Dr. Marwa Wageeh kids clinic

19/07/2025

أعيذكم بالله أن تغفلوا عن غز.ة في ساعات الإجابة ولله الأمر من قبل ومن بعد..
لازالوا يتساقطون في الطرقات وعلى أبواب المشافي من شدة التجويع والألم، ولكن بأعداد تتزايد على مدار الساعة و لا حول ولا قوة إلا بالله..

ألحوا على الله باسمه المُقيت الرزاق الكافي الحسيب..
يا مقيت أطعم عبادك الموحدين
يا مقيت أطعم عبادك الصابرين
يا مقيت أطعم عبادك المستضعفين
يا كافي اكفهم المخمصة
يا كافي اكفهم الفجرة المجرمين
يا كافي اكفهم ما نزل بهم من كرب بما شئت وكيف شئت
يا رزاق تول المجوّعين المنكسرين بمعيتك ورزقك الكريم وجبرك الرحيم
أنت الرزاق ذو القوة المتين ذو الجبروت والملكوت وخزائن الأرض والسماء
تطعم الدواب في جحورها في باطن الأرض وكهوف الجبال وجو السماء وظلمات الأرحام
لا يعجزك شيء ولا راد لفضلك
و لا حول ولا قوة إلا بك..
يارب لا إله إلا أنت ولا مولى لنا ولهم إلاك وإنا لله وإنا إليه راجعون
منقول

22/06/2025

👶💬ليه ابني بيكدب؟
سؤال كتير من الأمهات بيسألوه لما يلاقوا أولادهم بيقولوا كلام مش حقيقي.. تعالي نعرف مع بعض *أشهر أسباب الكذب عند الأطفال*👇

🔹الخوف من العقاب
لو طفلك حس إنك هتعاقبيه بشدة لما يغلط، طبيعي جدًا إنه يكدب عشان يهرب من العقوبة.

🔹 الخيال الواسع
في سن معين، الأطفال بيخلطوا بين الواقع والخيال، فممكن يحكوا قصص غريبة وهم مش واعيين إنهم بيكدبوا فعلًا.

🔹 عايز يلفت الانتباه
أحيانًا الكذب بيكون طريقة الطفل عشان ياخد اهتمام أكبر، خصوصًا لو بيحس إن حد تاني في البيت واخد كل الاهتمام.

🔹بيقلد الكبار
لو شافك بتكدبي "كذبة بيضا" أو بتتحايلي في موقف، ممكن يقلدك من غير ما يفهم إن ده غلط.

🔹 عايز حاجة معينة
زي لما يقول "ماما، المدرّسة قالت لازم نجيب شوكولاتة" وهو بيكون بس نفسه فيها 😅

🎯 نعمل إيه بقى؟

* ما تعصبيش عليه فورًا، حاولي تفهمي هو كدب ليه.
* امدحيه لما يقول الصراحة حتى لو غلط.
* كوني قدوة ليه ودايمًا خليكِ صادقة.
* قللي من التهديد والعقاب القاسي.

👂الأطفال ساعات بيكدبوا لأنهم مش لاقيين طريقة تانية يعبروا بيها عن نفسهم. ساعدي ابنك يفهم إن الصدق مش حاجة يخاف منها، بالعكس.. دي شجاعة!
رد فعلك مع ابنك أو بنتك هو الي هيحدد هل انتي شخص أهل للثقة وانه يقولك الحقيقة ولا لا؟ عشان كده لازم نحاول نخلي ردود أفعالنا تتناسب مع الفعل نفسه.. ماينفعش أدي رد فعل أكبر بكتير من الخطأ نفسه.. أو العقاب يكون أكبر مما يستاهل

17/06/2025

في حملة شغالة دلوقتي في بعض المحافظات اسمها من بدري امان
فيها تطعيم للبنات ضد الفيروس الحليمي البشري بداية من سن 9 ل 15 سنة

التطعيمات مش رفاهية… دي خط دفاع أول عن صحتك وصحة اللي بتحبهم!

