27/04/2025
التربية الإيجابية مش بتطلع عيال مدلعة.
أول حاجة: يعني إيه تربية إيجابية أصلاً؟
التربية الإيجابية مش معناها أسيب الطفل يعمل اللي هو عايزه وخلاص. بالعكس، التربية الإيجابية مبنية على الاحترام المتبادل، يعني الأهل يحطوا حدود واضحة وثابتة، بس بطريقة تحافظ على كرامة الطفل وتعلمه يتحمل المسؤولية، مش بطريقة قاسية أو مهينة.
ثاني حاجة: هل التربية الإيجابية بتطلع طفل مدلّع؟
لا، التربية الإيجابية بتطلع طفل:
_عنده احترام لذاته لأنه اتعامل بكرامة.
_بيحترم القوانين لأنه فهمها مش اتفرضت عليه بالقوة.
_بيعرف ياخد قرارات لأنه اتعود يكون له رأي مسموع.
_مسؤول ومستقل مش معتمد على حد يحركه بالخوف أو العقاب.
الطفل المدلّع الحقيقي هو اللي تم التعامل معاه بـ:
_دلع بدون حدود
_تلبية كل طلباته بدون قواعد
_حماية زايدة عن اللزوم (وده مش تربية إيجابية خالص)
ثالث حاجة: التربية الإيجابية مش "نُعومة زايدة"
التربية الإيجابية فيها:
_تعاطف مع مشاعر الطفل
_ثبات على القواعد بدون صريخ ولا عنف
_تصحيح للسلوك بدل ما نركز على العقاب يعني لما الطفل يغلط، مش بنطنشه، لكن كمان مش بنهينه... بنوجهه ونساعده يتعلم.
التربية الإيجابية مش بتلغي الحدود، بالعكس، بتعلم الطفل احترامها مع الحفاظ على كرامته. وأولاد التربية الإيجابية بيكبروا ناس مسؤولة مش مدلعة، لأنهم اتعلموا القيم مش بالعنف، لكن بالاحترام.
مش مشكلة المنهج أنك أم أو أب مكسلين تتعلموا.
