Dalia Elleathy - Specialist Psychiatrist

03/11/2023

Hold your horses

Parents

الامومه رحله صعبه
من اول لحظه بييجي فيها الطفل للدنيا بيتولد معاه احساس بالمسؤولية و القلق و الذنب و التقصير
اما بقي لو عندك طفل حركي .. مندفع بيتشتت فده موضوع تاني
من اول الحاجات اللي بتقع و قلقك عليه طول الوقت لا يعمل في نفسه حاجه .. لكلام الاهل ان هو ليه الولد مختلف و انت مدلعاه
لكلام المدرسه و الكابتن و كل حد اللي هو بطل بقي


لاحساسك بالاحباط ان هو مش زي اللي حواليه مع ان مفيهوش حاجه واضحه تقول ان في سبب لاختلافه
كل ده بيخليها رحله أصعب جدا

و عشان كده بتحتاج اكتر لونس و فهم و اهتمام بنفسي و معلومات عن اسباب ده و كمان آليات لازاي اساعده و اساعد نفسي

في مجموعتنا هنعمل ده سوا

لو حابب تشترك معانا و تعرف تفاصيل اكتر
برجاء ملا الاستماره المرفق اللينك ليها

https://forms.gle/k2C5B79cKrJfT2y98

22/09/2023

💖

07/09/2023

اضطراب القلق من المرض أو القلق على الصحة illness anxiety disorder
ده عبارة عن قلق مفرط من أن الواحد يكون مريضً بمرض خطير او حالته خطيرة أو أن تصبح كذلك.

النوع ده من القلق المريض بيعتقد أنَّ أحاسيس الجسم الطبيعية أو الأعراض الطفيفة هي مؤشرات لمرضٍ خطير، على الرغم من نفي الفحص الطبي لوجود أيِّ حالة مَرضية خطيرة.

المريض بالفعل مصاب بتوتر حقيقي وممكن يؤثر على أداؤه وعلاقاته ، فهو مش بيدلع هو فعلا بيعاني .

في عوامل بتزود الفرصة من الإصابة بالقلق على الصحة زي تعرض الشخص نفسه او احد من اهله لتجارب ماضية للاصابة بمرض خطير ، أو يكون هناك معتقدات بأن اي أحاسيس جسدية غير مريحة زي ضربات القلب السريعة أو سرعة التنفس فده معناه ان في خطر .

علاج اضطراب القلق من المرض أو القلق على الصحة بيشمل العلاج المعرفي السلوكي بالإضافة إلى علاج دوائي حسب شدة الأعراض.

د.داليا حسين الليثي
أخصائي الطب النفسي

01/09/2023

أهالي كتير من حبهم لاولادهم بيبقوا عايزين ولادهم ما يتعرضوش لأي أذى أو موقف سلبي فبينصحوهم بشكل مباشر صاحب فلان ما تصاحبش فلان ، اعمل كزا ، احنا عارفين اكتر منك ، احنا قولنالك ما تكلميهاش ، ادخل الكلية دي

وساعات النصح بيوصل لفرض رأي واحيانا عقاب . الاهل بيبقوا عاوزين الاولاد يوصلوا لنفس النتيجة اللي هما شايفينها صح واللي الاهل وصلولها اصلا بعد تجارب وخبرات وسنين .

للأسف الطريقة دي يا اما حتخلق صدام بين الاهل والأبناء أو حتخلي الابن معتمد ان حد يوجهه ومعندوش القدرة انه يعرف يختار ازاي .

طيب بدل الطريقة دي ما نتناقش معاهم ، ونعلمهم مهارات حل المشكلات ونساعدهم يشوفوا الصورة كاملة قبل أي قرار ويفكروا في حلول لو في سلبيات للقرار ، وياخدوا بالهم من عواقب اي اختيار ويتحملوا مسئوليته ، وندعمهم في اختيارتهم حتى لو عكس اللي شايفينه طالما مش خطر ، حتى لو بعد التجربة اكتشفوا ان قرارهم مكانش الأفضل ده برده مكسب .

انهم يخوضوا تجارب وياخدوا قرارت بنفسهم لغاية ما يوصلوا لنتيجة حتخليهم واثقين من نفسهم ، متحملين للمسؤولية ، عندهم حب ورغبة في الاستكشاف والمعرفة والأهم يستمتعوا انهم عايشين الحياة بتاعتهم اللي مختارين تفاصيلها بنفسهم .

د.داليا حسين الليثي
أخصائي الطب النفسي

23/08/2023

أحيانا كتير بنلاقي نفسنا بنقول لولادنا عبارات زي " انت قلقان أو خايف كدة ليه " "مفيش حاجة تقلق"
عبارات مضمونها -حتى لو ما نقصدش- استنكار أنهم ممكن يحسوا بالقلق ، فنتيجة لكدة أولادنا ممكن يوصلهم أن مشاعر القلق مشاعر وحشة وغير مرغوب فيها وما ينفعش نحسها .😐

الحقيقة أن مشاعر القلق بالنسبة لينا كلنا هي مشاعر طبيعية جدا ، كلنا ممكن يقلق أو يتوتر من وقت التاني .

القلق مش بس مشاعر طبيعية لكن كمان مفيدة ، مفيدة لأنها بتنبهنا اننا نستعد لمواجهة خطر مثلا " لو كلب جري ورانا" ، أو بتساعدنا وتحفزنا اننا نؤدي افضل ما عندنا " زي قبل امتحان أو مسابقة" .💪

على الرغم اننا أو اولادنا مش بنكون مرتاحين وقت ما بنكون قلقانين لكن مشاعر القلق مش حاجة خطيرة أو وحشة ، هي مهمة للحياة والبقاء وفي الاخر هي مؤقتة وحتقل وحتاخد وقتها الطبيعي وحتنتهي.🙂

القلق جزء طبيعي من حياتنا ومن حياة أولادنا ، فكرة القضاء عليه من حياة اطفالنا فكرة مستحيلة ومش بتساعدهم أو تكبرهم بل بالعكس ممكن تعطلهم.

