SOS - الإسعافات الأولية

28/09/2024

يوم ٢٨ سبتمبر هو اليوم العالمي لداء الكلب ودا بيوافق ذكرى وفاة العالم لويس باستور الذي له الفضل بابتكار أول لقاح ضد المرض.

لُعاب الحيوانات المصابة بالمرض زي الكلب والقطة وغيرهم من الحيوانات اللي ممكن تعض وتخربش بيبقى موجود فيه ڤيروس بيتنقل عن طريق الجهاز العصبي وبيؤدي في الآخر بعد أعراض كتيير وصعبة إلى الوفاة!
وللأسف ملهوش علاج! بس موجود اللقاح إللي هيحميك إن شاء الله لو تعرضت للڤيروس.

في حالة تعرضك لا قدر الله ل(عض- خربشة) من أي حيوان (كلب - قطة - فار - ثعلب -... إلخ)
لازم تعمل الآتي:

- لو الجرح كبير وفيه نزيف شديد: وقف النزيف فورًا عن طريق الضغط المباشر بشاش معقم أو قماشة نضيفة.

- لو الجرح سطحي ومفيش نزيف شديد: اغسل الجرح كويس جدًا بمياه غزيرة وصابون.

- لازم تتوجه بأسرع وقت ممكن للوحدة الصحية أو المركز الطبي أو المستشفى المتوافر فيها اللقاح.

- تأكد من إنك تاخد الجرعة كاملة سواء حقنه واحدة أو أكتر من حقنه (5 حقن - ودا إللي موجود في المستشفيات والوحدات الصحية) في المواعيد المحددة ليك، وكمان ممكن تاخد تطعيم التيتانوس.

التطعيم بتاع الكلب مش بس لعضة الكلب..
دا لعضة أو لخربشة الكلب أو القطة أو أي حيوان بيعض وبيخربش.. حتى لو متربي في البيت.

التطعيم بينقذ حياة إنسان لإنه هو الحل الوحيد.. لإن للأسف لو الإنسان اتصاب بالسعار ملوش علاج وهيموت.

Dr. Alaa Makram Kharoub - د. علاء مكرم خروب

23/09/2024

سؤال شاغل ناس كتير..
دي كوليرا؟ ولا بكتريا معينه؟ ولا تسرب فضلات مصانع ولا ولا ولا؟!
حتى الآن مفيش تأكيد لحاجة معينة..
ولكن الأكيد إن الأعراض الظاهرة هي الإسهال والترجيع..

في حالة لا قدر الله حدوث إسهال مشكلته الكبيرة بتكون في فقدان كمية كبيرة من السوائل والأملاح وده بيؤدي إلى الجفاف إللي ممكن يؤدي للوفاة.

لذلك في حالة حدوث أي إسهال - حتى في الحالات العادية في أي يوم عادي مش شرط يكون ليه علاقة باللي حصل في أسوان -
لازم يتم تعويض الشخص بالسوائل والأملاح عن طريق الآتي:

- شرب كميات كبيرة من المياه النظيفة سواء المعدنية أو في حالة الشك في نظافة المياه بنغليها ونستنى تبرد وبعدين نستخدمها.

- استخدام محلول معالجة الجفاف(موجود في الصيدلية).. ودا بنستخدمه كوقاية من الجفاف مش بس لعلاجه.. يعني بمجرد حدوث الإسهال نستخدمه..
بيتم تفريغ محتويات الكيس على كباية مياه نظيفة (٢٠٠مل) وشربه عن طريق رشفات (واحدة واحدة بق بق) علشان ما يحصلش قئ.. ويمكن استخدامه في أي عمر من الأعمار المختلفة (رضع، أطفال، بالغين).

- الأكل الصحي المتوازن المحتوي على جميع العناصر الغذائية والغني بالأملاح والمعادن.

- لو المصاب رضيع بننصح الأم إنها تكتر من معدل رضاعته الطبيعية وتديله كميات أكبر.

- تجنب السكريات سواء العصائر المحتوية على سكر أو الحلوى لإنها بتزود الإسهال.

