دكتورة / نشوى عبود - Dr. Nashwa Aboud

29/01/2026

موعدنا مع همسة الخميس . ويارب تعجبكم.
مع تحياتى للجميع. دكتورة / نشوى عبود
https://www.facebook.com/DrNashwaAboud1

08/01/2026

https://www.facebook.com/share/p/1ChGcQZdkb/

مقال منشور وعجبنى ، حبيت اشاركه معاكم

التربية على احترام النعمة

أولادي بيحبوا الورك بتاع الفرخة
النهارده نسيت وسيبتلهم الجزء اللي فوق
رفضوا ياكلوا وبدأت المحايله والطبطبة، وهاحط كاتشب، طب أعمله شاورما، طب آخر مرة!
وكل ما أتحايل يزيد الدلع والرخامة!
آخر ما زهقت قولتلهم هتاكلوا؟
لفيت أكلهم كله وأخدتهم ونزلت الشارع
مشينا لحد ما لقيت عامل نضافة
قولت له اتفضل ألف هنا وشفا
ورجعت
عدت ساعة اتنين تلاتة أربع ساعات
بدأت عصافير بطنهم تصوصو شويه والعصافير بقت بتصرخ!
ماما عايزين نتغدا
كان علي عيني يا حبايبي الغدا خلص
طب اعملينا أي حاجة
علي عيني يا عيوني أنا مش فاتحه مطعم
فيه طبق فول من فطار الصبح أسخنه؟
الولد الصغير كان هيقول مش بنحبه
أخته سكتته وقالته ماتقولش كده ماما هتنزله لعمو تحت وهنموت م الجوع
سخنت الفول
وعن منظرهم وهم بياكلوا من غير محايله ولا طبطبة كأنها هابي ميل من ماك
صحيح لازم ع قد مانقدر مانحرمش ولادنا
بس في شَعرة بين إن نخلي عنيهم مليانه ونخليهم مدلعين ويتبطروا على نعمة ربنا!
لازم نخلي بالنا واحنا بنجري ونجاهد ف الدنيا عشان مانحرمهمش من أي حاجة ونحقق كل طلبتهم
إننا نهتم نخليهم حاسين بقيمة النعمة وعمرهم مايتبطروا عليها
ويحمدوا ربنا ع الكتير أو القليل
لازم لما يطلبوا حاجة واحنا لسه ماقبضناش نعرفهم ونفهمهم
حتي لو معانا لازم يعرفوا مش كل طلب هيجاب
ودي دايمًا النصيحة اللي والدي كان بيرددها
"اخشوشنوا فان النعم لا تدوم٠
منقول

01/01/2026

موعدنا مع همسة الخميس . ويارب تعجبكم.
وكل عام وأنتم بخير.
مع تحياتى للجميع. دكتورة / نشوى عبود
https://www.facebook.com/DrNashwaAboud1

