25/04/2026
دي أدوية لعلاج الخشونه🦵 ... آمنه وبسيطه ومناسبه غالبا لاي حد....
حتى مريض القلب والكلى والضغط....!❤️
انا كاتبها اساسا علشان الناس اللي تعبت من المسكنات الكتير اللي عندهم درجه ثالثه او رابعه....
وزي ما قولت قبل كده الأدوية زي القماشه بنفصلها لكل مريض على حسب حالته وايه اللي يناسبه....
تعالى بقا نبدأ نشرح مكونات الروشته دي واقولك معلومات مهمه عن كل دوا فيها....
اول دوا كتبته هنا اسمه
cymbatex 30mg cap
ده مسكن للألم عن طريق الأعصاب... بيخلي إشارات الألم تتعطل
بس خد بالك علشان يشتغل ممكن ياخد وقت اسبوعين...
مفيد جدا للألم المزمن... اللي له مده طويله و الألم المنتشر ف الجسم كله
بناخده مره واحده باليل قبل النوم بساعتين او 3
الماده الفعاله duloxetin
تركيزه 30
وممكن بعد اسبوعين نغير لتركيز 60 ف المتابعه.
طبعا الدوا ده ممنوع لمرضى الكبد وممنوع مع مضادات الاكتئاب
MAOI..
الدوا التاني معروف
voltarene jel
دهان موضعي 3 او 4 مرات بعد كمادات....
الكمادات بارده لو فيه ألم وتورم
وكمادات دافيه لما الألم يهدى شويه علشان نرخي العضلات المشدوده ونحسن الدوره الدمويه
آمن جدا ونتايجه ف بعض الحالات زي الأقراص بس ممكن ياخد وقت لحد لما يشتغل..
الماده الفعاله diclofenac.....
الدوا اللي بعده
limitless curcumin capsules 500mg
مضاد التهاب طبيعي بيساعدنا نقلل الألم....
المهم النوع اللي تاخده يكون
curcumin+piperine
علشان الجسم يمتصه
وياريت ناخده مع الاكل... وجبه دهنيه زي الغدا مثلا...
كبسولتين ف اليوم مع كوباية مياه
اي مشاكل ف المراره استشير دكتورك الاول.....
الدوا اللي بعده ماغنسيوم...
Magnesium glycinate 200mg tab
حبه واحده قبل النوم
هيفك لنا الشد العضلي ويساعدنا ننام كويس كمان ان شاء الله
واللي عنده مشاكل عنيفه ف الكلى يتشير دكتوره الاول
كل الادويه دي ممكن نستمر معاها اسبوعين وبعد كده نتابع ف العياده علشان نقيس التحسن ونعدل...
طيب هل ممكن ناخد معاها ادويه تانيه؟؟؟
ايوا
ممكن نزود
omeprazole 20mg cap
للناس الي معدتهم تعبانه
ممكن نزود
paracetamol 500 MG tab
قرص عند الزوم يومين او 3 ... قرص كل 6 ساعات... لو محتاجين مسكن إضافي..
كده الروشته خلصت...?
لا
ضروري نعمل تحاليل و نتطمن على مستويات الفيتامينات والمعادن الناقصه ف الجسم ونصلحها فورا...
زي الحديد و الكالسيوم و الماغنسيوم وفيتامين د و ب12...
(التحاليل مكتوبه ف الروشته)
و فيه حالات ممكن نزودلها وظايف كلى وكبد والدهون....
طيب كفايه؟
لسه...
التمارين والوزن اهم علاج ف الدنيا
وأفضل تمارين للدرجه الرابعه وال3.. التمارين المائيه بتخفف الوزن جدا وبتسهل ع المفصل الحركه
طيب انا مش هقدر اروح تمارين مائيه؟؟؟
بسيطه... انا عامل هنا فيديوهات لتمارين الخشونه الدرجه الرابعه... ابدا فيها ولو صعبه او حالتك الماديه تسمح روح علاج طبيعي كمان..
وممكن نعمل حقن زيت... لو الحاله الماديه تسمح....
وممكن نخلط على الزيت كورتيزون او بلازما لكن حسب الحاله...
وابدا ظبط الوزن حتى لو هتروح لحد متخصص يتابع حالتك...
طيب اعمل عملية مفصل ولا لا؟
لو حالتك خشونه متقدمه ومش قادرين نسيطر ع الألم بكل الوسائل و بتتحرك كتير وحالتك الماديه تسمح... توكل على الله...
لكن برده اعمل التمارين وظبط الوزن مفيش تعارض... تستفيد اكتر...
و في الاخر العلاج باي مشكله هوا تغيير نمط الحياه... مفيش حبة دوا هتغيرلي حياتي...
اسمع الفيديوهات الللي فاتت هتلاقي فيها كل اسئلتك... الفيديوهات دي انا تعبت فيها اوي علشانك... ومش باخد اي مقابل ل ده ولا محتاج الحمدلله...
اكتبلي ف التعليقات عملت ايه و اي سؤال ليك و باخذه ف الاعتبار ف البوستات الجايه ان شاء الله
مع السلامه
#تمارين #التهاب