تطعيم بسيط ممكن يحيمك من أمراض خطيرة ويطمنك على مستقبلك، خصوصًا لما يكون في وقت مناسب وبدون أي تكلفة!

الحملة موجودة حاليا في خمس محافظات
الشرقية
الغربية
الدقهلية
المنوفية
كفر الشيخ
وان شاء الله يتنقل بعدها لباقي المحافظات

📌 الحملة بتقدم مجانًا:
🔹 كشف مبكر على أورام (الثدي – عنق الرحم – الرئة – القولون – البروستاتا)
🔹 تطعيم ضد فيروس HPV للبنات من سن 9 لـ 15 سنة
🔹 فحوصات شاملة – أشعة – مناظير – علاج
🔹 توعية للفحص الذاتي ومتابعة مستمرة

لتطعيم ده مهم جدا وكويس اوي انه بقى متاح 🌷🌷

05/06/2025

اللهم في يوم عرفة
ارحم اخواننا المستضعفين في كل مكان في مشارق الأرض ومغاربها
رب ارفع عن أهل غ..ز..ة البلاء.. وامن روعهم.. واجبر كسرهم واشف مرضاهم
اللهم ارزقهم الامن والامان والنصر القريب
اللهم من لهم عونا وسندا..وأغثهم بغوثك يا ارحم الراحمين

23/05/2025

على مدار سنوات عملي كطبيبة أطفال الي تقترب من 15 سنة.. ما شفتش عدد حالات الهيربس بشكل عنيف زي الأيام دي.. حالات كتير جدا وبتتطور بسرعة لقرح والتهابات ف الفم كله لدرجة أن الطفل ممكن يحتاج حجز في المستشفى بسببها لأنه مش قادر يبلع حتى ولا ياكل ويشرب ونضطر نعتمد على التغذية الوريدية 🥲🥲
يعني الشكل البسيط الي في الصورة ده ماشفتوش مؤخرًا خالص تقريبًا

معظم الأمهات عندها علم عن فيروس الهيربس البسيط وطرق انتقاله، بس للاسف ساعات كتير العلم ده مش بيكون كافي ان نحمي ولادنا منه خاصة لما الأطراف الأخرى ماتحترمش خوف الأم على ولادها مثلا ويصمموا يشيلوا الطفل او يبوسوه 🥹🥹

وللتنبيه خلينا نفتكر سوا تاني طرق انتقال العدوى
العدوى سهلة جدًا وبتنتقل عن طريق:
🔸 التقبيل، خصوصًا من الكبار اللي عندهم العدوى حتى لو مش باينة
🔸 مشاركة أدوات الأكل أو المناشف
🔸 لمس قرح أو لعاب الشخص المصاب وده ممكن يحصل بدون قصد في الأطفال خاصة لو بيتشاركوا اللعب أو أدوات الأكل

🛡️ إزاي تحمي طفلك؟
✅ امنعي أي حد عنده حرارة أو قرح من إنه يبوس الطفل
✅ متخليش أطفالك يشاركوا أدواتهم الشخصية مع حد
✅ اغسلي إيديهم باستمرار، وخصوصًا قبل الأكل وبعد اللعب
✅ راقبي ظهور أي تقرحات على الفم أو الشفايف وخدي استشارة طبيب الأطفال فورًا

❗معلومة مهمة: الهيربس زي أي فيروس علاجه بيكون مضاد للفيروسات مش مضاد حيوي.. فبلاش تستعجلي وتدي الطفل مضاد حيوي من نفسك يقلل مناعته أكتر
❗معلومة مهمة تانية: الهيربس فيروس بيظل كامن في الجسم وممكن ينشط تاني في فترات الضعف المناعي أو الإرهاق.