19/12/2025

خناقات المترو
هو المترو حواراته كترت ليه؟
(إذا كان الشخص مش عارف يكون مؤدب في المواصلات العامة ويحترم غيره يبقى ينزل وياخد تاكسى مخصوص له لوحده).
كلمة كلنا عارفينها من صغرنا.
بس للأسف الأحداث الأخيرة تابعنا تطورات كتيرة وصعب الحكم عليها؛ لأننا مكناش موجودين فيها، لكن تعالوا نرصد ونحلل زى ما بنعمل في أي أحداث بتحصل من غير تحيز لكن برؤية مختلفة ، وكل واحد له حق الرد طبعاً والاختلاف وارد في الآراء.
1 – الموقف الأول:
الفتاة التي تقف ومصورة نفسها واقفة والشباب جالس ومحدش راضى يقعدها.
طب مين الغلطان؟ وهى ليه راكبة عربية رجال؟ وفين الذوق والشهامة الى عند الرجالة؟
كل ده سمعناه بس اعتقد إنه ناقصه حاجة ومحدش يزعل منى للأسف بعض الفتيات بتتعامل بمنطق الحق المكتسب وهو: انا ست فلازم تقف لى وده غلط لأنه مش فرض على أي راجل يقف . وإذا كان في حد عنده ذوق وبيفهم في الإتيكيت ووقف لك مرة فمش لازم كل مرة حد يقف ويقعدك، وخصوصاً إنك مش سيدة كبيرة في السن مثلاً أو شايلة ولد صغير وغيرها من الأسباب الى تخلى الشاب يقف ويقعدك، لأ أنتى ما شاء الله واقفة كويسة أهو وسنك مش كبير طب مركبتيش ليه عربية الستات بدل ما تقعدى تشتكي؟
وعلى فكرة الشاب الى قاعد ده ممكن يكون شغال شفتين 16 ساعة مثلاً ومن حقه هو كمان يرتاح ولا إيه؟
انتى كنتى واقفة في حالك ومحدش ضايقك وده حقك ، لكن إنك تزعلى إن محدش وقف وقعدك ده مش حقك ، ده تطوع من الشخص الى هيقعدك يا يعمله يا لأ لكنه مش فرض عليه.
وكلمة في سركم معروف بين الستات إننا بنركب عربية الرجال عشان يمكن حد يقعدنا لأن الستات مش هتقوم إلا نادراً لست زيها للأسف.
وبالمناسبة أنا كنت راكبة عربية الستات من فترة وكنت قاعدة والبنت الى قدامى أصغر منى بكتير فقمت وقعدتها وبعد ما قعدت لقيت الستات في العربية بتزعق لى إنها صغيرة وليه هي تقعد وإحنا أكبر منها. قلت لهم هي تعبانة وراجعة برضه من الجامعة ومحاضرات زى ما احنا راجعين من شغلنا ولازم نرحم بعض، راحت البنت وطت على ودنى وقالت لى بصوت واطى: أنا عاملة عملية في ضهرى واتكسفت اقولك اقعد مكانك. طبطبت عليها وقلت لها أنا حسيت إنك تعبانة من غير ما تقولى.
الخلاصة: ياريت نرحم بعض، كل واحد سواء قاعد أو واقف، فيه الى مكفيه ودماغه شغالة ومش ناقص كمان مين الى هيقعد الأول هي مش الكراسى الموسيقية.
2- الموقف التانى:
الراجل المسن الى زعق لبنت إنها قاعدة حاطة رجل على رجل، وهى مكانتش فاردة رجلها في وشه ولا حاجة البنت قاعدة حاطة رجلها فوق رجلها مش مضايقة حد، وفى ناس على فكرة طويلة مش بتعرف تقعد غير كده ،وهى قاعدة في حالها متكلمتش مع حد، لكن الراجل مش عاجبه المنظر وزعق لها طب ما طبيعى البنت مش هتسكت، كل فعل له رد فعل، هو انت كنت كلمتها بالراحة عشان تقعد كويس وهى رفضت، وإيه حكاية التخبيط بالعصاية دى، ده أنت حظك حلو إن البنت كانت طيبة وهادية لكن دى لو واحدة غيرها في مكانها مكانتش هتسيب حضرتك إلا قدام أمن المحطة وبعدين في قسم الشرطة واحتمال ترفع عليك قضية كمان، هو أنت ماشى تضرب الناس بعصايتك وعايز الناس تسكت لك والا إيه ؟ وبعدين نقطة مهمة من البداية أصلاً معلش تكلمها ليه؟ هو حضرتك هتربيها؟ ده مترو وكل واحد نازل في محطته، هي مش قاعدة عندكم في الدوار.
برغم اختلافى مع طريقة قعدة البنت في مواصلات عامة، لكن في ناس كبيرة في السن للأسف مش عاجبها حاجة وعمالة تنتقد وخلاص، وهي مش بنته عشان يكون له حكم عليها، وكلنا عارفين الأجيال الجديدة مش سهل قوى إنك توجه أو تنصح حد متعرفوش ومن غير ما يفتكر إنك حشرى أو بتتدخل في الى مالكش فيه. للأسف بنشوف النموذج ده كتير راجل عجوز مش عاجبه حاجة وعمال ينتقد في الشباب الى جنبه وخلاص كإن هو اتولد كبير ومكنش في يوم شاب زيهم.
لكن المرة دى وسعت منه لما زعق جامد وقعد يشتم، والناس بدل ما تدافع عن البنت لأ جت في صف الراجل محدش رد قاله وأنت مالك، أو خليك في حالك، أو يمكن ضهرها واجعها او بطنها أي سبب يخليك تسكت ومتقعدش تزعق لها. للأسف الشيب في الشعر أو كبر السن مش معناه امتياز للزعيق أو العصبية والانتقاد عمال على بطال.
لأن الناس هتزهق من كبار السن العصبيين زى ما بتزهق من زن الأطفال في المترو برضه.
الواحد كان زمان بيطمن وهو قاعد جنب راجل كبير، وتقوله أدعى لى معاك يا حاج، ويدردش معاه بلطف لحد ما ينزل محطته، دلوقتى بقى الكبير في السن من أول ما يركب المترو شغال انتقاد طول الوقت وشتيمة في الشباب والبنات على فكرة، بس معتقدش إن في شاب هيسكت لكن في الحالة بتاعتنا هو زعق لبنت عشان متأكد إنها مش هتعمل له حاجة.
ولما الراجل حمش كده مزعقش ليه للشاب الى جنبه أبو بنطلون مقطع وركبته باينة والا هي عشان ست وكانت قدامه حاطة رجل على رجل؟ طب لو كان الى حاطط رجل على رجل كان هيزعق له برضه؟
وإيه موضوع إبنك الى بيرد ده، هو كل واحد عايز يعمل تريند وياخد اللقطة وإبنه الى يطلع يرد، زى سواق عربية الفنان محمد صبحي . بجد حاجة رخمة.
الخلاصة: كل واحد يفكر يركب مواصلات يبقى يلتزم بآداب المواصلات العامة، ومحدش يقعد يربى الناس في المواصلات وإلا هتسمع كلام مش هيعجبك خصوصاً من الأجيال الجديدة.
إذا عجبك المقال برجاء كتابة تعليق والضغط على الإعجاب.
مع تحياتى
د/ نشوى عبود
دكتوراة فى علم النفس الإكلينيكى
إستشارات نفسية – إرشاد أسرى
ت: 01227181401
https://www.facebook.com/DrNashwaAboud1

