01/07/2025
🚩 ليه الغدة الدرقية باظت وجالك خمول فيها؟ وإزاي بتبدأ اصلا .. وليه بتزيدي وزن مهما عملتي دايت؟.. وليه معاها قلق واكتئاب ولخبطه هرمونات .. وعلاج كل ده إيه ؟؟؟
🔸لو سألتِ دكتور:
"هو ليه أصلاً الغدة الدرقية بتخرب؟
ليه بقيت باخد التروكسين ومش بتتحسن؟
ليه بنتي لسه صغيرة وعندها لخبطة غدة؟
ليه أختي عندها أعراض خمول وهي تحاليلها سليمة؟
ليه أنا بقيت تعبانة طول الوقت رغم العلاج؟"
واستحاله هتاخدي إجابة تشفي عقلك وقلبك…
هنا جاي أعرفك الحقيقة اللي ناس كتير مش بتقولها:
جاي اقولك المشكلة مش دايمًا في الغدة نفسها...
المشكلة في "اللي بوّظ الغدة" من الأول!
---
1. أول جريمة: الكبد اللي ساب الهرمونات تِعِيث فسادًا ..
عارفة إن الكبد هو المسؤول عن "تنضيف" الإستروجين الزايد؟
لو الكبد تعبان، الإستروجين بيزيد في الجسم،
والستات بالذات بيتأثروا… لأن هرمون الإستروجين عندهم أصلاً أعلى.
وده بيعمل كارثة اسمها:
Estrogen Dominance = هيمنه الإستروجين
يعني الجسم مليان هرمون أنوثة زايد عن اللزوم،
وده بيخلي الغدة مش عارفة تفرز طبيعي،
وبيسبب:
كسل في الغدة
اضطراب في الدورة
تكيس مبايض
احتباس ميّه
تعب نفسي
تساقط شعر
زيادة وزن
أرق واكتئاب
🔸والدكاترة هتقولك: "إنتي عندك خمول غدة"
ويكتبوا لك التروكسين (هرمون بديل)
بس محدش بيبص على السبب الحقيقي:
كبدك مش بيخلصك من الهرمونات الزيادة!
---
2. تاني جريمة: المناعة اللي اتجننت
في حالات كتير، خمول الغدة بيكون بسبب مرض اسمه:
هاشيموتو - Hashimoto’s Thyroiditis
يعني: الجسم بيهجم الغدة بالغلط!
▪️ليه؟؟
ببساطة: الجهاز المناعي حصل له لخبطة
وساعات دي بتيجي بعد عدوى فيروسية، أو توتر مزمن، أو أكل ملوث بجلوتين وسكريات كتير.
جسمك مش فاهم مين العدو،
فبيهجم الغدة وهي مش عاملة حاجة.
بس برضو… محدش بيقولك إن علاج المناعة بيبدأ من الأمعاء والكبد والتغذية
مش من التروكسين بس!
---
3. تالت جريمة: الأمعاء اللي بتسرّب سموم
عارفة "تسريب الأمعاء"؟
ده لما الأمعاء تبقى مش قافلة كويس،
وكل شوية تعدّي بروتينات غير مهضومة، وسموم،
تخلي المناعة تهيج وتلخبط الدنيا.
▪️وده بيأثر على:
الغدة
المناعة
المزاج
القولون
البشرة
الخصوبة
🔸ودي بتبدأ من:
سكريات
معجنات
مضادات حيوية كتير
توتر مزمن
أكل جاهز ومقليات
---
4. طب ليه المشكلة دي بتصيب الستات أكتر؟
لأن الإستروجين عندهم أعلى
والكبد والمناعة بتتأثر أسرع بسبب تغييرات البيريود والحمل والرضاعة
وكمان لأن الستات أكتر عرضة للتوتر المزمن
وطبعًا مفيش حد بيعلم الستات
إزاي يحموا كبدهم، يظبطوا أكلهم، ينضفوا أمعاءهم،
ويقللوا الإستروجين الزيادة ده من الأساس
---
5. طيب إيه الحل؟!
1. كبدك هو نقطة البداية
– شُرب ميّه كفاية
– قللي أكل المصنع والمقلي
– اكلي خضار ورقي أخضر
– استخدمي دعم للكبد زي "سليمارين" أو "كركم"
2. نضفي أمعائك وقللي الالتهاب
– امنعي الجلوتين لو فيه مشاكل مناعية
– قللي السكر
– زودي ألياف طبيعية
– خدي بروبيوتك طبيعي (زبادي، مخلل، أو مكمل)
3. عالجي نقص الفيتامينات
– B12، D، سلينيوم، زنك
(اللي ناقصين بيوقفوا شغل الغدة)
4. راجعي تحاليلك صح
– مش بس TSH
– اعملي Free T3, Free T4, TPO, TgAb
– شوفي صورة الغدة بالسونار
---
🔶 طيب ليه بتزيدي رغم إنك مش بتاكلي؟
هسألك سؤال:
لو واحدة ست وزنها بيزيد من أقل لقمة،
وبتقولك: "أنا باكل قليل والله"،
يبقى ردّك الطبيعي: "أكيد بتاكلي غلط!"
