Marwa Abo Elela - مروة أبو العلا

02/12/2025

26/11/2025

كنت دايمًا أسمع من بعض المشايخ أن من تعلّق قلبه بغير الله عوقب بالحرمان منه، او فهو مذلول معذب به

والحقيقة كنت بستغرب، وبقف كتير مع الاقوال دي...

إزاي الله الرحيم.. يعاقبنا على حاجة ساعات بتقع منّا من غير ما نحس؟ إزاي يعاقبنا على مشاعر مش بإيدنا أصلا؟
وليه اصلا ياخد مننا حاجة بنحبها، مش هو بيحبنا ويحب يشوفنا سعداء؟؟

لحد ما عيشت وشوفت واتعلمت ففهمت...

فهمت إن الموضوع مش عقاب.. ده إنقاذ
محبة صافية، ورحمة واسعة أوي على قلبك 🩷

لأن التعلّق مش حب،
التعلّق عبودية...

مش سجود وركوع ...
لكن عبودية من نوع تاني ...

إنك تمشي ورا الشيء أو الشخص اللي قلبك ماسك فيه...
إنك تتنازل، وتبرّر
انك تغمض عن الحق...

وتبقى مستعد تخسر نفسك وتخسر علاقتك بربك عادي، علشان بس ما تخسروش...

زي ما كانوا زمان في الأفلام يقولوا "أنا مش بحبك ... أنا بعبدك" وده حقيقي هي عبودية

لأن اللي بيعلّق قلبه.. بيبقى مسلوب الإرادة
مش بياخد قرارات بوعيه.. ده بيتسحب بدون ما يدرى وتدريجي .. لحد ما يلاقي نفسه فجأة في نص البحر...
مش قادر يرجع .. فبيقرر يكمل ...

والشيطان وقتها يزينهالك، يقولك"عادي ده طبيعي انت بتحب.. او انت محتاج، وربنا غفور وعالم بحالك، ومحدش كامل…"
وتلاقي نفسك بتقع،
لأ مش مجرد وقوع .. انحدار...

بتلاقي نفسك بتفرّط في قيّمك اللي عيشت سنين عمرك متمسك بيها.. وبتتنازل عن مبادئ وأساسيات مكنتش تتخيل انك ممكن تتخلى عنها أبدا...

وأنت فاكر انك بتعمل كل ده غصب عنك 😓

هو غصب عنك فعلا .. بس عشان مسلوب الارادة
وانت اللي بإيدك سلمتها لشخص أو شيء يتحكم فيها

بس الله الحكيم العليم، شايفك...

شايف قلبك وهو بيتشد، ورجلك وهي بتتزحلق بيتزحلق بعيد عنه..

شايفك وأنت بتتعلق بحاجة هتكسرك
أو بتحب حد مش هيقدّرك 🥺

أو بتسلم قلبك وعقلك لطريق آخره وجع هو وحده العليم بإنك مش هتقدر تتحمله ...
طريق هيضيعك، ويخسرك نفسك، و يبعدك عنه سبحانه 🤍🤍

فبينقذك ...
ياخد الحاجة دي من طريقك...

مش عشان يعاقبك، لكن عشان يحميك...
ويشدّك ليه تاني 😇

بيحررك ...
بيفك عنك قيودك اللي إنت قيدت بيها نفسك

ياخد اللي معلّقك… عشان يحررك
ياخد اللي بيبعدك… عشان يقربك

ده أعلى درجات الرحمة 🤍🤍🤍

الله الرحيم بقلبك وعايز يربيه "لتصنع على عينه" مش بيحرمك ... لكن بيهذّب قلبك ويطهّره، ويجهّزه للحاجة اللي تستاهله وهو يستحقها 🩷🩷

لإنه غالي عنده 🤍
ولإنك مكرّم منه 😇

ّم_لحكمه_وحكمته

23/11/2025

قالت "غصب عني، ايوه عارفه انها متألمة من بعدي عنها، وبتسأل كتير ازاي أبعد ناس بقوا أقرب منها ليا... بس هي حكت لك لما كنت باجي طايرة من الفرحة إني نجحت وطالعة ترتيب في الأوائل، فتبص لي بمنتهى الاستخفاف وتقولي إيه يعني ما في اتنين قبلك.. حكت لك عن كام مرة رجعتلها بانجاز بشوف في عيون الناس اعجابهم وفخرهم بيه وبيا، وهي رد فعلها أنه إيه الأڤورة دي يعني اخترعتي الذرة..."

