08/07/2025
التحليل النفسي من مدرسة فرويد :
قبل فرويد الناس كانت شايفة إن الإنسان كائن بيفكر بمنطق ، وكل حاجة بيعملها نابعة من قراره الواعي
لكن فرويد ظهر وقال لأ ، فيه جزء كبير جدًا من أفكارنا وتصرفاتنا بييجي من مكان احنا مش شايفينه… مكان مستخبي جوانا ، بنسميه "اللاوعي"
ومن هنا بدأ فرويد يبني نظريته عن " مستويات الشعور " واللي كانت وقتها شيء ثوري تمامًا
فرويد كان شايف إن العقل البشري بيتقسم لـ ٣ مستويات ، مش مستوى واحد
فيه اللي بنشوفه ونعرفه ، وفيه اللي نقدر نوصله بسهولة ، وفيه اللي مدفون جوا أعماقنا ومش بنشوفه خالص لكنه بيأثر فينا كل يوم
★ أول مستوى هو الوعي ، وده ببساطة هو كل حاجة إحنا مُدركينها دلوقتي في اللحظة دي
يعني إنت دلوقتي واعي إنك ماسك الموبايل، بتقرأ، مركز في الكلام
إنت عارف اسمك ، شايف المكان اللي حواليك
و حاسس بشعور معين جواك
كل ده بيدخل تحت " الوعي "
لكن فرويد كان شايف إن الوعي ده محدود جدًا وإنه جزء صغير قوي من اللي بيحصل جوانا
★ بعد كده فيه طبقة تانية اسمها ما قبل الوعي
ودي ممكن تتخيلها كأنها درج مقفول جوه عقلك
و الدرج ده فيه معلومات مش في بالك دلوقتي بس تقدر تفتكرها بسهولة
زي مثلًا لما تحاول تفتكر اسم صاحبك من ثانوي أو لون هدومك من يومين....
انت مش في بالك طول الوقت المعلومات دي بس لو ركزت شوية ، تقدر تطلعها.
المعلومات دي مش ضايعة ، لكن مش ظاهرة برضو ، وده اللي بيميز " ما قبل الوعي "
★ أخطر وأعمق جزء بقى هوا " اللاوعي "
وده عالم كامل مستخبي جواك بيحتوي على كل الحاجات اللي عقلك شايف إنها تقيلة أو مؤلمة أو مينفعش تتقال ، فدفنها جواك من زمان
يعني ممكن تكون مواقف حصلتلك وإنت صغير واتأثرت بيها ، بس نسيتها بعقلك الواعي
أو مشاعر خفت منها ، أو أفكار المجتمع و البيت علموك إنها غلط أو عيب
فبدل ما تواجهها… عقلك خبّاها 👀
بس المدهش إن الحاجات دي مش بتموت
هي بتفضل موجودة ، وبتخرج في تصرفاتك أو في اختياراتك ، في أحلامك، في مخاوفك، أو حتى في غضبك اللي مالوش سبب....
فرويد كان بيقول إن اللاوعي مش ساكن
بالعكس نشيط جدًا ، وبيأثر علينا من غير ما نحس
يعني مثلًا :- ممكن تكون بتتعصب بسرعة من ناس معينة من غير ما يكون فيه سبب منطقي
بس الحقيقة إنهم فكرّوك بشخص قديم أو جرح مدفون في ال لاوعي عندك
أو تلاقي نفسك كل شوية تقع في نفس النوع من العلاقات… وتقول " هو أنا منحوس؟ "
بس ده مش نحس ، ده تكرار ناتج عن حاجة مأثرة فيك من جواك ، وإنت مش شايفها
وعلشان كده فرويد ما كانش بيشوف العلاج النفسي مجرد شوية نصايح أو دعم معنوي
هو كان شايف إن العلاج الحقيقي بيبدأ لما الإنسان يشوف اللي مستخبي جواه
ولما يواجه مشاعره ، ويتعامل مع الذكريات اللي حاول يدفنها ، ويفهم إن فيه حاجة بتحرّكه من جوه من غير ما يكون واعي بيها....
وده اسمه " التحليل النفسي "
اللي بيعتمد على إن المريض يبدأ يتكلم بحريّة ومن غير ترتيب ، ويحكي عن أحلامه ومشاعره وتجربته
ومن خلال الحكي ده ، المعالج يقدر يساعده يربط الخيوط ويشوف الصورة كاملة 🩶
