 سعر حراري
الكحك بالتمر فيه 180 سعر حراري
البيسكويت فيه 90 سعر حراري
الغريبة فيها 160 سعر حراري
البيتيفور فيه حوالي 90 سعر حراري..
⚠️ إحسب هتاكل كام واحدة وحاول تلتزم بسعرات اليوم.. ولو لقيت نفسك زودت عن سعراتك واحتياجاتك.. إلغي أكل أو وجبة وزود رياضة وخصوصا المشي في أيام العيد...
✅ طبعا لازم نقول إن احتياجات الشخص المتوسط بتكون ما بين 2000-2500 سعر حراري في اليوم للرجال وبين 1500-2000 سعر حراري في اليوم للسيدات.. بيختلف من حد للتاني وبيزيد عن دا أو بيقل على حسب الوزن والطول ومعدل الحركة والحالة الصحية ولكن الارقام دي ما هي الا للتقريب والمساعدة 💪🏻
عيدكم سعيد ❤️🌼
د. رقية الشناوي
أخصائي التغذية العلاجية والغدد الصماء والسكري
كلية الطب جامعة عين شمس
الجامعة الأمريكية بالقاهرة

03/05/2021

We Do Care ❤️

28/04/2021

آخر التوصيات من مركز السيطرة على الأمراض والوقاية منها الأمريكي (CDC) .. بينصح بإرتداء كمامتين فوق بعض لحماية أكتر بكتير .. بس شرط تكون الكمامة الأولى كمامة جراحية (الكمامة الزرقا الل كلنا بنستخدمها) والكمامة التانية تكون كمامة قماش .. الدراسة اللي اتعملت أكدت ان دا بيحمي بنسبة 85% ودا أقصى حماية ممكنة من الكمامات ذات الاستخدام اليومي ، كمان نصح المركز لو هنستخدم كمامة جراحية واحدة يفضل اننا نعقدها من الجنبين - زي الصورة المرفقة- لان نسبة الحماية بتزيد من 56% الى 77% لما نربط الكمامة من الجنبين (نعقدها) ، في الصور المرفقة توضيح أكتر للفكرة .. طبعا لازم نأكد إن الكلام دا لا ينطبق على كمامة الN95 ، هي تعتبر أفضل وسيلة حماية من الفيرس ، وبالتالي لا يلزم استخدام كمامة تانية معاها.

⚠️تنبيه: المركز بيأكد على فكرة ان ارتداء كمامتين من الجراحي فوق بعض مش هيدي الحماية الكافية أو كمامتين قماش فوق بعض نفس الفكرة.. الأفضل اننا نحط كمامة جراحية مع كمامة قماش.
دمتم سالمين 🌹

شكر خاص لدكتورة مريم خالد khaled
قسم الصحة العامة - كلية طب القصر العيني - جامعة القاهرة

د.رقية الشناوي
أخصائي التغذية العلاجية والغدد الصماء والسكري
كلية الطب جامعة عين شمس
الجامعة الأمريكية بالقاهرة

📀 المصادر لمزيد من الإطلاع:
1
"Maximizing Fit for Cloth and Medical Procedure Masks to Improve Performance and Reduce SARS-CoV-2 Transmission and Exposure, 2021 | MMWR" https://www.cdc.gov/mmwr/volumes/70/wr/mm7007e1.htm

2
"Improve How Your Mask Protects You | CDC" https://www.cdc.gov/coronavirus/2019-ncov/your-health/effective-masks.html

⚠️ الصور الملحقة بالبوست هي لتوضيح وتبسيط الفكرة الواردة في المصادر وليست من الCDC.

