27/01/2025
🙏🏻10 حاجات عشان تتعامل مع مريض سرطان صح؟!
1- عامله زي ما كنت بتعامله قبل كدا، متتحسوش ان في حاجه اتغيرت.. متبينش انك متعاطف معاه او تحسسه ان "يا حررام".
2- لو هتبقى موجود من البداية يبقى تاخد عهد على نفسك انك هتبقى موجود للنهاية.. البدايات بيبقى الكل متحمس و معاك و بعد كام شهر صحرا.. بجد ده اكتر احساس وحش، احساس المريض ان الناس زهقت من السؤال عليه.. و دلوقتي يعني ما اكتر وسائل الاتصال فملكش حجة.
3- مريض السرطان مش محكوم عليه بالموت في ناس بتخف والله.
4- من اول اكتشاف المرض، البيت كله مبيتكلمش ف اي حاجه غير المرض.. بيجي وقت المريض عايز يفصل، نتكلم ف اي حاجه تانيه، نعيش طبيعين عشان بننسى احنا كنا عايشين ازاي قبل المرض، فمش كل الكلام عن السرطان و المرض.
5- قصص الناس اللي حالها اسوء م عمرها ما بتشجع ، فبلاش قصص مأسوية للمواساه عشان مفعولها عكسي، ممكن نبدلها بقصص تفاؤل و ناس خفت و قصص انبياء زي الحواديت اللي كانت بتتحكي واحنا صغيرين.
6- في واحد مبيبقاش عارف يعبر عن اللي جواه، بيحاول! بس احساسه ميترجموش كلام، و بيبقى غالبا مش فاهم احساسه اصلا، فحاول تسأله اسئلة ترتب احساسه شوية و تساعده يتكلم.
7- وجود اشخاص وقت الجرعة مع مريض السرطان ف المستشفى بيهون كتير، و تاني متكلموش خالص عن المرض.. هات اي لعبة او قعدوا العبوا ، فكروا فخطط عايزين تعملوها بعد ما يفوق من الجرعة.. بس كلام عن المرض بلااااش.
8- بعد الجرعة او الاشعاع، مريض السرطان والله بيبقي عالق ما بين العالم الموازي و العالم الواقعي.. مبيعرفش يفرق هو فين، الارض كلها بتلف و روحه لمسه جسمه تقريبا بنسبة 7%َ.. فطبيعي انك تلاقيه متنح و مش بيتكلم او يرد ع الموبيل عشان هو حرفيا مش واعي من كتر الدروخه.
9- بلاش كلام من اللي هو انا سمعت ان مفيش حاجه اسمها سرطان و ده نقص ف مش عارف ايه، او تجارب الفيران اللي الكل بيفتي فيها، انت متخيل واحد بيتألم أد ايه من كيماوي و انت جاي تقوله هتخف من عصير البنجر، الله الكلام ده مستفز جدا لمريض سرطان.
10- الشكل بيتغير و الصحة بتسهتلك، فبلاش كلام زي انت خسيت اوي او شكلك تعبان! أو وزنك زياده ليه كدا والله ياجماعه كورتيزون انا مش باكل زياده عنكو ومش همشي اقول لكل الناس باخد كورتيزون مع الكيماوي كفايه تجريح.
للاستعلام ع حجز سرير رعاية
011 00013321
أو من خلال رقم الفون 01100013321