لكن لو بجد بتحاول ومافيش فايدة؟
يبقى لازم تشك في... "الغدة الدرقية".
▪️بس خد بالك، الغدة مش السبب الوحيد،
لكنها مفتاح أساسي في معدل الحرق
وخصوصًا لما تكون تعبانة أو فيها كسل بسيط أو التهاب مناعي زي "هاشيموتو".
🔹ليه الغدة بتبوّظ الحرق؟؟
ال T3 هو الهرمون المسؤول عن التمثيل الغذائي
ف لو T3 قليل → الجسم يدخل في "وضع النجاة"
يعني:
يحرق أقل
يخزّن دهون
يبوّظ الشهية
يسبب إمساك
يسبّب برودة، نعاس، وكسل
ويمنع نزول الوزن حتى مع الدايت!
▪️هتجاوب تقولي.. أن أرقامك شكلها سليم في التحليل ؟
في حالات كتير الـ TSH يكون طبيعي،
لكن T3 قليل جدًا → وده اسمه Low T3 Syndrome
وبيحصل بسبب:
توتر مزمن
دايت قاسي
نقص في السيلينيوم والزنك
سوء امتصاص
الحل؟
ضبط النوم والتوتر
التوقف عن الدايت القاسي
دعم الكبد
علاج الأمعاء
دعم الغدة بمكملات زي السيلينيوم + الزنك + فيتامين D
التغذية العميقة والمتوازنة
---
🔷 حابب اتكلم الغدة والقلق والاكتئاب…
ولخبطة المشاعر من أول ما تصحي من نومك لآخر يومك !
الغدة مش بس مسؤولة عن الحرق والشكل
دي كمان بتأثر على الدماغ والمزاج والمشاعر!
الخمول يساوي:
دماغ مش صاحية
نسيان وتركيز ضعيف
اكتئاب مزمن
عدم حماس لأي حاجة
رغبة في النوم طول اليوم
كسل نفسي قبل الجسدي
▪️ليه؟
لأن T3 بيوصل للمخ ويأثر على هرمونات السعادة زي السيروتونين والدوبامين
نقصه يخلّي مزاجك متدمر
وده بيزيد أكتر لو فيه نقص في فيتامين D، B12، حديد
▪️والعكس صحيح!
التوتر المزمن → بيزوّد الكورتيزول
الكورتيزول العالي → بيوقف تحويل T4 إلى T3
يعني حتى لو الغدة بتفرز، الجسم مش بيستفيد
🔸الحل؟
علاج الغدة = علاج المزاج وعلاج المزاج = علاج الهضم + فيتامينات + نوم كويس
+ حركة + دعم نفسي
لازم حد يشوف الصورة كلها… مش مجرد رقم على التحليل
---
🔶 طيب الغدة مشكلتها ايه مع الحمل والدورة…
لما هرموناتك تتحول لسكاكين!
واحدة من أهم أسباب تأخر الحمل أو مشاكل التبويض وماترتب عليه = "خمول الغدة الدرقية"
ليه؟
▪️الغدة هي اللي بتظبط العلاقة بين المخ والمبيض
لو فيها كسل → اللخبطة توصل للتبويض، البريود ، والحمل
الغدة بتأثر على:
انتظام التبويض والبريود
جودة البويضات
بطانة الرحم
حتى الحمل السليم
▪️الغدة لو تعبت في الحمل:
يحصل إجهاض متكرر
أو تأخر حمل
أو حمل ضعيف
أو ولادة مبكرة
أو طفل عنده مشاكل في النمو العقلي
قبل الحمل لازم تعملي:
تحليل TSH + Free T3 + Free T4
وخصوصًا لو فيه:
تأخر حمل
دورة غير منتظمة
إجهاضات سابقة
تاريخ مرضي في العيلة
كمان: الغدة ممكن تبوظ بسبب الحمل!
بعض السيدات أول خمول غدة عندهم بيبدأ بعد الولادة
اسمه: Postpartum Thyroiditis
---
🚩 وإيه دور طبيب التغذيه ايه مع مشاكل الغده ؟
"طبيب التغذية مش بتاع رجيم… ده بيظبط جسمك من جذوره!"
لو حد قالك إن دكتور التغذية شغلته ينزّل لك كام كيلو والسلام… ابعد عنه فورًا..
لأن في حالات زي خمول الغدة الدرقية، أو هاشيموتو، أو زيادة الوزن الغامضة، أو تأخر الحمل، أو الاكتئاب المرتبط بالهرمونات
دور طبيب التغذية بقى أهم من أي وقت تاني.