26/04/2021

نسبة كبيرة من الناس بتعاني من حرقة المعدة أو الاثني عشر او إرتجاع المرئ.. والتلات أمراض دول مرتبطين ببعض بطريقة أو بأخرى والسبب هو عصارة المعدة الحمضية.. الأعراض معظمها متشابهه.. بتكون بحرقة في الصدر أو مغص أو غممان نفس أو غازات وألم أو كل الحاجات دي..
لو فضلت الاعراض دي لفترة طويلة بدون علاج ممكن تتحول لقرحة في المعدة أو في الإثنى عشر اللي هي أول جزء من الامعاء.. أو إلتهاب شديد في المرئ..
القرحة بتتشخص بمنظار علوي..
سواء في وجود القرحة أو التهاب جدار المعدة أو الاثنى عشر فأدوية تثبيط عصارة المعدة والتحكم في حموضتها بتساعد جدا مع الأكل السليم..
في رمضان.. الصيام بيكون تحدي لإن عصارة المعدة الحمضية بتزيد فترة الصيام.. ونسبة حدوث المضاعفات بتزيد في رمضان عن أي وقت تاني في السنة..
عشان كدا التوصيات بتقول :
⛔ لو في قرحة نشطة لسة في مرحلة العلاج لا ينصح بالصيام.
⭕ لكن لو تم علاج القرحة وعلاج جرثومة المعدة بفاعلية يمكن الصيام مع الإلتزام بالأدوية الموصوفة واتباع نظام الأكل المقترح..
مع الأخذ في الاعتبار كذا نقطة :
⚠️ عصارة المعدة بتوصل لأكثر افراز ليها فترة العصر لما قبل الفطار .. فدا الوقت اللي بيحصل فيه الألم الاكبر..
عشان كدا لما نيجي نفطر.. يفضل نكسر صيامنا بحاجة بسيطة زي تمراية وعلبة زبادي.. وبعد كدا نصلي وناخد وقتنا ونرجع ناكل كمية بسيطة ممكن نقسمها على مرتين وجبة بعد صلاة المغرب ووجبة بعد صلاة التراويح.
⚠️ لو حسينا بغممان نفس شديد أو حصل ترجيع شديد لازم نشوف دكتور.
⚠️لو حسينا بألم في البطن مع وجود براز اسود لازم نشوف دكتور.
⛔ لازم نبعد عن :
✖️ المقليات والأكل كثير الدهون.
✖️ صوص الطماطم والصلصة وعصير الطماطم وكل مشتقاتها.
✖️الفواكه والخضروات الحمضية.
✖️التوابل الكتير والشطة والليمون.
✖️الاكل المعلب والمحفوظ واللحوم المصنعة.
✖️السكريات المصنعة والمضافة.
✖️التدخين
✖️المشروبات الغازية والقهوة والشاي والنعناع.
✖️ ممنوع النوم او الإستلقاء بعد الأكل مباشرة ولمدة ساعة لساعتين.
✖️ يفضل عدم الأكل قبل النوم ب4 ساعات.
عدا ذلك كل الأكل مطلوب بكميات معتدلة.. ويفضل اكل الزبادي والنشويات بطيئة الإمتصاص كالحبوب الكاملة عند السحور.
وشرب كميات مناسبة من المية بين الفطار والسحور 8-10 أكواب.
دمتم في صحة 😊❤️




د. رقية الشناوي
أخصائي التغذية العلاجية والغدد الصماء والسكري
كلية الطب جامعة عين شمس
الجامعة الأمريكية بالقاهرة
للتواصل :01098770439

25/04/2021

للحامل في رمضان رخصة انها تفطر، لكن لو قررت انها تصوم بعد استشارة طبيبها، فأهم حاجة لازم تهتم بيها هي حالة الإرتواء وشرب المية.. لإن دي من الحاجات الأساسية لحمل صحي وخصوصا لو كان رمضان في الصيف..
من أهم العلامات اللي بتكون انذار لحدوث الجفاف هي:
⚠️ لون البول يكون برتقالي أو أصفر غامق.
⚠️التبول أقل من 3 مرات في اليوم.
⚠️ الدوخة وعدم التركيز أو الإحساس بالهبوط.
ولو إجتمعت التلات علامات دي مع بعض ينصح بكسر الصيام..
وعشان نتجنب كل دا محتاجين نشرب 10-13 كوب ماء في اليوم.
ونتأكد من أخذ الفيتامينات لو كانت موصوفة من قبل الطبيب بشكل منتظم.
مع أكل 5-7 حصص فواكه وخضروات في اليوم، يفضل الغنية بالمية زي البطيخ والكنتالوب والخيار والكابوتشي.
تناول الحبوب الكاملة والبقوليات زي العيش البلدي والشوفان والكينوا والفول والفاصوليا البيضاء والحمراء وخصوصا في وجبة السحور..
نحاول نقلل من السكريات ومن الأملاح الكتير وخصوصا في وجبة السحور.