- في حالة ظهور أي علامات أو أعراض غريبة لازم استشارة الطبيب فورًا (سخونية - ترجيع - علامات جفاف - تغير في درجة الوعي - دم في البراز،... إلخ) أو إذا استمر الإسهال أكتر من يوم.

في حالة عدم توافر محلول معالجة الجفاف(ودا وارد من ذعر الناس يشتروه بكميات كبيرة) يمكن تحضيره في البيت:

١ لتر مياه نظيفة + نصف ملعقة صغيرة من الملح + ٦ ملاعق صغيرة من السكر.

بالإجراءات دي وبالتعويض بالسوائل والأملاح بإذن الله نقدر نحمي نفسنا من خطر الجفاف سواء بسبب إسهال عادي أو حتى لا قدر الله كان وباء كبير نقدر نتجنب مشاكل كبيرة قد تصل للوفاة.

ربنا يحفظ أهلنا في أسوان وفي كل مكان.

Dr. Alaa Makram Kharoub - د. علاء مكرم خروب

12/07/2024

للأسف قرأنا الفترة إللي فاتت أكتر من خبر وفاة شخص بسبب تكييف العربية! وقالوا إن سبب الوفاة هو أول أكسيد الكربون
إيه الحكاية بالظبط؟!

أولاً، خلينا نفهم يعني إيه أول أكسيد الكربون. هو غاز مالوش لون ولا ريحة، وبيتكون من احتراق حاجات كتير قوي زي الفحم وغيره ومنها لما البنزين أو الديزل يتحرق في المحركات، زي موتورات العربيات.

المشكلة بقا إن الغاز ده سام جدًا ولو اتنفسناه بكميات كبيرة، بيعمل مشاكل كبيرة للجسم، ممكن توصل للوفاة.

طب ودا علاقته إيه بموضوع تكييف العربية؟!
لما العربية بتبقى مش شغالة، لكن الموتور شغال عشان التكييف، ممكن يتكون غاز أول أكسيد الكربون من العادم. المشكلة بتحصل أكتر لو العربية مركونة في مكان مقفول زي جراج، أو حتى في الشارع ومفيش تهوية كويسة حواليها. الغاز ده ممكن يطلع من العادم ويتسرب جوا العربية من الفتحات أو الشباك أو حتى التكييف نفسه.

طب نعمل إيه عشان نتجنب المشكلة دي؟!
أول حاجة وأهم حاجة، بلاش تشغل العربية أو تسيبها شغالة في مكان مقفول لفترة طويلة.
دايماً حاول تكون في مكان فيه تهوية كويسة.
لو حسيت بأي أعراض زي دوخة، غثيان، صداع فجأة، افتح الشبابيك بسرعة واخرج من العربية فوراً.

فيه كمان بعض النصايح اللي لازم ناخد بالنا منها:

تفحص العربية بانتظام، خصوصاً نظام العادم، واتأكد إنه مفيهوش أي تسريب.
متقفش في أماكن ضيقة ومقفولة كتير، واتجنب إنها تفضل شغالة لفترات طويلة وأنت مش بتحركها.

طب لو حصل إن حد اتعرض للتسمم، تعمل إيه؟!
أول حاجة، لازم تجيب الشخص ده في مكان فيه هواء نقي، وافتح الشبابيك والأبواب لو كنت في مكان مقفول.

اتصل بالإسعاف فوراً ومتستناش.

لو الشخص مش واعي ومفيش نبض أو تنفس، لازم تبدأ عملية إنعاش القلب والرئتين لحد ما الإسعاف توصل.

باختصار، الوقاية خير من العلاج. خلي بالك من مكان وقوف العربية، ونظام العادم(صيانة العربية) ، واستخدم التكييف بشكل آمن، والأهم متعرضش نفسك للخطر بتشغيل العربية في أماكن مقفولة. حافظ على سلامتك وسلامة اللي حواليك.