فبدل ما نحاول نحمي أولادنا أو نبعد عنهم القلق الافضل اننا نساعدهم ونديهم الثقة والمهارة أنهم يتحملوا القلق ويبقوا واعيين بيه ويتعاملوا ويعبروا عنه بصورة صحية بدل ما ينكروا وجوده أو يتجاهلوه.

طيب امتى يكون القلق مشكلة؟
لو طفلنا بقى بيقلق اغلب الوقت أو بقى يتجنب الأنشطة الخاصة بيه أو رافض يروح مدرسته بسبب القلق أو الخوف ، أو بقى في تأثير سلبي على نومه ولعبه واداؤه الدراسي وعلاقاته ، كدة هنا القلق أصبح مشكلة أو اضطراب.

فكروا في القلق زي الضباب🌪 إذا كان بيغطي على كل شيء وبيمنع الرؤية الواضحة وبيمنع أولادنا أنهم يعملوا اللي متعودين عليه ،هنا أولادنا محتاجين دعمنا ومساعدة من متخصص .

فهم طبيعة مشاعر القلق والوعي والتعامل والتعبير عنه بشكل سليم اول طريقة لحماية أولادنا من اضطرابات القلق .

22/08/2023

لا تَستطيع إنقاذ الناس يُمكنك فقط أن تُحبهم
ولا تَستطيع أن تُغَير منهم يُمكنك فقط أن تواسيهم 💞

21/08/2023

مع ان ده أحيانا بيبقى صعب ان الواحد ما يشيلش هم وألم اللي معاه خصوصا لو الشخص اللي بيتألم قريب وغالي عنده لكن مهم ان الواحد يخلي باله من احتياجاته ويهتم بنفسه في الوقت ده ويعرف ان دي مش أنانية ولا معناها انه مش حاسس باللي قدامه كفاية ، بالعكس ده يمكن اللي حيخليه يعرف يقدم مساعدة مناسبة ودعم حقيقي ويكمل كمان في مساندته لفترة طويلة .
الضغوط حوالينا كتير ، فخلوا بالكم من نفسكم لأنها مسئوليتكم في المقام الاول وعشان تقدروا حقيقي تخلوا بالكم من بعض.

06/07/2023

من شغلي مع الأطفال وحتى الكبار بلاحظ ان من أهم العوامل اللي بتساعد على التحسن والنمو هو تواجد الطفل مع مجموعة بيحس فيها بالانسجام وانه مش لوحده في الصعوبات والتحديات اللي عنده ، بياخد ويستفيد من الاطفال اللي معاه وبيدي وبيأثر فيهم كمان ، ويحس بوجوده كفرد مميز وكجزء من المجموعة في نفس الوقت 💓

واللي بيخلي المجموعة العلاجية فارقة ومتخصصة اكتر عن أي نشاط تاني بيعمله الطفل هو وجود المتخصصين داخل المجموعة لتيسير الحركة والتناغم ده انه يحصل بشكل صحي ودعم كل طفل في المجموعة ودعم المجموعة ككل .

متحمسين انا ود.أسماء سعيد نستقبل أطفالنا الجداد اللي حيشرفونا في مجموعتنا واثق ومتميز🤩 🎉🎈

للتفاصيل لينك الايفينت
https://shorturl.at/psCK4

واثق ومتميز فبراير ٢٠٢٣
https://shorturl.at/ewEF3

03/07/2023

سعيدة بانضمامي لفريق عيادة journey mental health clinic ❤️

نرحب بانضمام د. داليا الليثي في
اخصائي الطب النفسي للأطفال والمراهقين والبالغين

- حصلت على دبلومة ممارسة الطب النفسي من كلية الطب جامعة عين شمس

- عملت بمستشفى حلوان للصحة النفسية في وحدات الاطفال والمراهقين والبالغين من عام ٢٠١٤ حتى عام ٢٠٢١

- تعمل بعيادة واحة المختصة بعلاج الصدمات النفسية للاطفال والمراهقين منذ عام ٢٠٢١ حتى الآن، كما تتلقى تدريب منتظم في العلاج الأسري المختص بالصدمات النفسية

- عملت في الخط الساخن للامانة العامة للصحة النفسية منذ عام ٢٠١٩ الى ٢٠٢١

- عملت كرئيس قسم الطب النفسي بمستشفى منشية البكري لمدة ٦ أشهر

- تلقت دورة تدريبية للعلاج الأسري من الجامعة الأمريكية من مارس الى ديسمبر ٢٠٢١

- شاركت بكتابة واعداد وتنفيذ الدليل الإرشادي لعدد من المجموعات العلاجية الخاصة بالصحة النفسية للأطفال والمراهقين (اضطراب فرط الحركة، علاج القلق والاكتئاب، تقدير الذات، المهارات الاجتماعية، تدريب الوالدين)

- معالج ومدرب معتمد في حملات التوعية للأمانة العامة للصحة النفسية سابقا

- تهتم د.داليا بالعمل مع الاطفال والمراهقين، وتؤمن بأهمية دور الوالدين وأهمية التواصل الفعال الجيد بينهم وبين الأبناء، كما تهتم بالعمل مع البالغين من النساء

----------------------
للحجز والتفاصيل

Mob.: 01025155282
01551521419
Email: Journey.mental.health.clnic@gmail.com
العنوان: (405) بالدور الرابع عماره ( 8 ) بعمارات حدائق
رامو طريق النصر _ مدينه نصر _ بجوار معرض علام للسيارات