خلي بالك علشان طفلِك يكون في أمان 💙
#توعية

23/05/2025

رب اجعلني مقيم الصلاة ومن ذريتي ربنا وتقبل دعاء
اللهم صل وسلم وبارك على سيدنا ونبينا محمد وعلى آله وصحبه أجمعين

16/05/2025

حد جرب حل للمشكلة دي ونجح؟؟

16/05/2025

بعد ما خلصنا كل فقرات تضييع الوقت الي ممكن تحصل.. وفطرنا وشربنا وحلينا ولعبنا وعملنا كل حاجة..
كارمن قعدت على اللابتوب حوالي ساعة كده قلت الحمد لله اللهم بارك هنذاكر بقى وهتزهزه معانا
شوية لقيتها داخلة عليا بالشيء الي ف الصورة ده
ايه ده ياحبيبتي؟ قالتلي افتحيها...
قعدت افتحها هي عبارة عن ورقة كبيرة متطبقة تطبيقات ورا تطبيقات كده كذا دور لحد ما اتفردت تماما وكاتبة لي فيها كلمتين حلوين ف الأخر والورقة كلها وش وضهر عليها رسومات وقلوب
ماحنا فاضيين بقى😏
طب ياربي اشكرها على اللفتة الجميلة دي؟ ولا اقوم اجيبها من شعرها على وقت المذاكرة الي بيضيع وتبًا للتربية الإيجابية والسلبية ولا اعمل ايه بالظبط!
الوحي لازم ينزل واحنا بنذاكر طبعا.. معروف ان الامتحانات بتف..جر الإبداع في عروق الطلبة.. وبتف...جر عروق أهاليهم أصلا

14/05/2025

نقول تاني وتالت ورابع
Early use of drugs >> supress formation of antibodies >> decrease natural defence >> relapse of the disease
معناه ايه الكلام ده؟ ان مفيش حاجة اسمها الحق ادي ابني الدوا قبل ما التعب يبان عليه.. لازم ادي جسمه فرصة يتعرف على المرض ويحاول يقاومه ويبقى عنده مناعة.. لكن الاستسهال والاستعجال هيخليه عرضة اكتر للمرض..
اللكلام للامهات والأطباء والصيادلة ولكل من يهمه الامر 👍👍👍

13/05/2025

بيدهشني كل مرة أن الأم تبقى راحت الصيدلية مرة واتنين وتلاتة وجربت مع ابنها علاج واتنين وتلاتة وبعد أسبوع واكتر ومفيش استجابة تفكر بقى تيجي تكشف بعد ما يبقى الدور اتطور واتدهور
مع ان المستشفى تجنن وبسمسم يعني.. والمراكز الصحية في كل مكان والتذاكر مش غالية.. طب خلي حد متخصص يشوفه طيب؟ طب اي حاجة؟

11/05/2025

ابني دخل في نوبة غضب؟ أعمل إيه؟!

كلنا مرّينا بلحظة الطفل اللي بيصرخ في نص السوبر ماركت علشان عايز بسكوت 😅
بس الحقيقة إن نوبات الغضب دي مش عناد... دي طريقة الطفل يقول بيها "أنا مش فاهم أنا حاسس بإيه!"

🧠 الحل؟
✅ خليكِ هادية... متدخليش معاه في معركة صريخ
✅ طبطبي على مشاعره من غير ما تستسلمي لطلبه
✅ لما يهدا، علميه يعبر بالكلام مش بالصريخ
✅ ولو تصرف بهدوء في موقف تاني، شجعيه وقولي له "أنا فخورة بيك"

⛔ امتى أستشير متخخص؟
لو النوبات دي عنيفة أو مش بتقل مع الوقت
لو الطفل عدى سن السبع سنين ولسه بتحصل
لو ممكن يؤذي نفسه فيها أو غيره أو يتسبب في ضرر كبير زي أنه يو.لع ف حاجة أو يتعمد ينتقم من حد
في الحالات دي ممكن نحتاج نستشير متخصص

💡 افتكري:
كل مرة ابنك بيغضب... هي فرصة يتعلم يهدى
وكل مرة إنتي بتهدي... هي فرصة يتعلم منك ❤️

10/05/2025