Dr. Alaa Makram Kharoub - د. علاء مكرم خروب

15/06/2024

عيد مبارك.. كل عام وانتم بخير 💜

16/04/2024

الأيام الجاية الشمس مستحلفالك 🔥😢

شوية حاجات تاخد بالك منها في الحرارة العالية علشان ميحصلكش إنهاك أو إجهاد حراري:

- تجنب التعرض المباشر للشمس خصوصًا من الساعه ١١ للساعة ٣.
- إلبس هدوم لونها فاتح وتكون قطن.
- استخدم الكاب أو الشمسية لو هتمشي في الشمس.
- حافظ على مستوى السوائل في جسمك عن طريق إنك تشرب مياه كتير على مدار اليوم أو أي مشروبات تانيه.
- لو هتفقد عرق كتير سواء بسبب الحركة أو لو طبيعة شغلك إنك بتعرق كتير.. استخدم محلول معالجة الجفاف وضيفه على المياه أو العصير واشرب منه علشان تعوض فقدان السوائل والأملاح.
- حاول كل ما يتوفر دا إنك تبرد جسمك ودماغك عن طريق دش مياه فاترة أو عن طريق غسيل الوش والرأس.
- المياه ثم المياه ثم المياه خصوصا للأطفال ولكبار السن.

طيب لو لا قدر الله حسيت بتعب وبإنهاك بسبب الحرارة، ودي بتكون آعراضها صداع ودوخة وعدم تركيز وشعور بالإغماء وعرق شديد وارتفاع بسيط في درجة الحراة.

الأمر بسيط:
- ننقل المصاب لمكان بارد والتهوية فيه كويسة ونفك الحاجات الضيقة حوالين رقبته.
- ندي المصاب سوائل باردة ونديله محلول معالجة الجفاف.
- نخليه يبرد جسمه عن طريق دش مياه فاترة.

لكن خد بالك!

ممكن تحصل إصابة خطيرة جدًا بسبب التعرض للشمس وهي الصدمة الحرارية أو المعروفة ب"ضربة الشمس"..
ودي أهم ما يميزها إن المصاب بتكون درجة حرارته مرتفعة جدًا ومفيش أي عرق خالص في جسمه ودرجة وعيه وإدراكه بيتغيروا.

الإصابة دي خطيرة جدًا وبتؤدي للوفاة لو ما اتصرفناش معاه بسرعة..

التصرف الصح معاه إننا:
- نتصل بالإسعاف على رقم ١٢٣ وننقله المستشفى بأسرع وقت.
- نشيل الملابس من على جسمه ونعرضه للهواء البارد سواء من مروحة أو تكييف.
- ياخد دش مياه باردة علشان تخفض درجة حرارته.
- نعمله كمادات مياه مثلجة أثناء نقله للمستشفى وأماكن الكمادات: حوالين الرقبة وتحت الإبطين وأعلى الفخدين.

في درجة الحرارة العالية دايمًا الوقاية خير من العلاج.. شرب المياه مهم جدًا جدًا جدًا.

د. علاء مكرم خروب

شوف أول كومنت 🆘

06/04/2024

ستات البيوت رافعين حالة الطوارئ القصوى اليومين دول ما بين الكحك والبسكويت وما بين تنضيفة العيد..
وانت قاعد طول النهار سامع صوت تنفيض السجاد وحاجة آخر صداع..

المهم ست البيت علشان تنضف تحت رجل الكرسي في الأوضه المقفولة إللي محدش بيدخلها أساسًا بس لازم ننضف طبعًا البلاطه المستخبية دي علشان محدش يقول علينا حاجة..
نزلت ست الكل عملت شوبينج من عند بتاع المنظفات إشي كلور وفلاش وبريل وكل ما لذ وطاب من المطهرات والمعقمات..

ست الكل جابت أكبر جردل عندها وجات تعمل الخلطة الحرية بتاعتها وحطت كلور على فلاش على ديتول وهوب لقت فيه بقاليل كده بتحصل ويطلع منها بخار شمته مقدرتش تاخد نفسها وهاتك يا كحة وكان يوم ما يعلم بيه إلا ربنا..

يخربيتك.. هتمومتي يا سوسو..

يا ست الكل بعد إذنك ممنوع ممنوع ممنوع تخلطي مواد التنظيف مع بعضها خصوصا الكلور والفلاش.. علشان بيتفاعلوا وبيطلع منهم غازات سامة زي غاز الكلور ودا بيسبب تهيج وانسداد في الجهاز التنفسي..

