04/02/2026
"اعاده تمثيل الصدمه"
الشخص اللي اتربى في بيت كان الحب فيه مشروط
يعنى لازم يتعب ويضحي ويعمل مجهود جبار عشان ياخد كلمه حلوه او نظره رضا بيكبر وهو مبرمج عاطفيا على نمط معين
زى مثلا شخص عاش طفوله مع اهل متاحين بالقطاره او اهل عندهم جفاف عاطفى
فاتبرمج عقله ان الحب هو المعافره
وان الشخص اللى بيرفضنا او بيتعبنا هو ده اللى قيمته عاليه ولازم نكسب رضاه
والنتيجه فى العلاقات لما بيكبر بينجذب بالمغناطيس للشخص البارد عاطفيا او الشخص اللى مش متاح او اللى بيعامله بإهمال
ليه⁉️
لان ده الجو اللى هو عارفه وحافظه الحب الهادى المستقر بيحسه ممل او مش حقيقى
لانه متعلمش ان الحب ممكن يكون سهل ومن غير وجع قلب
احنا مش بنختار اللى شبهنا احنا غالبا بنختار اللى شبه وجعنا القديم فى محاوله من عقلنا انه يصلح الماضى فى الشخص الجديد بس الحقيقه اننا احيانا بنعيد وجع نفسنا تانى
لكن مش كل واحد مر بجفاف عاطفى هيطلع يدور على علاقات سامه فيه ناس بوعيها وتجاربها بتقدر تكسر الدايره دى وتختار شريك حنين يعوضها
📌واخيرا
الاستعداد النفسى ومستوى الوعى بالذات ومدى قدره الشخص على انه يتشافى من جروح طفولته هى اللى بتحدد هل هيفضل يكرر النمط ولا هيتعلم يحب نفسه كفايه عشان يرفض اى حد مش بيقدر قيمته