05/12/2025

خايفة على ولادى
احبس ولادى فى قمقم ولا اعمل إيه؟
بعد انتشار حوادث التحرش والاعتداء على الأطفال، وصلنى خوف كتير من الأمهات القلقانة على ولادها ومش عايزة تخلى ولادها ينزلوا من البيت وبتقول هخليهم قدام عنيا بدل ما يجرى لهم حاجة
للأسف ده غلط لأننا مش هنعيش لأولادنا طول العمر، ومهما قفلنا عليهم دلوقتى ، لازم هيجى لهم وقت ويواجهوا المجتمع لوحدهم ، يبقى الأفضل اننا نبدأ نعودهم من دلوقتى إزاى يتصرفوا.
هنحاول في السطور التالية أن نجيب عن السؤال الأهم:
ماذا يجب علينا أن نفعل لكي نحمى أولادنا؟
الموضوع فعلاً حساس ومؤلم ، وكل أم بتتخبط بين الخوف الزايد والحرية المطلوبة.
هنحاول نقسم الخطوات إلى عدة نقاط عملية تحقق التوازن:
1- الحماية مع الحريّة:
- عينك في وسط راسك: خليك قريب في الأماكن العامة، لكن بدون ما تتحول لمراقبة خانقة. مثلا، لو طفل 5 سنين، خليه يلعب في نادي أو حديقة قريبة وأنت بتشوفه من بعيد.
- حدود التلامس: علمه "ممنوع التلامس" مع أي حد حتى لو قريب، خصوصاً المناطق الحساسة (الجزء العلوي والسفلي من الجسم). استخدم قصص أو تمثيل.
2- التوعية من صغرهم :
- ممنوع "المدرب أو المدرس يلمسني": خليه يفهم إن أي لمسة مش مريحة لازم يرفض ويقول "لا" ويبلغك فوراً.
- الكلمات السحرية: "لو حد حاول يلمسك أو ياخدك، صرخ وجرى وبلغني".
- التدريب على رفض: مثلا قول له "لو كابتن قال اضربني أو لمسك، قول لا وابتعد "
3- استخدام التكنولوجيا كمساعد : مثل :
- تحديد مواقع (GPS):
- ساعات ذكية أو أجهزة تعقب لو لزم الأمر.
4 - ممنوع التقبيل من الفم حتى من الأم :
- السبب: الطفل يتعلم إن جسمه ملكه، و إن أي لمس لازم يكون بإذنه.
- التطبيق: ممكن الأم تقول: "بحبك، نخلي البوس على الخد أو اليد." لو طفل صغير مش فاهم، ممكن تستخدم قصة أو لعبة.
- الرد على الاعتراض: "دي قواعد البيت لحمايتك، مش تقليل من الحب."
5- التعامل مع الأهل والأقارب 🤝
- شرح القواعد: "إحنا بنحمي أولادنا، مش تقليل من الحب."
- التدرج: لو حد عنده تحفظ، ممكن تبدأ ب "ممنوع البوس من الفم، نكتفي بالخد."
- الاعتذار المهذب: لو رفض، قلل التواصل حفاظًا على الطفل.
6- التواصل المستمر :
- اسمعهم: خصص وقت تسألهم فيه عن يومهم، مين كان معاهم، هل حد قال حاجة غريبة؟
- اسأله يوميًا: "مين كان معاك؟ هل حد لمسك بطريقة مش مريحة؟"
- الثقة: بني علاقة قوية عشان يحكولك لو حصل شيء مش مريح.
- الثقة: لو قال "لا"، صدقه، لكن لو لاحظت تغيير (سلوك، خوف)، اسأل بعمق.
- التعزيز: امدحه لو رفض لمسة أو قال "لا".
7- الأنشطة الآمنة :
- اختر أماكن موثوقة: نادي، مدرسة، أو مراكز معروفة.
- المرافقين : لو في رحلة أو نشاط خارجي، الأفضل يكون معاهم مرافقين بالغين تثق فيهم.
8- لا للخروج مع "صاحب بابا" أو أي شخص غريب :
- علمه قاعدة: " مفيش خروج مع شخص مش معروف، حتى لو قال إن بابا عارفه."
- استخدام كلمة سر: لو حد ادعى إنه من طرف الأب، اسأله عن كلمة سر معروفة بينكم.
- التدريب على الرفض : صرخ، جرى، بلغك فورًا.

9. الدورات المدرسية ووسائل النقل :
- مكان جلوسه: علم إبنك مكانه في العربية (رقم المقعد).
- حدود مع السواق/المدرس/الكابتن : "ممنوع التلامس، ممنوع يطلب منه يجيب حاجة وحده."
- رقم ولي الأمر: خليه مع السواق أو المدرب للتواصل فورًا.

10: المصيف والنوم المشترك :
- كل طفل غرفة منفصلة أو على الأقل سرير منفصل.
- لا للنوم الجماعي مع أولاد الخال/الخالة: حفاظًا على الخصوصية والأمان.
- تجهيز مكان آمن: لو المكان زحمة، حدد مكان ثابت للطفل تعرف تراقبه.
6- التعامل مع الخوف الزائد للأم :
- التوازن: الخوف مش غلط، لكن لازم يكون مُدار. علمهم الاستقلالية تدريجياً (مثل السماح لطفل 10 سنين يمشي لوحده لمسافة قصيرة).
- دعم نفسي : لو الأم نفسها متوترة جداً، ممكن تتكلم مع مختص نفسي يساعدها تدير القلق.

الخلاصة:
 لا حبس ولا إطلاق حرية مطلقة.
 جسم الطفل ملكه.
 لا تلامس بدون إذن.
 حدود ثابتة مع الكل (سواء أم، أب، قريب، مدرس، سائق).
 تعليم الرفض والصراخ.
 التوعية + الحماية + الثقة = بيئة آمنة.
 راقب، علم، استمع.

حفظ الله أولادنا جميعًا..
إذا عجبك المقال برجاء كتابة تعليق والضغط على الإعجاب.
مع تحياتى
د/ نشوى عبود
دكتوراة فى علم النفس الإكلينيكى
إستشارات نفسية – إرشاد أسرى
ت : 01227181401
https://www.facebook.com/DrNashwaAboud1