استخدمي كل حاجه لوحدها.. وخلي المكان اللي هتنضفيه التهوية فيه كويسة..

أنا عارف إن انتي مش هتعملي كده خلاص بعد ما عرفتي..
بس جارتك الولية أم سعيد إللي عنيها مدورة ووحشه مش عارفه الكلام ده فلو لا قدر الله لقتيها بتصوت وحصلها كده..
بسرعة خليها تطلع في مكان التهوية فيه كويسة.. وتغسل وشها وعنيها ومناخيرها وفمها بمياه جارية..
وتكلم مركز السموم أو تتجه بسرعة لأقرب مستشفى علشان يعملوا معاها اللازم..

الموضوع لو تطور واغمى عليها أو حصلها اختناق شديد كلمي الإسعاف على طول على رقم ١٢٣

وكل عيد وانتم بخير.

Dr. Alaa Makram Kharoub - د. علاء مكرم خروب

20/03/2024

-السلام عليكم يا دكتور علاء..
=وعليكم السلام يا زينبو..

-دلوقتي أنا بنتي وقع على إيديها ميا مغلية.
=بركة يا بت علشان تسيبيها تلعب في المطبخ بعد كده.

-المهم بقا ايه عمتها بهانة قالتلي أحطلها زيت أكل..
=اه

-وبعدين يا دكتور لقيت معجون سنان فحطيته..
=اه

-وبيض ودقيق.
=هي صانية كيكة يا بت؟

-السؤال بقا يا دكتور.. هو الحرق دا هيسيب أثر؟ ولا اللي أنا عملته دا غلط؟
=دا مش غلط وبس دا غلطين تلاته دا أربع غلطات
دا هبد يا بت.. إنتي فيه حد مسلطك عليا؟

-=علشان تعرف التعامل الصح مع الحروق.. شوف الفيديو ده:
https://youtu.be/hGCKj2yKGmA
ومتنشاش تعمل شير 🤓

20/03/2024

بما إن لسه جايلي مكالمه منه دلوقتي.. فحابب أعرفكم على الأبلكيشن الجميل ده Be My Eyes.
فكرة الأبلكيشن إنك تقدر تساعد الشخص الكفيف أو ضعيف البصر في حاجات بسيطة هو محتاج المساعدة فيها..
بتسجل بياناتك وتختار اللغة وبس..
وقت ما حد هيكون محتاج مساعدة هيجيلك اشعار زي مكالمه كده بترد عليها هتلاقي مكالمه ڤيديو مع الشخص الكفيف ده بيسألك على حاجة..
على إن فئة الفلوس إللي في ايده دي كام مثلا؟
تاريخ انتهاء أكل معين أو دوا..
يافطه معينة يسألك مكتوب عليها إيه؟
وهكذا..

مساعدة بسيطة وبتفرق.

10/03/2024

كل عام وأنتم بخير.. رمضان مبارك 💜
لا تنسونا من صالح دعائكم يا كِرام 💜

04/10/2023

حاجة مهمة ممكن تكون حصلتلك قبل كده أو علي الأقل شفت حد حصله كده هنتكلم عليها وهي نزيف الأنف..
ربنا يحمينا و يحميك وانت قاعد كده لقيت مناخيرك بتنزل دم !

- طب أيه دا بقا و أتصرف معاه إزاي؟!
= بص يا سيدي.. الأنف موجودة في مكان مليان بالأوعية و الشعيرات الدموية وفي مكان حساس من الجسم و ضعيف تمام فأي حاجة بسيطة ممكن تأثر علي الشعيرات الدموية و تنفجر و تعمل نزيف الأنف😉 حتي لو خبطة صغيرة أو حتى ممكن يحصل تلقائي 😢

- طيب بيحصل أمته الكلام ده؟
= بيحصي يا سيدي لما الأغشية المبطنه للأنف بتجف وبتكون الشعيرات الدموية معرضه للنزيف مفيش حاجة بتحميها 😰

- أيوه ليه يعني الشعيرات بيحصلها كده ؟
= الكلام ده بيحصل لما الأنف يحصله جفاف شديد بسبب الجو البرد الشديد وكمان ممكن يحصل بسبب الجو الحر الشديد وكمان فيه أسباب تانيه بس أقل شيوعاً وهي إرتفاع الضغط و تناول الأدوية اللي بتقلل تجلط الدم أو بتعمل سيولة بمعني أصح.