هو إزاي حد يكون عنده من الغلظة اللي توصله لمرحلة يدمر فيها فرحة حد ويأذيه للدرجة دي؟

حتى لو فرحته دي بإنجاز من وجهة نظرك بسيط، حتى لو كنت شايفه "عادي"
هو مش عادي عنده 🥹

هو يمكن يكون حارب جواه كتير.. يمكن اتحدى خوف.. يمكن تكون دي أول خطوة بعد وقعة كبيرة 😔

وإنت تيجي بمنتهى السهولة تقول كلمة تحدفه من السما للأرض تكسره ١٠٠ حتة

اللي مؤلم بجد بقى...

إن أكتر ناس بتعمل كده ساعات بيكونوا الأهل (الكلام فوق ده 👆كان عن أم)

الأهل عموما بيكون قصدهم يشجعوا، بيفكروا إنهم بالطريقة دي بيحمّسوا ولادهم يكونوا أحسن

لكن في الحقيقة، هم بيهزوا ثقة.. بيطفوا نور...

بيخلّوا الولد أو البنت يحسوا إن مفيش فايدة..
وإن مفيش داعي يشاركوا فرحتهم مع حد مش شايفها أصلاً 😓

وبعد شوية.. يبعدوا 🤷

ويقربوا لناس تانية...
ناس بتعرف تقول “برافو”
ناس بتعرف تقدّر 😌

ناس بتحسّسهم إن ليهم قيمة، وإن كل خطوة—حتى لو صغيرة—لها معنى.

فـااا.. قبل ما تقلل من إنجاز حد، اسأل نفسك...
هو محتاج يسمع إيه دلوقتي؟
وإنت عايز تكون مين بالنسباله؟

الكتف اللي يتسند عليه.. ولا الصخرة اللي يتحطم عليها انجازاته؟
حضن بيحتوي ويقدّر .. وللا فزاعة بتخوّف وتطفّش؟

مصدر أمان .. وللا مصدر إحباط؟

22/11/2025

إحنا بنتشكّل من اللي بنشوفه…
من اللي بنقرب له…
ومن اللي بنسمح له يدخل جوانا.

الإنسان مرآة…
والنموذج قدّامه بيسيب علامة…
علامة ممكن تغيّر طريق…
أو تصنع نسخة جديدة منّا.

وكذلك طفلك بيتعلم منك...
بيتفرج عليك وبيقلدك.

استجاباته السلوكية بتكون محاكاة لأفعالك مش لأقوالك ونصايحك...

فلو عايز تعلم ابنك سلوك ايجابي...
حاول تكتسبه انت الأول 🤗

11/11/2025

جرب ترفع ايدك عنها
وتسلم للحكيم العليم

06/11/2025

ربنا عنده أحلى 🤍🌿

ضاعت منك حاجة حلوة.. ربنا عنده أحلى هيديلك منه

اتمنيت حاجة ومأخدتهاش .. ربنا عنده أحلى منها ومش هيبخل عليك بيها
كانت خلاص في ايدك وفجأة اختفت فحسيت بإحباط.. ربنا عنده أحلى هيعوضك بيه في الوقت المناسب
ما صدقت لقيت اللي بتدور عليه وقولت خلاص هو ده ومطلعش هو .. ربنا عنده أحلى منه بكتيييييير هيجيبه لحد عندك بس انت اصبر شوية كمان

مفيش حاجة ضاعت ولا في حاجة ناقصة
كله هتاخده في وقته ومكانه

بس انت اصبر شوية كمان

01/11/2025

على اسم مصر التاريخ يقدر يقول ما شاء
أنا مصر عندي أحب وأجمل الأشياء
باحبها وهي مالكه الأرض شرق وغرب
وباحبها وهي مرميه جريحة حرب
باحبها بعنف وبرقة وعلى استحياء
واكرهها وألعن أبوها بعشق زي الداء
واسيبها واطفش في درب وتبقى هي ف درب
وتلتفت تلقيني جنبها في الكرب
والنبض ينفض عروقي بألف نغمة وضرب
على اسم مصر
مصر النسيم في الليالي وبياعين الفل
ومرايه بهتانة ع القهوة .. أزورها .. واطل
القى النديم طل من مطرح منا طليت
والقاها برواز معلق عندنا في البيت
فيه القمر مصطفى كامل حبيب الكل
المصري باشا بشواربه اللي ما عرفوا الذل
ومصر فوق في الفراندة واسمها جولييت
ولما جيت بعد روميو بربع قرن بكيت
ومسحت دموعي في كمي ومن ساعتها وعيت
على اسم مصر
مصر السما الفزدقي وعصافير معدية
والقلة مملية ع الشباك .. مندية
والجد قاعد مربع يقرا في الجرنال
الكاتب المصري ذاته مندمج في مقال
ومصر قدامه اكتر كلمة مقرية
قريتها من قبل ما اكتب اسمي بإيديا
ورسمتها في الخيال على أبدع الأشكال
ونزلت أيام صبايا طفت كل مجال
زي المنادي وفؤادي يرتجف بجلال
على اسم مصر