23/04/2021

عدى عشر أيام من رمضان.. وهزرنا كتير وكلنا براحتنا.. جه الوقت عشان نتصدم 😁🤯
اللي في الصورة دي السعرات الحرارية الموجودة في قطعة كنافة صغيرة جدا.. قد عقلتين صابع أو أكتر شوية صغيريرن..
السعرات الموجودة في قطعة الكنافة المتوسطة اللي معظمنا بياكلها هي :
💥كنافة سادة : 512
💥 كنافة بالمانجا : 570
💥 كنافة: بالمكسرات : 563
💥كنافة بالقشطة/كريمة: 652
💥كنافة بالنوتيلا : 662
💥كنافة بالريد فيلفيت : 772
💥 كنافة بالمالتيزرز : 780
💥كنافة بالجبنة ريكوتا : 566
💥كنافة بالأوريو كيك : 650
💥كنافة بالرز باللبن والبسبوسة : 860
😅😅😅

22/04/2021

الإمساك (constipation) مشكلة بتواجه ناس كتير في رمضان.. نتيجة لطبيعة أكل وعادات صحية وقابلية الشخص لحدوث دا مع فكرة الصيام نفسها..
في نصايح غذائية مهمة عشان نتجنب حدوث الإمساك مع الصيام..
أهمها :
🔅 استبدال الحلويات والسكريات بفواكه.. ينصح ب3-4 حصص فاكهة ما بين الفطار والسحور..
🔅 وجود الخضروات المختلفة مع وجبة الفطار والسحور زي الكابوتشي والجزر.
🔅 استخدام سلطات متنوعة واضافة بعض الحبوب الكاملة ليها زي الكينوا والبرغل والحمص.
🔅 شرب شوربات الخضروات المختلفة قليلة الدسم مع الفطار والسحور.. زي شوربة العدس وشوربة القرنبيط.
🔅 نستبدل العيش الأبيض بالعيش البلدي أو عيش الحبوب الكاملة.. نحاول بشكل عام نبعد عن كل الحبوب المكررة.
🔅 نشرب كميات مناسبة من المية 8-10 أكواب مية ، أو اللبن خالي الدسم أو عصائر الخضروات أو عصائر الفواكه الطبيعية الخالية من السكر والمحضرة في البيت.


د. رقية الشناوي
أخصائي التغذية العلاجية والغدد الصماء والسكري
كلية الطب جامعة عين شمس
الجامعة الأمريكية بالقاهرة
للتواصل : 01098770439

20/04/2021

القهوة.. مشروب السعادة والتركيز والرواق لملايين الناس في العالم..
فيه معلومة مشهورة عنها انها بتسبب ادرار للبول وبالتالي يفضل لو حد هيصوم ما يشربهاش، عشان متزودش الجفاف والعطش..
الأبحاث فعلا اثبتت إن مادة الكافيين ليها تأثير على ادرار البول وانها بتزوده..
لكن كمية الكافيين في القهوة هي اللي هتحدد التأثير دا..
والتأثير دا بيبتدي من عند شرب حوالي 250-300 مج.. من الكافيين.. مرة واحدة.. وكمان عشان يعمل التأثير دا محتاج يكون حد بقاله فترة طويلة مش بيشرب قهوة وفجأة شرب الكمية دي.. يعني لو متعود يشربها كل يوم مش هيحصل التأثير دا..
عشان الصورة توضح أكتر لازم نشوف كمية الكافيين الموجودة في كل نوع قهوة لانه بيختلف من قهوة للتانية مثلا :
☕فنجان القهوة التركي 100مل فيه حوالي 84 مج كافيين..
☕ الاميريكانو 240مل فيه حوالي في المتوسط 95 مج كافيين.
☕ الاسبريسو وان شوت 30-50مل فيه حوالي 63جم كافيين.
☕ القهوة سريعة التحضير "النسكافيه" كوب 240مل فيه 30-90مج كافيين.
واضح من نسبة الكافيين في أنواع القهوة المختلفة إن عشان يحصل تأثير ادرار البول لازم نشرب أكتر من مرتين من كل نوع قهوة في المتوسط.. وكمان لازم يكون بقالنا فترة طويلة مشربناش..
🔥لكن بردو تفضل القهوة بتأثيرها اللي حير العلماء.. اللي ممكن يكون عكس بعضه فين ناس مختلفة.. عشان كدا لو ليك تجربة مختلفة مع القهوة غير الكلام دا.. فدا طبيعي جدا.. لإن دي القهوة ودا الكافيين اللي بيختلف تأثيره في بعض الأوقات في بعض الناس .. لكن الكلام هنا عن الغالبية..

🌙تبقى نقطة مهمة وهي ان الناس المتعودة عالقهوة الصبح وبتحس بصداع لو مشربتهاش مع الصيام..مفيش أي مشكلة من شرب قهوة عالسحور المتأخر لتقليل الصداع دا..



د. رقية الشناوي
أخصائي التغذية العلاجية والغدد الصماء والسكري
كلية الطب جامعة عين شمس
الجامعة الأمريكية بالقاهرة