- طيب النزيف ده خطير يعني؟ 😒
= الموضوع مش خطير لو إتعاملت معاه صح وهقولك دلوقتي إزاي و الموضوع مش خطير لو حصل مرة كده علي الماشي بسبب الساقعه أو الحر لكن لو أتكرر بشكل كبير و ملحوظ لازم استشارة طبيب مختص.

- أعمل أيه بقا لو لا قدر الله حصلي نزيف في الأنف؟
= بص يا سيدي هتقعد و هنتحني لقدام حاجة بسيطه علشان الدم مينزلش في الحلق ويدخل المعدة وبعدين تضغط بصباعك الإبهام و السبابه علي مناخيرك عند أرنبة الأنف اللي هي الجزء اللحم اللي تحت العضم بحيث تقفلها لمدة 10 دقايق وهتتنفس من خلال الفم زي ما موجود في الصورة كده و حاول متتكلمش ولا تخلي فيه ضغط في الأنف ولما النزيف يقف حاول أستخدام محلول الملح علشان ترطب بيه الأنف بس متحاولش تنضف الأنف بعنف بعد النزيف علي طول 😉
وممكن تستخدم قطعة تلج وتلفها في قماشة وتحطها على الأنف..

لو لا قدر الله النزيف إستمر لازم تروح لأقرب مستشفى أو دكتور 😞😞
وزي ما قلنا قبل كده دا بالنسبة للنزيف اللي بيحصل مرة كده علي الماشي مش المتكرر فلو الموضوع إتكرر لازم إستشارة الطبيب علشان تعرف السبب و تعالجه صح 😉

متنساش تعمل شير ولايك للصفحة..
وتشوف كورس الإسعافات الأولية SOS على اليوتيوب
واللي هتلاقي الرابط بتاعه في أول كومنت✌️

01/10/2023

28/09/2023

يوم ٢٨ سبتمبر هو اليوم العالمي لداء الكلب ودا بيوافق ذكرى وفاة العالم لويس باستور الذي له الفضل بابتكار أول لقاح ضد المرض.

لُعاب الحيوانات المصابة بالمرض زي الكلب والقطة وغيرهم من الحيوانات اللي ممكن تعض وتخربش بيبقى موجود فيه ڤيروس بيتنقل عن طريق الجهاز العصبي وبيؤدي في الآخر بعد أعراض كتيير وصعبة إلى الوفاة!
وللأسف ملهوش علاج! بس موجود اللقاح إللي هيحميك إن شاء الله لو تعرضت للڤيروس.

في حالة تعرضك لا قدر الله ل(عض- خربشة) من أي حيوان (كلب - قطة - فار - ثعلب -... إلخ)
لازم تعمل الآتي:

- لو الجرح كبير وفيه نزيف شديد: وقف النزيف فورًا عن طريق الضغط المباشر بشاش معقم أو قماشة نضيفة.

- لو الجرح سطحي ومفيش نزيف شديد: اغسل الجرح كويس جدًا بمياه غزيرة وصابون.

- لازم تتوجه بأسرع وقت ممكن للوحدة الصحية أو المركز الطبي أو المستشفى المتوافر فيها اللقاح.

- تأكد من إنك تاخد الجرعة كاملة سواء حقنه واحدة أو أكتر من حقنه في المواعيد المحددة ليك، وكمان هتاخد تطعيم التيتانوس.

التطعيم بتاع الكلب مش بس لعضة الكلب..
دا لعضة أو لخربشة الكلب أو القطة أو أي حيوان بيعض وبيخربش.. حتى لو متربي في البيت.

التطعيم بينقذ حياة إنسان لإنه هو الحل الوحيد.. لإن للأسف لو الإنسان اتصاب بالسعار ملوش علاج وهيموت.

د.علاء مكرم خروب

Alaa M. Kharoub