16/09/2025
ركزوا معايا ف الكلمتين دول عشان مفيش اي دكتور هيقولهالكم الا انا ولله الحمد السيزون الخامس شغاله ف مصل الانفلونزا ومتابعة كل ابديت جديد ليه ❤️🔥
السنه دي إن شاء الله هنبدأ السيزون بدري عشان حالتين مهمين
١_الحوامل ودا عشان المصل بيحمي الام وكمان بيعدي من المشيمه ويحمي الجنين فلو واحده هتولد ف اول الشتا يبقي تطعم ابنها بدري بدري من وهو ف بطنها عشان مينفعش ياخد لما يتولد الا بعد ٦ شهور تمام ؟تمام إن شاء الله
٢_الحاله التانيه الناس الكبيره اللي اول مره هتاخد لازم تاخده بدري شويا عشان هو بياخد اسبوعين وتلاته لولا ما يشتغل ف الجسم تمام ؟تمام
__________________
نيجي للنقطه اللي بردو كله ممكن يقولهالك بس محدش هيفهمهالك غير د.يسريه 😎
المصل السنين اللي فاتت كان رباعي يعني بيحمي من ٤ انواع من سلالات الانفلونزا ٢ من النوع A و ٢ من النوع B
وكنا بنسميه انفلوفاك تيترا يعني رباعي
دلوقتي في سلاله من ال B بفضل الله ثم المصل دا تقريبا اختفت ف مصر فشلناها خالص وبقي ترايفيلنت يعني ثلاثي يارب اكون وصلت لكم المعلومه
💥💥💥نيجي لأهم حاجه هي السعر
نازل ف ٢٠٢٥/٢٠٢٦ بسعر أقل حوالي 322 ج
وطبعاً هنشتغل نحجز من دلوقتي عشان منشوفش الأدوار الوحشه اللي بنشوفها ف بداية الشتاء
واليكم كل التفاصيل عن المصل بعد ما فهمتكم الدنيا رايحه فين وجايه منين ♥♥♥♥
🚨🚨🚨🚨*الانفلوفاك* مصل الانفلونزا الموسمية
ليه لازم تاخد مصل الانفلونزا الموسميه :
1- بيقلل حدة الاعراض 80%
2- بيقصر مدة الاعراض
3- الاهم انه بيقلل اي مضاعفات للانفلونزا زي الالتهاب الرئوي الحاد
*طبعا كل افراد العائله لازم تطعم بس مين الاكثر عرضة للمضاعفات :
1- الاطفال وخاصة من عمر 6 شهور
2- كبار السن الاكبر من 50 سنه لان مناعتهم بتكون اضعف
3- اصحاب الامراض المزمنة زي الضغط والسكر و امراض القلب وامراض الجهاز التنفسي زي الازمه واصحاب المناعة الضعيفة
4- الحوامل لابد انها تطعم في اي وقت اثناء الحمل لان دا حماية ليها من اعراض الانفلونزا ومضاعفاتها وحماية للجنين انه ينزل بدري او ينزل وزنة قليل
*التطعيم اثناء الحمل بينقل الاجسام المضادة للجنين فبيتولد متطعم لحد عمر 6 شهور*
5-الاطباء والصيادلة والتمريض لابد من تطعيمهم لانهم في احتكاك مباشر مع المريض
*جرعة الانفلوفاك*
- للكبار: سرنجه واحدة بتتحقن في الكتف سواء اتطعم قبل كدا او لا ، وكل ما كان بدري كان افضل لان الاجسام المضاده والمناعة بتتشكل في خلال اسبوعين ل تلاتة.
-الأطفال: لو متطعمش قبل كدا بيحتاج سرنجه كامله وبعد شهر بيتحقن بسرنجة كمان
*التطعيم مهم كل فرد في البيت*