ليه؟
لأن العلاج مش في حباية…
العلاج الحقيقي في:
"فهم جسمك، وتحويله من نظام تعبان لنظام شغال صح."
---
طيب دكتور التغذية بيعمل إيه بظبط؟ تعال أقولك بالتفصيل:
1. بيفكك المشكلة من أولها
لو عندك أعراض غدة (تعب – شعر بيقع – وزن بيزيد – نوم ملخبط – لخبطة في البريود)
مش هيجري يكتب لك دايت وخلاص
هو بيسألك:
نمط أكلك شكله إزاي؟
عندك مشاكل هضم؟
نومك عامل إزاي؟
بتتعرضي لضغط نفسي قد إيه؟
تاريخك الصحي والوراثي؟
خدت أدوية قبل كده؟
في إمساك؟ انتفاخ؟ حساسية أكل؟
لأن كل تفصيلة بتكشفله جذر المشكلة...
---
2. بيطلب تحاليل ذكية ومربوطة ببعض
طبيب التغذية الصح مش بيطلب TSH وبس
هو بيطلب:
TSH + Free T3 + Free T4
TPO, TgAb لو شك في مناعة
فيتامين D، B12، Ferritin
وظائف كبد
سكر صايم وإنسولين صايم
CRP و ESR لو فيه التهاب
تحليل هرمونات لو فيه أعراض أنثوية
تحاليل أمعاء أو حساسية أكل لو فيه مشاكل هضم
ليه؟
عشان يعرف "هل الغدة السبب؟
ولا الغدة ضحية لحاجة أكبر؟"
---
3. بيظبط الكبد والأمعاء الأول
مش هينفع تعالج غدة بتنهار…
وجهازك الهضمي مسرّب سموم، وكبدك مش بينضف هرمونات!
فبيبدأ بـ:
نظام غذائي مضاد للالتهاب
إلغاء أكلات بتعمل حساسية (لبن، جلوتين، سكر)
دعم الكبد بمكملات زي: Milk Thistle، كركم، NAC
تحسين الهضم بألياف وبروبيوتك
تنظيم الميكروبيوم بتاعك
كل ده قبل ما يقرب للغدة نفسها.(دور دكتور الغدد الصماء)
---
4. بيساعدك تسدّ النواقص الحيوية
معظم حالات خمول الغدة فيها نقص في:
فيتامين D
فيتامين B12
سلينيوم
زنك
أوميجا 3
ماغنيسيوم
طبيب التغذية بيراجع تحاليلك
ويبدأ يكمّل الناقص ده… مش بعشوائية،
لكن حسب جسمك وقدرتك على الامتصاص
ولو عندك سوء امتصاص؟
بيعالج الأمعاء الأول، أو يديلك فيتامينات عن طريق الحقن لو احتجت..
---
5. بيشتغل على الحرق من جوه
مش بيحسب لك سعرات!
هو بيشوف:
ليه الحرق بطيء؟
ليه جسمك بيخزن؟
وبيبدأ يظبط:
توقيت أكلك
نوع الأكل
دعم الحرق طبيعي
منعك من الدايت القاسي اللي بوّظلك T3
يشجعك على حركة خفيفة مناسبة لهرموناتك
---
6. بيتدخل وقت الحمل أو ما قبل الحمل صح
🔹لو واحدة عندها مشاكل غدة وبتحاول تحمل
طبيب التغذية يجهز جسمها للحمل من ناحية:
الغدة
الفيتامينات
الإستروجين
الالتهابات
الأكل الممنوع
دعم الجنين في أول ٣ شهور
🔸لو واحدة ولدت والغدة فيها مشكله ؟
هو اللي يظبط التغذية عشان الغدة ترجع تشتغل
من غير ما الجنين أو الأم يتأذوا
---
7. بيشتغل على المزاج والمناعة كمان!
الغدة مرتبطة بمزاجك ومناعتك
ودكتور التغذية بيديك نظام:
يقلل الالتهاب اللي بيخرب المناعة
يظبط هرمونات السعادة زي السيروتونين
يمنع السكر اللي يبوّظ نفسيتك
يحسّن المايكروبيوم → فتتحسن أعصابك ومودك
-------
🚩خلاصة كلامي كله:
الغدة مش مجرد "رقم في التحليل".. لازم تعرفي إيه السبب والمشكلة وتحليها من جذورها ...
الغدة بتتأثر بكبدك، أمعائك، أكلك، نومك، توترك، فيتاميناتك
ودكتور التغذية الشاطر هو اللي يعرف يربط كل ده
ويبدأ يعالج من الجذور ..وانتي دورك تلتزم وتصبر
واوعدك هتلاقي صحتك رجعت و وشك نور و رجعت للحياه الصحيه بسلام بامر الله
